Atamu ma Eva, saunia e Douglas Fryer

3--9 Fepuari

2 Nifae 1--5 

“Na Matou Ola e Tusa ma le Ala o le Fiafia”

Na aoaoina e Liae ana fanau taitasi e tusa ma o latou manaoga taitoatasi ma tulaga. Mulimuli i lana faataitaiga a’o e sauni e a’oa’o tamaiti i lau vasega.

Tusi faamaumau Ou Lagona Uunai

Valaaulia le Fefaasoaai

A uma ona faamatala atu na aoao e Liae lona aiga e uiga i le saolotoga e faia ai a tatou lava filifiliga, ia valaaulia tamaiti e faasoa mai ni aafiaga na latou oo i ai ao filifili le mea sao. O a ni o latou lagona ina ua uma ona latou faia lena filifiliga? E mafai faʻapefea ona latou manatua e filifili le saʻo i le lumanaʻi?

Aoao atu le Aoaoga Faavae: Tamaiti Laiti

2 Nifae 1:20 

E faamanuiaina a’u pe a ou usitai.

O le mataupu faavae o loo aoaoina i lenei fuaiupu---o le usiusitai e aumaia ai faamanuiaga---o loo faaalia soo i le Tusi a Mamona. Mafaufau pe mafai faapefea ona e fesoasoani i tamaiti ia latou iloaina io latou lava olaga.

Gaoioiga e Mafai Ona Fai

• Fai i tamaiti e fesoasoani ia te oe e faamatala le upu poloaiga ma fai se lisi o poloaiga. Faitau le 2 Nifae 1:20, ma faamamafa atu o le a tatou “manuia,” pe faamanuiaina, pe a tatou tausia poloaiga. O a ni o tatou lagona pe a tatou tausia ia poloaiga?

• Faaali atu i tamaiti mea e ofoina atu le puipuiga, e pei o seevae, pulou, ma totigilima. Tuu atu ia i latou e faataitai i latou. E faapefea e nei mea ona puipuia i tatou? Tau atu ia i latou o poloaiga a le Tama Faalelagi e mafai ona puipuia ai i tatou mai mea matautia faaleagaga. Faasoa se mea na tupu ina ua puipuia oe i le mulimuli i poloaiga.

2 Nifae 2:11, 16, 27 

Na tuuina mai e le Atua ia te au le saolotoga e filifili ai.

Ona o a la filifiliga, sa tatau ai ona tuua e Atamu ma Eva le Faatoaga o Etena. E mafai faapefea ona e aoaoina tamaiti faapea o filifiliga a Atamu ma Eva ua mafai ai ona tatou faaaogaina lo tatou faitalia e filifili le Tama Faalelagi i le aso?

Gaoioiga e Mafai Ona Fai

• Tusi se ata o se tagata saoloto ma se ata o se tagata pagota (atonu o se tagata i le falepuipui), ma valaaulia tamaiti e tusi i le ata sao pe a e faitauina upu saoloto ma le faatagataotauaina i le 2 Nifae 2:27. Faamamafa le fuaiupu “saoloto e filifili,” ma valaaulia tamaiti taitasi e toe fai.

• Toe faamanatu faatasi ma tamaiti le tala ia Atamu ma Eva (tagai 2 Nifae 2:17--19; tagai foi “Mataupu 3: Atamu ma Eva,” Tala o le Feagaiga Tuai, 15--18, poo le vitio talafeagai i luga o le ChurchofJesusChrist.org) ma le filifiliga na la faia i le Faatoaga o Etena. Fesoasoani i tamaiti e lisi nisi o filifiliga latou te faia i aso uma. Molimau atu na tuuina mai e lo tatou Tama Faalelagi ia i tatou le saolotoga e filifili ai i le va o le lelei ma le leaga, ma valaaulia tamaiti e feosofi i luga ma lalo pe patipati o latou lima e faamanatu ai le saoloto e filifili.

• Fai se taaloga lea e te fai atu ai se upu (e pei o le malamalama) ae fai mai e tamaiti lona faafeagai (pogisa). Toe fai le gaoioiga lenei mo ni nai taimi. Ina ia fesoasoani i tamaiti ia malamalama pe aisea e fesoasoani ai ia i tatou le i ai o faafeagai i le faiga o filifiliga, faitau le afa muamua o le 2 Nifae 2:11 ma le 2 Nifae 2:16. Taʻu i tamaiti ni tala e uiga i se tamaitiiti ua faaosoosoina e faia se filifiliga sese. Fesoasoani i tamaiti e mafaufau pe o le a le faafeagai o lena filifiliga, ma valaaulia i latou e faatino. Molimau atu e faamanuiaina i tatou e le Tama Faalelagi pe a tatou filifili le mea tonu.

• Usu faatasi se pese e faatatau i le faiga o filifiliga, e pei o le “O Loo Ou Taumafai e Avea e Pei o Iesu” poo le “Filifili Le Ala Sa‘o” (Tusipese a Tamaiti, 40--41, 82), ma fesili atu i tamaiti po o a mea ua latou aoaoina mai le pese e uiga i le faia o filifiliga.

Aoao atu le Aoaoga Faavae: Tamaiti Matutua

2 Nifae 1:20 

E faamanuiaina a’u pe a ou usitai.

A maua e tamaiti le faatuatua o le a faamanuiaina i latou e le Atua mo le tausia o poloaiga---tusa lava pe le oo mai na faamanuiaga i le taimi lava lena---e sili atu ona faigofie mo i latou le faia o filifiliga tonu.

