O Liae o loo autilo i le Liahona

O Liae ma le Liahona, saunia e Joseph Brickey

27 Ianuari –2 Fepuari 

1 Nifae 16--22 

“O Le a Ou Saunia le Ala i o Outou Luma”

O tala musuia i le 1 Nifae 16--22 ua aoaoina upumoni e mafai ona faamanuiaina ai tamaiti i lau vasega. Faitau i mataupu nei ma faamaumau lagona e te mauaina.

Tusi faamaumau Ou Lagona Uunai

aikona e fefaasoaai

Valaaulia le Fefaasoaai

Tusi upu nei i luga o le laupapa, pe faaali atu o latou ata: o le Liahona, le aufana, ma le vaa. Valaaulia ni tamaiti se toatolu e filifili se tasi o upu po o ata ma faasoa atu le vaega o le tala a Nifae o loo talanoaina ai lena mea faitino. Tuu atu le fesoasoani pe a manaomia.

aikona e aoao atu

Aoao atu le Aoaoga Faavae: Tamaiti Laiti

1 Nifae 16:10, 28–29; 18:8–13, 20–22

E mafai e le Alii ona taitai ma faatonu a’u.

Aoao tamaiti e tusa lava pe latou te feagai ma luitau faigata, e mafai e le Alii ona taitaiina i latou (tagai 1 Nifae 16:29).

Gaoioiga e Mafai Ona Fai

• Faaali atu i tamaiti se tapasa, se faafanua, po o se isi mea e fesoasoani tatou te sailia ai lo tatou ala, ma faamalamalama pe faʻapefea ona faʻaaoga nei meafaigaluega. Faatusatusa nei meafaigaluega i le Liahona ao e otootoina le tala i le 1 Nifae 16:10, 28--29 ma le 18:9–13, 20–22. Faamanino atu ina ua le usiusitai le aiga o Liae, e lei galue le Liahona (tagai foi 1 Nifae 18:9--12, 20--22). O a mea e fesoasoani ia i tatou i lenei vaitaimi e saili ai lo tatou ala e toe foi atu ai i le Tama Faalelagi?

• Aumai se atigipusa o loo i ai ni faailoilo o faamatala ai se nofoaga i totonu po o autafa o le falelotu. Faaaoga le atigipusa ma faailoilo e fai ma sui o le Liahona, ma tuu atu i tamaiti e feauauai i le filifiliina o faailoilo ma le mateina po o le a le nofoaga. Ona malaga faatasi lea i le nofoaga. Faamalamalama atu afai tatou te faaalia le faatuatua ma mulimuli i le taitaiga e tuuina mai e le Alii ia i tatou, o le a Ia fesoasoani ia tatou toe foi atu ia te Ia (tagai Alema 37:38--42). E faapefea ona taitaiina i tatou e le Tama Faalelagi i la tatou faigamalaga e toe foi atu ia te Ia?

1 Nifae 16:14–32 

E mafai ona avea au ma faataitaiga lelei i loʻu aiga.

O fegalegaleaiga a Nifae ma lona aiga i taimi faigata e mafai ona fesoasoani i tamaiti ia iloa e ui lava ina laiti i latou, e mafai ona avea i latou ma faataitaiga io latou aiga.

Gaoioiga e Mafai Ona Fai

• Tofi tamaiti taitoatasi e tusi se ata o se mea mai le tala i le aufana gau a Nifae (tagai 1 Nifae 16:14--32), e pei o Nifae, se aufana, po o le Liahona. Ona faaaoga lea o ata e faamatala atu ai le tala i le vasega, ma tuu atu i tamaiti e auauai i le faia o lea mea. E faapefea ona avea i tatou e pei o Nifae pe a feagai o tatou aiga ma taimi faigata?

• Valaaulia tamaiti e oti ese se pepa lapotopoto ma tusi se foliga faanoanoa i le tasi itu ma se foliga fiafia i le isi itu. Ao e faamatalaina le tala i le aufana gau a Nifae, ia valaaulia i latou e faaaoga foliga e faaali ai pe na faapefea lagona o le aiga o Nifae i vaega eseese o le tala. Na faapefea ona fesoasoani Nifae e faafiafia lona aiga? O le a se mea e mafai ona tatou faia e faafiafia ai o tatou aiga?

1 Nifae 17:7–19; 18:1–4

E mafai e le Tama Faalelagi ona fesoasoani ia te au e fai mea faigata.

E pei o Nifae, o tamaiti o loo e aoaoina o loo aoao e fai mea e foliga faigata. O le aafiaga a Nifae e mafai ona fesoasoani ia latou iloa ai o le a fesoasoani le Tama Faalelagi ia i latou pe a latou ole atu.

Gaoioiga e Mafai Ona Fai

• Tau atu i tamaiti le tala o le poloaiina o Nifae e fau se vaa, faaaoga le 1 Nifae 17:7–19 ma le 18:1–4. E mafai foi ona e faaaogaina le “Mataupu 7: O le Fausiaina o le Vaa” (Tala o le Tusi a Mamona, 21--22) poo le vitio talafeagai i le vaega o Vitio o le Tusi a Mamona i luga o le ChurchofJesusChrist.org. O le itulau o gaoioiga o lenei vaiaso e mafai ona faamalosia ai le mataupu faavae faapea na fesoasoani le Tama Faalelagi ia Nifae, ma o le a Ia fesoasoani ia i tatou.

• Usu faatasi le fuaiupu lona lua o le “Lototele o Nifae” (Tusipese a Tamaiti, 64--65). O le a le mea na fesoasoani ia Nifae e maua ai le lototele ina ua ulagia o ia e ona uso mo le taumafai e fausia le vaa?

aikona e aoao atu

Aoao atu le Aoaoga Faavae: Tamaiti Matutua

1 Nifae 16:10, 28–29; 17:13–15; 18:8–13, 20–22

A ou tausia poloaiga, e taitaiina aʻu e le Alii.

