Mataupu 13
O Senifa
Na tuua e Senifa ma isi tagata Sa Nifae o latou aiga i Saraemila ae malaga atu i le nuu o Nifae, lea o loo nonofo ai isi tagata Sa Nifae.
Na latou mauaina tagata Sa Lamana o nonofo ai iina. Na malaga atu Senifa ma ni alii se toafa i le aai e talanoa i le tupu. Na latou talosagaina le Tupu o Lamana pe mafai ona latou nonofo i lona nuu.
Na fai atu le Tupu o Lamana o le a aveatu ma i latou isi ona aai e lua. Na manao le tupu e nonofo i lona nuu ina ia avea ai i latou ma ana pologa.
Na fausia e tagata o Senifa o latou fale ma fausia ni pa faataamilo i o latou aai. Na latou totoina ni laau eseese se tele. Na i ai foi a latou lafu manu.
Na ta’u atu e le Tupu o Lamana i ona tagata ua malolosi tele tagata o Sa Nifae. E toatele Sa Lamana na o atu e osofai tagata Sa Nifae ma gaoia a latou manu ma fua o a latou faatoaga.
Na sosola tagata Sa Nifae i le aai o Nifae. O iina na faaauupegaina ai e Senifa tagata i aufana ma u fanafana, pelu, uatogi, ma maatā. Ua latou o atu e tau ma Sa Lamana.
A o le i amataina la latou taua, na tatalo tagata Sa Nifae ma ole atu i le Atua mo se fesoasoani. Na faamanuiaina e le Atua tagata Sa Nifae i le malosi tele, ma na latou faatoilaloina tagata Sa Lamana.
Ina ua maea le taua, na tuu e Senifa ni leoleo e faataamilo i le aai o Sa Nifae. Na manao o ia e puipuia ona tagata ma a latou lafu manu mai tagata Sa Lamana.
Na ola filemu tagata Sa Nifae mo le tele o tausaga. Na galulue tama tane uma i le fanua, a o fafine i le gaosiina o filo ma le suiina o lavalava.
Na maliu le Tupu o Lamana, ma avea lona atalii ma tupu. Na auina atu e le tupu fou ana fitafita e tau ma tagata Sa Nifae.
Na toe maua foi e tagata Sa Nifae le malosi mai le Alii. Na latou fasiotia nisi o tagata Sa Lamana, ae na sosola ese le toatele.