Minerva K. Teichert (1888–1976), Lauga Faamavae a le Tupu o Peniamina, 1935, suauu i luga o le laupapa, 36 x 48 inisi. Faatufugaga a le Iunvesite a Polika Iaga

13--19 Aperila

Mosaea 1–3

“Ua Tumu i le Alofa i le Atua ma Tagata Uma”

Na tuuina mai e le Tupu o Peniamina se pogai se tasi e tusifaamaumau ai o tatou lagona uunai faaleagaga: “Aua e lē mafai e lo tatou tamā, o Liae, ona manatua nei mea uma, ma aoao atu i ana fanau, vagana ai le fesoasoani a nei papatusi” (Mosaea 1:4).

Tusifaamaumau Ou Lagona Uunai

A e faalogo i le upu tupu, atonu e te mafaufau i palealii, maota tioata, auauna, ma nofoalii. I le Mosaea 1–3, o le a e faitau ai e uiga i se ituaiga o tupu e ese. Nai lo le ola i galuega a lona nuu, o le Tupu o Peniamina “sa galue lava o ia i [ona] lava lima” (Mosaea 2:14). Nai lo le faia ia auauna atu isi ia te ia, sa ia auauna atu i lona nuu “ma lona manatu atoa, mafaufau, ma le malosi atoa ua tuu mai e le Alii ia te [ia]” (Mosaea 2:11). Sa lei manao le tupu i lona nuu e tapuai atu ia te ia, ae, sa ia aoaoina i latou e tapuai atu i se Tupu e sili atu nai lo ia lava, aua sa ia malamalama o “le Alii Mamana o le o nofotupu” (Mosaea 3:5). E faapei o taitai uma i le malo o le Atua, o upu a le Tupu o Peniamina ma ana faataitaiga ua faasino atu ai i tatou i le Tupu Faalelagi, o le Faaola lea, o Iesu Keriso. Sa molimau mai le Tupu o Peniamina e faapea na afio mai Iesu “i lalo mai le lagi” ma sa afio atu “i totonu o le fanauga a tagata, ma fai vavega tetele. … Ma faauta, e afio mai o ia i ona lava tagata, ina ia mafai ona oo mai o le olataga i le fanauga a tagata e ala lava i le faatuatua i lona suafa” (Mosaea 3:5, 9).

Manatu mo Suesuega Faaletagata Lava Ia o Tusitusiga Paia

Mosaea 2:1–9

O le mauaina o le afioga a le Atua e manaomia ai sauniuniga.

Ina ua auina atu e le Tupu o Peniamina le upu ua manao o ia e talanoa atu i lona nuu, sa o mai le anoanoai o tagata “sa le faitauina i latou” (Mosaea 2:2). Sa latou o mai, ma o se vaega, ona o lo latou lotofaafetai ma lo latou alolofa i lo latou taitai. Ae o le mea sili ona taua, na latou o mai ina ia aoaoina i le afioga a le Atua.

A o e faitauina le Mosaea 2:1–9, vaavaai mo mea na faia e tagata e faaalia ai sa latou faatauaina le afioga a le Atua. O le a le mea na aioi atu le Tupu o Peniamina ia i latou e fai e saunia ai e faalogo i le afioga a le Atua? (tagai i le fuaiupu 9). E mafai faapefea ona e saunia lelei atili oe lava e maua le afioga a le Atua i lau suesuega faaletagata lava ia ma faaleaiga ma i taimi o fonotaga faale-Ekalesia?

Tagai foi Mataio 13:18–23; Alema 16:16–17.

Mosaea 2:10–26

Pe a ou auauna atu i isi, ua ou auauna atu foi i le Atua.

Pe e te tauivi e sue se taimi e auauna atu ai pe o moomoo foi maimau pe ana aumaia e lau auaunaga se fiafiaga e sili atu? O le a sou manatu o le a se tala a le Tupu o Peniamina pe ana faapea e te fesili atu ia te ia pe aisea na ia auauna atu ai ma “lona manatu atoa, mafaufau atoa, ma le malosi atoa”?? (Mosaea 2:11). A o e faitauina le Mosaea 2:10–26faailoa mai ia upumoni na aoao mai e le Tupu o Peniamina e uiga i le auauna atu ma mafaufau pe mafai faapefea ona e faaaogaina i lou olaga. Mo se faataitaiga, o le a le uiga ia te oe o le iloa a e auauna atu i isi tagata, o loo e auauna atu foi i le Atua? (tagai i le Mosaea 2:17). Mafaufau i se auala e mafai ona e auauna atu ai i se tasi i lenei vaiaso!

Tagai foi Mataio 25:40.

Pe a ou auauna atu i isi, ua ou auauna atu foi i le Atua.

Mosaea 3:1–20

E mafai ona ou faatoilaloina le tagata natura ma avea o se tagata paia e ala i le Togiola a Iesu Keriso.

