“27 Aperila–3 Me. Mosaea 7--10: ‘I Le Malosi o le Alii,’” Sau, Mulimuli Mai ia te A’u---Mo le Peraimeri: Tusi a Mamona 2020 (2020)
“27 Aperila–3 Me. Mosaea 7--10,” Sau, Mulimuli Mai ia te A’u—Mo le Peraimeri: 2020
Minerva K. Teichert (1888–1976), O Amona i luma o le Tupu o Limae, 1949 1949, oil on masonite, 35 15 / 35 x 48 inisi. Falemataaga mo Faatufugaga a le Iunvesite a Polika Iaga, 969.
27 Aperila--3 Me
Mosaea 7--10
“I Le Malosi o le Alii”
Faitau ma le agaga tatalo le Mosaea 7--10, mafaufau loloto i lagona na e mauaina. E mafai faapefea e upumoni o loo i totonu o nei mataupu ona fesoasoani e taulimaina manaʻoga o tamaiti o loʻo e aoaoina?
Tusi faamaumau Ou Lagona Uunai
Valaaulia le Fefaasoaai
Ia uunaia tamaiti e faasoa atu soo se mea atonu latou te iloa e uiga i mea na tutupu i nei mataupu. E mafai ona e maua le fesoasoani i le “Mataupu 13: Senifa” (Tala o le Tusi a Mamona, 36--37, po o le vitio talafeagai i luga o le ChurchofJesusChrist.org).
Aoao atu le Aoaoga Faavae: Tamaiti Laiti
Sa fesoasoani le Atua i tagata i tusitusiga paia, ma e mafai ona Ia fesoasoani mai ia te aʻu.
Na manaomia e le nuu o Limae, o e sa nofo pologa i Sa Lamana, le faatuatua o le a fesoasoani le Atua ia i latou, o lea na faamanatu atu ai e Limae ia i latou taimi na fesoasoani ai le Atua i Ona tagata.
Gaoioiga e Mafai Ona Fai
-
Fai i tamaiti e faasoa mai se taimi na latou manaomia ai le fesoasoani. Faamalamalama atu o le nuu o le Tupu o Limae sa i ai faafitauli, o lea na ia faasoa atu ai se tala e fesoasoani ai ia i latou ina ia maua le faatuatua. Faitau le Mosaea 7:19 i tamaiti, ma faaali atu se ata o le fanauga a Isaraelu o sopoia le Sami Ulaula (tagai Moses Parting the Red Sea, ChurchofJesusChrist.org). Toe iloilo lenei tala ma le tala o le manai, ma fesoasoani i tamaiti e faatino nei tala (tagai mataupu 17 ma le 18 i le Tala o le Feagaiga Tuai, po o le vitio talafeagai i luga o le ChurchofJesusChrist.org). Na faapefea ona fesoasoani le Alii i tagata? Molimau atu e mafai ona fesoasoani le Alii ia i tatou.
-
Faitau le Mosaea 7:33 i tamaiti, ma fesoasoani ia latou malamalama i le mea o loo aoao mai le fuaiupu tatou te faia e maua ai le fesoasoani mai le Alii. Fesoasoani i tamaiti e mafaufau i taga e mafai ona suitulaga i nei mea, ma toe fai atu le fuaiupu ao latou faia taga. O a ni mea tatou te manaomia ai le fesoasoani? E faapefea ona tatou faʻaali atu tatou te faalagolago i le Alii? Faasoa atu se aafiaga na e faalagolago ai i le Alii ma na Ia fesoasoani ia te oe.
-
Filifili ni nai fuaiupu o le “Tala o le Tusi a Mamona” po o le “Lototele o Nifae” (Tusipese a Tamaiti, 62, 64--65) e usu faatasi ma tamaiti. Fesoasoani ia i latou e iloa pe na faapefea ona fesoasoani le Alii i tagata i le Tusi a Mamona. Faasoa atu isi tala faatusipaia e te lagona o le a fesoasoani i tamaiti e aoao e faalagolago i le Alii.
