Minerva K. Teichert (1888–1976), Lauga Faamavae a le Tupu o Peniamina, 1935, suauu i luga o le laupapa, 36 x 48 inisi. Faatufugaga a le Iunvesite a Polika Iaga

13--19 Aperila

Mosaea 1–3

“Faatumuina i le Alofa i le Atua ma Tagata Uma”

A’o e faitauina le Mosaea 1--3, tatalo ia iloa pe mafai faapefea ona e fesoasoani i tamaiti o loo e aoaoina ia malamalama i upumoni taua na aoao mai e le Tupu o Peniamina. Faamaumau manatu e oo mai ia te oe mai le Agaga Paia.

Tusi faamaumau Ou Lagona Uunai

Valaaulia le Fefaasoaai

Faaali atu le ata o le Tupu o Peniamina o loo aoao atu, o loo maua i le otootoga o lenei vaiaso i le Sau, Mulimuli Mai ia te ‘Au—Mo Tagata Taitoatasi ma Aiga. Tuu atu i tamaiti e faasoa mai mea latou te iloa e uiga i lea ata.

Aoao atu le Aoaoga Faavae: Tamaiti Laiti

Mosaea 2--3

Pe a ou auauna atu i isi, o loo ou auauna atu foi i le Atua.

O le a se mea e te faia e fesoasoani ai i tamaiti ia malamalama o le auauna atu i isi o se auala foi lea e auauna atu ai i le Atua?

Gaoioiga e Mafai Ona Fai

• Tuu atu i tamaiti e auauai i le paleina o se pale (o le itulau o gaoioiga o lenei vaiaso o loo i ai se faataitaiga) ma le tutu i luga o se nofoa e faafoliga ai o le Tupu o Peniamina. E mafai ona latou faia lenei mea a’o e faasoa atu nisi o mea na aoaoina ai e le Tupu o Peniamina lona nuu, o loo maua i totonu o le Mosaea 2--3. Tagai foi “Mataupu 12: O Le Tupu o Peniamina” (Tala o le Tusi a Mamona, 32--35, po o le vitio talafeagai i luga o le ChurchofJesusChrist.org.)

• Valaaulia tamaiti e toe fai le fuaiupu lea i ni nai upu i le taimi ao latou patipati i faaleogaina tatasi faatasi ma oe: “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17). Toe fai lenei mea seia oo ina aoaoina e tamaiti nisi po o upu uma. Molimau atu afai tatou te fesoasoani i isi, o loo tatou fesoasoani foi i le Tama Faalelagi ma Iesu ma faafiafiaina ai i Laua. Fai atu i tamaiti e faasoa mai ni auala e mafai ona latou fesoasoani ai i isi.

• Fesoasoani i tamaiti e lolomi o latou lima i luga o se fasipepa ma tusi se mea e mafai ona latou faia e auauna atu ai i o latou aiga. Usu faatasi se pese e faatatau i le auauna atu, e pei o le “Pe A Tatou Fesoasoani”” (Tusipese a Tamaiti, 108).

Na aoao mai le Tupu o Peniamina e mafai ona tatou auauna atu i le Atua e ala i le auauna atu i isi.

Mosaea 2:19–25

O o’u faamanuiaga uma e mai le Tama Faalelagi.

A iloa e tamaiti o le Atua o le punavai o o latou faamanuiaga uma, o le a latou lotomaualalo ma lotofaafetai.

Gaoioiga e Mafai Ona Fai

• Faamatala atu na aoao mai e le Tupu o Peniamina o o tatou faamanuiaga uma e mai le Tama Faalelagi. Valaaulia tamaiti e faalogo mo se faamanuiaga ua tuuina mai e le Tama Faalelagi ia te i tatou a’o e faitauina le Mosaea 2:21. O a isi faamanuiaga ua tuuina mai e le Tama Faalelagi ia i tatou? E faapefea ona tatou faʻaali atu tatou te faafetai mo nei mea? (tagai Mosaea 2:22).

• Taaalo i se taaloga lea e pasi ai e tamaiti se mea faitino aʻo latou usuina se pese e uiga i le loto faafetai pe faʻalogo i se pese (tagai “Lotofaafetai” i le faasino autu o le Tusipese a Tamaiti). Taofi le usuina o le pese pe taofi le musika i lea taimi ma lea taimi, ma valaaulia soo se tasi o uuina le mea faitino e faasoa atu se faamanuiaga o lotofaafetai ai o ia.

Mosaea 3:1--20

Ou te talitonu ia Iesu Keriso.

Sa taʻu atu e se agelu i le Tupu o Peniamina ia upumoni taua e uiga i le soifuaga ma le auaunaga a Iesu Keriso. Vaavaai i nei fuaiupu mo upumoni e faatatau ia Iesu e te lagona e taua mo tamaiti e aoao ai.

Gaoioiga e Mafai Ona Fai

• Faaali ata o nisi o mea na tutupu lea na taua i le Mosaea 3:5–10 (tagai, mo se faataitaiga, Tusiata o le Talalelei, nu. 30, 41, 42, 57, 59). Fesili atu i tamaiti pe o le a le mea o loʻo tupu i ata, ma fesoasoani ia i latou pe a manaʻomia. Faitau lemu le Mosaea 3:5--10, ma valaaulia tamaiti e sii o latou lima pe a e faitau e uiga i se mea i se tasi o ata. Valaaulia tamaiti e faasoa mai nisi mea latou te iloa na faia e Iesu a o i ai o Ia i le lalolagi.

