Keriso o loo aoao Ona soo, saunia Justin Kunz

2--8 Mati

2 Nifae 31-33 

“O le Ala Lenei”

Amata au tapenapenaga i le faitauina o le 2 Nifae 31--33. Saili le taitaiga a le Agaga e uiga i mea e aoao ai tamaiti. E mafai ona avatu e lenei otootoga ni manatu ia te oe.

Tusifaamaumau Ou Lagona Uunai

Valaaulia le Fefaasoaai

Aua na aoao mai Nifae e uiga i le papatisoga o Keriso, fai atu i tamaiti e faasoa mai se mea na latou aoaoina e uiga i le papatisoga. E mafai foi ona latou faasoa atu manatu ma lagona e uiga io latou lava papatisoga po o papatisoga o uo po o tagata o le aiga.

Aoao atu le Aoaoga Faavae: Tamaiti Laiti

2 Nifae 31 

Na aoaoina au e Iesu Keriso i le auala e toe foi atu ai i le Tama Faalelagi.

Na aoao mai e Nifae o le mulimuli i faataitaiga ma aoaoga a le Faaola o le pau lea o le auala e “faaolaina ai o le tagata i le malo o le Atua” (2 Nifae 31:21).

Gaoioiga e Mafai Ona Fai

• Faaali le ata i le otootoga o lenei vaiaso mai le Sau, Mulimuli Mai ia te A’u---Mo Tagata Taitoatasi ma Aiga a o e aoteleina le tala o le papatisoga o Iesu (tagai 2 Nifae 31:4--13). Faamalamalama atu o le papatisoga o se laasaga e tasi i luga o le ala e toe foi atu ai e nonofo faatasi ma le Tama Faalelagi. Valaaulia se tasi e leʻi leva ona papatiso e faamatala i tamaiti pe o le a sona lagona e uiga i le papatisoga.

• Faamalamalama atu na aoaoina i tatou e Iesu Keriso i mea e tatau ona tatou faia e toe foi atu ai ia te Ia pe a mavae le oti. Tusi se auala i luga o le laupapa, ma tuu se ata o Keriso i le faaiuga. Tuu atu i tamaiti ni ata e suitulaga i elemene o le aoaoga faavae a Keriso (faatuatua ia Keriso, salamo, papatiso, le meaalofa o le Agaga Paia, ma le tumau e oo i le iuga). Fesoasoani ia i latou e tuu ata i luga o le auala.

• Fesoasoani i tamaiti e tauloto le mataupu faavae lona fa o le faatuatua. Usu faatasi se pese e faatatau i muai mataupu faavae o le talalelei, e pei o le “Faatuatua,” “Pe A Ou Papatiso,” po o le “Filifili Le Ala Sa‘o” (Tusipese a Tamaiti, 50--51, 53, 82).

2 Nifae 32:3 

E mafai ona ou taumafa fiafia i afioga a Keriso.

E mafai faapefea e ou aafiaga i le “taumafa[taga] fiafia i afioga a Keriso” (2 Nifae 32:3) ona fesoasoani i tamaiti ia malamalama i lenei fuaitau?

Gaoioiga e Mafai Ona Fai

• Fai atu i tamaiti e taʻu mai nisi o meaai e sili ona latou fiafia i ai, ma valaaulia i latou e faatino pe faapefea ona latou taumafaina i. Faitau le 2 Nifae 32:3, ma fai i tamaiti e faalogo mo mea na fai mai ai Nifae e tatau ona tatou taumamafa ai. O le a le uiga o le taumafa i tusitusiga paia? Faamalamalama atu o tusitusiga paia o se tasi nofoaga e mafai ona tatou mauaina ai afioga a Keriso.

• Tusi upu nei Atua ma le Alii i luga o le laupapa. Valaaulia tamaiti e susue i se itulau o tusitusiga paia ma vaavaai mo upu nei. Tuu atu ia i latou le fesoasoani pe a manaomia. Molimau atu a o tatou faitauina tusitusiga paia, e mafai ona tatou aoao e uiga i le Atua.

2 Nifae 32:8–9 

E finagalo le Tama Faalelagi ia ou tatalo e le aunoa.

O nei fuaiupu e mafai ona musuia tamaiti ia avea le tatalo ma se vaega o o latou olaga i aso taitasi.

Gaoioiga e Mafai Ona Fai

• Fesili atu i tamaiti po o a taimi latou te tatalo ai. Pe latou te tatalo i le taeao? i le po? ao le’i aai? Fesoasoani i tamaiti e mafaufau i ni taga e faaali atu ai taimi e mafai ai ona tatou tatalo, e pei o le taimi tatou te feala mai ai, a’o lei momoe, ma aai---po o se isi lava taimi. Faitau atu ia i latou le laina muamua pe lua mai le 2 Nifae 32:9, ma faamamafa atu le fuaitau lenei “tatalo e le aunoa.”

• Fesili atu i tamaiti pe faapefea ona latou tatalo. O a mea latou te faia i o latou ulu, lima ma isi? O a ituaiga mea latou te fai atu ai? Fai atu ia i latou e mafaufau faapea e te le iloa le auala e tatalo ai, ma tuu atu latou te aoaoina oe. Aisea e finagalo ai le Tama Faalelagi ia tatou tatalo?

E mafai ona tatou talanoa i le Atua e ala i le tatalo.

