Mataupu 31
Ua Faato’ilaloina e Kapeteni Moronae ia Saraemina
Na manao Sara’emina, le taitai o tagata Sa Lamana i ona tagata, e faaauau pea ona ita i tagata Sa Nifae ma avea i latou ma a latou pologa.
Na mananao tagata Sa Nifae e faasaoloto lo latou nuu ma o latou aiga. Na latou mananao foi e saoloto e tapuai i le Atua.
O Kapeteni Moronae na avea o ia ma taitai o fitafita a tagata Sa Nifae. Ina ua o mai tagata Sa Lamana e siitaua mai, sa faafetaia’i i latou e Moronae ma lana autau i le nuu o Seasona.
Na saunia e Kapeteni Moronae lana autau i auupega o talita, ofutau, ma ofu mafiafia.
E toatele atu le autau a tagata Sa Lamana, ae na matata’u i latou ina ua latou vaai i ofutau o tagata Sa Nifae—ae laiti ni nai ofu na oofu ai tagata Sa Lamana.
E le i fia tau tagata Sa Lamana i le autau a Kapeteni Moronae. Na taufetuli atu tagata Sa Lamana i le vao ma filifili e osofaia se tasi aai o tagata Sa Nifae.
Ua auina atu e Moronae tagata matavao e vaavaaia tagata Sa Lamana. Na ia fai atu foi ia Alema e tatalo atu i le Alii mo se fesoasoani. Na tau atu e le Alii ia Alema le mea o le a alu atu i ai le osofaiga a tagata Sa Lamana.
Ina ua maua e Moronae le savali a Alema, na ia tuua nisi o fitafita e leoleoina Seasona ae savavali atu ma le isi vaega e faafetaui tagata Sa Lamana.
Ua lalafi foi fitafita a Kapeteni Moronae i itu uma o le vaitafe o Saitonu ma sauniuni e mailei le autau a tagata Sa Lamana.
Ua amata le taua, ma ua taumafai tagata Sa Lamana e sosola ese e ala i le sopoia o le vaitafe, ae toatele tagata Sa Nifae sa faatalitali mai i le isi itu o le vai.
I le malosi sili atu nai lo se isi taimi muamua na latou tau ai, na fasiotia ai e le autau a Saraemina le toatele o tagata Sa Nifae. Na aioi atu tagata Sa Nifae i le Atua mo se fesoasoani.
Na faamalosia e le Alii le autau a tagata Sa Nifae. Na siosiomia e le autau tagata Sa Lamana, ma na taofia e Moronae le taua.
Na tau atu e Moronae ia Saraemina e le i mananao tagata Sa Nifae e fasioti tagata Sa Lamana, pe fai foi ma a latou pologa.
Na fai atu Moronae, e le mafai e tagata Sa Lamana ona faatamaia le faatuatua o tagata Sa Nifae ia Iesu Keriso. Na ia fai atu foi, o le a faaauau pea ona fesoasoani mai le Atua i tagata Sa Nifae i le taua pe afai latou te faatuatua.
Na faatonuina e Moronae Saraemina e lafoa’i ana auupega. O le a le fasiotia tagata Sa Lamana pe afai o le a latou folafola mai e le toe faasagatau atu i tagata Sa Nifae.
Na tuuina atu e Saraemina ana auupega ia Moronae, ae na te le i folafolaina atu o le a le toe tau. Na toe tuuina atu e Moronae auupega i tagata Sa Lamana ina ia puipuia ai i latou.
Na oso vave atu Saraemina e fasioti Moronae, ae na taina e se tasi o fitafita a Sa Nifae le pelu a Saraemina ma ga’u ai.
Ona tipiese ai lea e le fitafita o le tumua’i o Saraemina, ma tuu i le tumutumu o lana pelu ma sisi i luga.
O le a pauu foi tagata Sa Lamana e pei o le tumua’i o Saraemina, ona fai atu lea o Moronae ia i latou, seiloga latou te lafoa’i a latou auupega ma folafola mai o le a latou le toe faasagatau mai.
E toatele tagata Sa Lamana na lafoa’ia a latou pelu i vae o Moronae ma folafola mai o le a le toe faasagatau mai. Na faasaolotoina i latou.
Ua ita tele Saraemina, ma ua ia faaoso ana fitafita uma e tau. Na fasiotia e fitafita a Moronae le toatele o i latou.
Ina ua vaai atu Saraemina o le a fasiotia i latou uma ma ana auauna, ona ia aioi atu lea ia Moronae e faasao i latou. Na ia folafola atu e le toe faasagatau atu i tagata Sa Nifae.
Na taofi e Moronae le taua ma ia aveina auupega a tagata Sa Lamana. Na o ese i latou, ina ua uma ona latou folafola atu latou te le toe tau.