Talafaatusa o le Laau Olive, saunia e Brad Teare

16--22 Mati

Iakopo 5–7

E galue faatasi le Alii ma i tatou.

Suesue, mafaufau loloto, ma tatalo ia iloa pe mafai faapefea ona sili atu ona e aoaoina tamaiti i upumoni o loo maua i le Iakopo 5--7. Tusi faamaumau soo se lagona e te mauaina.

Tusi faamaumau Ou Lagona Uunai

Valaaulia le Fefaasoaai

Ina ia amataina se talanoaga e uiga i savali o loo maua i le Iakopo 5--7, valaaulia tamaiti e talanoa e uiga i mea io latou olaga e fesoasoani latou te lagona ai le alofa o le Tama Faalelagi ma Iesu Keriso. E faapefea ona tatou faaalia lo tatou alolofa mo isi?

Aoao atu le Aoaoga Faavae: Tamaiti Laiti

Iakopo 5

E auauna atu faifeautalai i fanau a le Tama Faalelagi.

Mafaufau loloto pe mafai faapefea ona e faasoa atu le talafaatusa o laau olive i se auala e mafai ona malamalama ai tamaiti.

Gaoioiga e Mafai Ona Fai

• Faaali se ata o se laau, pe savali i fafo e matamata i se laau, ma iloilo puupuu vaega autu o le talafaatusa o laau olive i totonu o le Iakopo 5. Mo se faataitaiga: o le Alii o le tovine (e mafai ona suitulaga ia Iesu) na galue malosi e tausi ana laau olive (lea e mafai ona avea ma sui o tagata i luga o le fogaeleele) ona sa alofa tele o Ia ia te i latou. Na ia valaauina tagata faigaluega (e mafai ona suitulaga i faifeautalai) e fesoasoani i le tausiga o laau. Filifili se fuaiupu e tasi pe lua mai le Iakopo 5 e faitau atu i tamaiti (e pei o fuaiupu 71--72).

• Fesili atu i tamaiti pe latou te iloaina se tasi na auauna atu faamisiona, pe talanoa e uiga i se tasi e te iloa. Fesoasoani i tamaiti e sue i luga o se faafanua ia nofoaga o loo auauna ai na faifeautalai. Faamalamalama atu na faatusaina e Iakopo le lalolagi i se vaega o laau olive. O laau e pei o tagata i luga o le fogaeleele, ma o le tausiga o na laau e pei lava o mea e faia e faifeautalai mo fanau a le Atua O le a le mea e fai e faifeautalai e faamanuia ai fanau a le Tama Faalelagi? Vaavaai mo ni tali i lenei fesili i se pese e pei o “Tofia e Auauna” (Tusipese a Tamaiti, 94--95). E mafai faapefea ona avea i tatou e pei o faifeautalai?

O le galuega faafaifeautalai o se tasi lea o auala e mafai ai ona tatou fesoasoani i fanau a le Atua e toe foi atu ia te Ia.

Iakopo 6:5

E alofa le Tama Faalelagi ia te a’u.

E mafai faapefea ona e aoaoina lau vasega e alofa le Atua i Ana fanau uma ma faaloaloa atu Lona “aao o le alofa mutimutivale” ia i latou?

Gaoioiga e Mafai Ona Fai

• Valaaulia tamaiti e fusi i latou lava. O a ni o tatou lagona pe afai tatou te fusiina se tasi tatou te alolofa i ai? Faitau le Iakopo 6:5 i tamaiti, ma faamalamalama atu o fuaitau “e pipii mai [le Atua] ia te outou” ma “faaloaloa atu lona aao o le alofa tunoa ia te outou” e aoao mai ai e alofa le Tama Faalelagi ia i tatou ma e finagalo ia tatou toe foi atu ia te Ia i se aso.

• Usu faatasi se pese e faatatau i le alofa, e pei o le “Le Alofa o lou Faaola” (Tusipese a Tamaiti, 42--43). Valaaulia tamaiti e ta’u mai mea e fesoasoani latou te lagonaina ai le alofa o le Faaola.

Iakopo 7:1–23

E mafai ona ou tu atu mo le mea ou te iloa e moni.

O Iakopo o se faataitaiga sili ona lelei o se tasi na fesoasoani lana molimau maumaututu ia te ia e puipuia le upumoni i le feagai ai ma feteenaiga.

Gaoioiga e Mafai Ona Fai

• Faamatala atu le tala ia Iakopo ma Serema (Iakopo 7:1--23) i se auala e mafai ai e tamaiti ona malamalama. E mafai ona e faaaogaina le “Mataupu 10: Iakopo ma Serema” (Tala o le Tusi a Mamona, 27--29, po o le vitio talafeagai i luga o le ChurchofJesusChrist.org). Toe faamatala le tala, ae o le taimi lenei tuu atu i tamaiti e fesoasoani e faʻatumu faamatalaga. Fesili atu ia i latou po o a mea na latou aoaoina mai ia Iakopo. E mafai faapefea ona tatou mulimuli i Lana faataitaiga?

• Valaaulia tamaiti e usu se pese e faatatau i le filifilia o le mea tonu, e pei o le “Ia Fai Le Mea Tonu” po o le “Tu Mo Le Mea Tonu” (Tusipese a Tamaiti, 80 81). Fai atu ia i latou e tutu i luga soo se taimi latou te usuina ai upu e pei o le tonu po o le faamaoni.

Aoao atu le Aoaoga Faavae: Tamaiti Matutua

Iakopo 5

E popole le Alii mo Ona tagata.