Ua tuuina mai e le Atua ia i tatou perofeta, tagatavaai, ma talifaaaliga.
E faapefea ona e faaaogaina le Mosaea 8:16--17 e aoao ai tamaiti e uiga i le matafaioi a se perofeta o se tagatavaai?
Gaoioiga e Mafai Ona Fai
-
Faaali atu i tamaiti pe faapefea ona uu o latou lima i luga i o latou mata e peiseai o latou tilotilo i se matatioata po o se mea vaai. Faitau le Mosaea 8:17, ma fai atu i tamaiti e fai o latou “matatioata” i taimi uma latou te faalogoina ai le upu “tagatavaai.” Faamalamalama atu ua tuuina mai e le Atua ia i tatou perofeta ma o se tasi o matafaioi a se perofeta o le avea lea o se “tagatavaai” ona e mafai ona ia “vaai” i mea o le a oo mai. Faasoa atu ni faataitaiga o mea na vaai ma faaali mai e perofeta ia i tatou (e aofia ai tusitusiga paia), pe faasoa atu se faataitaiga o le taimi na galue ai se perofeta o se tagatavaai (e pei o le 1 Nifae 11:20--21).
-
Fai ni tulagavae mai pepa, ma tusi i luga ni ata o mea na fautuaina i tatou e perofeta e fai. Tuu nei tulagavae i se auala faataamilo i le potu, ma faamatala ia ata. Fai atu i tamaiti e auauaʻi e avea ma perofeta ma taʻitaʻia isi tamaiti i le mulimuli i nei tulagavae.
-
Faaali atu le ata o loo maua i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga, ma fai i tamaiti e faamatala mai mea latou te vaaia. Faamalamalama atu o le Perofeta o Iosefa Samita o se tagatavaai. Na tuuina atu e le Alii ia te ia ni meafaigaluega ua taʻua o le Urima ma le Tumema ma se maa vaai e faaaoga i le faaliliuina o le Tusi a Mamona.
-
Faaali se ata puupuu o se savali talu ai nei mai le Peresitene o le Ekalesia (pe faaali atu se ata o ia ma faitau se mea na ia aoaoina). Tuuina atu lau molimau o ia o se perofeta, tagatavaai, ma talifaaaliga.
Aoao atu le Aoaoga Faavae: Tamaiti Matutua
Mosaea 7:18–20, 33; 9:14–19; 10:6–10, 19–21
Sa fesoasoani le Atua i tagata i tusitusiga paia, ma e mafai ona Ia fesoasoani mai ia te aʻu.
O Senifa ma ona tagata, o e na nonofo i le laueleele o Sa Lamana, sa osofaia e sa Lamana ma na manaomia le fesoasoani a le Atua. O le a se mea e mafai ona aʻoaʻoina e tamaiti mai lenei tala e uiga i le fesoasoani a le Atua i Lana fanau?
Gaoioiga e Mafai Ona Fai
-
Vaevae tamaiti i ni vaega se tolu, ma valaaulia vaega taitasi e suesue se tasi o tala faatusipaia nei: o tagata Isaraelu o loo sopoia le Sami Ulaula (tagai Esoto 14:10–14, 21–31),o le aiga o Liae o loo malaga i le vaomatua (tagai 1 Nifae 16:9–16; 17:1–6), ma le nuu o Senifa na laveaiina mai sa Lamanā (tagai Mosaea 9:14–19; 10:6–10, 19–21). Na faapefea ona faaalia e tagata i nei tala na latou faalagolago i le Atua? Na faapefea ona fesoasoani le Atua ia i latou? E faapefea ona Ia fesoasoani ia i tatou pe a tatou faalagolago ia te Ia?
