“2-8 Mati: 2 Nifae 31-33: ‘O Le Ala Lenei,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“2-8 Mati: 2 Nifae 31-33: ‘O Le Ala Lenei,’” Sau, Mulimuli Mai ia te Au—Mo Tagata Taitoatasi ma Aiga: 2020
O Iesu o loo aoao atu Ona Soo, saunia e Justin Kunz
2–8 Mati
2 Nifae 31–33
“O Le Ala Lenei”
O lenei otootoga o loo fautuaina mai ai ni mataupu faavae atonu e te maua e taua tele i le 2 Nifae 31–33. Ae o mea aupito sili ona taua o le a e aoaoina i lau suesuega o le a maua mai musumusuga a le Agaga. Saili le taitaiga, ma tusifaamaumau ou lagona uunai e oo mai.
Tusifaamaumau Ou Lagona Uunai
Faatasi ai ma toe upu a Nifae na tusifaamaumauina, tatou te maua ai le tautinoga lenei: “Aua ua faapea ona poloaiina ai o au e le Alii, ma e ao ina ou usiusitai” (2 Nifae 33:15). Ua foliga mai o se aotelega fetaui lelei lenei o le soifuaga o Nifae. Sa ia sailia le finagalo o le Alii ma sa taumafai ma le lototoa e usiusitai i ai—pe o le uiga o lena mea o le tuu o lona ola i se tulaga matautia ia maua mai papatusi mai ia Lapana, fauina o se vaa ma le laasia o le vasa, po o le aoao atu ma le faamaoni o le mataupu a Keriso i le manino ma le mana. Sa mafai ona tautala Nifae ma le faatauanau e uiga i le manaomia ona “fetuleni atu i luma ma le mausali ia Keriso,” pe mulimuli i le “auala sa’o ma le vaapiapi lea e tau atu i le ola e faavavau” (2 Nifae 31:20, 18), aua o le ala lena na ia mulimuli ai. Sa Ia silafia e ala i le poto masani e faapea o lenei ala, e ui ina faumalo i nisi o taimi, ae e tumu foi i le fiafia, ma “ua leai se isi lava ala po o se isi suafa ua tuuina mai i lalo ifo o le lagi, e mafai ona faaolaina ai o le tagata i le malo o le Atua” (2 Nifae 31:21).
Manatu mo Suesuega Faaletagata Lava Ia o Tusitusiga Paia
O Iesu Keriso ma Lana mataupu ua na o le pau lea ole ala i le ola e faavavau.
Pe afai e tatau ona e aoteleina le ala i le ola e faavavau i na o ni nai upu, o le a lau tala a fai? O Nifae, faatasi ai ma ona uiga e tuusa’o ma faigofie, o le ala lea na ia faia ai: faatuatua ia Keriso, salamo, papatisoga, mauaina o le meaalofa a le Agaga Paia, ma tumau e oo i le iuga. A uma ona e suesueina aoaoga a Nifae i le 2 Nifae 31–32, mafaufau pe o le a faapefea ona e faamalamalama atu i se tasi i au lava upu. Mafaufau pe ua faamanuiaina faapefea oe i le ola ai i nei aoaoga. E mafai ona e mafaufau i aoaoga a Nifae i le 2 Nifae 31:18–20 ma iloilo au lava taumafaiga e “fetuleni atu i luma” i le ala o le talalelei.
Tagai foi 3 Nifae 11:32–39; 27:13–22; D. Todd Christofferson, “O Le Mataupu Faavae a Keriso,” Ensign po o le Liahona, Me 2012, 86–90; Brian K. Ashton, “O Le Mataupu Faavae a Keriso,” Ensign po o le Liahona, Nov. 2016, 106–9.
O le mulimuli i aoaoga a Iesu Keriso e taitai atu ai i tatou i le ola faavavau.
Ua faia e Iesu Keriso le faataitaiga atoatoa o le usiusitai ina ua Ia papatiso.
Pe na tupu ananafi lou papatisoga po o le 80 tausaga talu ai, o se taimi e matuai taua tele—sa e ulu atu ai i se feagaiga mo le olaga atoa e mulimuli ia Iesu Keriso. Mafaufau i lou papatisoga a o e faitau e uiga i le papatisoga o le Faaola i le 2 Nifae 31:4–13. Aisea na papatiso ai se Faaola? Na tutusa faapefea mafuaaga na papatiso ai o Ia i mafuaaga na e papatiso ai? O le a sau mea o faia nei e faaauau ai pea le mulimuli i faataitaiga a le Faaola o le usiusitai?
O le sauniga o le faamanatuga o se avanoa faalevaiaso mo oe e toe tuuto atu ai e mulimuli ia Iesu Keriso. O le isi taimi e te ‘ai ai ma inu i le faamanatuga, mafaufau e faitau le 2 Nifae 31:13 ma mafaufau loloto i lou naunautaiga e “mulimuli i le Alo, ma le faamoemoega atoa o le loto” ma lou naunautaiga “e tauave i ou luga le suafa o Keriso.”
