Mataupu 35
O Kapeteni Moronae ma Paorana
Na fiafia Kapeteni Moronae ina ua ia faalogo ua toe aumaia e Helamana ma lana autau le tele o eleele o Sa Nifae mai Sa Lamana.
Ae na manaomia e Helamana ma lana autau se fesoasoani. E le i lava a latou fitafita e lavea’ia le tele o aai.
Na tusi e Kapeteni Moronae se tusi ma auina atu ia Paorana, le faamasino sili ma le kovana. Na ia ole atu ia Paorana e aumai nisi fitafita e fesoasoani i le autau a Helamana.
Na osofa’ia e tagata Sa Lamana se aai o tagata Sa Nifae lea na toe aumaia e Helamana. Na latou fasiotia le toatele o Sa Nifae ma tutuli ese tagata uma mai le aai.
Ona o le ita tele o Moronae ma taitai o le malo i le le tuuina mai o se fesoasoani, na toe tusi ai e Moronae le isi tusi ia Paorana.
Na tusi atu Kapeteni Moronae ua toatele tagata ua fasiotia ona o le le auina mai e Paorana o nisi fitafita.
A le auina vave mai e Paorana ni fitafita ma ni meaai, o le a ave atu e Moronae lana autau i Saraemila ma ave mea o loo moomia e lana autau.
E le i umi ae maua e Moronae se tusi mai ia Paorana. Na faanoanoa tele o ia ona o mafatiaga ua oo ia Moronae ma ana autau.
Na ta’u atu e Paorana ia Moronae o se vaega o tagata amioleaga o Sa Nifae ua ta’ua o tagata-tupu ua le mananao e avea o ia ma faamasino sili. Ua latou aveesea faamalosi ia ma i latou uma ma ana ‘au mai Saraemila.
Na ta’u atu e Paorana o loo ia faapotopotoina se autau e taumafai e toe aumaia Saraemila.
Ua filifilia e tagata-tupu se tupu e avea ma o latou taitai ma ua au faatasi ma tagata Sa Lamana.
E le i ita Paorana i le mea na tusi mai ai Moronae. O loo manao foi o ia e faasaoloto tagata Sa Nifae.
Na ia ole atu ia Moronae e aumai nisi alii e fesoasoani ia te ia ma na ia fai atu foi afai e faapotopotoina e Moronae nisi tagata i le ala, o le a mafai e nei autau tuufaatasi ona latou toe aumaia Saraemila.
Na fiafia Kapeteni Moronae ia Paorana ona lona lotonuu ma o loo manao pea o ia i le saolotoga mo ona tagata.
Na o atu Moronae faatasi ma se vaega toaitiiti o lana autau e faafetaui Paorana. Na ia tauaveina le tagavai o le saolotoga, ma e faitau afe alii na aufaatasi ma i latou i le ala.
Na savavali atu le autau tuufaatasi a Moronae ma Paorana i Saraemila. Na latou fasiotia le tupu o tagata amioleaga o Sa Nifae ma pu’eina ona tagata.
Na auina atu e Moronae meaai ma fitafita e 12,000 e fesoasoani i le autau a Sa Nifae. O nei autau na latou tuliesea Sa Lamana, ma na toe i ai le filemu i le nuu.