Mataupu 42
O Faailoga O le Faasatauroina O Keriso
Ua tuanai atu le 33 tausaga talu ona vaaia e tagata faailoga o le soifua mai o Iesu Keriso.
Ua latou faatalitali nei i faailoga o lona maliu: aso e tolu o le pogisa.
O isi e le i talitonu o le a oo mai lea faailoga. Na latou feupua’i ma i latou o e na talitonu.
Na oo mai se āfā tele i se tasi o aso. Sa i ai se matagi matautia.
Na emo uila, ma sa luluina le lalolagi atoa e faititili.
Na mu le nuu o Saraemila. Na goto i le moana loloto le nuu o Moronae. Na tanumia le nuu o Moronaea.
Na luluina le lalolagi atoa e se mafuie. Na faaumatia alatanu, ma ua pauu fale. Ua faatafunaina le tele o aai, ma e toatele tagata na maliliu.
E tolu itula o agi le afa ma le mafuie.
Ina ua uma le afa ma le mafuie, na ufitia le eleele e se pogisa tele. Na lē toe i ai se malamalama i soo se mea. Ma ua mafai ona lagona e tagata le pogisa.
E tolu aso na i ai le pogisa. E le i mafai ona mumu ni moligao, ma e le i toe vaaia e tagata le la, masina po o fetu.
Na tagi auē tagata ona o le pogisa, faatafunaga ma le oti. Na faanoanoa i latou i lo latou lē salamo i a latou agasala.
Ona faalogoina lea e tagata o le siufofoga o Iesu Keriso.
Na ta’u atu e Iesu faatamaiga matautia ua oo i le nuu. Na ia faapea mai o tagata sili ona amioleaga ia ua fasiotia.
Na ia fetalai mai o i latou e lē i fasiotia e tatau ona salamo. Afai latou te salamo ma o mai ia te ia, o le a ia faamanuiaina i latou.
Na maofa tagata ina ua latou faalogo i le siufofoga, ma ua taofia ai lo latou fetagisi. Na filemu mea uma mo le tele o itula.
Ona toe fetalai mai lea o Iesu ma faapea mai, na ia taumafai i taimi uma e fesoasoani i tagata. Afai o le a latou salamo i le taimi nei, o le a mafai lava ona latou toe foi atu ia te ia.
Ina ua mavae aso e tolu, e le i toe i ai se pogisa. Na fiafia tagata ma olioli ma faafetai atu i le Alii.