-
Valaaulia ni tamaiti se toatolu e tusi se tofotofoga po o se luitau o feagai ma i latou i luga o le laupapa. Fai atu i se tamaitiiti e faitau le Mosaea 7:33, ma uunaia isi tamaiti e soloese se tasi o tofotofoga po o luitau i taimi uma latou te faalogo ai i se mea e mafai ona latou faia e maua ai le fesoasoani a le Alii. E mafai faapefea e le faalagolago i le Alii ona fesoasoani ia i tatou e foia o tatou luitau?
E tuuina mai e le Atua perofeta, tagatavaai, ma talifaaaliga e manuia ai tagata.
Tatou te lagolagoina le Au Peresitene Sili ma Aposetolo e Toasefululua o ni perofeta, tagatavaai, ma talifaaaliga. E mafai faapefea ona e aʻoaʻoina tamaiti e uiga i le taua o perofeta?
Gaoioiga e Mafai Ona Fai
-
Filifili ni nai upu taua mai le Mosaea 8:12--19, ma tusi i luga o le laupapa. Valaaulia se tamaitiiti e faitau nei fuaiupu, ma fai atu i isi tamaiti e sii o latou lima pe a latou faalogo i upu taitasi i luga o le laupapa. Taofi le faitau ma talanoaina upu taitasi o se vasega.
-
Fai atu i tamaiti e toe iloilo le Mosaea 8:16--18 e aoao ai po o le a le tagatavaai. Tusi le fuaiupu lenei i luga o le laupapa: O se tagatavaai e pei . Fesoasoani i tamaiti e mafaufau i auala e faauma ai le fuaiupu e faamatala ai pe aisea e avea ai se tagatavaai o se faamanuiaga mo i tatou---mo se faataitaiga, o se tagatavaai e pei o se leoleo, o loo lapataia i tatou i mea matautia.
-
Filifili se fuaitau mai le Mosaea 8:16--17, ma tusi i luga o le laupapa, sui ia upu taitasi i se faailoga na fau. Tuu atu i tamaiti se lisi o faailoga ma upu latou te fai ai ma sui, ma tuu atu ia i latou e suia pe “faaliliu” le fuaitau e pei ona faia e tagatavaai. O a nisi o auala e avea ai perofeta, tagatavaai, ma talifaaaliga o se “manuia tele” ia i tatou? (Mosaea 8:18).
A ou vaivai, e mafai e le Alii ona faamalosia au.
A feagai tamaiti ma luʻitau, latou te lagona i nisi taimi le vaivai ma le leai o se fesoasoani. Faaaoga le tala i tagata o Senifa e aoao ai tamaiti e mafai ona latou maua le malosi mai le Alii.
Gaoioiga e Mafai Ona Fai
-
Fai i tamaiti e faasoa mai ni auala e mafai ai ona latou malosi faaletino. O le a le uiga o le i ai o “le malolosi o tagata”? (tagai Mosaea 10:11). O le a le uiga o le i ai o “le malosi o le Alii”? (tagai Mosaea 9:17–18; 10:10). E faapefea ona tatou maua le malosi o le Alii?
-
Valaaulia tamaiti e tusi se ata o se tasi latou te lagona o loo i ai le malosi o le Alii ma faasoa mai pe aisea na latou tusia ai lenei tagata.
Fautuaina le Aoaoina i le Aiga
Valaaulia tamaiti e faasoa mai ma o latou aiga se tala mai tusitusiga paia e musuia ai i latou e “tuu atu lo [latou] faalagolago i le Atua“ (Mosaea 7:19).
Faaleleia o Lo Tatou Aoao Atu
Fai fesili musuia. Fai ni fesili e valaaulia ai tamaiti e faasoa atu a latou molimau i upumoni o le talalelei. Mo se faataitaiga, afai o outou talanoaina perofeta, e mafai ona e fesili i tamaiti e faasoa mai pe na faapefea ona faamanuiaina i latou e perofeta.