Mataupu 28
O Tagata Sorama ma le Rameutoma
O tagata Sa Sorama na avea ma tagata o le Ekalesia a le Atua a ua avea i latou ma tagata leaga ma ua tapuai atu i tupua.
Na taumafai tagata Sa Nifae e aveese tagata Sa Sorama mai le faatasi atu i tagata Sa Lamana, o lea na o atu ai Alema ma isi faifeautalai e talai atu le afioga a le Atua i Sa Sorama.
Na matuai faateia nei faifeautalai ma ua le fiafia i le auala o loo tapuai ai tagata Sa Sorama i la latou ekalesia, ua ta’ua o sunako.
I le ogatotonu o le falesa, ua fausia ai e tagata Sa Sorama se tulaga ua taua o le Rameutoma. E na o le toatasi le tagata e mafai ona ofi ai e tu i le tumutumu.
Na auaua’i tagata Sa Sorama e tutu iina, ma sii ae lima i le lagi ma alaga atu ma le leo tele i le tatalo lava e tasi.
O lea tatalo, o loo faapea ai tagata Sa Sorama o le Atua e leai sona tino; ua na o se agaga. Ua latou faapea mai foi o le a leai se Keriso.
Na manatu tagata Sa Sorama, ua na o i latou ua filifilia e le Atua e faasaoina i le malo i le lagi. Na latou faafetai atu i le avea o i latou ma tagata e sili ona fiafia i ai.
Pe a maea talosaga a tagata taitoatasi o Sa Sorama, ona latou o atu lea i o latou fale, ma le toe tatalo pe talanoa foi i le Atua i le vaiaso atoa.
O tagata Sa Sorama mauoa e fiafia i latou i auro ma ario, ma latou te mitamita foi i mea ua latou maua. Na faanoanoa tele Alema e vaavaai atu i le leaga ua latou oo i ai.
Na tatalo Alema ina ia maua e ia ma ana faifeautalai le malosi, mafanafana, ma le manuia i la latou galuega.
Ina ua maea ona ole atu mo se fesoasoani e toe aumaia ai tagata Sa Sorama i le upu moni, na faatumulia Alema ma isi faifeautalai i le Agaga Paia.
Ona o atu ai lea o faifeautalai i itu eseese e talai. Na faamanuiaina i latou e le Atua i meaai ma lavalava ma le malosi i la latou galuega.
O tagata Sa Sorama matitiva, e le i faatagaina i totonu o falesa. O nei tagata, na amata ona latou faalogo i faifeautalai.
E toatele na fesili atu ia Alema pe o le a le mea e tatau ona latou faia. Na tau atu e Alema ia i latou, e le manaomia lo latou auai atu i se falesa e tapua’i ai i le Atua.
Na ia ta’u atu ia i latou e faatuatua i le Atua. Ona aoao atu lea o Amoleka ia i latou e uiga ia Iesu Keriso ma le fuafuaga a le Atua mo ana fanau.
Na tuua e faifeautalai le aai, ae o tagata Sa Sorama na talitonu ia i latou ua tutuli ese ma le aai. Na o atu tagata ia na talitonu i le nuu o Seasona ma nonofo ai ma tagata o Amona.
E ui lava ina faamata’uina e tagata leaga o Sa Sorama tagata o Amona, ae na fesoasoani tagata o Amona i tagata amiotonu Sa Sorama ma ave atu ia i latou meaai, lavalava, ma fale.