Mataupu 10
O Iakopo ma Serema
Na fai atu Nifae ia Iakopo e tusi mea o le a fesoasoani i tagata e talitonu ai ia Iesu Keriso.
Na tuuina atu e Nifae ia Iakopo le pule e avea ai ma ositaulaga i le Ekalesia ma aoao atu ai le afioga a le Atua i tagata Sa Nifae.
Ina ua mavae le maliu o Nifae, e toatele tagata Sa Nifae na amioleaga. Na aoao atu e Iakopo tagata e salamo mai mea leaga ua latou faia.
O se tagata amioleaga e igoa ia Serema na ia aoao atu i tagata Sa Nifae e aua le talitonu ia Iesu Keriso.
Na tau atu e Serema i tagata o le a leai se Keriso. E toatele tagata na talitonu ia Serema.
Na aoao atu e Iakopo tagata e talitonu ia Keriso. Na manao Serema e finau ma Iakopo ma tauanau atu ia te ia e leai se Keriso.
E le i mafai ona suia le faatuatua o Iakopo ia Iesu Keriso. Na vaai o ia i agelu ma faalogo foi i le siufofoga o le Alii. Na ia iloa o le a afio mai Iesu.
Sa i ai le Agaga Paia ia Iakopo a o ia tuuina atu ia Serema lana molimau e uiga ia Iesu Keriso.
Na manaomia e Serema se faailoga. Na manao o ia e faamautinoa atu e Iakopo o loo i ai se Atua. Na fia vaai o ia i se vavega.
E le i ole atu Iakopo i le Atua mo se faailoga. Na ia faapea mai ua uma ona iloa e Serema e moni mea na aoao mai e Iakopo.
Na faapea mai Iakopo afai e taia e le Atua Serema, o le a avea lena ma faailoga o le mana o le Atua.
Na faafuasei ona pau Serema i le eleele. E le i toe tu o ia mo ni aso se tele.
Na vaivai Serema ma ia iloa o le a oo le oti ia te ia. O lea na ia faapotopoto ai tagata.
Na ia ta’u atu ia i latou sa pepeloo ia. Na ia faapea atu e tatau ona latou talitonu ia Iesu Keriso.
Ina ua maea ona talanoa atu Serema i tagata, ona oti ai lea o ia. Na lagona e tagata uma le mana o le Atua, ma na pauu i latou uma i le eleele.
Na amata ona salamo tagata ma faitau i tusitusiga paia. Na latou ola i le alofa ma le filemu. Sa fiafia Iakopo ma ua ia iloa ua tali mai le Atua i ana tatalo.