Iakopo ma Enosa, saunia e Scott Snow

23--29 Mati

Enosa--Upu a Mamona

E Galue o Ia ia te A’u e Faia Lona Finagalo

Enosa, Iaroma, Ominae, ma le Upu o Mamona o ni tusi pupuu o loo i ai le tele o aoaoga taua mo tamaiti o loo e aoaoina. Suesue mo nei lesona, ma mafaufau loloto i ni auala e mafai ai ona e fesoasoani i tamaiti e aoaoina na lesona. E mafai foi ona fesoasoani ia manatu o lenei otootoga.

Tusifaamaumau Ou Lagona Uunai

Valaaulia le Fefaasoaai

Fesoasoani i tamaiti e manatua mea na latou aoaoina mai le lesona i le vaiaso ua tuanai. Pe na latou faasoa atu mea na latou aoaoina i o latou aiga po o isi?

Aoao atu le Aoaoga Faavae: Tamaiti Laiti

Enosa 1:1–19

E mafai ona ou talanoa atu i le Tama Faalelagi e ala i le tatalo.

Ua aoao mai e le aafiaga a Enosa nai upumoni e uiga i le tatalo. E faapefea ona e musuia tamaiti e mulimuli i le faataitaiga a Enosa a’o latou tatalo?

Gaoioiga e Mafai Ona Fai

• Faaali atu se ata o Enosa; mo se faataitaiga, tagai le otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga, pe faaaoga le ata Enosa o loo Tatalo (Tusiata o le Talalelei, nu. 72). Fai atu i tamaiti e talanoa po o le a le mea o loo tupu i le ata, ma faasoa atu le aafiaga a Enosa ma i latou. E mafai ona e faaaogaina le “Mataupu 11: Enosa” (Tala o le Tusi a Mamona, 30--31, po o le vitio talafeagai i le ChurchofJesusChrist.org).

• Fai i tamaiti e faasoa mai mea latou te fiafia i ai e talanoa ai ma o latou matua. Faamalamalama atu o le tatalo i le Tama Faalelagi o le auala lea e mafai ai ona latou talanoa atu ia te Ia. A’o e faitauina le Enosa 1:1--4 i tamaiti, valaaulia i latou e faafoliga o i latou o Enosa e ala lea i le faatinoina o le tulimanu, tootuli e tatalo, ma isi. Faamalamalama atu na faafofoga le Tama Faalelagi i le tatalo a Enosa ma faamagaloina ana agasala.

• Usu faatasi se pese e faatatau i le tatalo, e pei o le “O Le Tatalo A Le Tamaititi” (Tusipese a Tamaiti, 6--7). Valaaulia tamaiti e sii o latou lima i taimi uma latou te faalogo ai i le upu “tatalo” po o se isi upu o faifai pea. Molimau atu i le mana o le tatalo i lou olaga.

I le avea ai ma fanau a le Atua, e mafai ona tatou tatalo i lo tatou Tama Faalelagi.

Upu a Mamona 1:3–8

E mafai ona ou faamanuiaina isi pe a ou faalogo i le Agaga Paia.

A o ia tuufaatasia le Tusi a Mamona, na uunaia Mamona e faaaofia ai papatusi laiti a Nifae. Na te le iloa pe aisea na manaomia ai papatusi laiti, ae o le aso ua faamanuiaina i tatou ona sa mulimuli o ia i lenei uunaiga. O lenei faataitaiga e mafai ai ona musuia tamaiti e mulimuli i le Agaga.

Gaoioiga e Mafai Ona Fai

• Valaaulia tamaiti e faasoa mai ni tala na latou aoaoina mai le Tusi a Mamona i lenei tausaga (ata mai le Sau, Mulimuli Mai ia te A’u---Mo Tagata Taitoatasi ma Aiga po o le Tusiata o le Talalelei e mafai ona fesoasoani ia i latou e manatua). Faamalamalama atu o loo ia i tatou nei tala i totonu o le Tusi a Mamona aua na faalogo Mamona ina ua taʻu atu e le Agaga Paia ia te ia e faaaofia i latou. Aisea na finagalo ai le Tama Faalelagi tatou te maua nei tala?

• Faasoa atu se tala mai mekasini a le Ekalesia pe mai se savali o le konafesi aoao e uiga i se tasi na mulimuli i musumusuga a le Agaga Paia. Pe faasoa atu se tasi o ou lava aafiaga. Valaaulia tamaiti e tusi ni ata o le tala. Na faapefea ona faamanuiaina tagata i nei tala ona sa latou mulimuli i le Agaga Paia?

• Fai atu i se tagata o le uarota e asiasi i le vasega ma faasoa atu se aafiaga ina ua ia mulimuli i se uunaiga mai le Agaga Paia. Na faapefea ona faamanuiaina isi ona o ana galuega? Faamalamalama atu e finagalo le Tama Faalelagi tatou te fesoasoani ma faamanuia isi, o lea na Ia auina mai ai le Agaga Paia e taitaiina i tatou.

• Usu faatasi se pese e uiga i le Agaga Paia, e pei o le “The Still Small Voice” (Children’s Songbook, 106--7). Usu faatele i auala eseese, e pei o le vave, tuai, pe musumusu. A e musumusu le pese, susue i le Upu a Mamona 1:7, ma faasino atu faapea na faamatalaina e Mamona le Agaga Paia o se musumusu.

Aoao atu le Aoaoga Faavae: Tamaiti Matutua

Enosa 1:1–19

E faafofoga ma tali mai le Tama Faalelagi i a’u tatalo faamaoni.

