Mataupu 46

Ua Aoao Atu Iesu Keriso ma Tatalo Faatasi ma Sa Nifae

O tagata Sa Nifae na vaai ia Iesu Keriso ua latou ta’u atu i a latou uo e toe foi mai o ia i le aso e sosoo ai. Na galulue malosi le toatele o tagata ina ia oo atu i le mea o le a i ai Iesu.

3 Nifae 19:2–3

O le taeao na sosoo ai na aoao ai e Nifae ma isi soo le faapotopotoga o tagata. Ona tatalo ai lea o le au soo ina ia latou maua le Agaga Paia.

3 Nifae 19:6–9

Na alu ifo Nifae i le vai ma ua papatisoina ai o ia. Ona ia papatisoina lea o isi soo.

3 Nifae 19:11–12

Ina ua uma ona papatisoina le au soo, na latou mauaina le Agaga Paia. Na foliga mai ua siosiomia i latou e le afi, ma ua o ifo agelu mai le lagi ma auauna ia i latou.

3 Nifae 19:13–14

A o faatasi agelu ma le au soo, na afio ifo Iesu ia i latou.

3 Nifae 19:15

Na fetalai atu Keriso i tagata Sa Nifae uma e tootutuli i le eleele. Na fai atu o ia i ona soo e tatalo.

3 Nifae 19:16–17

A o tatalo i latou, na maliu ese Iesu mai ia te i latou ma tootuli e tatalo atu i le Tama Faalelagi.

3 Nifae 19:18–20

Na faafetai atu Iesu i le Tama Faalelagi mo le foaiina atu o le Agaga Paia i ona soo. Ona ia ole atu lea e foai atu le Agaga Paia i soo se tasi e talitonu i upu a ona soo.

3 Nifae 19:20–21

Na faamanuia e Iesu ona soo a o latou tatalo. Na silasila atu o ia ma le fiafia ia te i latou, ma ua sinasina foi i latou faapei o ona fofoga ma ona laei.

3 Nifae 19:25

Na ia toe tatalo foi mo ona soo. Sa fiafia o ia ona o lo latou faatuatua tele.

3 Nfiae 19:29, 35

Na fetalai atu Keriso i tagata e aua le toe tatalo ae ia tatalo pea i o latou loto. Ona ia tuuina atu lea ia i latou le faamanatuga.

3 Nifae 20:1–5

E le i aumaia e se tasi ni areto po o se uaina, ae na saunia e le Faaola i se auala ofoofogia.

3 Nifae 20:6–7

Na fai atu Iesu Keriso i tagata Sa Nifae o le a toe aumaia lana talalelei i le lalolagi i aso mulimuli.

3 Nifae 21:1, 3, 7, 9

Na ia ta’u atu ia i latou e suesue i tusitusiga paia, ma na ia tuuina atu ia Nifae e tusia i faamaumauga le faataunuuina o valoaga a Samuelu le Sa Lamana.

3 Nifae 23:1, 9–13

Ona aoaoina lea o tagata e Iesu mai tusitusiga paia. Na ia ta’u atu ia i latou e aoao atu i isi mea ua ia aoaoina ai i latou.

3 Nifae 23:14

Na toe afio atu Iesu i le lagi, ae ua aoaoina e ona soo tagata. O i latou na talitonu na papatisoina ma maua le Agaga Paia.

3 Nifae 26:15, 17

Na amata ona usitai tagata Sa Nifae i poloaiga uma.

3 Nifae 26:20