Mataupu 38
O Le Fasiotia o le Faamasino Sili
Ua avea tagata amioleaga ma faamasino i tagata Sa Nifae. Na latou faasalaina tagata amiotonu ae lē o tagata amioleaga.
Na faanoanoa Nifae i le amioleaga o tagata.
Na tatalo o ia i se tasi aso i se ’olo i lana faatoaga. O lana faatoaga e i tafatafa o le ala tele e tau atu i le nofoaga o fefaataua’iga i Saraemila.
Na lagona e tagata sa feoai i le ala tele le tatalo a Nifae. Na faapotopoto se vaega o tagata, ma taumanatunatu pe aisea ua faanoanoa ai o ia.
Ina ua iloa atu e Nifae tagata, na ia ta’u atu ia i latou, ua faanoanoa o ia ona o lo latou amioleaga. Na ia ta’u atu ia i latou ina ia salamo.
Na ia lapataia i latou afai latou te le salamo, o le a avea e o latou fili o latou aiga ma o latou aai, ma o le a lē fesoasoani foi le Alii ia i latou e tau ma o latou fili.
Na faapea mai Nifae ua sili atu le amioleaga o tagata Sa Nifae i lo tagata Sa Lamana ona ua uma ona aoaoina tagata Sa Nifae i poloaiga ae latou te le i usitaia.
Na fai mai o ia afai e lå salamo tagata Sa Nifae, o le a faatamaia i latou.
Sa i ai nisi o faamasino amioleaga iina. Na mananao i latou ina ia faasalaina Nifae e tagata ona o lona tetee ia te i latou ma a latou tulafono.
Na ioeina e nisi tagata manatu o faamasino amioleaga. Ae o isi na talitonu ia Nifae; na latou iloa o ia o se perofeta, ma o loo tautala o ia i le upu moni.
Na ta’u atu e Nifae i tagata, ua latou fouvale i le Atua ma o le a faasalaina i latou pe afai latou te lē salamo.
Na ta’u atu e Nifae i tagata e o e vaai lo latou faamasino sili. O le a maua atu o ia o taoto i lona lava toto, ua fasiotia e lona lava uso, aua ua manao i lona tulaga.
Na taufetuli alii e toalima o le faapotopotoga e vaai le faamasino sili. E le i talitonu i latou o Nifae o se perofeta a le Atua.
Ina ua latou vaaia Sesorama, le faamasino sili o loo taoto i lona toto, na pauu i latou i le eleele ona o lo latou fefefe. Ua latou iloa nei, o Nifae o se perofeta.
Ua maua e auauna a Sesorama lo latou faamasino sili ma ua latou taufetuli e ta’u atu i tagata. Na latou toe foi ane, ma iloa ai alii e toalima o loo taatitia i le eleele.
Na manatu tagata ua fasioti e alii nei e toalima Sesorama.
Ua latou lafoina nei alii e toalima i le falepuipui ma ta’u atu i le aai ua oti Sesorama, ma o i latou na fasiotia o ia o loo falepuipui.
O le aso na sosoo ai na o atu ai tagata i le mea e tanu ai le faamasino sili. Na tuufesili faamasino na i le faatoaga a Nifae pe o fea o i ai tagata nei e toalima.
Na fai atu faamasino e fia vaai i tagata ua molia i le fasiotiga o le faamasino sili.
O alii e toalima na molia i le fasiotiga o Sesorama, o i latou ia na taufetuli atu i le faamasino sili mai le faatoaga a Nifae.
Na ta’u atu e alii nei e toalima na latou maua atu le faamasino sili ua taoto i lona toto, e pei ona ta’u mai e Nifae. Ona molia lea o Nifae e faamasino i lona auina mai o se tasi e fasioti Sesorama.
Ona ua iloa e alii nei e toalima o Nifae o se perofeta, na latou finau atu i faamasino, ae latou te le i faalogo. Ua latou saisai ia Nifae.
Na ofoina atu e faamasino ni tupe ia Nifae ma le faasaoina o lona ola pe afai na te faapea atu o ia na fuafuaina le fasiotiga o le faamasino sili.
Na fai atu Nifae i faamasino ina ia salamo mai a latou amioleaga. Ona fai atu lea o Nifae ia te i latou e o atu ia Seanetuma, le uso o Sesorama.
Na fai atu Nifae e o e fesili ia Seanetuma pe na la fuafuaina ma Nifae e fasioti Sesorama. Na fai atu Nifae o le a faapea mai Seanetuma e “leai.”
Ona toe fesili atu foi lea o faamasino ia Seanetuma, pe na ia fasiotia lona uso. O le a toe faapea mai Seanetuma e “leai,’ ae peitai o le a maua e faamasino le toto i le tuupao o lona ofu.
O le a gatete foi Seanetuma ma sesega, ma o le a ia ta’uina mai o ia lava na fasiotia lona uso.
Na o atu faamasino i le fale o Seanetuma, ma na taunuu mea uma e pei ona ta’uina atu e Nifae. Na faasaolotoina Nifae ma alii e toalima.
A o tuua e nisi tagata Nifae, o nisi na latou faapea mai o Nifae o se perofeta; a o isi ua latou faapea mai o se atua. Na foi atu Nifae i lona aiga ma le faanoanoa ona o lo latou amioleaga.