O le a Ia Taitai Oe i le Lima, saunia e Sandra Rast

24 Fepuari–1 Mati 

2 Nifae 26–30 

“O se Galuega Ofoofogia ma le Mea e Ofo Ai”

Ae le’i amata ona e fuafuaina gaoioiga e a’oa’o ai mo tamaiti i lau vasega, suesue le 2 Nifae 26--30. O le a valaaulia ai le Agaga i lau tapenapenaga.

Tusifaamaumau Ou Lagona Uunai

Valaaulia le Fefaasoaai

Uu i luga se kopi o le Tusi a Mamona, ma faamatala atu na muai iloa e Nifae o le Tusi a Mamona o le a taua i o tatou aso. Fai atu i tamaiti e faasoa mai se mea na latou aoaoina e uiga i le Tusi a Mamona i lenei tausaga.

Aoao atu le Aoaoga Faavae: Tamaiti Laiti

2 Nifae 26:33 

E finagalo Iesu Keriso i tagata uma e o mai ia te Ia.

Na molimau Nifae e alofa le Faaola i tagata uma, e tusa lava po o ai i latou, ma Na te valaaulia i latou uma ia “taumamafa i lona agalelei.”

Gaoioiga e Mafai Ona Fai

• Faaali atu ata o tagata mai ituaiga eseese ma aganuu (atonu e te mauaina nisi i mekasini a le Ekalesia). Fai atu i tamaiti e faamatala nisi o auiliiliga latou te vaaia i ata. Tatala tusitusiga paia i le 2 Nifae 26:33 ma faitau, “[Iesu Keriso] ua valaauina i latou uma ia o mai ia te ia.” Toe fai lenei fasifuaitau ma tamaiti a’o e tusi atu i ata taitasi. Ona faasino atu lea i tamaiti taitoatasi ma fai atu, “Ua valaaulia oe e Iesu Keriso e sau ia te Ia.” O le a se mea e mafai ona tatou faia e o mai ai i le Faaola?

• Usu se pese ma tamaiti e faatatau i le alofa i tagata uma, e pei o le “Ou te Savali ma Oe” poo le “We Are Different” (Tusipese a Tamaiti, 78--79, 263). Faailoa upu po o fuaitau i le pese e te lagona e faamalosia ai le savali o le 2 Nifae 26:33.

2 Nifae 28:2; 30:6

O le Tusi a Mamona o se faamanuiaga.

Mafaufau pe faapefea ona e fesoasoani i tamaiti o lau vasega e lagona o le Tusi a Mamona o “se faamanuiaga lena mo i latou mai le aao o le Atua”(2 Nifae 30:6).

Gaoioiga e Mafai Ona Fai

• Faaali atu i tamaiti se Tusi a Mamona ua afifiina o se meaalofa, ma taʻu atu ia i latou o loo i ai se mea taua i totonu. Tuu atu ia i latou e uu le meaalofa, ma tuu atu ni faamatalaga tau faaataata e fesoasoani ai ia i latou e mate mai po o le a; mo se faataitaiga, o se mea ua tuuina mai e le Alii ia i tatou, e fesoasoani tatou te talitonu ai ia Iesu Keriso, ma isi. Faitau mai le 2 Nifae 30:6: “O se faamanuiaga lena mo i latou mai le aao o le Atua.” Tuu atu i tamaiti e tatala le meaalofa, ona faamatala lea e tatau ona tatou tatalaina le Tusi a Mamona ma faitau e maua ai faamanuiaga o loo i ai.

• Faitau le 2 Nifae 28:2 i tamaiti. Faamatala atu na vaai Nifae o le Tusi a Mamona o le a “taua tele” ia i tatou, o lona uiga o le a fesoasoani ma faamanuiaina ai i tatou. Tau atu i tamaiti pe aisea e taua tele ai le Tusi a Mamona ia te oe. Faasoa atu lau fuaiupu e fiafia i ai po o se tala mai le Tusi a Mamona, ma valaaulia tamaiti e faasoa mai foi a latou tala. Faaali atu ata mai le Tusi Ata o le Talalelei e avatu ai ia te i latou ni manatu.

2 Nifae 28:30 

E aoao mai le Tama Faalelagi ia te a’u i sina mea itiiti i i ma sina mea itiiti i o.

Masalo e mafai ona e mafaufau i se lesona faitino po o se gaoioiga o le a fesoasoani i tamaiti e iloa ai le uiga o le aʻoaʻoina “lea fuaitau i luga o lea fuaitau.” O fautuaga o loʻo i lalo e ono faaosofia ai nisi o manatu.

Gaoioiga e Mafai Ona Fai

• Fesoasoani i tamaiti e tuufaatasi se paso faigofie pe fausia se mea i poloka. Tuu atu ia i latou se fasi paso se tasi po o se poloka se tasi i le taimi, ma ao latou fausiaina, ia faamatala atu o le auala lenei e aoao mai ai i tatou e le Tama Faalelagi---tasi le upumoni i le taimi. O le a le mea e ono tupu pe afai tatou te taumafai e faʻapipiʻi faʻatasi uma vaega i le taimi e tasi?

• Aoao atu i tamaiti se tomai i lea sitepu ma lea sitepu, e pei o le nonoa o se aufana po o le tusiina o se ata. Faitau mai le 2 Nifae 28:30: “Ou te tuu atu i le fanauga a tagata lea fuaitau i luga o lea fuaitau, … o sina mea itiiti i i ma sina mea itiiti i o.” Aisea e aoao ai i tatou e le Atua i sina mea itiiti i lea taimi ma lea taimi?

