agelu o faaali atu ia Alema ma atalii o Mosaea

Liua o Alema le Itiiti, saunia e Gary L. Kapp

18--24 Me

Mosaea 25--28

“Sa Taua i Latou o le Nuu o Le Atua”

E silafia e le Tama Faalelagi mea e manaomia ona aoaoina e tamaiti o lau vasega ma le auala e aapa atu ai ia i latou. Saili Lana taitaiga ao e faitau Mosaea 25--28 ma iloilo lenei otootoga.

Tusifaamaumau Ou Lagona Uunai

aikona e fefaasoaai

Valaaulia le Fefaasoaai

Faaali atu le ata mai le otootoga o lenei vaiaso i le Sau Mulimuli Mai ia te Au—Mo Tagata Taitoatasi ma Aiga, ma fai atu i tamaiti e faamatala le mea o loʻo tupu i le ata. Afai e masani tamaiti i le tala ia Alema le Itiiti ma atalii o Mosaea, tuu atu ia i latou e faasoa mai mea latou te iloa.

aikona e aoao atu

Aoao atu le Aoaoga Faavae: Tamaiti Laiti

Mosaea 26:30--31

E finagalo le Alii ou te faamagalo atu.

Na aoao atu e le Alii ia Alema o Ia e faamagalo fua i latou oe salamo. E tatau ona tatou mulimuli i Lana faataitaiga e ala i le faamagalo atu ia i latou oe agasala mai ia i tatou.

Gaoioiga e Mafai Ona Fai

• Faitau atu i tamaiti le fuaitau mai le Mosaea 26:31: “Ia outou faamagalo foi le tasi i le isi.” Tuu atu i tamaiti e faataitai le fai atu “Ou te faamagalo atu ia te oe” mo ni nai taimi, ma saili pe latou te iloa le uiga o le faamagalo atu. Faasoa se mea na tupu mai lou olaga ina ua e faamagalo atu i se tasi pe ua faamagalo oe e se tasi.

• Fesoasoani i tamaiti e faatino le faamagalo o le tasi i le isi. Fai atu i se tamaitiiti e faafoliga na ia faia se mea e faatiga pe faaita ai se isi tamaitiiti. O le a se tala e fai mai e le isi tamaitiiti pe fai e faʻaalia ai le faʻamagaloga?

• Valaaulia tamaiti e tusi se foliga faanoanoa i le tasi itu o se pepa ma se foliga fiafia i le isi itu. Fai atu ia i latou e uu i luga le foliga faanoanoa ao latou faamatala mai se mea na tupu ina ua le fiafia i se uso po o se uo. Fai atu ia i latou e uu i luga le foliga fiafia ao latou taʻu mai pe na faapefea ona latou faamagalo pe o le a faamagaloina lena tagata.

Mosaea 27:8-–37

E fesoasoani le talalelei i tagata e sui ma avea atili e faapei o Iesu.

O le liuaina o Alema le Itiiti ma atalii o Mosaea ua faaalia ai ona o Iesu Keriso ma Lana talalelei, e mafai ai e soo se tasi ona suia ma avea atili e faapei o Iesu.

Gaoioiga e Mafai Ona Fai

• Faamatala faapuupuu le liua o Alema le Itiiti ma atalii o Mosaea, e pei ona faamatalaina i totonu o le Mosaea 27:8--37. Mo le fesoasoani, tagai “Mataupu 18: Ua Salamo Alema Le Itiiti” (Tala o le Tusi a Mamona, 49--52, po o le vitio talafeagai i luga o le ChurchofJesusChrist.org). Ona toe faamatala lea o le tala, ma tuu atu i tamaiti e faasoa mai auiliiliga latou te manatuaina. Tuu atu ia i latou e faatino le tala, ma fesoasoani ia latou iloa le eseesega i le va o le mea na i ai Alema ma atalii o Mosaea ae latou te lei salamo ma mulimuli ane.

• Fesoasoani i tamaiti e faaaoga le itulau o gaoioiga o lenei vaiaso e faamatala ai le tala ia Alema ma atalii o Mosaea. Faitau Mosaea 27:24, ma fesoasoani i tamaiti ina ia malamalama na suia Alema ma atalii o Mosaea ona sa latou salamo ia latou agasala ma taliaina le talalelei a Iesu Keriso.

  Alema le Itiiti o loo sii atu i le fale o lona tama

  Na Olioli Lona Tama, saunia e Walter Rane

Mosaea 28:1--8

E mafai ona ou fetufaai atu le talalelei

Ina ua mavae lo latou liliu mai, sa naunau atalii o Mosaea e faasoa atu le talalelei i tagata uma, e aofia ai o latou fili, o sa Lamana.

Gaoioiga e Mafai Ona Fai

• Faaaoga Mosaea 28:1--8 ina ia tau atu i tamaiti e uiga i le filifiliga a atalii o Mosaea e talai atu le talalelei i sa Lamana. Mo le fesoasoani, tagai “Mataupu 19: Ua Avea Atalii o Mosaea ma Faifeautalai” (Tala o le Tusi a Mamona, 53, po o le vitio talafeagai i luga o le ChurchofJesusChrist.org). Aisea na latou mananao ai e faasoa atu le talalelei? (tagai fuaiupu 3).

• Fesoasoani i tamaiti taitoatasi ia mafaufau i se tasi e manoamia ona iloa atili e uiga i le talalelei. Fesoasoani i tamaiti e fuafua mea o le a latou fai atu ai i tagata na latou mafaufau i ai.

