Keriso ma le Au Aposetolo, saunia e Del Parson

30 Mati–12 Aperila

Eseta

“O Le a Toe Tu Mai o Ia … ma le Faamalologa i Ona Apaau”

I le taimi o aso e tau atu i le Aso Sa o le Eseta, mafaufau e taulai atu au suesuega faaletagata lava ia ma faaleaiga i le molimau mamana a le Tusi a Mamona i le soifuaga, maliu, Toetu ma le mana togiola o Iesu Keriso.

Tusifaamaumau Ou Lagona Uunai

Sa totoa ia Aposetolo anamua ia latou molimau e uiga ia Iesu Keriso ma Lona Toetu. E faitau miliona ua talitonu ia Iesu Keriso ma ua taumafai e mulimuli ia te Ia ona o a latou upu o loo tusia i le Tusi Paia. Ae atonu o taumanatunatu nisi, pe afai o Iesu Keriso o le Faaola o le lalolagi uma, pe aisea la na faatuaoia ai Ana molimau vaaitino i na o ni tagata toalaiti i se itulagi laitiiti se tasi?

O le Tusi a Mamona ua tu atu o se molimau faaopoopo, faatalitonuina e faapea o Iesu Keriso o le Faaola o le lalolagi, “ua faaailia mai o ia lava i atunuu uma” (itulau faaulutala o le Tusi a Mamona) ma o loo ofoina atu le olataga ia i latou uma o e o mai ia te Ia. E le gata i lea, o lea molimau lona lua o loo faamanino maia foi le uiga o le faaolataga. O le pogai lea na galulue ai “ma le filiga [ia perofeta uma i le vaneina o nei upu i luga o papatusi”—ina ia ta’utino atu ai i tupulaga o le lumanai e faapea o i latou foi “sa iloaina Keriso, ma … ua i ai se faamoemoe i lona mamalu” (Iakopo 4:3–4). O le vaitau o lenei Eseta, manatunatu i molimau o i le Tusi a Mamona e faapea o le mana o le Togiola a Keriso e atulaulau ma e patino foi—e togiolaina ai le lalolagi uma ma togiolaina ai foi oe.

Manatu mo Suesuega Faaletagata Lava Ia o Tusitusiga Paia

2 Nifae 9:6–15, 22; Alema 11:41–45; 40:21–23; 3 Nifae 26:4–5

Ona o le Toetu o Iesu Kerisoo, o le a toetutu ai ia tagata uma.

O se tu masani i le Eseta le mafaufau loloto i le Toetu o Iesu Keriso, ae o le a tonu lava le uiga o le toetu mai? O a malamalamaaga ua ofo mai e le Tusi a Mamona e uiga i le toetu? Atonu e avea o se vaega o lau faamamaluga o le Eseta e mafai ona e faia se lisi o upumoni e uiga i le toetu e te maua i le 2 Nifae 9:6–15, 22; Alema 11:41–45; 40:21–23; ma le 3 Nifae 26:4–5. E mafai foi ona e tusifaamaumauina le pogai e te manatu ai e taua le iloaina o nei upumoni taitasi.

E te ono matauina foi o upumoni e uiga i le Toetu e tele ina aoao mai faatasi ma upumoni e uiga i le Faamasinoga Mulimuli. Mafaufau po o le a le mea o aoao atu ai ia te oe e uiga i le taua o le Toetu i le ata o le faaolataga.

Tagai foi Luka 24:36–43; Galuega 24:15; 1 Korinito 15:12–23.

Mosaea 3:7; 15:5–9; Alema 7:11–13

Na tauave e Iesu Keriso i Ona lava luga a’u agasala ma o’u tiga, ma o’u vaivaiga.

O loo aoao manino mai e le Tusi Paia e faapea na togiolaina e Iesu Keriso a tatou agasala. Peitai, o le Tusi a Mamona ua faalauteleina lo tatou malamalama i le taulaga ma puapuaga o Keriso i ni ala e taua. E mafai ona e mauaina nisi o nei aoaoga i le Mosaea 3:7; 15:5–9; ma le Alema 7:11–13.. A uma ona e faitauina nei fuaitau, mafaufau e tusifaamaumau mea e te mauaina i se siata faapea:

O le a le mea na puapuagatia ai le Faaola?	Aisea na puapuagatia ai o Ia?	O le a le uiga o lenei mea ia te a’u?
O le a le mea na puapuagatia ai le Faaola?	Aisea na puapuagatia ai o Ia?	O le a le uiga o lenei mea ia te a’u?

Tagai foi Isaia 53; Eperu 4:14–16.

Ketesemane, saunia e Michael T. Malm

Mosaea 5:1–2; 27:8–28; Alema 15:3–12; 24:7–19

O le Togiola a Iesu Keriso e faamamaina ai au ma fesoasoani e faaatoatoa ai au.

