Mataupu 15
Ua Aoao Atu Alema ma Papatisoina Tagata
Na sola ese Alema mai auauna a le Tupu o Noa ma lafi i aso e tele. A o lafi o ia, na ia tusia mea na aoao mai e le perofeta o Apinati.
Na salamo Alema i ana agasala ma na ia toe alu atu faalilolilo i tagata Sa Nifae, ma aoao i latou i le savali a Apinati. Na tau atu e Alema i tagata e faatuatua ia Iesu Keriso ma salamo.
A oo i le ao ona lafi lea o Alema i pupu vao i tafatafa o le vai ua taua o le Vai o Mamona.
O i latou na talitonu i aoaoga a Alema, na o atu i le Vai o Mamona ma papatiso ai. Na papatisoina e Alema tagata e 240 i le Ekalesia a Keriso.
Na faauuina e Alema faitaulaga e aoaoina tagata. Na ia ta’u atu i faitaulaga e aoao atu le salamo ma le faatuatua ia Iesu Keriso. Na ia faapea atu foi e le tatau ona latou fefinaua’i ae ia tasi i latou.
Na fealofani tagata o Alema ma auauna atu i isi. Na latou fetufaai atu mea uma sa ia i latou ma faafetai ona ua latou aoao e uiga ia Iesu Keriso, lo latou Togiola.
Na vaai le auauna a le Tupu o Noa o aoao e Alema tagata. Na fai mai le tupu o loo aoaoina e Alema tagata Sa Nifae ina ia faasagatau atu ia te ia, o lea na ia auina atu ai ni fitafita e fasiotia i latou.
Na lapataia e le Atua Alema o loo agai mai le autau a le Tupu o Noa. Na faapotopotoina e tagata o latou aiga, lafu manu, ma isi a latou mea totino ma sosola atu i le vao.
Na faamalosia e le Atua le nuu o Alema ina ia latou sosola ese mai le autau a le Tupu o Noa. Na saili i latou e le autau ae latou te le i maua.
Ina ua mavae aso e 8 o le faigamalaga i le vao, na taunuu le nuu o Alema i se nuu matagofie ma se vai manino o loo tafe ai. O iina na latou totoina ai laau ma fausia ai fale.
Na mananao tagata e avea Alema ma o latou tupu, ae na faapea atu Alema, e le finagalo le Atua e i ai so latou tupu. E finagalo le Atua ina ia latou saoloto.