• Usu faatasi se pese e faatatau i le faasoaina o le talalelei, e pei o le “Ou Te Fia Avea Nei Ma Faifeautalai” (Tusipese a Tamaiti, 90). Faasino fuaitau i le pese ua fautua mai ai le auala e mafai ona tatou faasoa atu ai le talalelei i isi.

aikona e aoao atu

Aoao atu le Aoaoga Faavae: Tamaiti Matutua

Mosaea 26:22–23, 29–30; 27:8–37

E faamagalo fua e le Atua i latou o e salamo.

Afai e i ai se tasi i lau vasega e mafaufau pe mafai ona faamagaloina moni o ia, o le fetalaiga a le Atua ia Alema le Matua ma le aafiaga a Alema le Itiiti e mafai ona fesoasoani.

Gaoioiga e Mafai Ona Fai

• Fai atu i tamaiti e faafoliga o latou talanoa i se tasi e le manatu o le a faamagalo o ia e le Atua. Valaaulia i latou e iloilo le fetalaiga a le Atua ia Alema le Matua i le Mosaea 26:22–23, 29–30. O a mea latou te maua o le a fesoasoani i lena tagata?

• Ao lei amataina le vasega, fai atu i se tasi o tamaiti e faitau e uiga i le liua o Alema le Itiiti, o loo maua i le Mosaea 27:8--37. ma sau saunia e faamatala le tala i le vasega e pei o ia o Alema le Itiiti. (Afai e manaʻomia, fautua atu e fesili atu i se matua e fesoasoani.) Ao faamatala mai e le tamaitiiti le tala, ia fai fesili e pei o le “O a ni ou lagona ina ua … ?” po o le “O le a le mea na sosoo?”

• Valaaulia tamaiti e fai se lisi o upu mai le Mosaea 27:8--10 e faamatalaina ai pe na faapei ia Alema ma atalii o Mosaea a’o le’i liua i latou. Ona fai atu lea ia i latou e fai se isi lisi mai le Mosaea 27:32--37 e faamatalaina ai pe na faapefea mulimuli ane. E tusa ai ma fuaiupu 24--29, o le a le mafuaaga o lenei suiga tele ia Alema?

Mosaea 26:29–31

Ina ia faamagaloina, e tatau ona ou faamagalo atu.

Fesoasoani i tamaiti ia iloa le fesootaiga i le va o le faamagaloga latou te tuuina atu i isi ma le faamagaloga latou te faamoemoe mo i latou lava.

Gaoioiga e Mafai Ona Fai

• Valaaulia tamaiti e faitau Mosaea 26:29--31 ma faitau pe faafia ona vaaia le upu “faamagalo”. O le a se mea o aoao mai e nei fuaiupu e uiga i le faamagalo atu o isi? E faapefea ona fesoasoani le faamagalo atu i le tagata na faia se mea sese ma le tagata o loʻo faʻamagaloina?

• Fai atu i se tamaitiiti e tusi se alalaupapa i luga o le laupapa, ma faasoa atu lenei saunoaga na sii mai e Peresitene Thomas S. Monson: “O le na te le mafai ona faamagalo atu i isi ua ia motusiaina le ala laupapa lea e tatau ona ia sopoiaina pe afai e alu atu o ia i le lagi, aua e moomia e tagata uma le fefaamagaloa’i” (Na sii mai e George Herbert, i le “O Tina O Loo Natia,” Liahona, Me 2002, 19). Tape se vaega o le alalaupapa, ma fai atu i tamaiti e fesoasoani ia te oe e toe fausia, i lea vaega ma lea vaega, ao latou faasoa mai ni auala e mafai ona latou faalautele atu ai le faamagaloga i isi. Valaaulia i latou e mafaufau i se tasi latou te manaomia e faamagalo.

Mosaea 27:8--24

E mafai ona ou tatalo ma anapogi mo le Atua e faamanuia i latou ou te alofa i ai.

Mafaufau pe mafai faapefea ona e fesoasoani i tamaiti ia malamalama o le anapogi e mafai ona faamalosia ai lo latou faatuatua ao latou tatalo mo tagata latou te alolofa i ai.

Gaoioiga e Mafai Ona Fai

• Faitau faatasi le Mosaea 27:8--24, ma fai atu i tamaiti e faailoa le mea na faia e Alema ma ona tagata e fesoasoani ai ia Alema le Itiiti. Faasoa atu se aafiaga na e anapogi ma tatalo ai mo se tasi, ma uunaia tamaiti e faasoa mai o latou lava aafiaga.

• Valaaulia tamaiti e mafaufau i se tasi latou te iloa e manaomia le fesoasoani a le Atua i lona olaga. Tuu atu lau molimau e mafai e tamaiti ona tatalo ma anapopogi ma le faatuatua mo le Atua e faamanuia lenei tagata. Valaaulia tamaiti e tatalo mo le tagata latou te mafaufau i ai ma, pe afai latou te mafai, ia anapogi foi mo i latou.

aikona aoaoina

Fautuaina le Aoaoina i le Aiga

Fai atu i tamaiti e piki se mea se tasi na latou aoaoina mai le aafiaga o Alema le Itiiti ma atalii o Mosaea latou te mananao e faasoa ma o latou aiga.

Faaleleia o Lo Tatou Aoao Atu

Lagolago matua “O matua o faiaoga aupito taua ia mo a latou fanau—e iai ia i latou le tiutetauave autu ma le mana silisili e tosina ai a latou fanau (tagai Teuteronome 6:6–7). A o e aoao atu tamaiti i le lotu, saili ma le agaga tatalo auala e lagolago ai o latou matua” (Aoao Atu i le Ala a le Faaola, 25).

itulau o gaoioiga: e fesoasoani le talalelei ia i tatou e avea pei o Iesu Keriso