“9--15 Mati. Iakopo 1--4: ‘Ia Outou Faalelei ma le Atua e ala i le Togiola a Keriso,’” Sau, Mulimuli Mai ia te A’u--Mo le Peraimeri: Tusi a Mamona 2020 (2020)
“9--15 Mati. Iakopo 1--4,” Sau, Mulimuli Mai ia te A’u—Mo Le Peraimeri: 2020
Faamagalo, saunia e Greg K. Olsen
9--15 Mati
Iakopo 1–4
Ia Outou Faalelei ma le Atua e ala i le Togiola a Keriso
A o e faitauina le Iakopo 1--4, mafaufau po o fea mataupu faavae mai nei mataupu e sili ona taua mo tamaiti e aoao ai. Saili mo le taitaiga faaleagaga ia iloa le auala e sili ona lelei e aoao ai nei mataupu faavae, ma faamaumau ou lagona.
Tusifaamaumau Ou Lagona Uunai
Valaaulia le Fefaasoaai
Valaaulia tamaiti e faasoa mai se mea sa latou faia po o latou aiga i lenei vaiaso e aoao mai ai i le Iakopo 1--4. E mafai foi ona e fai atu ia i latou e faasoa mai se mea latou te manatua mai le lesona o le vaiaso talu ai. O a ni fesili e te fesili ai e fesoasoani latou te manatua ai?
Aoao atu le Aoaoga Faavae: Tamaiti Laiti
E valaauina e le Atua taitai o le Ekalesia e fesoasoani ia te au e mulimuli ia Iesu Keriso.
Fesoasoani i tamaiti ia malamalama o le a faamanuiaina i latou e ala i le mulimuli i fautuaga a taitai o le Ekalesia.
Gaoioiga e Mafai Ona Fai
-
Fai ni papeti faigofie e fai ma sui o Iakopo ma Iosefa, uso laiti o Nifae, o e na avea ma taitai i le Ekalesia. Faasoa atu ni nai fuaiupu mai le Iakopo 1 ma le 2 e faamatala ai mea ua valaauina taitai o le Ekalesia e fai. Mo se faataitaiga, o taitai e tauanauina i tatou e “talitonu ia Keriso” (Iakopo 1:8), valaaulia i tatou e salamo (tagai Iakopo 2:5--6, 9--10), ma “ta’u atu afioga a [le Atua]” (Iakopo 2:2 11). Tuu atu i tamaiti e faaaoga papeti e faafoliga ai o fai nisi o nei mea.
-
Valaaulia tamaiti e tau mai nisi o taitai o le Ekalesia latou te iloa, e pei o taitai o le Peraimeri, au epikopo, ma perofeta ma aposetolo. Fesoasoani i tamaiti e mafaufau i auala ua faamanuiaina ai i tatou e nei taitai.
E fesoasoani o tatou taitai o le Ekalesia ia tatou mulimuli ia Iesu Keriso.
E mafai ona ou fesoasoani i isi o loʻo manaʻomia le fesoasoani pe a ou fefa’asoaa’i ma i latou.
Pe o malamalama tamaiti o loo e aoaoina i faamanuiaga e oo mai pe a latou fefa’asoaa’i atu ma i latou e le tagolima? E mafai faapefea ona e fesoasoani ia latou iloa e finagalo le Tama Faalelagi ma Iesu latou te fesoasoani atu i isi?
Gaoioiga e Mafai Ona Fai
-
Faamalamalama atu o nisi o tagata i le taimi o Iakopo sa matua mauoa, ae latou te le mananao e faasoa atu mea na latou maua ma tagata matitiva. Faitau le Iakopo 2:17–19 e fesoasoani i tamaiti ia malamalama i aoaoga a Iakopo i nei tagata. A o e faia, tuu atu i tamaiti ni ata po o ni mea faitino e uu e o faatasi ma upu poʻo fuaitau i nei fuaiupu.
