o le Keriso toetu ma Ona Aposetolo

Keriso ma le au Aposetolo, saunia e Del Parson

30 Mati–12 Aperila

Eseta

“O Le a Toetu o Ia … ma le Faamalologa i Ona Apaau”

Ao e faitau i mau o loo fautuaina atu ii ma totonu o le Sau, Mulimuli Mai ia te Au---Mo Tagata Taitoatasi ma Aiga, o le a fesoasoani le Agaga ia te oe e iloa le mea e taulai atu i ai e fesoasoani i tamaiti ia lagona le alofa o le Faaola i le Aso Sa o le Eseta.

Tusifaamaumau Ou Lagona Uunai

aikona o le fefaasoaai

Valaaulia le Fefaasoaai

Talanoa atu i tamaiti e uiga i mea e te faia e manatua ai le Faaola i le Eseta. Valaaulia i latou e faasoa mai mea latou te faia.

aikona o le aoao atu

Aoao atu le Aoaoga Faavae: Tamaiti Laiti

1 Nifae 11:27; Mosaea 3:5; 15:7; Helamana 14:16–17

Na iloa e perofeta o le Tusi a Mamona o le a afio mai Iesu Keriso.

O le aoaoina o mea na aoao mai e perofeta i le Tusi a Mamona e uiga i le misiona ma le auaunaga faalelalolagi a Iesu Keriso e mafai ona fesoasoani e faamalosia ai le faatuatua o tamaiti ia te Ia.

Gaoioiga e Mafai Ona Fai

• Faaali atu ata o le Faaola o papatisoina, faamaloloina o isi, faasatauroina, ma avea ma se tagata toetu (tagai i le itulau o gaoioiga o lenei vaiaso po o le Tusiata o le Talalelei, nu. 35, 41, 57, 59). Fai atu i tamaiti e faamatala atu ia te oe mea o lo o tutupu i ata taitasi. Faamalamalama atu i le tele o tausaga ao le i afio mai Iesu i le lalolagi, sa faaali mai e le Atua i perofeta i le Tusi a Mamona o le a Ia faia nei mea. Faitau 1 Nifae 11:27; Mosaea 3:5; 15:7; ma le Helamana 14:16–17, ma fesoasoani i tamaiti e faafetaui nei mau ma ata talafeagai.

• A o galulue tamaiti i le itulau o gaoioiga o lenei vaiaso, ia talanoa e uiga i perofeta o loo i le ata ma mea na latou aoaoina e uiga ia Iesu Keriso. Faasoa atu i tamaiti nisi o mea matagofie na faia e Iesu mo i tatou.

3 Nifae 11:1–17

Na toetu Iesu Keriso.

Aoao atu i tamaiti e faapea e le gata i tagata o e na vaai i le Faaola toetu i Ierusalema, e faitau afe na vaai ia te Ia ina ua afio mai o ia i le atu Amerika.

Gaoioiga e Mafai Ona Fai

• Faaali atu ata o le maliu o le Faaola ma le Toetu. Fesili i tamaiti pe o le a se mea latou te iloa e uiga i nei mea na tutupu. Pe a manaomia, faaaoga “Mataupu 53: Ua Faasatauroina Iesu” ma le “Mataupu 54: Ua Toetu Mai Iesu” (Tala o le Feagaiga Fou, 136–38, 139–44, po o vitio talafeagai i luga o le ChurchofJesusChrist.org) e faamatala atu ai i tamaiti nei tala.

• Faaaoga ata mai le Tusiata o le Talalelei po o le Sau, Mulimuli Mai ia te A’u---Mo Tagata Taitoatasi ma Aiga, tau atu i tamaiti le asiasiga a le Faaola toetu i le atu Amerika, e pei ona faamatalaina i le 3 Nifae 11:1--17. Toe faamatala le tala mo ni nai taimi, valaaulia tamaiti e fesoasoani ia te oe. Faamamafa auiliiliga e te lagona o le a aoga i tamaiti. Aemaise lava, ia faamamafa atu e ui lava ina maliu Iesu i luga o le satauro, ae e mafai e tagata ona iloa ua toetu o Ia. Tuu atu i tamaiti e auauai e toe faamatala le tala ia latou lava upu.

• Usu faatasi le “Easter Hossana” po o le fuaiupu mulimuli o le “Tala o le Tusi a Mamona” (Tusipese a Tamaiti, 68–69, 62). Valaaulia tamaiti e tusi ni ata o se mea o loo faamatalaina i le pese. Ona fai atu lea i tamaiti e faasoa mai a latou ata ma mea latou te manatu o lagona na maua i le i ai iina ina ua asiasi atu Iesu i Sa Nifae.

Mosaea 3:7; Alema 7:11–12

E silafia e Iesu Keriso le auala e faamafanafana ai aʻu.

Aua na mafatia Iesu Keriso “i tiga ma maʼi o ona tagata” (Alema 7:11), Na te silafia o tatou lagona, e tusa lava pe leai se tasi na te iloa.

Gaoioiga e Mafai Ona Fai

• Faitau atu i tamaiti ni nai laina muamua o le Mosaea 3:7, ma valaaulia i latou e faafoliga o latou lagonaina le “tiga … , fia ‘ai, fia inu, ma le lailoa [lelava].” Fai atu ia i latou e faasoa mai taimi na latou lagona ai nei mea. Ona taʻu atu lea i tamaiti o lenei fuaiupu o loo faamatalaina ai nisi o mea na lagona e Iesu Keriso ina ua puapuagatia o ia i le Faatoaga i Ketesemane. Ona o lenei, Na te silafia le ala e fesoasoani ai ia i tatou pe a tatou lagona nei mea.