E mafai ona faapea o le Tusi a Mamona o se tala i tagata na suia ona o le Togiola a Iesu Keriso. O le mea moni, o nisi o nei tagata sa faia ni agasala matuia ma sa avea foi o ni fili o le nuu o le Atua a o lei galueaiina e le mana o le Faaola ia i latou se suiga tele e tusa ai ma lo latou faatuatua ia te Ia. E mafai ona e faitau i nisi o nei aafiaga i le Mosaea 5:1–2; 27:8–28; ma le Alema 15:3–12; 24:7–19; e mafai foi ona e mafaufau i isi faataitaiga e suesueina foi. O a ni mea ua e mataua e tutusa ai nei aafiaga taitasi? O a ni eseesega ua e matauina? O a ni mea ua aoao atu ia te oe e nei tala e uiga i le ala e mafai ai e le Togiola a le Faaola ona suia oe?

Tagai foi Alema 5:6–14; 13:11–12; 18; 19:1–16; 22:1–26; 36:16–21; Eteru 12:27; Moronae 10:32–33.

Manatu mo Suesuega Faaleaiga o Tusitusiga Paia ma Afiafi Faaleaiga

A o outou faamanatuina le Eseta ma lou aiga, vaavaai mo ni auala e aoao faatasi ai e uiga i le Faaola ma Lana Togiola, e aofia ai le Toetu. O ni nai manatu nei.

3 Nifae 11; 17

O nisi aiga ua latou iloa o le suesueina o le tala i le asiasiga a le Faaola toetu i Amerika, e faapitoa lona ‘anoa i le vaitau o le Eseta. Fautuaina tagata o le aiga e mafaufau faapea mata o le a se lagona pe a tagotago i Ona manu’a (tagai 3 Nifae 11:14–15) pe avea o se tasi o fanau sa Ia faamanuiaina (tagai 3 Nifae 17:21). E faapefea e lenei tala ona faalolotoina lo tatou lotofaafetai mo le Toetu o le Faaola? O se atavali o loo faaalia ai lenei tala o loo avatu faatasi ma lenei otootoga; e mafai ona maua isi i le ChurchofJesusChrist.org. E mafai foi ona fiafia ia tagata o le aiga e tusi a latou lava ata o mea sa latou faitauina.

Savali mai le Konafesi Aoao

I le tele o vaega o le lalolagi, o le konafesi aoao ia Aperila i lenei tausaga e faia i le faaiuga o le vaiaso a o loma le Eseta. Atonu o le faalogologo i savali o le konafesi o le a mafai ona fesoasoani i lou aiga e taulai atu ai i le Faaola i lenei Eseta. Mo se faataitaiga, e mafai ona e valaaulia tagata o le aiga e faalogologo mo savali o le konafesi o loo molimau mai ai ia Iesu Keriso ma Lona Toetu—aemaise mai i Aposetolo, o molimau faapitoa a Iesu Keriso. Ona mafai lea ona outou iloiloina faatasi nei savali ma faailoa mai aoaoga o loo faamalolosia ai a outou molimau i le Faaola.

“O Le Keriso Soifua: O Le Molimau a Aposetolo”

Faitau o se aiga, “O Le Keriso Soifua: O Le Molimau a Aposetolo”” (Ensign po o le Liahona, Me 2017, i totonu o le faavaa i luma; tagai foi ChurchofJesusChrist.org) ma valaaulia tagata taitasi o le aiga e filifili se savali o le Eseta mai lenei molimau e faasoa atu i isi. Mo se faataitaiga, e mafai ona e faia ni pepa e faaali ai i luga o le upega tafailagi, i luga o lou faitotoa, po o luga o se faamalama.

Vitio: Molimau Faapitoa a Keriso

ChurchofJesusChrist.org ma le Gospel Library app o loo i ai se faasologa o vitio e ta’ua o Special Witnesses of Christ. O loo aofia ai vitio o uso taitasi o le Au Peresitene Sili ma le Korama a Aposetolo e Toasefululua o loo tuuina mai molimau ia Iesu Keriso. E mafai e lou aiga ona matamata i se tasi pe sili atu foi o nei vitio ma talanoaina po o a mea o loo aoao mai ai i tatou e uiga i mea na faia e le Faaola mo i tatou.

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.

Faaleleia o Lo Tatou Aoao Atu

Ola i le talalelei a Iesu Keriso. O le mea aupito taua e mafai ona e faia o se matua o le ola lea i le talalelei ma lou loto atoa. O le ala sili lea e agavaa ai mo le mafutaga ma le Agaga Paia. E te le tau atoatoa, na o le taumafai ma le filiga e fai le mea sili ma saili le faamagaloga e ala i le Togiola a le Faaola. (Tagai Aoao Atu i le Ala o le Faaola, 13–14.)

Atatusi o Keriso ma sa Nifae na saunia e Ben Sowards