-
Valaaulia tamaiti e faatino ni auala e mafai ai ona latou fefa’asoaa’i atu mea latou te maua i se tasi o loo manaomia le fesoasoani. Molimau atu e faamanuiaina i tatou a o tatou fefa’asoaa’i atu i isi.
-
Aumai se mea i le vasega e mafai ona e fefaʻasoaa’i ma tamaiti. Tufa atu i tamaiti taitasi, ma faamalamalama atu o loʻo e fefa’asoaa’i. Fesili atu ia i latou po o le a so latou lagona ina ua e fefa’asoaaʻi ma i latou. O a ni o latou lagona pe a latou fefa’asoaaʻi ma isi? Fesoasoani ia i latou e mafaufau i se mea e mafai ona latou fefa’asoaa’i atu e fesoasoani ai i se tasi ia lagona le fiafia.
E mafai ona ou faamalosia lo’u faatuatua ia Iesu Keriso.
Ao ola amiotonu ia Iakopo e ui lava i le amioleaga na siomia ai o ia, na matua malosi lona faatuatua e le mafai ona luluina. Mafaufau loloto pe mafai faapefea ona e fesoasoani i tamaiti ia malamalama i le uiga o le i ai o le faatuatua e le mafai ona luluina.
Gaoioiga e Mafai Ona Fai
-
Fesoasoani i tamaiti e mafaufau i mea latou te faia ina ia malolosi o latou tino. O le a le mea e mafai ona tatou faia e faamalosia ai lo tatou faatuatua? Tatala tusitusiga paia i le Iakopo 4:6, ma fesoasoani i tamaiti ia latou iloa mea na faia e Iakopo ma ona tagata ina ia “le maluelue” lo latou faatuatua.
-
Usu le “Tagata Poto ma le Tagata Valea” (Tusipese a Tamaiti, 132) ma tamaiti. I le tasi itu o le laupapa, tusi ai se fale o fau i luga o le oneone. I le isi itu o le laupapa, tusi se fale o fau i luga o se papa. Afai e mafai, aumai le oneone ma se maa i le vasega. O le fea e sili atu le faigofie ona lulu pe gaoioi? O le fea, oneone poʻo le papa, tatou te mananaʻo ia faʻatusa i ai lo tatou faʻatuatua?
Aoao atu le Aoaoga Faavae: Tamaiti Matutua
E valaauina e le Atua taitai o le Ekalesia e fesoasoani ia te au e mulimuli ia Iesu Keriso.
O tamaiti o loo e aoaoina o le a faamanuiaina ao latou talitonuina ma mulimuli i fautuaga a taitai o le Ekalesia.
Gaoioiga e Mafai Ona Fai
-
Faitau ma tamaiti le Iakopo 1:6--8 ma le 2:1--6 11, fesoasoani ia i latou e vaavaai mo fuaitau o loo faamatalaina ai pe faapefea ona taitai e auauna a le Atua le Ekalesia. Fai atu ia i latou e tusi nei fuaitau i ni fasi pepa ona faaali lea o pepa i luga o le laupapa. Aisea e valaauina ai e le Atua ia taitai o le Ekalesia e taitaiina i tatou? Fai i tamaiti e faasoa mai ni aafiaga i le aoaoina po o le mauaina o se taitaiga mai se taitai o le Ekalesia po o se faiaoga ma faamanuiaga na latou mauaina.
-
Fai atu i tamaiti e tusi se ata o se taitai o le Ekalesia latou te iloa, ma tuu atu i le isi vaega o le vasega e mate po o ai na latou tusia. O a mea e faia e nei taitai e fesoasoani ia i tatou ia mulimuli ia Iesu Keriso? Valaaulia tamaiti e tusi ni tusi i taitai o le Ekalesia, faafetai atu ia i latou mo la latou auaunaga.
-
Valaaulia se taitai o le Ekalesia i le lotoifale e tau atu i tamaiti le mea o loo ia faia e faataunuu ai lona valaauga. Fai i tamaiti e ta’u mai ni mea e mafai ona latou faia e lagolago ai o latou taitai.