Gaoioiga e Mafai Ona Fai

• Fesoasoani i tamaiti e toe faamanatu nisi o filifiliga na faia e Nifae ma ona uso. Mo ni nai faataitaiga, tagai 1 Nifae 2:11–16; 3:5–7; ma le 18:9–11. Valaaulia i latou e faitau le 2 Nifae 1:20 faatasi ma faasoa mai pe aisea latou te manatu ai o le a tuuina atu e Liae lenei savali i lana fanau.

• Tusi fuaitau mai le 2 Nifae 1:20 i luga o ni fasi pepa, ma talanoa pe o le a le uiga o na fuaitau. Valaaulia tamaiti e tuu ia fasi pepa i le faasologa sao e faaaoga ai le fuaiupu. Ina ia faaalia le eseesega i le va o le faamanuiaina ma le vavae ese, faʻaali atu i tamaiti se laau lauusiusi ma se laulaʻau poʻo se lala na vavae ese mai le laau. O le a le eseesega i le va o se laulaau o loʻo i luga o le laau ma le tasi ua vavae ese? E faapefea ona pei i tatou o le laulaau i luga o le laau pe a tatou usitai i poloaiga a le Atua? Valaaulia tamaiti e faamaumau i se api o talaaga auala e faamanuiaina ai i latou e le Atua pe a latou filifili le mea saʻo.

2 Nifae 2:22--28 

Na tuuina mai e le Atua ia te au le saolotoga e filifili ai.

Na laveaiina i tatou e Iesu Keriso mai le oti faaletino ma le oti faaleagaga (vavae ese mai le Atua ona o agasala) e ala i Lana Togiola ma le Toetu. Ina ia mafai ona tatou toe nonofo faatasi ma le Tama Faalelagi, e tatau ona tatou faaaoga la tatou faitalia e faaauau ai pea ona salamo ma taumafai e ola amiotonu.

Gaoioiga e Mafai Ona Fai

• Tuu i luga se ata o Atamu ma Eva (tagai Tusiata o le Talalelei, nu. 4), ma valaaulia tamaiti e faasoa mai mea ua latou iloa e uiga i le mea na tupu ia Atamu ma Eva i le Faatoaga o Etena. Fesoasoani i tamaiti e sue tali i le 2 Nifae 2:22--27. Faamalamalama atu ona o le filifiliga a Atamu ma Eva, ua faamanuiaina ai i tatou e o mai i le lalolagi ma faaaoga lo tatou faitalia e faia ai filifiliga lelei ma salamo e ala i le Togiola a Keriso pe a tatou faia filifiliga sese.

• Tusi upu o le 2 Nifae 2:27 i luga o le laupapa. Fesoasoani i tamaiti e tauloto le fuaiupu e ala lea i le toe fai ma feauauai e solo upu i taimi uma latou te toe faia ai. Fesoasoani i tamaiti e mafaufau pe faapefea se olaga e aunoa ma filifiliga. Aisea latou te faafetai ai mo le faitalia?

• Valaaulia tamaiti e faasoa mai se aafiaga ina ua latou faia se filifiliga lelei. O a ni o latou lagona ina ua uma ona latou faia lena filifiliga? O le a se mea e mafai ona tatou faia e fesoasoani ai ia i tatou ia filifilia le saʻo pe a faaosoosoina i tatou e faia se mea sese? Mafaufau e usu se pese e faatatau i le faiga o filifiliga, e pei o le “Filifili Tau o Mea Tonu” (Viiga, nu. 149), ma valaaulia tamaiti e faasoa mai mea ua latou aoaoina mai le pese.

2 Nifae 3:6–24 

O Iosefa Samita o se “tagata vaai filifilia.”

I le 2 Nifae 3 na taʻua e Liae se valoaga e uiga i le Perofeta o Iosefa Samita. E mafai ona e faʻaaogaina lenei mea o se avanoa e aoao ai tamaiti e uiga i lana misiona i aso e gata ai.

Gaoioiga e Mafai Ona Fai

• Valaaulia tamaiti e suesue le 2 Nifae 3:6--24 mo ni faailo e faatatau poo ai le perofeta o loo tautalagia. Tusi faailo i luga o le laupapa. Aisea ua taʻua ai Iosefa Samita o se “tagatavaai filifilia”? O le a le mea na faia e Iosefa Samita e “aoga tele i [ona uso]”? (fuaiupu 7).

• Usu se viiga e faatatau ia Iosefa Samita, e pei o le “Vi‘ia Lē na Fetaia‘i ma Ieova” (Viiga, nu. 15), pe matamata i se vitio o loo faaalia ai vaega eseese o lana misiona, e pei o na o loo maua i le history.ChurchofJesusChrist.org/article/joseph-smith-video-downloads. Fesili atu i tamaiti pe aisea latou te faafetai ai mo le Perofeta o Iosefa Samita.

Fautuaina le Aoaoina i le Aiga

Uunai tamaiti e maitau avanoa latou te maua e fai ai filifiliga i lenei vaiaso. Valaaulia i latou ia saunia e faasoa atu i le vaiaso a sau filifiliga na latou faia ma iuga o a latou filifiliga.

Faaleleia o Lo Tatou Aoao Atu

E mafai ona iloa e tamaiti le uunaiga a le Agaga. Aoao atu i tamaiti o lagona o le filemu, alofa, ma le mafanafana latou te mauaina, pe a latou talanoa pe usuina le pese e uiga ia Iesu Keriso ma Lana talalelei e mai le Agaga Paia. E mafai e nei lagona ona fausia a latou molimau.