Minerva K. Teichert (1888–1976), O Amona i luma o le Tupu o Limae, 1949 1949, suauu i luga o le laupapa, 35 15/16 x 48 inisi. Falemataaga mo Faatufugaga a le Iunvesite a Polika Iaga, 1969.

27 Aperila--3 Me

Mosaea 7--10

“I Le Malosiaga o le Alii”

A o e faitau, e mafai ona aumaia e le Agaga ia te oe ni fasifuaitau patino po o fuaitau. Tusi i lalo pe faapefea ona faatatau na fuaitau ia te oe.

Tusifaamaumau Ou Lagona Uunai

A o olioli le nuu o le Tupu o Mosaea i le “filemu faifai pea” i Saraemila (Mosaea 7:1), sa liliu atu o latou mafaufauga i se isi vaega o sa Nifae, o e na tuua i le tele o tausaga ua mavae e nonofo i le nuu o Liae-Nifae. Na mavae tupulaga, ma sa lei faalogo le nuu o Mosaea mai ia i latou. O lea na faatonuina ai e Mosaea ia Amona e taitai se vaega sailiili e o e sue ia sa Nifae sa tuua i latou. Na maua e le au sailiili e faapea o sa Nifae, “ona o le amioleaga” (Mosaea 7:24), sa nofopologa ia sa Lamana. Peitai, i le taunuu atu o Amona ma ona uso, na faafuasei ai ona i ai le faamoemoe mo le laveaiina.

O nisi taimi tatou te pei ai o sa Nifae sa nofopologa, e puapuagatia ona o a tatou agasala, e taumanatunatu pe o le a faapefea ona toe maua o le filemu. O nisi taimi tatou te pei ai o Amona, e lagona le uunaia e aapa atu i isi ma iu ai ina iloa o a tatou taumafaiga na musuia ai i latou e “faaeaea i luga [o latou] ulu, ma fiafia, ma tuu lo [latou] faatuatuaga i le Atua” (Mosaea 7:19). Po o a lava o tatou tulaga, tatou te manaomia uma lava le salamo ma “liliu atu i le Alii ma le faamoemoega atoa o le loto,” ma le faatuatua “o le a ia … laveaiina [i tatou]” (Mosaea 7:33).

Manatu mo Suesuega Faaletagata Lava Ia o Tusitusiga Paia

Mosaea 7:14–33

Afai ou te liliu atu i le Alii, faalagolago ia te Ia, ma auauna atu ia te Ia, o le a Ia laveaiina au.

O le feiloai atu ia Amona, o se sa Nifae mai Saraemila, na avatu ai i le Tupu o Limae sina faamoemoe, ma sa ia manao e pasi atu lena faamoemoe i lona nuu. A o e faitauina le Mosaea 7:14--33, matau mea na fai atu ai Limae i lona nuu e fautuaina ai i latou, faamalosia lo latou faatuatua, ma avatu ia i latou se faamoemoe o le a fesoasoani le Atua ia i latou. E ui lava atonu e le o ta’usalaina oe i agasala lava e tasi e pei o le nuu o Limae, ae e mafai faapefea e ana upu ona fesoasoani ia te oe e liliu atu ai i le Alii? O le a e matauina, mo se faataitaiga, na faamanatu atu e Limae i lona nuu e uiga i tala ua tuanai e uiga i le laveaiina o i latou e le Atua (tagai fuaiupu 18–20). E faapefea e nei tala, faapea foi isi tala faatusi paia po o aafiaga patino, ona fesoasoani ia te oe e faatuatuaina le Atua?

Mosaea 8:5–12

O a papatusi e 24 ia na maua e le nuu o Limae?

A o sailia e aunoa ma se faamanuiaina e se vaega toalaiti o le nuu o Limae le nuu o Saraemila, sa latou mauaina papatusi e 24 e auro ma ni tusiga vane i se gagana e lei masani ai. O nei papatusi, ia na iu ina faaliliuina e le Tupu o Mosaea, sa faamatala ai e uiga i se nuu sa igoa o sa Iareto, o e na o mai i le nuu folafolaina mai le Olo o Papelu ma sa iu ina faaumatia (tagai Mosaea 28:11–19). Mulimuli ane sa faia ai e Moronae se faapuupuuga o nei papatusi (tagai Eteru 1:1–2), lea na avea ai ma tusi o Eteru. Matau i le Mosaea 28:18 le aoga o nei talafaamaumau i le nuu o Mosaea.

Mosaea 8:12–19

Ua saunia e le Alii ia perofeta, tagatavaai, ma talifaaaliga ia manuia ai le tagata.