E faigofie ona avea a tatou tatalo ma mea masani pe faasamasamanoa. O le aafiaga a Enosa o se faamanatu o le mauaina o tali ia tatou tatalo e manaomia i nisi taimi le “fagatuaga” ma “ni fagatuaga uumi e tele” (Enosa 1:2 11).

Gaoioiga e Mafai Ona Fai

• Valaaulia tamaiti e moeiini o latou mata ma vaai faalemafaufau o latou talanoa faafesagaʻi ma le Tama Faalelagi. O le a se mea latou te fia talanoa ai ma Ia? Valaaulia tamaiti e mafaufau e uiga i le talanoa faafesagaʻi ma le Tama Faalelagi i taimi uma latou te tatalo ai.

• Valaaulia tamaiti e galulue taitoalua ma faitau le Enosa 1:1--5. Fai atu ia i latou e suesue nei fuaiupu mo se upu po o se fasifuaitau o faamatalaina ai le tatalo a Enosa ona faasoa atu lea o mea na latou mauaina i le vasega. O a mea o loo taʻu mai e nei upu e uiga ia Enosa ma lona aafiaga? Tuu atu i tamaiti e faasoa mai nisi mea e faagaeetia ai i latou e uiga i tatalo a Enosa. Faasoa atu se aafiaga ina ua “matelaina” lou agaga ma na e “tagi atu” i le Alii (Enosa 1:4). Faataga tamaiti e mafaufau loloto i se mea se tasi e mafai ona latou faia ina ia atili anoa ai a latou tatalo.

• Fai atu i tamaiti e lisi nisi o mea e masani ona latou tatalo ai, i luga o le laupapa po o luga o le itulau o gaoioiga o lenei vaiaso. Ona valaaulia lea o i latou e saili mo mea na tatalo ai Enosa, i le Enosa 1:2,9,13--14 ma le 16 ma faaopoopo mea na i le latou lisi. Ia talanoaina pe mafai faapefea e tamaiti ona mulimuli i le faataitaiga a Enosa ia latou tatalo; mo se faataitaiga, e mafai ona e talanoa e uiga i le mafuaaga na naunau ai Enosa e tatalo mo Sa Lamana---o e na avea ma ona fili---ma valaaulia tamaiti e tatalo i lenei vaiaso mo se tasi na agaleaga ia i latou.

Upu a Mamona 1:3–8

E mafai ona ou faamanuiaina isi pe a ou faalogo i le Agaga Paia.

Na silafia e le Alii o uluai itulau e 116 ia na faaliliuina o le Tusi a Mamona o le a leiloloa (tagai MF&F 10; Au Paia, voluma 1, mataupu 5). Ina ia suia lenei mea na leiloa, na Ia musuia Mamona e ala i le Agaga e faaaofia ai papatusi laiti a Nifae i le Tusi a Mamona. E mafai faapefea ona e uunaia tamaiti e mulimuli i faataitaiga a Mamona ma faalogo i le Agaga?

Gaoioiga e Mafai Ona Fai

• Fai atu i tamaiti e auauai i le faitauina o fuaiupu mai le Upu a Mamona 1:3--8 taitasi i le taimi, ona fesoasoani lea ia i latou e tauaofai mea latou te aoaoina mai fuaiupu taitasi. Faamalamalama atu na mulimuli Mamona i le Agaga e ala i le faaaofiaina o papatusi laiti a Nifae (lea ua tatou maua nei i le 1 Nifae se’i oo ia Ominae) i le Tusi a Mamona. E faapefea ona faamanuiaina i tatou aua na faalogo Mamona i le Agaga? E mafai faapefea ona ese le Tusi a Mamona pe a na ia le faalogo? Faasoa atu se aafiaga na musuia ai oe e le Agaga Paia e fai se mea e faamanuiaina ai i se tasi. Fai atu i tamaiti e faasoa mai se aafiaga talitutusa na latou maua.

• Valaaulia se tamaitiiti e faitau le Upu a Mamona 1:7 ma le isi e faitau le Mataupu Faavae ma Feagaiga 8:2--3. O le a se mea o aoao mai e nei fuaiupu e uiga i le ala e talanoa mai ai le Agaga Paia ia i tatou? Fesoasoani i tamaiti e iloa taimi na latou lagonaina ai uunaiga mai le Agaga Paia. Faaaoga le Moronae 7:12 e faamalamalama atu afai o se mafaufauga lelei ma musuia i tatou e faia mea lelei, e sau mai le Tama Faalelagi. Mo se faataitaiga, mafaufau e faaali le vitio “Preparation of Thomas S. Monson: Always Follow the Promptings of the Spirit” (ChurchofJesusChrist.org). Valaaulia tamaiti e faalogo mo uunaiga e faia mea lelei ma mulimuli i ai.

Fautuaina le Aoaoina i le Aiga

Uunai tamaiti e fai atu i tagata o o latou aiga e faasoa mai ni aafiaga na latou maua i le tatalo po o le Agaga Paia.

Faaleleia o Lo Tatou Aoao Atu

Faaaoga musika. E mafai ona fesoasoani pese a le Peraimeri ma viiga i tamaiti o vaitausaga uma e malamalama ai ma manatua upumoni o le talalelei. O le usu o pese e mafai ai foi ona faagauai atoatoa mai tamaiti i se aafiaga e aoao ai. (Tagai Aoao Atu i le Ala a le Faaola, 22.)