Aoao atu le Aoaoga Faavae: Tamaiti Matutua

2 Nifae 31 

Na aoaoina au e Iesu Keriso i le auala e toe foi atu ai i le Tama Faalelagi.

E mafai ona tatou toe foi i le Atua pe a mavae lenei olaga e ala i le mulimuli i aoaoga faavae na aoaoina e Iesu Keriso: faatuatua ia Keriso, salamo, papatisoga, meaalofa o le Agaga Paia, ma tumau e oo i le iuga.

Gaoioiga e Mafai Ona Fai

• Faaali atu le ata i le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga, ma valaaulia tamaiti e faasoa mai mea ua latou iloa e uiga i le papatisoga o Iesu (tagai Mataio 3:13–17). Tuu upu nei i soo se faasologa i luga o le laupapa: Na molimau atu Iesu i le Tamā o le a Ia usiusitai ia te Ia. Valaaulia tamaiti e faitau le 2 Nifae 31:7 o se vasega ma tuu upu i le faasologa sao.

• Fai atu i tamaiti pe o le a se latou tala e fai atu i se tasi o sauniuni e papatiso, ma fesoasoani ia i latou e tuufaatasia a latou fautuaga i luga o tamai kata e mafai ona latou tuuina atu i se tasi. E faapefea ona tatou faaauau ona mulimuli i le faataitaiga a Iesu ina ua uma ona papatisoina i tatou?

• Faamatala atu o le mataupu faavae a Keriso e aofia ai le mea e aoao mai e Iesu Keriso e tatau ona tatou faia e toe foi atu i le Tama Faalelagi. Tusi i luga o pepa eseese faatuatua ia Keriso, salamo, papatisoga, meaalofa o le Agaga Paia, ma le tumau e oo i le iuga, ma tuu solo i totonu o le potu. Faitau atu i tamaiti le 2 Nifae 31:11--19, ma valaaulia tamaiti e feauauai e oso mai lea pepa i lea pepa ao latou faalogo i nei mataupu faavae ua taʻua. Fesoasoani ia i latou e mafaufau i se aafiaga na latou maua ma nei mataupu faavae taitasi.

2 Nifae 32:3--5 

E mafai ona ou taumafa i afioga a Keriso.

Aisea e manaomia ai e tamaiti ona malamalama i le taua o le taumamafa i afioga a Keriso?

Gaoioiga e Mafai Ona Fai

• Fai atu i tamaiti e mafaufau i se taumafataga. O a meaai o le a latou mananao ia i ai iina? O le a le mea o le a latou aia muamua? Ona valaaulia lea o i latou e vaai faalemafaufau pe o le a le uiga o le taumamafa i tusitusiga paia ao e faitauina le 2 Nifae 32:3. Aisea na faaaoga ai e Nifae le upu taumamafa e aʻoaʻo ai i tatou i le auala e tatau ai ona tatou suʻesuʻeina le afioga a le Atua? Aisea na ia le fai mai ai faitau? O le a le uiga o le taumamafa i tusitusiga paia? Faasoa ma tamaiti faamanuiaga na e mauaina ao e taumafa i tusitusiga paia.

• Faauma le itulau o gaoioiga faatasi ma tamaiti, ma valaaulia i latou e fai se sini e fai se mea se tasi e taumafa ai i tusitusiga paia i lenei vaiaso.

2 Nifae 32:8–9 

E finagalo le Tama Faalelagi ia ou tatalo e le aunoa.

E faaosoosoina i tatou e le fili e aua le tatalo. Mafaufau pe mafai faapefea ona e fesoasoani i tamaiti e tetee atu i lenei faaosoosoga ma “tatalo e le aunoa: (2 Nifae 32:9).

Gaoioiga e Mafai Ona Fai

• Filifili se fuaitau e faatatau i le tatalo mai le 2 Nifae 32:8--9, tusi i luga o le laupapa, ma ufiufi upu taitasi i se fasi pepa. Valaaulia tamaiti e feauauai e aveese se pepa e tasi i le taimi seia mafai ona latou mateina po o le a le fuaitau.

• Faitau le 2 Nifae 32:8--9 faatasi, ma fai atu i tamaiti e faasoa mai mea na latou aoaoina e faatatau i le tatalo mai nei fuaiupu. O le a le uiga o le “tatalo e le aunoa”? (fuaiupu 9). E faapefea ona tatou faia lenei mea?

• O le a se mea atonu e le manao ai se tasi e tatalo? Faasoa atu se aafiaga o se taimi na e tatalo ai e ui lava e te le’i lagonaina le fia faia. O a ni ou lagona mulimuli ane? Valaaulia se tamaitiiti e faitau le afa lona lua o le 2 Nifae 32:8, ma tuu atu i tamaiti se taimi e mafaufau loloto ai. Aisea e le manao ai Satani tatou te tatalo? E faʻapefea ona tatou faamanatu atu ia i tatou lava e tatalo e tusa lava pe tatou te le mananao i ai?

Fautuaina le Aoaoina i le Aiga

Uunai tamaiti e sue se tasi---se uo, se uso, po o se isi tagata o le aiga---e mafai ona latou aoao ia iloa tatalo.

Faaleleia o Lo Tatou Aoao Atu

E tiotio tamaiti. Valaaulia tamaiti e faatino tala mai tusitusiga paia ma pese. Faʻaaoga o latou natura tiotio e faʻaleleia ai aʻoaʻoga. (Tagai Aoao Atu i le Ala o le Faaola, 25–26,)