Na faasoa atu e Iakopo le talafaatusa o laau olive e fesoasoani e valaaulia Ona tagata e o mai ia Keriso. E mafai ai ona ausia lenei lava faamoemoega mo tamaiti e te aoaoina.

Gaoioiga e Mafai Ona Fai

• Faitau ma faamatala atu i tamaiti fuaiupu autu o loo tauaofai ai le talafaatusa o laau olive, e pei o Iakopo 5:3–4, 28–29, 47, and 70–72, ma valaaulia tamaiti e tusi ata o mea o loo faamatala mai e nei fuaiupu. O le a se mea ua tatou aoaoina mai nei fuaiupu e faatatau i lagona o le Alii e uiga i Ona tagata? Fai atu i tamaiti e faafoliga o loo tausia se laau olive ao e otootoina fuaiupu 61--71 (atonu o le a latou faatino le eliina o se mea, faasusu, ma isi). Valaaulia ni nai tamaiti e faitau le Iakopo 5:11, 41, 47, and 72, vaavaai mo mea o faaalia ai le tele o le alofa o le Alii o le tovine (Iesu Keriso) i laau. O le a le mea na faia e le Faaola e faaali ai Lona popole mo i tatou? O le vitio “Old Testament Olive Vineyard” (ChurchofJesusChrist.org) e mafai ona fesoasoani i lenei gaoioiga.

• Lisi nisi o faailoga mai le Iakopo 5 i luga o le laupapa, e pei o le tovine, le alii o le tovine, le auauna, ma laau olive. Ona fai lea o se isi lisi, i soo se faasologa, o mea e ono faatusa i ai nei faailoga, e pei o le lalolagi, le Faaola, taitai o le Ekalesia po o faifeautalai, ma tagata o le Atua. Faitau faatasi fuaiupu mai le Iakopo 5 o taua nei faailoga, ma fesoasoani i tamaiti e tusi laina i luga o le laupapa e fesootai ai ia faailoga ma a latou uiga talafeagai (tagai, mo se faataitaiga, fuaiupu 3–4, 28–29, 47, 70–72).

Iakopo 6:4--5

E alofa le Tama Faalelagi ia te au ma o le a faamagalo au pe a ou salamo.

E taua le fesoasoani i tamaiti o loo e aoaoina ina ia malamalama e alofa le Atua ia i latou ma o le a ia faamagalo pea i latou a o latou salamo faamaoni.

Gaoioiga e Mafai Ona Fai

• Fatu se siata i le laupapa e i ai ni koluma e lua, faaigoa Tama Faalelagi ma Tatou. Faitau faatasi le Iakopo 6:4--5, ma fai atu i le afa o le vasega e suʻe fuaitau e faatatau i le Atua ma le isi afa e vaavaai mo fuaitau e faatatau ia i tatou. Faamaumau mea latou te maua i le koluma talafeagai. Fesoasoani ia i latou e faamatala uiga o upu latou te le malamalama i ai.

• Faasoa atu le tala a Elder Allen D.Haynie e faatatau e uiga i le faapalapala i totonu o se lua pala i lana savali “Manatua Le Ua Tatou Faalagolago I Ai” (Ensign po o le Liahona, Nov. 2015, 121--23). O le a se mea ua aoao mai e lenei tala ia i tatou e uiga i mea e tatau ona tatou faia ina ia faasaoina i tatou i le malo o le Atua? O le a se isi mea tatou te aʻoaʻoina mai le Iakopo 6:4--5?

Iakopo 7:1–23

E mafai ona ou tu atu mo le mea ou te iloa e moni.

E faapefea ona e musuia le fanau e tutu atu mo le upumoni e pei ona faia e Iakopo?

Gaoioiga e Mafai Ona Fai

• Valaaulia tamaiti e faatino le fegalegaleaiga i le va o Iakopo ma Serema, faaaoga le Iakopo 7:1--23 o se taiala. Pe faaali le vitio “Jacob and Sherem” (ChurchofJesusChrist.org). Fai atu i tamaiti e talanoa e uiga ia latou vaega e fiafia i ai o le tala. Na faapefea ona tu atu Iakopo mo le mea na ia iloa e sao? Valaaulia tamaiti e faasoa mai ni aafiaga ina ua latou tutu mo le mea sao, pe faasoa atu sou aafiaga.

• Valaaulia tamaiti e usu se pese e faatatau i le filifilia o le mea tonu, e pei o le “Ia Fai Le Mea Tonu” po o le “Tu Mo Le Mea Tonu” (Tusipese a Tamaiti, 80 81). Vaevae i latou i ni vaega, ma valaaulia i latou e fatu se fuʻa musuia po o se pepa lautele e fai ma sui o se mea latou te tutu ai pe talitonu i ai.

Fautuaina le Aoaoina i le Aiga

Valaaulia tamaiti e mafaufau i se auala e mafai ona latou fesoasoani ai io latou aiga ia lagona le alofa o le Faaola-mo se faataitaiga, e ala i le faamalamalamaina o mea na latou aoaoina e uiga i le auala na tausia ai e le Alii o le tovine ana laau olive.

Faaleleia o Lo Tatou Aoao Atu

E fiafia tamaiti e faasoa mai mea ua latou aoaoina. E ui ina laiti tamaiti, e mafai e tamaiti ona faamalolosia tagata o o latou aiga. Fautuaina i latou e faasoa atu i o latou aiga mea na latou aoao i le Peraimeri. (Tagai Aoao Atu i le Ala a le Faaola, 30.)