Mataupu 18
Ua Salamo Alema Le Itiiti
Na tofia e le Tupu o Mosaea Alema e fai ma taitai o le Ekalesia i Saraemila. Ona filifilia lea e Alema nisi alii e fesoasoani ia te ia i le aoaoina o tagata Sa Nifae.
Na popole Alema ma le Tupu o Mosaea ona ua faapologaina tagata o le Ekalesia e tagata lå talitonu ona o lo latou talitonuga.
O Alema e i ai lona atalii e igoa ia Alema. O Alema le Itiiiti e le i talitonu i aoaoga a lona tama ma na avea ma tagata amioleaga.
O Alema le Itiiti ma atalii e toafa o le Tupu o Mosaea na latou faasagatau atu i le Ekalesia. Na latou tauanauina le toatele o tagata e tuua le Ekalesia ma avea ma tagata leaga.
Na tatalo Alema ina ia iloa e lona atalii le mea moni ma salamo.
Na faaauau pea ona taumafai Alema le Itiiti ma atalii o le Tupu o Mosaea e faaleaga le Ekalesia.
O se tasi o aso na faaali atu ai se agelu ia i latou. Na fetalai atu le agelu i se leotele ma gatete ai le eleele.
Na matuai matatau nei alii e toalima ma ua pauu i le eleele. Latou te le’i malamalama i le taimi muamua, i le mea na ta’u mai e le agelu.
Na oo mai le agelu, o se tali i talosaga a tagata o le Ekalesia. Na fesiligia e le agelu Alema le Itiiti pe aisea ua faasagatau atu ai i le Ekalesia.
Na matuai luluina le eleele ina ua fetalai atu le agelu ia Alema le Itiiti e taofi le taumafai e faaleaga le Ekalesia.
Na toe pauu i le eleele Alema le Itiiti ma atalii o Mosaea. Ua latou vaai i se agelu, ma ua latou iloa o le mana o le Atua na luluina ai le eleele.
Ua maofa tele Alema le Itiiti ma ua le mafai ai ona tautala. Ua matuai vaivai lava ma tauau ai ina le mafai ona gaoioi ona lima.
Na sii atu e atalii o Mosaea Alema le Itiiti i lona tama ma faamatala i ai mea uma na tutupu ia i latou.
Na fiafia Alema. Na iloa e ia ua tali mai le Atua i ana talosaga.
Na faapotopoto e Alema le toatele o tagata latou te vaavaai i mea ua faia e le Alii i lona atalii ma atalii o Mosaea.
Na anapopogi ma tatalo faatasi Alema ma isi taitai o le Ekalesia ma ole atu i le Atua e fesoasoani ia Alema le Itiiti ina ia toe malosi.
Ina ua mavae ao ma po e lua, na mafai ona toe gaoioi ma tautala Alema le Itiiti.
Na ia ta’u atu i ona tagata ua salamo o ia i ana agasala ma ua faamagaloina o ia e le Atua.
Na ia aoao atu e tatau ona amiotonu tagata uma ina ia sao atu i le malo o le Atua. Na ia faamatala atu foi puapuaga e tele na oo ia te ia ona o ana agasala.
Ua fiafia Alema le Itiiti ona ua salamo o ia ma ua faam-agaloina e le Atua. Na ia iloa e alofa le Atua ia te ia.
Na amata ona aoao atu e Alema le Itiiti ma atalii o Mosaea le upu moni i le nuu, ma ta’u atu i tagata uma mea na latou vaai ma faalogoina.
Na latou taumafai e aveese mea sese na latou faia. Na latou faamatala atu tusitusiga paia i tagata ma aoao i latou e uiga ia Iesu Keriso.
Na faamanuiaina e le Atua Alema le Itiiti ma atalii o Mosaea, a o latou aoaoina atu le talalelei. E toatele na faalogo ma talitonu ia i latou.