Mataupu 3
Ua Tuua e Liae Ierusalema
Sa fiafia le Alii ia Liae, ma na ia talanoa atu ia te ia i se tasi po i se miti. Na ia ta’u atu ia Liae e ave lona aiga, ma tuua Ierusalema. Na usitai Liae i le Alii.
Na tapena e le aiga o Liae meaai ma faleie. Na latou tuua lo latou fale ma a latou auro ma ario ae malaga atu i le vao.
E toafa atalii o Liae ma lona toalua o Sarai. O o latou igoa o Lamana, Lemuelu, Sama ma Nifae.
Ina ua maea aso e tolu o la latou malaga, sa latou tolauapi i se vanu i tafatafa o se vaitafe.
Na fau e Liae se fata faitaulaga i maa ma osi ai se taulaga i le Atua. Na ia faafetai i le Atua mo le faasaoina o lona aiga mai le faatafunaga.
Na faaigoa e Liae le vaitafe ia Lamana ma le vanu ia Lemuelu. Na manao Liae ia faapei ona atalii o le vaitafe ma le vanu, ia faaauau pea ona mulimuli i le Atua ma tumau i le tausia o poloaiga.
Na manatu Lamana ma Lemuelu ua valea lo latou tama i lo latou tuua o Ierusalema ma a latou auro. E le i talitonu i laua o le a faatamaia Ierusalema.
Na fia malamalama Nifae i mea na vaaia e Liae. Na tatalo o ia mo lona fia iloa pe sao le mea ua faia e lona tama, o le tuua lea o Ierusalema.
Na asiasi atu Iesu Keriso ia Nifae ma ta’u atu ia te ia e moni mea o loo taua e Liae. Na talitonu Nifae ae le i fouvale e pei o ona uso o Lamana ma Lemuelu.
Na ta’u atu e Nifae i ona uso mea na ta’u mai e Iesu ia te ia. Na talitonu Sama ia Nifae, ae le i talitonu Lamana ma Lemuelu.
Na folafola atu e le Alii ia Nifae o le a faamanuiaina ia ona o lona faatuatua. O le a avea o ia ma pule i ona uso.