Ina ua faalogo Limae i le molimau a Amona faapea sa faatuina mai e le Alii se tagatavaai, sa “matuai olioli [Limae] ma ava’e le faafetai i le Atua” (Mosaea 8:19). Aisea e te manatu ai na faapena ona lagona? O le a le mea ua e aoaoina e uiga i tagatavaai mai upu a Amona i le Mosaea 8:13–19? I o tatou taimi, “o le Au Peresitene Sili ma le Aufono a le Toasefululua, ua lagolagoina o ni perofeta, tagatavaai, ma talifaaaliga” (Bible Dictionary, “Seer”). O anafea le taimi mulimuli na e manatunatu loloto ai i faamanuiaga o le i ai o perofeta, tagatavaai, ma talifaaaliga i le lalolagi? Atonu e mafai ona e tusitusia pe na faapefea ona avea perofeta, tagatavaai, ma talifaaaliga o se “manuia tele” ia te oe (Mosaea 8:18).

O le Perofeta o Iosefa Samita o le tagatavaai sili e tu i le faauluuluga o lo tatou tisipenisione (tagai i le MF&F 21:1; 124:125; Iosefa Samita—Talafaasolopito 1:62). Na faapefea ona ia faatinoina le faamatalatalaina e Amona o se tagatavaai i le taimi o lana galuega?

Mosaea 9–10

E mafai ona ou faafetaia’ia o’u luitau “i le malosiaga o le Alii.”

Sa tautino atu e Senifa na ia faia ni mea sese. Sa ova naunau o ia i nisi taimi, ma sa ia tuuina lona nuu—tuaa o le nuu o Limae—i se tulaga faigata e ala i le faia o se maliega le mafaufau ma le Tupu o Lamana. Ae mulimuli ane, ina ua ia sii taua atu ia sa Lamana, sa ia fesoasoani i lona nuu e faafetaia’ia ia luitau ma le faatuatua. A o e faitauina le Mosaea 9–10, vaavaai mo mea na faia e le nuu o Senifa e faaalia ai lo latou faatuatua. Na faapefea ona faamalolosia i latou e le Atua? O le a le uiga ia te oe o le agai i luma “i le malosiaga o le Alii”? (Mosaea 9:17; 10:10–11).

Mosaea 10:11–17

O a’u filifiliga e mafai ona tosina ai augatupulaga.

E tusa ai ma le Mosaea 10:11--17, na faapefea e faatinoga ma uiga faaalia o tuaa o sa Lamana ona papuipuia sa Lamana mai le iloaina o le upumoni? Na faapefea e filifiliga a tuaa o sa Lamana ona aafia ai tupulaga i le lumanai? Mafaufau i tagata e ono tosinaina i ou talitonuga ma filifiliga; o le a sau mea o fai e fesoasoani ai ia te i latou ia atili faatuatua atoatoa ai ia Keriso?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Mosaea 7:19–20

Matau ia faataitaiga na faasino i ai Limae ina ia faamalosiauina ai lona nuu ia faatuatua. O a ni faataitaiga mai tusitusiga paia e musuia ai i tatou e “faalagolago i le Atua”? O le a le uiga o le tuu atu o lo tatou faalagolago i le Atua? (tagai foi i le Mosaea 9:17; 10:19). O a tala mai o tatou olaga po o olaga o o tatou augatama e mafai ona tatou faasoa atu e musuia ai le faalagolago sili atu i le Atua?

Mosaea 7:26–27

O a mea ua tatou aoao e uiga i le Faaola mai i nei fuaiupu? (tagai foi i le MF&F 130:22). Aisea tatou te faafetai ai i le iloaina o nei mea?

Mosaea 8:13–18

Ina ia fesoasoani ia malamalama tagata o le aiga pe o le a le tagatavaai, atonu e mafai ona e faaali atu ia i latou ni ata o meafaigaluega e fesoasoani ia i tatou e vaai ai i mea semanu e le mafai ona tatou vaai i ai, e pei o mea vaai, o se telesikope [telescope], po o se maikolosikope [microscope]. E faapefea ona faapei nei meafaigaluega o se tagatavaai? (tagai i le Mose 6:35–36). O a mea e mafai e tagatavaai ona vaai i ai ae tatou te le mafaia? O le a se faamaoniga o ia i tatou faapea o Iosefa Samita o se tagatavaai?

E mafai ona e faaali atu ata o o tatou perofeta soifua, tagatavaai, ma talifaaaliga ma fesili i lou aiga pe o a ni mea latou te iloa ia i latou. O faapefea ona tatou mulimuli ia i latou?

Mosaea 9:14–18; 10:1–10

Ina ua osofaia e sa Lamana, sa saunia faaletino ma faaleagaga le nuu o Senifa. O le a se mea e mafai ona tatou aoao mai le nuu o Senifa e uiga i le saunia mo luitau?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia Suesuega Faaletagata Lava Ia

Sailia ou lava malamalamaaga faaleagaga. O lenei otootoga o loo fautuaina mai ai fuaitau ma mataupu faavae e taulai i ai, ae aua nei faatuaoia au suesuega i nei fautuaga. Atonu e uunaia oe e fuaiupu e maua foi ni mataupu faavae e le o ta’ua ii. Ia tuu atu i le Agaga e taialaina oe.

Faaaliga ia Iosefa Samita, saunia e Clark Kelley Price