Mataupu 7
O le Fausiaina o le Vaa
Ina ua maea le tolauapiga a le aiga o Liae i aso e tele i tafatafa o le sami, ona fetalai atu lea o le Alii ia Nifae. Na ia faatonuina o ia e fau se vaa e ave atu ai lona aiga i le nuu o le folafolaga.
E le i iloa e Nifae pe faapefea ona fau se vaa, ae na fetalai atu le Alii o le a ia faaali atu ia te ia. Na ia ta’u atu ia Nifae le mea e maua ai uamea e fausia ai meafaigaluega o loo ia manaomia.
Na faatauemu Lamana ma Lemuelu ia Nifae i lona manao e fau se vaa. E le i talitonu i laua ua faaali atu e le Alii ia Nifae le auala e fai ai. Na mumusu i laua e fesoasoani ia te ia.
Na tau atu e Nifae ia Lamana ma Lemuelu e salamo ae aua le fouvale. Na ia faamanatu atu ia i laua le agelu sa laua vaai i ai. Na ia ta’u atu foi ia i laua o loo i le Atua le mana e faataunuu ai mea uma.
Na le fiafia Lamana ma Lemuelu ia Nifae ma ua la mananao e lafoai o ia i le moana.
A o agai atu i laua ia Nifae, na faatonu i laua e Nifae e aua nei pa’i atu ia te ia aua ua faatumulia o ia i le mana o le Atua. Na fefefe Lamana ma Lemuelu mo aso e tele.
Ona faatonuina lea e le Alii o Nifae e pa’i atu ia Lamana ma Lemuelu. Ina ua pa’i atu Nifae ia i laua, na luluina i laua e le Alii. Na talitonu Lamana ma Lemuelu o le mana o le Atua o loo ia Nifae.
Na ta’u atu e Nifae ia Lamana ma Lemuelu e usitai i o latou matua ma le Atua. Na ta’u atu e Nifae, afai la te faia lea mea, o le a faamanuiaina i laua.
Na salamo Lamana ma Lemuelu ma fesoasoani ia Nifae i le fauina o le vaa.
E tele taimi na alu atu ai Nifae i le mauga e tatalo mo se fesoasoani. Na aoaoina o ia e le Alii i le auala e fau ai le vaa.
Ina ua maea ona fau e Nifae ma ona uso le vaa, na latou iloa o se vaa lelei. Na latou faafetai i le Atua mo lona fesoasoani ia i latou.