O le Tupu o Peniamina, e faapei foi o perofeta uma, sa molimau mai ia Iesu Keriso ina ia “mafai e [lona nuu] ona maua le faamagaloga o a latou agasala, ma olioli i le olioli tele” (Mosaea 3:13). Sa ia aoao mai foi e faapea o le Faaola, e ala i Lana Togiola, e le gata ina faamamaina ai i tatou ae ua tatou maua ai foi le mana e faatoilalo ai le “tagata natura” ae avea “o se tagata paia” (Mosaea 3:19; tagai foi Guide to the Scriptures, “Natural Man,” scriptures.ChurchofJesusChrist.org).

Na faamalamalama mai e Elder David A. Bednar: “O le Togiola a Iesu Keriso e maua mai ai le mana faamama ma le mana faaola lea e fesoasoani tatou te faatoilalo ai le agasala ma se mana faapaia ma faamalosi lea e fesoasoani tatou te lelei atili ai nai lo le mea tatou te mafaia e ala lea i le faalagolago i lo tatou malosi. O le Togiola e le i’u e mo le tagata agasala faapea foi le tagata paia ia i tatou taitoatasi.” (“O Lima Mama ma se Loto e Mama,” Ensign po o le Liahona, Nov. 2007, 82).

O nai fesili nei e mafaufau i ai a o e faitauina le molimau a le Tupu o Peniamina i le Faaola i le Mosaea 3:1–20:

• O a ni mea ou te aoaoina mai nei fuaiupu e uiga i le Faaola ma Lana misiona?

• Na faapefea ona fesoasoani mai Iesu Keriso ia te au e faatoilalo le agasala? Na faapefea ona Ia fesoasoani ia te au ia suia lo’u natura ma avea atili ai e faapei o se e paia?

• O le a se mea ua ou aoaoina mai le Mosaea 3:19?

Mosaea 3:8

O le a le mea na faasino i ai e le Tupu o Peniamina ia Iesu o “le Tama o le lagi ma le lalolagi”?

Sa faamalamalama mai e Peresitene Iosefa F. Samita: “O Iesu Keriso, o le ua tatou iloa foi o Ieova, o le na mulimuli i le taitaiga a le Tama, o Elohima, i le galuega o le foafoaga. … O Iesu Keriso, o le na Foafoaina, ua ta’ua pea lava pea o le Tama o le lagi ma le lalolagi … ; ma ona o Ana foafoaga e faavavau lona taunuuga, ua alagatatau ai ona ta’ua o le Tama e Faavavau o le lagi ma le lalolagi” (Aoaoga a Peresitene O Le Ekalesia: Iosefa F. Samita [1998], 367-8).

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Mosaea 1:1–7

Na faapefea ona faamanuiaina le nuu o le Tupu o Peniamina ona o papatusi apamemea ma papatusi a Nifae? E faapefea ona faamanuiaina lo tatou aiga i tusitusiga paia?

Mosaea 2–3

E ono malie foi mo lou aiga ona fatuina se nofoaga mo le saunoaga a le Tupu o Peniamina. E mafai ona outou faia sina tama’i ‘olo ma tuu atu i tagata o le aiga e feauaua’i e faitau mai upu a le Tupu o Peniamina a o tutu ai i luga. E mafai ona faalogologo mai isi tagata o le aiga i totonu o se faleie fesiitai.

Mosaea 2:9–19

O le a se mea ua tatou aoao mai e uiga i le auaunaga mai aoaoga a le Tupu o Peniamina ma ana faataitaiga? O le a se mea ua musuia i tatou e fai?

Mosaea 2:15–25

Mata e aoga i lou aiga ona faia se talanoaga e uiga i le lotomaualalo? Aisea na le talagugutu ai le Tupu o Peniamina i mea uma sa ia faia? O le a se mea e mafai ona tatou aoao mai i ana aoaoga e uiga i lo tatou sootaga ma le Atua?

Mosaea 2:36–41

O le a se mea na aoao mai e le Tupu o Peniamina e uiga i taunuuga o le iloa o le upumoni ae le ola ai? O le a se mea na ia aoao mai e uiga i le ala e maua ai le fiafia moni?

Mosaea 3:19

O le a le mea tatou te manaomia ona fai ia avea ai ma tagata paia? O le fea o uiga mai lenei fuaiupu e mafai ona tatou taulai i ai e atina’e faatasi o se aiga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Suesuega Faaletagata Lava Ia

Faatutu ni sini e mafai ona ausia. O le faaalu o ni nai minute faaopoopo i se aso e suesue ai i tusitusiga paia e mafai ona faamanuia ai lou olaga. Tautino atu e suesue i aso taitasi, ma sue se ala e faamanatu ai ia te oe lava lau tautinoga.

Lauga a le Tupu o Peniamina, saunia e Jeremy Winborg