• Faitau leotele le Alema 7:11, ma fesili atu i tamaiti pe latou te iloaina se tasi o ma’i po o tiga. Molimau atu na lagona e Iesu Keriso o tatou “tiga ma ma’i” ina ia mafai ai ona Ia malamalama pe faapefea ona faamafanafanaina i tatou (Alema 7:12).

aikona o le aoao atu

Aoao atu le Aoaoga Faavae: Tamaiti Matutua

2 Nifae 9:10–15; Alema 11:41–45; 40:21–23

Ona na toetu Iesu, o le a ou toetu foi.

O loo faamatala manino mai i le Tusi a Mamona le uiga o le toetu ma o ai o le a toetutu. E mafai faapefea ona e fesoasoani i tamaiti ia iloa nei upumoni?

Gaoioiga e Mafai Ona Fai

• Fai i tamaiti e tau mai ia te oe mea latou te iloa e uiga i le maliu ma le Toetu o Iesu Keriso. Tusi i luga o le laupapa fesili e pei O le a le uiga o le toetu? ma le O ai o le a toetutu? Fesoasoani i tamaiti e sue tali i totonu o le 2 Nifae 9:10–15; Alema 11:41–45; ma le Alema 40:21--23 ma faasoa atu i le vasega mea na latou maua.

• Faamatala i tamaiti e uiga i se tasi e te iloa ua oti. Fai atu ia i latou e faafoliga e te le iloa e uiga i le Toetu. E faapefea ona latou fesoasoani ia te oe ia e malamalama po o le a lena mea? Uunai i latou e faaaoga le 2 Nifae 9:10–15; Alema 11:41–45; po o le Alema 40:21–23 e aʻoaʻo ai oe e uiga i le toetū. Ia valaaulia foi i latou e tuuina atu a latou molimau i le Toetu o le Faaola o se vaega o a latou tali.

O Iesu o loo tatalo i le Faatoaga o Ketesemane

Ketesemane, saunia e Michael T. Malm

Enosa 1:2–8; Mosaea 27:8–24; Alema 13:11–12; 24:7–19

O le Togiola a Iesu Keriso e faamamaina ai a’u ma suia ai aʻu.

O le Tusi a Mamona o loo tuuina mai ai le tele o faataitaiga o tagata na suia ona o le Togiola a le Faaola. Mafaufau pe faapefea e nei aafiaga ona musuia tamaiti e salamo ma liliu atu i le Faaola.

Gaoioiga e Mafai Ona Fai

• Faaali atu i tamaiti se ofutino paepae mama ma se ofutino paepae palapala. Faitau faatasi le Alema 13:11--12. Na faapefea ona faamamaina tagata mai a latou agasala? Na faapefea e lenei mea ona aafia o latou lagona e faatatau i le agasala? Talanoa e uiga i ou lagona pe a e salamo ma maua le faamagaloga, ma tuuina atu lau molimau e uiga i le mana o le Faaola e faamama ai i tatou mai le agasala.

• Valaaulia tamaiti e filifili se tasi o tagata nei e aoao ai: Enosa (tagai Enosa 1:2--8), Alema le Itiiti (tagai Mosaea 27:8--24), po o Aneti-Nifae-Liae (tagai Alema 24:7--19). A o e faitauina faatasi le tala, valaaulia tamaiti e matau pe na faapefea ona suia lenei tagata po o le vaega ona o le Togiola a Iesu Keriso. E faapefea ona tatou mulimuli i faataitaiga a nei tagata?

Mosaea 3:7; 15:5; Alema 7:11

Na tauave e Iesu Keriso i Ona lava luga aʻu agasala, tiga, ma maʻi.

E faaopoopo atu i le mafatia mo a tatou agasala, sa puapuagatia foi le Faaola i o tatou tiga, maʻi, ma isi vaivaiga ina ia Ia silafia le ala e faamafanafana ai i tatou.

Gaoioiga e Mafai Ona Fai

• Tofi tamaiti taitoatasi e saili se tasi o fuaiupu nei e sue ai le mea na puapuagatia ai Iesu Keriso: Mosaea 3:7; Mosaea 15:5; po o le Alema 7:11. Valaaulia i latou e lisi i luga o le laupapa mea na latou mauaina ma mafaufau i taimi na latou lagonaina ai nisi o nei mea. E tusa ai ma le Alema 7:12, aisea na puapuagatia ai Iesu i nei mea uma? Aisea e taua ai le iloa na puapuagatia o Ia i nei mea mo i tatou?

• Usu faatasi se pese e faatatau i le Faaola, e pei o le “Ua Ou Iloa Lo‘u Fa‘aola” (Viiga, nu. 73). Valaaulia tamaiti e suesue i le viiga mo fasifuaitau o loo faamatalaina ai pe faapefea ona faamafanafanaina i tatou e le Faaola, ma talanoa e uiga i le mafuaaga e aoga ai nei fasifuaitau ia i latou. Faasoa atu ou lagona e uiga ia Iesu Keriso, ma valaaulia tamaiti e faasoa mai o latou lagona.

aikona o le aoaoina

Fautuaina le Aoaoina i le Aiga

Valaaulia tamaiti e saili se tasi i lenei vaiaso e manaomia le faamafanafanaga. Uunaia i latou e faasoa atu i lenei tagata mea na latou aoaoina e uiga i le aveina e le Faaola i luga o Ia lava o o tatou tiga ina ia mafai ona Ia faamafanafanaina i tatou.

Faaleleia o Lo Tatou Aoao Atu

Valaaulia le Fefaasoaai. Fesili i tamaiti e uiga i o latou mafaufauga, lagona, ma aafiaga. O le a e iloaina e tele lava ina faigofie ae maoae o latou manatu.

itulau o gaoioiga: Na molimau mai perofeta o le Tusi a Mamona ia Iesu Keriso