E mafai ona ou fesoasoani i isi ia lagona le fiafia e ala i le fefa’asoaaʻi ma i latou.
O soo moni o Iesu Keriso ua naunau e faasoa atu mea latou te maua i isi. Uunai tamaiti e avatu le fiafia ia i latou e le tagolima e ala i le fefa’asoaaʻi ma i latou.
Gaoioiga e Mafai Ona Fai
-
Tau atu i tamaiti o le toatele o tagata i le taimi o Iakopo na maua i le faamaualuga ma le agaleaga aua latou te fiafia i oa (tagai Iakopo 2:12--14, 17--21). Valaaulia ni nai tamaiti e faitau leotele le Iakopo 2:17--19 , ma fesoasoani ia i latou e malamalama i soo se upu faigata. O le a le mea e tatau ona tatou sailia ae tatou te lei saili oa? O a mea e tatau ona tatou saili e fai i soʻo se oa tatou te maua?
-
Faitau le Iakopo 2:17 i tamaiti. O a faamanuiaga ua faasoa mai e le Tama Faalelagi ia i tatou? Aisea e finagalo ai o Ia ia tatou fefa’asoaa’i ma isi? Valaaulia tamaiti e faasoa mai taimi na latou fefaasoaai ai se mea ma se tasi, e aofia ai lagona na latou maua ma lagona o le isi tagata.
E mafai ona ou faamalosia lo’u faatuatua ia Iesu Keriso.
Na le maluelue le faatuatua o Iakopo ao ia sailia upu a perofeta ma maua lana lava molimau (tagai Iakopo 4:6). E faapefea ona e fesoasoani i tamaiti ia naunau e fausia le faatuatua e le mafai ona luluina?
Gaoioiga e Mafai Ona Fai
-
Valaaulia tamaiti e mafaufau i mea e avea ma mea malolosi ma malupuipuia i le aluga o taimi, e pei o se laau tele. E faapefea ona tutusa le faatuatua ma mea na latou mafaufau i ai? O a fuaitau i le Iakopo 4:6, 10--11 o faamatala mai ai mea e mafai ona tatou faia ina ia le maluelue ai lo tatou faatuatua? Fai atu i tamaiti e fai se lisi i luga o le laupapa o auala e mafai ai ona faamalosia lo latou faatuatua ia Iesu Keriso.
-
Faasoa atu le tala faatusa a Elder Neil L. Andersen o le laau e ola i se siosiomaga matagi, o loo maua i lana savali “O Asiosio Faaleagaga” (Ensign po o le Liahona, Me 2014, 18--21), pe faaali le vitio “Spiritual Whirlwinds” (ChurchofJesusChrist.org). Aisea e taua ai mo lo tatou faatuatua ona le maluelue ma malosi e pei o le ogalaau o se laau? O le a le mea e faatusa i ai asiosio? O a ni mea e mafai ona tatou faia e fausia ai le faatuatua e le maluelue? Fesoasoani i tamaiti e mafaufau i isi faatusatusaga o loo aoao mai e uiga i le i ai o le faatuatua lea e le mafai ona luluina.
Fautuaina le Aoaoina i le Aiga
Valaaulia tamaiti e mafaufau i se mea e mafai ona latou faasoa atu ma o latou aiga-e aofia ai le faasoa atu o se mea na latou aoaoina i le vasega i le aso. Tuuina atu ia i latou avanoa i se lesona i le lumanaʻi e talanoa ai e uiga i mea na latou fefa’asoaaʻi.
Faaleleia o Lo Tatou Aoao Atu
Fautuaina le migao. Fesoasoani i tamaiti ia malamalama o se vaega taua o le migao o le mafaufau lea i le Tama Faalelagi ma Iesu Keriso. E mafai ona e faamanatu i tamaiti o le migao o le usuusu lemu lea pe hamuina se pese pe faaalia se ata o Iesu.