Faaaoga le tala o le aiga o Liae o loo taitaia e le Liahona e faaali atu ai i tamaiti pe faapefea ona taitaiina i latou e le Atua ao latou taumafai e faia Lona finagalo.

Gaoioiga e Mafai Ona Fai

• Filifili se tasi pe sili atu o fasifuaitau nei e faitau ma tamaiti: 1 Nifae 16:10, 28–29; 17:13–15; ma 18:8–13, 20–22. Fai atu ia i latou e vaavaai mo mea e tatau ona tatou faia e maua ai le taitaiga ma faatonuga mai le Atua ma talanoaina mea ua latou aoaoina.

• A uma ona iloiloina tala i le 1 Nifae 16--18, faatalanoa ni nai tamaiti e peiseai na latou malaga faatasi ma le aiga o Liae. E mafai ona e faia fesili faapenei: Aisea na e lotofaafetai ai mo le Liahona? O le a se mea na e manaomia e faia ina ia galue le Liahona? (tagai 1 Nifae 16:28--29). Valaaulia le vasega e talanoaina mea na tuuina mai e le Alii e taitaiina ai i tatou i o tatou aso.

• Fai atu i tamaiti e mafaufau pe faapefea ona latou faaaogaina le tala o le Liahona e fesoasoani ai i se uo e manaomia ona faia se filifiliga taua. Fautua atu faapea e faaopoopo atu i le 1 Nifae 16:10, 26–31 ma le 18:9–22, e mafai foi ona latou tagai i le Alema 37:38--44. Faasoa atu se aafiaga na fesoasoani ai le Tama Faalelagi ia te oe i se taimi faigata, pe valaaulia foi tamaiti e faasoa mai se aafiaga. O le a le mea e tatau ona tatou faia ina ia maua ai Lana fesoasoani?

1 Nifae 16:14–39; 18:1–5

O o’u uiga ma filifiliga e mafai ona i ai se aafiaga lelei i loʻu aiga.

O le faatuatua o Nifae o se faamanuiaga maoae pe a feagai lona aiga ma tofotofoga. E mafai faapefea ona e fesoasoani i tamaiti e aoao mai i lana faataitaiga?

Gaoioiga e Mafai Ona Fai

• Valaaulia tamaiti e tusi ni ata e faaalia ai le tala i le aufana gau a Nifae (tagai 1 Nifae 16:14--39). Toe faamanatu le tala ma i latou, pe a manaʻomia. Ao latou faasoa atu a latou ata, fesoasoani ia i latou e faailoa mai ni auala na faamanuiaina ai le aiga a Nifae ona o lona faamaoni. Valaaulia tamaiti e mafaufau loloto i luitau o loo feagai ma i latou po o latou aiga. O le a le mea e mafai ona latou faia e mulimuli ai i le faataitaiga a Nifae?

• Faitau faatasi ni nai fuaiupu mai le 1 Nifae 16:21--32. Ia talanoaina nisi o sini e ono i ai i aiga o tamaiti, e pei o le fai soo o afiafi faaleaiga po o tatalo faaleaiga. E mafai faapefea e tamaiti ona fesoasoani io latou aiga ia ausia nei sini? Valaaulia i latou e fuafua e fai se mea se tasi e fesoasoani ai io latou aiga e ausia a latou sini i lenei vaiaso.

1 Nifae 19:22–24 

E mafai ona ou faatatauina tusitusiga paia i loʻu olaga.

Fesoasoani i tamaiti ia latou iloa o tala o loo i totonu o tusitusiga paia e sili atu nai lo tala---e i ai mataupu faavae e mafai ona faamanuiaina ai o latou olaga.

Gaoioiga e Mafai Ona Fai

• Fai atu i se tamaitiiti e faitau leotele le 1 Nifae 19:22--24 , fesili i tamaiti pe o le a so latou manatu o le a le uiga o le “faatatauina tusitusiga paia uma” ia i tatou lava. Fesoasoani ia i latou ia iloa pe faapefea ona faatatau e Nifae se tala faatusitusiga paia i lona aafiaga o le aumaia o papatusi apamemea (tagai 1 Nifae 4:1--4; tagai foi Esoto 14). Na faapefea e le manatuaina o lenei tala ona fesoasoani ia Nifae ma ona uso?

• Iloilo nisi o tala na aoaoina e tamaiti e uiga ia Liae ma lona aiga mai le 1 Nifae, ma valaaulia i latou e faasoa mai mea na latou aoaoina mai nei tala. Fesoasoani ia i latou e mafaufau i tulaga io latou olaga atonu e tutusa ma nei tala. Mo se faataitaiga, na talosagaina e le Alii ia Nifae e fau se vaa e faamanatu ai ia i latou taimi na manaomia ai ona latou faia se mea faigata ma na saili atu i le Alii mo le fesoasoani.

aikona e aoaoina

Fautuaina le Aoaoina i le Aiga

Valaaulia tamaiti e filifili se tala mai le 1 Nifae 16--22 ma faasoa ma o latou aiga pe faapefea ona latou “faatatau” lena tala i o latou olaga.

Faaleleia o Lo Tatou Aoao Atu

Faaaoga tala. O tala e fesoasoani i tamaiti ia malamalama ai i mataupu faavae o le talalelei aua latou te faaalia pe faapefea ona ola isi i na mataupu faavae.

itulau o gaoioiga: E fesoasoani le Atua ia te a’u e usitai i Ana poloaiga