Liua o Alema le Itiiti, saunia e Gary L. Kapp

18–24 Me

Mosaea 25–28

“Sa Ta’ua i Latou o le Nuu o le Atua”

Ina ua “uma ona oo mai le siufofoga o le Alii ia [Alema],” sa tusi e ia i lalo mea na ta’u atu e le Alii ia te ia “ina ia mafai ona maua e ia” (Mosaea 26:13, 33). O le a faapefea ona e mulimuli i le faataitaiga a Alema?

Tusifaamaumau Ou Lagona Uunai

Ina ua mavae le toetoe atoa tupulaga e tolu o le ola ai i atunuu eseese, sa toe avea sa Nifae ma nuu e tasi. O le nuu o Limae, nuu o Alema, ma le nuu o Mosaea—e oo lava i le nuu o Saraemila, o e sa lei tupuga mai ia Nifae—ua “faitaulia faatasi uma ma sa Nifae” (Mosaea 25:13). O le toatele o i latou sa mananao ia avea ma tagata o le Ekalesia lea sa faavaeina e Alema. O lea o i latou uma o e “sa mananao e ave i o latou luga le suafa o Keriso” sa papatisoina, “ma sa ta’ua i latou o le nuu o le Atua” (Mosaea 25:23–24). Ina ua mavae tausaga o taua ma le faatagataotauaina, sa foliga mai o le a iu ina olioli sa Nifae i se vaitau o le toafilemu.

E lei leva, ae amata ona sauaina le Au Paia e i latou sa lei talitonu. O le mea e faapitoa ai le lotomomomo i lenei mea ona o le toatele o nei tagata le talitonu o fanau lava a e sa talitonu—o le “tupulaga faia’e” (Mosaea 26:1), e aofia ai atalii o Mosaea ma le atalii e toatasi o Alema. Ona tupu lea o se vavega, ma o le tala o lena vavega na maua ai le faamoemoe i matua lototiga mo le tele o tupulaga. Peitai o le tala i le liuaina o Alema e le mo na o matua o fanau faalogogata. O le liuaina faamaoni o se vavega e, manaomia ona tupu ia i tatou uma, po o le a lava.

Manatu mo Suesuega Faaletagata Lava Ia o Tusitusiga Paia

Mosaea 26:1–6

Ua ia te au le tiutetauave mo lo’u lava faatuatua ma le molimau.

O i latou na faalogo i le lauga a le Tupu o Peniamina na oo i se liuaina ofoofogia (tagai Mosaea 5:1–7), ae o le liuaina o se aafiaga patino e le mafai ona pasi atu e pei o se tofi i se fanau a se tasi. E tatau ona tatou oo uma i o tatou lava liuga i le talalelei a Iesu Keriso. A o e faitauina le Mosaea 26:1--6 e uiga i “le tupulaga faia’e” o e le talitonu o sa Nifae, matau ia taunuuga o lo latou le talitonu. E mafai foi ona e mafaufau e uiga i tagata e te moomoo maimau pe ana mafai ona e aumaia ia Keriso. E ui e le mafai ona e avatu ia i latou lou liuaina, e mafai e le Agaga ona musumusu atu i ai mea e te mafai ona fai e fesoasoani ai ia i latou ia maua le faatuatua. A o e faitauina le Mosaea 25–28 e uiga i le ala na fesoasoani ai Alema ma isi tagata o le Ekalesia i le tupulaga faia’e, e mafai ona oo atu ia te oe nisi mafaufauga.

Tagai foi Mataupu Faavae ma Feagaiga 68:25–29.

Mosaea 26:6–39

E saili ia auauna faamaoni a le Atua e faia Lona finagalo.

O nisi taimi tatou te ono manatu ai o se taitai o le Ekalesia e pei o Alema e iloa i taimi uma le mea sa’o e fai. I le Mosaea 26 tatou te faitau ai i se faafitauli i le Ekalesia sa lei taulimaina muamua e Alema, ma “sa mata’u o ia nei fai e ia se mea sese i le silafaga a le Atua” (Mosaea 26:13). O le a le mea na faia e Alema i lenei tulaga? (tagai i le Mosaea 26:13–14, 33–34, 38–39). O le a se mea ua fautuaina mai e le aafiaga o Alema e uiga i le ala e mafai ona tatou taulimaina faafitauli faigata i lou aiga po o lau auaunaga i le Ekalesia?

E ono manaia foi le lisi i lalo o upumoni sa faaali atu e le Atua ia Alema o loo maua i le Mosaea 26:15–32. Matau o nisi o nei upumoni sa lei tuusa’o atua i le fesili a Alema. O le a se mea o ta’u mai e lenei mea ia te oe e uiga i le tatalo ma le mauaina o faaaliga faaletagata lava ia?

