17--23 Fepuari

2 Nifae 11–25 

“Ua Matou Olioli ia Keriso”

E amata lau tapenaga e aoao atu a o e faitauina le 2 Nifae 11–25. Sau, Mulimuli Mai ia te A’u—Mo Tagata Taitoatasi ma Aiga e mafai ona fesoasoani ia te oe ia malamalama i nei mataupu, ma e mafai ona avatu e lenei otootoga ia te oe ni manatu faafaiaoga.

Tusi faamaumau Ou Lagona Uunai

Valaaulia le Fefaasoaai

Fai se iloiloga puupuu faatasi ma tamaiti i mea sa latou aoaoina e uiga i le Faaola ma Lana Togiola i le vaiaso ua te’a. Afai na latou fefaasoaa’i mea na latou aoaoina ma o latou aiga, ia faamalosiau ia i latou e talanoa e uiga i lena mea.

Aoao atu le Aoaoga Faavae: Tamaiti Laiti

2 Nifae 12:2–3 

O le malumalu o le maota o le Alii.

O le valoaga a Isaia e uiga i le “mauga o le fale o le Alii” e mafai ona avea ma se avanoa e aoao ai tamaiti e uiga i le malumalu ma fesoasoani ia i latou e tulimatai le aso e o atu ai iina.

Gaoioiga e Mafai Ona Fai

• Tuu atu i se tamaitiiti e uu se ata o se malumalu (otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga o loo i ai le ata), ma fai atu i tamaiti e faasoa mai mea latou te iloa e uiga i le malumalu. Faitau le 2 Nifae 12:3, ma faamatala atu faapea i le fuaiupu lenei na valoia e se perofeta e igoa ia Isaia o le a i ai malumalu i aso mulimuli. Toe faitau le fuaiupu, ma faamamafa atu a tatou o atu i le malumalu, o le Alii o le a “aoao mai ia te i tatou e uiga i ona ala” ma fesoasoani ia i tatou ia “savavali i ona ala.”

• Fai se auala i luga o le fola, ma i le faaiuga o le auala, tuu se ata o le malumalu faatasi ma se ufiufi i luga o le ata. Tuu tamaiti e savavali i luga o le ala, ma a’o latou faia, fesoasoani ia i latou e toe fai le fuaitau “savali i ona ala.” A taunuu tamaiti i le faaiuga o le ala, tuu atu ia i latou e aveese le ufiufi mai le ata. O le a le uiga o le savali i ala o le Atua?

• Usu faatasi ma tamaiti se pese e faatatau i le malumalu, e pei o le “Ou Te Fia Vaai i le Malumalu” (Tusipese a Tamaiti, 99). Fesoasoani ia i latou e saili upu ma fuaitau i le pese e aoao ai pe o le a le malumalu ma mea tatou te faia iina.

2 Nifae 19:6; 25:26

“Ua Matou Olioli ia Keriso”

Na i ai ia Nifae ma Isaia molimau o le Faaola, ma o la molimau na la maua ai le olioli. Fesoasoani i tamaiti ia latou iloa e te “olioli ia Keriso.”

Gaoioiga e Mafai Ona Fai

• Valaaulia se tamaitiiti e uu se ata o le fanau mai o Iesu Keriso (e pei o le Tusiata o le Talalelei, nu. 30), ma fesoasoani i tamaiti e sue le pepe o Iesu i le ata. Faitau le 2 Nifae 19:6 pe faaali le vitio “Ua Fanau le Faaola--Vitio o le Kerisimasi” (ChurchofJesusChrist.org), ma fai atu i tamaiti e faasino ia Iesu pe a latou faalogo i upu tama ma le atalii. Faamalamalama atu o le perofeta o Isaia, o le na tusia upu o loo i totonu o le 2 Nifae 19:6, na iloa e uiga i le fanau mai o Iesu i le fia selau o tausaga ao lei tupu.

• Faamatala atu se tala e uiga ia Iesu Keriso o aumaia le fiafia i isi, pe faaali se vitio e pei o “Jesus Heals a Man Born Blind” poo le “Suffer the Little Children to Come unto Me” (ChurchofJesusChrist.org). Faailoa taimi fiafia i le tala po o le vitio. Faitau le 2 Nifae 25:26 ma talanoa pe aisea e te “fiafia ai ia Keriso.” Fai atu i tamaiti e talanoa pe faapefea ona aumaia e Iesu ia i latou le olioli.

2 Nifae 21:6–9; 22

O le Meleniuma o le a avea ma taimi o le filemu ma le olioli.

A mavae Lona Afio Mai Faalua, o le a nonofo faatasi Iesu Keriso ma Ona tagata i le vaitaimi o le filemu ua taʻua o le Meleniuma.

Gaoioiga e Mafai Ona Fai

• Faaali i tamaiti ata o manu o loo ta’ua i le 2 Nifae 21:6--7, ma fai atu i tamaiti e faaigoa mai manu. Faamalamalama atu o nei manu e masani lava ona avea ma fili i le isi, ae na aoao mai Isaia pe a mavae le toe afio mai o Iesu Keriso, o le a i ai se taimi o le filemu, ua taʻua o le Meleniuma, o le a le afaina ai se manu. E fa’apefea ona tatou mulimuli i le fa’ata’ita’iga a nei manu i le auala tatou te feutaga’i ai ma isi? Valaaulia tamaiti e tusi ni ata o nei manu o nonofo faatasi filemu.

