Mataupu 43
Ua Faaali Atu Iesu Keriso i Tagata Sa Nifae
Na faapotopoto le toatele o tagata Sa Nifae i le malumalu i Nuumau. Ua maofa i latou i suiga tetele ua oo i le nuu.
Na talanoa tagata e uiga ia Iesu Keriso ma faailoga o lona maliu.
A o talatalanoa i latou, na latou faalogoina se leo itiiti mai le lagi. Na mu o latou loto i lea leo.
O le taimi muamua, latou te le i malamalama i lea leo, ae o le faatolu ona latou faalogoina, na latou malamalama ai.
O le siufofoga o le Tama Faalelagi na latou faalogoina. Na faailoa atu ai Iesu Keriso i tagata ma sa ta’u atu ai ia latou faalogo ia te ia.
Na afio mai Iesu Keriso mai le lagi ma tu i le mea na latou i ai. Na fefefe i latou e tautatala aua latou te le i malamalama i le mea o loo tupu. Ua latou manatu o Iesu o se agelu.
Na ia ta’u atu ia i latou o ia o Iesu Keriso, lea na valoia e perofeta o le a oo mai.
Na fai atu Iesu i tagata e o mai e fetagofi i faailoga o loo i lona itu ma ona lima ma ona vae, lea na tutuiina i fao i le satauro.
Na finagalo Iesu e iloa e tagata o ia o lo latou Atua ma na maliu o ia mo a latou agasala.
Na auaua’i taitoatasi atu tagata e fetagofi i faailoga o loo i le itu o Iesu, o ona lima ma ona vae. Na iloa e tagata o ia o le Faaola.
Ona viia lea o Iesu e tagata ma sa latou ifo ma tapuai atu ia te ia.
Na valaauina e Iesu Nifae ma isi alii e 11. Na ia tuuina atu ia i latou le mana o le perisitua ma aoao i latou i le ala sao e papatiso ai.
Na ia ta’u atu i tagata Sa Nifae e talitonu ia te ia, salamo, ma tausia poloaiga. Afai latou te le faia ia mea, e le mafai ona latou sao atu i lona malo.
Na ia aoao atu i tagata Sa Nifae le auala e tatalo atu ai i le Tama Faalelagi. Na ia aoao atu foi ia i latou le anapogi ma ta’u atu o le a faamagaloina i latou pe a latou faamagalo atu i isi.
Ina ua uma ona aoao atu e ia le tele o mea i tagata, na ia ta’u atu ia i latou e o atu i o latou aiga ma tatalo e uiga i mea na ia fetalai atu ai.
Na amata ona fetagisi tagata Sa Nifae. E le i mananao i latou e vave afio ese Iesu.
E alofa Iesu i tagata Sa Nifae. Na fai atu o ia ia i latou e aumai tagata o loo mamai ma mafatia na te faamaloloina.
Na faamaloloina e Iesu nei tagata. Na ifo tagata uma ma tapuai atu ia te ia.