O le a faaali mai e le Agaga Paia ia te au mea e ao ona ou fai.
Afai o le papatisoga ma le faamauga o “le faitotoa lea [tatou] te ulu atu ai” o le ala sa’o ma le vaapiapi (2 Nifae 31:17), o le a se mea tatou te fai i le taimi tatou te i ai i luga o le ala? O le mea lena na taumanatunatu i ai le nuu o Nifae (tagai 2 Nifae 32:1). O a tali na tuu mai e Nifae i le 2 Nifae 31:19–20 ma le mataupu 32? O a tali ua e maua mo oe lava?
Tagai foi David A. Bednar, “Ia Maua le Agaga Paia,” Ensign po o le Liahona, Nov. 2010, 94–97; “Holy Ghost,” Gospel Topics, topics.ChurchofJesusChrist.org
Ua faatauanau e le Tusi a Mamona tagata uma ia talitonu ia Keriso.
I le 2 Nifae 33, a o faauma e Nifae ana tusitusiga, sa ia faamalamalama mai ia le mafuaaga na ala ai ona ia tusitusi. O a ni mafuaga ua e mauaina i lenei mataupu? Toe manatunatu i mea ua e faitauina i le 1 Nifae ma le 2 Nifafe ma tusigamanatu atonu na e faia. Ua faapefea e tala ma aoaoga ona faataunuuina ia faamoemoega o Nifae mo oe? Mo se faataitaiga, na faapefea ona faatauanauina ai oe e “talitonu ia [Keriso], ma tumau e oo i le iuga”? (fuaiupu 4). Mafaufau e tusifaamaumau nei aafiaga pe faasoa atu i se tagata o le aiga po o se uo.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
2 Nifae 31:5–13
Pe o i ai ni tagata o le aiga o sauniuni mo papatisoga, pe o i ai nisi sa faatoa papatisoina talu ai nei? Atonu e mafai ona latou faasoa mai pe aisea na tonu ai ia te i latou e papatiso. E tusa ai ma aoaoga a Nifae, o a ni nai mafuaaga e ao ai ona tatou papatiso? O a nisi o faamanuiaga e mafai ona tatou maua pe a tatou papatiso?
2 Nifae 31:17–21
E mafai faapefea ona e fesoasoani ia malamalama lou aiga i le talafaatusa e uiga i le “ala sa’o ma le vaapiapi”? (2 Nifae 31:18). Mo se faataitaiga, e mafai ona outou galulue faatasi e tusi se ata o le auala sa faamatalaina e Nifae i le 2 Nifae 31:17–21, ma faaigoa i mea e tatau ona tatou fai e ulu atu ai i le ala ma agaigai atu ai pea i luma. E faapefea ona fesoasoani le Faaola ia tatou agaigai i luma i luga o le ala?
2 Nifae 31:20
Afai e te fia manao ia malamalama atili lou aiga i le ala tatou te tumau ai e oo i le iuga, itulau 6 o le Tala’i La’u Talalelei o loo i ai se faauigaga aoga; e faapena foi i le savali a Elder Dale G. Renlund “Le Au Paia o Aso e Gata Ai, Taumafai Pea” (Ensign po o le Liahona, Me 2015, 56–58).
2 Nifae 32:8–9
Ina ia fesoasoani i tagata o le aiga ia malamalama faapea e mafai ona tatou “tatalo e le aunoa,” e mafai ona e faia se lisi o tulaga e mafai ona tatou tatalo ai (pe tusi foi ni ata e faatusa i ai). Ona mafai lea e lou aiga ona usu se pese o loo aoao mai ai e uiga i le tatalo, e pei o le “Pe Na Faia Sau Tatalo?” (Viiga, nu. 75), sui nisi o upu i le pese i upu mai a latou lisi. E faapefea ona faamanuiaina i tatou e le Alii pe a tatou tatalo e le aunoa?
2 Nifae 33:1–2
Mata o le a se mea e taitai ai tagata ia “faamaaaina o latou loto faasagatau i le Agaga Paia”? E mafai faapefea ona tatou mautinoa o loo i ai se “nofoaga o le Agaga Paia i totonu o i [tatou]”?
Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.
Faaleleia o Lo Tatou Aoao Atu
Faataitai i le Faaola. E fesoasoani tele le suesueina pe na faapefea ona aoao mai le Faaola—o metotia sa Ia faaaogaina ma mea sa Ia fetalai ai. Ae o le mana a le Faaola e aoao ma siitia ai isi na sau mai le pe o ai o Ia ma pe na faapefea ona Ia soifua ai. O le tele o lou filiga e taumafai e ola e faapei o Iesu Keriso ma faalagolago i Lona mana togiola, o le tele foi lena o le a e aoao atu ai oe lava i Lana ala.
Ina Ia Faataunuu ai Le Amiotonu Uma, saunia e Liz Lemon Swindle.