• Tusi se ata o le la i le pito i luga o le laupapa e fai ma sui o le lagi. Tusi ni auala e tau atu i nofoaga eseese i le laupapa ae na o le tasi lava le auala e tau atu i le lagi. Fai i tamaiti e sue le auala lena ma tuu se ata o Iesu i luga. Faitau le Mosaea 3:17, ma molimau atu o le mulimuli ia Iesu Keriso e na o le pau lea o le ala e toe foi atu ai i le Tama Faalelagi.

Aoao atu le Aoaoga Faavae: Tamaiti Matutua

Mosaea 2:11--18

Pe a ou auauna atu i isi, o loo ou auauna atu foi i le Atua.

E mafai faapefea ona e fesoasoani i tamaiti e aoao mai le faataitaiga o le auauna atu a le Tupu o Peniamina?

Gaoioiga e Mafai Ona Fai

• Faaali i tamaiti se ata o le Tupu o Peniamina o loo aoao atu lona nuu (tagai otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga po o le Tusiata o le Talalelei, nu. 74). Fesoasoani i tamaiti e suesue le Mosaea 2:11--18 e saili po o le a le mea na faia e le Tupu o Peniamina e auauna atu ai. Aisea na ia auauna atu ai i ona tagata? Aisea e tatau ai ona tatou auauna atu i isi?

• Tusi i luga o le laupapa fuaitau mai le Mosaea 2:16--17 ae faaavanoa [faamisi] nisi upu. Valaaulia tamaiti e vaai i totonu o tusitusiga paia mo upu o loo misi. Fai atu ia i latou e faamatala le uiga o nei fuaiupu ia i latou. Valaaulia i latou e faasoa mai ni aafiaga na auauna atu ai isi ia i latou pe sa latou auauna atu foi i isi. O a ni o latou lagona e uiga i nei aafiaga?

• Tuu atu i tamaiti fasipepa e tusi ai ni auala e mafai ai ona latou auauna atu i tagata o o latou aiga, ma tuu atu i tamaiti uma se taga e tuu ai pepa i totonu. Uunai tamaiti e piki se fasipepa mai le taga i aso taitasi ma faia lena gaoioiga o le auaunaga mo se tasi.

Mosaea 2:15--25

E le tatau ona ou mitamita e uiga i laʻu auaunaga ma galuega lelei.

Mafaufau i le auala e mafai ai ona e fesoasoani i tamaiti o e aoaoina ia malamalama o la tatou auaunaga e tatau ona musuia e lo tatou alofa mo isi ma mo le Atua.

Gaoioiga e Mafai Ona Fai

• Valaaulia tamaiti e faasoa mai pe faapefea ona latou faauigaina le upu mitamitavale, pe fesoasoani ia i latou e sue le uiga i le utugagana. Fesoasoani ia i latou e suʻe le Mosaea 2:15--24, vaavaai mo mafuaaga na le mitamita ai le Tupu o Peniamina e uiga i lana auaunaga i isi. Aisea e tatau ai ona tatou auauna atu i isi? A maea ona faasoa mai e tamaiti o latou manatu, fesoasoani ia latou malamalama e tatau ona tatou saili e auauna atu i isi aua tatou te alolofa ia i latou ma le Atua, e le mo le tauleleia ai i isi.

• Fai atu i tamaiti e faasoa mai tulaga e ono mitamitavale ai se tasi pe mitamita foi e uiga i se mea. Aisea e sese ai le mitamitavale i na tulaga? Valaaulia i latou e faaaoga fautuaga mai le saunoaga a le Tupu o Peniamina i le Mosaea 2:15--24 e fesoasoani ia i latou ia latou tali.

Mosaea 3:19

E faamamaina aʻu e Iesu Keriso mai le agasala ma fesoasoani ia te au e avea ma se tagata paia.

Ina ia avea faapei o lo tatou Tama Faalelagi, tatou te manaomia le sili atu nai lo le faamamaina mai a tatou agasala---e tatau ona suia o tatou loto. E pei ona aoao mai e le Tupu o Peniamina, tatou te manaomia ona faatoilaloina o tatou manaoga agasala ma avea ma tagata paia e ala i le Togiola a le Faaola.

Gaoioiga e Mafai Ona Fai

• Tusi ni tagata se toʻalua i luga o le laupapa---tasi e fai ma sui o le “tagata natura” ma le isi e fai ma sui o le “tagata paia.” (Atonu e manaomia lou faamatalaina o uiga o nei upu.) Faitau faatasi le Mosaea 3:19, ma valaaulia tamaiti e saili suiga e tatau ona faia e le tagata natura ina ia mafai ai ona avea ma se tagata paia. O a nisi upu ma fuaitau atonu e manaʻomia e tamaiti le fesoasoani ia malamalama ai?

• Na fesoasoani tamaiti o loo e aoaoina i o latou matua e saunia se meaai e faaaoga ai se fua o lea meaai? Afai o lea, atonu e te valaauliaina i latou e faʻaaoga le Mosaea 3:19 e fai mai ai se “fua” mo le auala e mafai ai ona avea i tatou e pei o Iesu Keriso. Aisea ua avea ai le Togiola a Iesu Keriso ma “vaega” e sili ona taua?

Fautuaina le Aoaoina i le Aiga

Valaaulia tamaiti e faaaoga le itulau o gaoioiga o lenei vaiaso e faasoa atu ma o latou aiga po o uo pe faapefea ona latou mulimuli i le faataitaiga a le Tupu o Peniamina ma auauna atu i isi.

Faaleleia o Lo Tatou Aoao Atu

E manuia tamaiti i le faifaafia. Aua le fefe e faifaafia ia gaoioiga, aemaise ma tamaiti laiti ifo. O le faifaafia o le a fesoasoani i tamaiti e manatua ai mea na latou aoaoina.