Alema le Itiiti o Loo Folafola Atu, saunia e Gary L. Kapp

25–31 Me

Mosaea 29–Alema 4

“Sa Latou Mausali ma le Le Faagaeetia”

O le faitauina o tusitusiga paia e valaaulia ai faaaliga. Ia nofo sauniuni i savali e finagalo le Atua e avatu ia te oe.

Tusifaamaumau Ou Lagona Uunai

E ono vaai atu nisi i le fautuaga a le Tupu o Mosaea e suitulaga ia tupu i faamasino e filifilia ua na o se toefaafouga poto faaupufai. Ae ia sa Nifae, aemaise i latou o e sa nonofo i lalo o le taitaiga a le Tupu amioleaga o Noa, o lenei suiga e i ai foi sona tulaga taua faaleagaga. Sa latou vaai i le ala na faaoso ai e se tupu amioletonu le “amioleaga” ma le “faafanoga tele” i lona nuu (Mosaea 29:17), ma sa latou “matua naunau” ia saoloto mai ia tosinaga. O lea suiga o le a mafai ai e i latou ona nafa ma lo latou lava amioletonu ma “tali atu mo [a latou] lava agasala” (Mosaea 29:38; tagai foi MFF 101:78).

Ioe, o le faaiuga o le nofoaiga a tupu e lei faapea ai na muta ai faafitauli i le nuu o sa Nifae. Sa faalauiloa e tagata amio pepelo e pei o Neoa ma Amaliki ia manatu sese, sa sauaina e tagata le talitonu ia le Au Paia, ma e toatele tagata o le Ekalesia sa faamaualuluga ma pauu ese. Ae sa tumau “tagata lolomaualalo sa mulimuli i le Atua” ma sa “mausali ma le le mafaagaeetia” e ui i mea sa tutupu i lo latou siomaga (Alema 1:25). Ma ona o le suiga na faatagaina e Mosaea, sa mafai ai ona latou “tuu atu o latou leo” e tosina ai lo latou nuu mo le lelei (Alema 2:6).

Manatu mo Suesuega Faaletagata Lava Ia o Tusitusiga Paia

Mosaea 29:11–27; Alema 2:1–7

E mafai ona avea au ma se tosinaga lelei i le nuu.

E na o le lima tausaga talu ona faia le nofoaiga a faamasino, ae tulai mai se mala o le a tofotofo ai le tautinoga a Mosaea e faapea o le toatele o tagata o le a masani ona filifilia le mea e sa’o (tagai Mosaea 29:26). O lea faafitauli na aofia ai le saolotoga faaletapuaiga: o se tagata e igoa ia Amiliki sa saili e “aveesea mai [i tagata] a latou aia ma avanoa o le ekalesia” (Alema 2:4). Pe ua e matauina ia aia tatau faaletapuaiga o faamata’uina i lo outou atunuu po o le nuu? O le a se mea e mafai ona e aoao mai i le ala na tali atu ai Alema ma lona nuu i o latou tofotofoga? (tagai Alema 2:1–7).

Atonu e tele ni faafitauli taua o feagai ma lou nuu. E mafai faapefea e oe, pei o sa Nifae, ona faamautinoa o loo aofia ai lou leo i “le leo o tagata”? Atonu o e nofo i se nofoaga e tau leai se tosinaga o leo o tagata i le malo, afai o lea, pe o i ai nisi auala e mafai ai ona avea oe o se tosinaga lelei i lou nuu?

Alema 1

E mafai ona ou iloa ma teena ni mataupu po o aoaoga faavae sese.

E ui na iu ina tautau atu e Neoa faapea e sese mea na ia aoao atu, ae sa faaauau pea ona tosina e ana aoaoga ia sa Nifae mo le tele o tausaga (tagai Alema 1:15–16; 2:1–2; 14:14–18; 15:15; 21:4; 24:28). Aisea na faatosina ai i tagata ia aoaoga a Neoa? A o e faitauina le Alema 1:2--4, tagai pe mafai ona e faailoa mai ia mea sese i aoaoga a Neoa; atonu o le a e matauina sa aoao faatasi atu lava ma se vaega o upumoni.

Sa faafetaia’ia e Kitiona ia Neoa “i afioga a le Atua” (Alema 1:7, 9). Pe mafai ona e mafaufau i ni mau e faamaonia ai le sese o mea pepelo a Neoa? O ni nai faataitaiga nei, ae e tele isi: Mataio 7:21–23; 2 Nifae 26:29–31; Mosaea 18:24–26; ma le Helamana 12:25–26. E mafai faapefea e nei mau ona fesoasoani ia te oe e faamaonia ai mea pepelo o loo aoao mai i nei aso?