Mosaea 27:8–37

E ao ina toe fanauina tane ma fafine uma.

Sa manino na manaomia e Alema le Itiiti se toefanauina faaleagaga, aua o atalii o Mosaea o “tagata agasala sili ona leaga,” o e sa o atu “e faaumatia le ekalesia a le Atua” (Mosaea 28:4; 27:10). Ae e lei leva ona mavae lona liuaina, sa molimau atu Alema e faapea o loo avanoa le liuga—ma e tatau ai—mo tagata uma: “Aua e te ofo,” na ia fai mai ai, “e ao i le fanauga uma a tagata … ona toefanauina” (Mosaea 27:25; ua faaopoopo le faatusilima). O lena mea, ioe, e aofia ai ma oe.

A o e faitau e uiga i le aafiaga o Alema, o loo maua i le Mosaea 27:8–37, atonu e te manao e tuu oe lava i lona tulaga. E te le o taumafai e faaumatia le Ekalesia, ae e mafai moni lava ona e mafaufau i mea e uiga ia te oe lava e manaomia ona suia. O ai, pei o le tama o Alema, o loo lagolagoina oe ma tatalo mo oe “ma le faatuatua tele”? O a aafiaga na fesoasoani e “faatalitonu [oe] i le mana ma le pule a le Atua”? (Mosaea 27:14). O a ni “mea tetele” ua faia e le Alii mo oe po o lou aiga e ao ona e “manatua”? (Mosaea 27:16). O le a se mea ua aoao mai upu ma faatinoga a Alema le Itiiti i le uiga o le toefanauina? E mafai ona fesoasoani fesili faapenei ia te oe e iloilo ai lou alualu i luma i le faagasologa o le toefanauina.

Tagai foi Mose 5:6-9; Alema 36; “Conversion” (Gospel Topics, topics.ChurchofJesusChrist.org).

Ua Olioli Lona Tama, saunia e Walter Rane

Mosaea 27:14, 19–24

E faafofoga mai le Atua i a’u tatalo ma tali mai i ai e tusa ai ma lona finagalo.

Atonu e te iloa se matua o i le tulaga o Alema le Matua, o i ai sona atalii po o se afafine o faia filifiliga faataumaoi. Pe atonu foi o oe o lena matua. O le a se mea e te maua i Mosaea 27:14, 19–24 e avatu ai ia te oe le faamoemoe? E mafai faapefea e nei fuaiupu ona faatosinaina au tatalo mo isi?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Mosaea 25:5–11

O a ni lagona o le nuu o Mosaea ina ua uma ona ia faitau atu ia i latou talafaamaumau a le nuu o Senifa ma le nuu o Alema? Pe o tausia e lou aiga ni talafaamaumau e mafai ona e faitau mai ai? Atonu e mafai ona e faaopoopo atu i au talafaamaumau pe amata foi ona tausia ni au lava. O le a se mea o le a e faaaofia ai e mafai ona fesoasoani i lou aiga (e aofia ai tupulaga i le lumanai) e “faatumulia ai i le olioli tele lava” ma aoao ai e uiga “i le agalelei vave o le Atua”? (Mosaea 25:8, 10).

Mosaea 25:16

Aisea na taua ai mo le nuu o Limae ona manatua sa laveaiina i latou e le Alii mai le nofopologa? O le a se mea na faia e le Alii mo i tatou e ao ina tatou manatua?

Mosaea 26:29–31; 27:35

E tusa ai ma nei fuaiupu, o le a se mea e tatau e se tagata ona fai ia maua ai le faamagaloga?

Mosaea 27:21–24

A o e faitauina nei fuaiupu, mafaufau i se tasi e mafai e lou aiga ona tatalo ma anapogi i ai.

Mosaea 27–28

Ina ia fesoasoani i lou aiga e vaai faalemafaufau i tala o i nei mataupu, e mafai ona e valaaulia i latou e tusi ni ata o tagata o loo aofia ai ma faaaoga ia ata e toe faamatala ai le tala. Pe atonu foi latou te fiafia e faatino mai le tala; pe mafai faapefea ona latou faaalia le suiga na oo i ai Alema ma atalii o Mosaea.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Lo Tatou Aoao Atu

Faaaoga ata o faatufugaga. “O le Tusi Ata o le Talalelei ma le LDS Media Library i le ChurchofJesusChrist.org o loo i ai le tele o ata ma vitio e mafai ona fesoasoani [i lou aiga] e vaai faalemafaufau ai i manatu faavae po o mea na tutupu” (Aoao Atu i le Ala a le Alii, 22).

Ata tusi o se agelu ua faaali atu ia Alema le Itiiti saunia e Kevin Keele