Aoao atu le Aoaoga Faavae: Tamaiti Matutua

2 Nifae 26:23–28, 33 

E finagalo Iesu Keriso i tagata uma e o mai ia te Ia.

Fesoasoani i tamaiti ia lagona o le valaaulia e o mai ia Keriso e faatatau ia i latou ma i tagata uma.

Gaoioiga e Mafai Ona Fai

• Talanoa ma le fanau e uiga i taimi na latou valaaulia ai uo po o aiga e o mai i se tulaga faapitoa, e pei o le faamanatuina o se aso fanau. O le a le mea na latou faia e faʻamalosia ai tagata e o mai? Faitau ma tamaiti le 2 Nifae 26:23–28, 33, ma fesoasoani ia i latou e saili mea o loo valaaulia i tatou e le Alii e fai. Fai atu i tamaiti e fatu se kata po o se tusi e valaaulia ai se tasi e o mai ia Iesu Keriso. Fautuaina i latou e faaaoga se fasifuaitau mai nei fuaiupu i a latou valaaulia (pe a manaomia, tusi ni fuaitau i luga o le laupapa e fesoasoani ai).

• Faitau le 2 Nifae 26:33 ma tamaiti, ma fesoasoani ia i latou e faia se lisi poo ai, e tusa ai ma lenei fuaiupu, e valaaulia e “taumafa i le agalelei o [le Alii].” (Atonu e te manao e faamalamalama atu o “tagata faapaupau” o i latou ia e le talitonu i le Atua.) Valaaulia i latou e faaopoopo o latou lava igoa i le lisi. E faapefea ona tatou taumamafa i le agalelei o le Alii?

• Talanoa puupuu ma tamaiti pe faapefea ona eseese tamaiti i le salafa o le lalolagi, ma molimau atu e alofa le Alii ia i latou uma (tagai 2 Nifae 26:24 33). Valaaulia tamaiti e tusi se ata o Iesu ma tamaiti eseese.

2 Nifae 28:27–30 

E faaalia mai e le Tama Faalelagi upumoni i “lea fuaitau i luga o lea fuaitau.”

Na lapatai mai Nifae e faasaga i le uiga faapea tatou te le manaomia nisi upumoni mai le Atua. Fesoasoani i tamaiti ia iloa o le aoaoina o le talalelei o se mea e faifai malie, e tulimatai i le olaga atoa.

Gaoioiga e Mafai Ona Fai

• Filifili se fuaitau mai le 2 Nifae 28:30, ma fai atu i se tamaitiiti e tusi le upu muamua i luga o le laupapa. Ona fai atu lea i se isi tamaitiiti e tusi le upu e sosoo ai, ma isi seia oo ina tusia le fuaitau atoa. E faapefea ona tutusa le gaoioiga lea i le auala e tuu mai ai e le Atua ia i tatou upumoni?

• Fesoasoani i tamaiti e faitau ma malamalama i le 2 Nifae 28:27--30, saili mo tali i se fesili faapenei: O le a se mea o aoao mai e nei fuaiupu e uiga i tagata o e talitonu ua lava a latou upumoni ma e le toe manaomia? Fai atu ia i latou e fautua mai ni auala e mafai ona tatou faaali atu ai i le Alii tatou te mananao e maua atili upumoni mai ia te Ia.

2 Nifae 29:7–11 

E galulue faatasi le Tusi a Mamona ma le Tusi Paia.

Ona ua ia i tatou le Tusi Paia, ua talitonu nisi tagata e le manaomia le Tusi a Mamona. O nei fuaiupu e mafai ona fesoasoani i tamaiti ia malamalama, ma faamatala atu i isi, le mafuaaga tatou te loto faafetai ai mo tusitusiga paia uma e lua.

Gaoioiga e Mafai Ona Fai

• Tuu atu i se tamaitiiti se kopi o le Tusi a Mamona ma le isi se kopi o le Tusi Paia. Fesili atu ia i latou pe faapefea ona tutusa nei tusi ma pe faapefea foi ona eseese. Faaali atu i tamaiti se faafanua o le lalolagi, ma fesoasoani ia i latou e faafetaui ia tusi taitasi ma le vaega o le lalolagi na sau mai ai. Faitau ma talanoaina le 2 Nifae 29:8. Aisea na tuuina mai ai e le Atua ia i tatou ni “molimau” se lua po o tusi o tusitusiga paia o loo aoao ai i tatou e uiga ia te Ia?

• Fai atu i tamaiti e vaai faalemafaufau faapea na taʻu atu e se uo ia i latou, “Ou te le manaomia ona faitau i le Tusi a Mamona. Ua uma ona ou faitauina le Tusi Paia.” Faitau faatasi le 2 Nifae 29:7--11, faʻamatala atu fuaitau ma faʻamatalaga pe’ā manaʻomia. Ona fai atu lea ia i latou e faasoa mai ni manatu e uiga i mea latou te ono fai atu i le latou uo.

Fautuaina le Aoaoina i le Aiga

Valaaulia tamaiti e faamatala i o latou aiga pe faapefea ona galulue faatasi le Tusi Paia ma le Tusi a Mamona e molimau ia Iesu Keriso.

Faaleleia o Lo Tatou Aoao Atu

Taulai atu i tagata, ae le o lesona. O manatu i lenei otootoga ua na o ni fautuaga. Lagona le saoloto e fetuutuunai i manaoga ma tomai o tamaiti o loo e aoaoina.