O se isi auala e fai ai au suesuega o le Alema 1 faatusatusa o Neoa i ona soo (fuaiupu 3–9, 16–20) ma “le nuu o le Atua” (fuaiupu 25–30; tagai foi 2 Nifae 26:29–31). E mafai faapefea ona avea atili oe e pei o le nuu o le Atua? Pe o e matauina se “faitaulaga pepelo” i lau lava auaunaga?

Alema 1:27–31; 4:6–15

O soo moni o Iesu Keriso latou te lē tuu atu o latou loto i luga o oa.

Mataupu 1 ma le 4 o le Alema o loo faamatala mai ai vaitau na manuia ai le Ekalesia, ae sa eseese le tali atu o tagata o le Ekalesia i na manuia i tulaga taitasi. O a ni eseesega o e vaaia? E fua i mea e te maua, e faapefea ona e faamatalaina le uiga faaalia “o soo lotomaualalo o le Atua” (Alema 4:15) i oa ma manuia o le lalolagi? O le a se mea ua musuia oe e sui e uiga i ou lava uiga faaalia?

Alema 4

O le “afioga a le Atua” ma le “molimau mama” e mafai ona suia ai loto.

O le a le mea na “matua faanoanoa” ai Alema (Alema 4:15) i le Alema 4? Atonu e faapea mai nisi o le tofi o le faamasino sili e ono tuu ai Alema i le tulaga silisili e foia ai faafitauli na te vaai i ai i lona nuu. Sa lagona e Alema e i ai se auala sili atu. O le a se mea ua faagaeetia ai oe e uiga i le faiga o le fesoasoani i lona nuu? O lau suesuega e ono musuia ai mafaufauga e uiga i ala e mafai ai ona e tosinaina ma le amiotonu i latou o siomia ai oe; afai o lea, faatino loa na mafaufauga.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Alema 1:19–25

E mafai ona manuia lou aiga mai le faailoaina o ala eseese e tali atu ai tagata o le Ekalesia i sauaga i nei fuaiupu. Atonu e mafai ona e faata’ita’ia auala e tali talafeagai atu ai pe a osofaia e isi ou talitonuga. O vitio i le ChurchofJesusChrist.org/religious-freedom/examples e mafai ona fesoasoani.

Alema 3:4

O le a le savali na manao Amiliki e tuuina atu ina ua latou “faailogaina i latou lava”? (tagai Alema 3:4, 13). O a ni savali atonu tatou te auina atu—ma le loto pe aunoa foi ma le loto—i o tatou foliga vaaia? Atonu o se taimi lelei lenei e toe iloilo ai le “Ofu ma Foliga Vaaia” i le Mo Le Malosi mo le Autalavou (2011), 6–8.

Alema 4:2–3

O a mea po o aafiga ua “fagua ai [tatou] e manatua lo [tatou] tiute” i le Atua? (Alema 4:3). Atonu e aoga le faasoa atu o fuaiupu nei pe a uma ona fafagu lou aiga i le taeao. Ona mafai lea ona outou talanoaina pe fesoasoani faapefea ia i tatou le ala mai faaletino, tatou te malamalama ai i luitau o le ala mai faaleagaga.

Alema 4:10–11

E mafai faapefea ona tatou aloese mai le avea o se “maa tu’ia tele ia te i latou o e lē auai i le ekalesia”? (Alema 4:10). E ono mafai foi ona aoga le talanoa e uiga i le ala e mafai ai ona tatou faamautinoa o taga a isi, aemaise o tagata o le Ekalesia, e le avea ma maa tu’ia mo lo tatou alualu i luma faaleagaga.

Alema 4:19

Ina ia fesoasoani i lou aiga ia malamalama i le mana o le molimau, e mafai ona e fai atu ia i latou e mafaufau i se taimi ina ua latou faalogo i se molimau a se tasi na aafia loloto ai i latou. Aisea atonu na filifili ai Alema e faaaoga le molimau ma le upu a le Atua e pa’i atu ai i loto o tagata? (tagai foi Alema 31:5). Aisea e sili atu ona aoga lea nai lo isi metotia e ono faaaoga e tagata e faatauanau ai isi ia suia? Pe o i ai ni tagata e mafai ona tatou faamalolosia lo latou faatuatua e ala i le faasoa atu i ai o a tatou molimau ia i latou?

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.

Faaleleia o Suesuega Faaletagata Lava ia

Faatatauina o tusitusiga paia ia te oe lava. Mafaufau pe faapefea ona faaaoga tala ma aoaoga a tusitusiga paia i lou olaga. Mo se faataitaiga, e mafai ona e maua ni tulaga e ogatusa ai le lalolagi i nei ona po ma faafitauli faalenuu sa feagai ma sa Nifae i le Alema 1–4

Alema ma Amiliki, saunia e Scott M. Snow