Mataupu 39
Ua Maua e Nifae le Mana Tele
Na agai atu Nifae i lona fale, ma mafaufau i mea na faaali mai e le Alii ia te ia ma le amioleaga o tagata Sa Nifae. Na faanoanoa o ia ona o lo latou amioleaga.
Na talanoa atu le Alii ia Nifae ma viia o ia ona o lona usiusitai ma lona galue malosi i le talaiina o le talalelei.
Na tuuina atu ia Nifae le mana e faia ai soo se mea. Na silafia e le Alii o le a ia faaaogaina ma le amiotonu lea mana.
Na ta’u atu e le Alii ia Nifae e lapataia tagata Sa Nifae, afai latou te le salamo, o le a faatamaia i latou. Na alu atu Nifae i lea lava taimi ma lapataia tagata.
E le i talitonu tagata Sa Nifae ia Nifae. Na latou taumafai e lafoa’i o ia i le falepuipui, ae na laveaiina o ia e le mana o le Atua.
Na folafola atu e Nifae le afioga a le Atua i tagata uma o Sa Nifae.
Ae na faateleina le amioleaga o tagata ma femisaa’i.
Na tatalo Nifae ina ia i ai se oge, ma le faamoemoe o le a faamaualaloina ai tagata Sa Nifae ma salamo pe a leai ni meaai.
Ua oo mai le oge. E le i toe i ai se timu, ma ua matutu ai le eleele ma lē toe ola ai ni laau. Sa lē toe femisaa’i tagata.
Ua fia aai tagata Sa Nifae, ma e toatele i latou na oti. O i latou na ola sa amata ona manatua le Alii ma mea na aoao atu e Nifae ia i latou.
Na salamo tagata mai a latou agasala ma aioi atu i o latou faamasino e fai ia Nifae e taofia le oge. Ona o atu ai lea o faamasino ia Nifae.
Ina ua vaaia e Nifae ua amata ona lotomaualalo tagata ma salamo, ona ia ole atu ai lea i le Alii e taofi le oge.
Na tali mai le Alii i le tatalo a Nifae, ma na amata ona timu. E le i umi ae toe ola laau toto. Na vivii atu tagata i le Atua ma ua latou iloa o Nifae o se perofeta maoae.
O le toatele o tagata Sa Nifae na auai i le Ekalesia. Na avea i latou ma tagata mauoa, ma ua faaleleia ai lo latou aai. Sa i ai le filemu i le nuu.
Na osofaia e isi tagata Sa Nifae na au ma Sa Lamana, tagata Sa Nifae.
Na taumafai tagata Sa Nifae e faatoilalo o latou fili, lea ua avea ma tagata faomea a Katinanetona, ae sa lē i mafai aua sa toe amioleaga foi i latou.
Pe a amiotonu tagata Sa Nifae, ona faamanuiaina lea o i latou e le Alii. Pe a loto mimita i latou ma galo le Alii, ona ia tuuina atu ai lea o faigata e fesoasoani latou te manatua ai o ia.