• Faitau le 2 Nifae 22:5, ma fai atu i tamaiti e fesoasoani ia te oe e sue se pese e faamatalaina ai “mea silisili ona lelei” ua faia e le Alii. O nisi o faataitaiga atonu e aofia ai “E Alofa Lo‘u Tama Faalelagi Ia Te A‘u” (Tusipese a Tamaiti, 16--17) poo le “Ua Sili Oe” (Viiga, nu. 46). Usu faatasi le pese. Faamalamalama atu i le Meleniuma, o le a iloa e tagata uma “mea silisili ona lelei” na faia e le Alii.

Aoao atu le Aoaoga Faavae: Tamaiti Matutua

2 Nifae 12:2–3 

O le malumalu o le maota o le Alii.

E mafai faapefea ona e faʻaaoga nei fuaiupu e fesoasoani ai i tamaiti e tulimatai atu i le aso e mafai ai ona latou auai i le malumalu?

Gaoioiga e Mafai Ona Fai

• Faaali atu se ata o se malumalu (o loo maua i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga ). Fai atu i se tamaitiiti e faitau le 2 Nifae 12:2--3, ma valaaulia isi tamaiti e faalogo mo mafuaaga na ala ai ona fai mai Isaia tatou te manaomia malumalu. E mafai ona e faamalamalama atu na taua e Isaia le malumalu “o le mauga o le fale o le Alii.” Aisea ua avea ai se mauga ma faailoga lelei mo le malumalu?

• Valaaulia tamaiti e tusi se ata o i latou lava o loo o atu i le malumalu. Afai e mafai, ia fai atu i se tasi o alii talavou po o tamaitai talavou i le uarota e ta’u atu i tamaiti pe faape’i mai le faiga o papatisoga mo e ua maliliu i totonu i le malumalu. O lenei tagata talavou po o se isi tagata o le uarota e mafai ona aoaoina tamaiti i le auala e maua ai igoa o o latou augatama o manaomia sauniga o le malumalu.

2 Nifae 15:20 

E taumafai Satani e faafememeai au e uiga i le lelei ma le leaga.

Ua tatou ola i se lalolagi lea, e pei ona valoia e Isaia, e taʻu e tagata le leaga o le lelei ma le lelei o le leaga. E mafai faʻapefea ona e fesoasoani i tamaiti ia latou iloa na taufaasese?

Gaoioiga e Mafai Ona Fai

• Faaali atu i tamaiti se mea oona, pei o se piko po o le tipolo, i totonu o se pepa lole. Faitau faatasi le 2 Nifae 15:20, ma faamatala atu o Satani o loo taumafai e faia mea leaga e foliga lelei. Fesoasoani i tamaiti e mafaufau i auala e faia ai e Satani lenei mea. E faʻapefea ona tatou iloa ana mea taufaasese?

• Faaali le minute muamua ma le afa o le vitio “You Will Be Freed” (ChurchofJesusChrist.org). Aisea e faalafi ai ele faifaiva lana mailei? Aisea e faalafi ai e Satani le agasala?

2 Nifae 17:14; 19:6; 25:23–26

“Ua Matou Olioli ia Keriso”

E manaomia e fanau ona iloa o le talalelei a Iesu Keriso o se mea e olioli ai. E faapefea ona e fesoasoani ia i latou ia “olioli ia Keriso”?

Gaoioiga e Mafai Ona Fai

• Fesoasoani i tamaiti e saili igoa o Iesu Keriso i le 2 Nifae 17:14 ma le 19:6. Atonu e te manao e faamalamalama atu o “Emanuelu” o se tasi o nei igoa, ma o lona uiga “Faatasi le Atua ma i tatou.” O a mea o loo aoao mai e nei igoa taitasi e faatatau ia te Ia?

• Tuu se ata o le Faaola i luga o le laupapa, ma faitau faatasi le 2 Nifae 25:26. Aisea na tautala ma tusi soo ai Nifae e uiga ia Iesu Keriso? Tuu atu i tamaiti taitoatasi e tusi i luga o le laupapa, latalata i le ata o Iesu, se mea e tasi e uiga i le Faaola na aumaia ai ia i latou le olioli.

• Fai atu i tamaiti e mafaufau i se tasi latou te mananao e “faatauanau … ia talitonu ia Keriso” (2 Nifae 25:23). E mafai faapefea ona tatou faailoa atu i isi le olioli e aumaia e le Faaola i o tatou olaga? Tuu atu i tamaiti e tusi pe faatino ni mea latou te ono faia e fesoasoani ai i le tagata na latou mafaufau i ai e talitonu ia Iesu Keriso.

Fautuaina le Aoaoina i le Aiga

Valaaulia tamaiti e mafaufau i se mea se tasi e mafai ona latou faia e faaali atu ai i o latou aiga latou te “olioli ia Keriso.”

Faaleleia o Lo Tatou Aoao Atu

Tuu atu i tamaiti e fatufatu. “Ao e aoaoina tamaiti, faataga i latou e fausia, tusi ata, valivali, tusitusi, ma fatufatuai. O nei mea e sili atu nai lo le na o ni gaoioiga malie—e taua i le aoaoina”(Aoao Atu i le Ala a le Alii, 25).