Alema le Itiiti o loo talai atu

Alema le Itiiti o loo Talai Atu, saunia e Gary L. Kapp

25--31 Me

Mosaea 29–Alema 4

“Sa Latou Mausali ma le Lē Mafaagaeetia”

O tamaiti e te aoaoina e mafai ona tele ni mea latou te aoaoina i lau vasega, ae o le a latou aoao atili pe afai latou te atiina ae se masani o le suesueina o tusitusiga paia i le fale. Mafaufau pe faapefea ona e faamalosia ma lagolagoina le aʻoaʻoina o le talalelei i le fale.

Tusi faamaumau Ou Lagona Uunai

aikona o le fefaasoaai

Valaaulia le Fefaasoaai

Valaaulia tamaiti e nonofo i luga o le fola i se liʻo, ma faataavale se polo i se tasi o i latou. Fai atu i lena tamaitiiti e faasoa mai se mea na ia aoaoina talu ai nei e uiga i le talalelei i le fale po o le Peraimeri. Ona valaaulia lea o le tamaitiiti e faataavale le polo i se isi tamaitiiti. Toe fai seia maua e tamaiti uma se avanoa e faasoa atu ai se mea.

aikona o le aoao atu

Aoao atu le Aoaoga Faavae: Tamaiti Laiti

Alema 1:2–9, 26–30

I le avea ai ma se tagata o le Ekalesia, e tatau ona ou alofa ma auauna atu i isi.

Atonu e te le filifili e tau atu i tamaiti le tele o mea e uiga i aoaoga a Neʻoa, ae atonu latou te manuia mai le iloaina e faapea, i le Ekalesia tatou te auauna atu aua tatou te alolofa i isi, ae le ona tatou te mananao ia mauʻoa pe lauiloa.

Gaoioiga e Mafai Ona Fai

• Faasoa atu i tamaiti, i ni upu faigofie, le tala ia Alema ma Ne’oa (tagai Alema 1; “Mataupu 20: Alema ma Ne’oa,” Tala o le Tusi a Mamona, 54–55, po o le vitio talafeagai i luga o le ChurchofJesusChrist.org). Faamamafa atu e ui lava ina agaleaga ia soo o Neʻoa i tagata o le Ekalesia, ae o le toatele o tagata o le Ekalesia sa tumau pea le agalelei ma le alofa.

• Faitau Alema 1:30 i tamaiti, ma fesoasoani ia i latou ia malamalama o tagata o le Ekalesia na fefaasoaa’i a latou mea ma tagata na manaomia le fesoasoani. Fesoasoani i tamaiti e mafaufau i mea e mafai ona latou fetufaa’i atu ma tagata e mafai ona latou fefaasoa’ai atu i ai. Valaaulia tamaiti e tusi ni ata o a latou fuafuaga.

• Usu faatasi se pese e faatatau i le alofa ma le auauna atu, e pei o le “O Le Agalelei e Amata Ia Te A‘u” (Tusipese a Tamaiti, 83), ma fesoasoani i tamaiti e mafaufau i taga e mafai ona o faatasi ma le pese.

Alema 2:28–30

O le a tali mai le Atua i a’u tatalo.

Ina ua lagonaina e Alema ma Sa Nifae le “matau tele” (Alema 2:23), na latou tatalo mo se fesoasoani ma na faamalosia. Fesoasoani i tamaiti e aoao mai i la latou faataitaiga.

Gaoioiga e Mafai Ona Fai

• Faʻaaoga ata i le otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga pe i le “Mataupu 21: O Sa Amaleka” (Tala o le Tusi a Mamona, 56--57, po o le vitio talafeagai i luga o le ChurchofJesusChrist.org), tau atu i tamaiti pe na faapefea ona maua e Sa Nifae le malosi e faatoilaloina ai Sa Amaleka. Fesili atu i tamaiti e uiga i mea e taufaafefe pe faigata mo i latou, ma molimau atu e mafai ona latou tatalo i le Tama Faalelagi mo se fesoasoani i nei mea.

• Faasoa atu se aafiaga na fesoasoani ai le Atua ia te oe ina ua uma ona e tatalo ia te Ia. Valaaulia tamaiti e faasoa mai ni aafiaga na latou maua i le tatalo.

Alema 4:19

O laʻu molimau e mafai ona faamalosia ai isi.

E masani lava o le “molimau manino” (Alema 4:19) o se tamaitiiti e mafai ona i ai se aafiaga malosi i isi. E mafai faapefea ona e fesoasoani i tamaiti e sue ni auala e faasoa atu ai a latou molimau?

Gaoioiga e Mafai Ona Fai

• Susue tusitusiga paia i le Alema 4:19, ma faamatala atu, ina ua iloa e Alema le amioleaga o tagata, na tonu ia te ia le auala sili e fesoasoani ai ia i latou o le tuuina atu lea o le “molimau manino” ia i latou. Faaaoga le itulau o gaoioiga o lenei vaiaso e aoao ai tamaiti po o le a le molimau ma le vaega e aofia ai. Uunaia i latou e faasoa mai a latou molimau.

• Sasaa se vai mama i totonu o se ipu manino, ma faamatala atu o le vai e pei o a tatou molimau aua e mafai ona tatou faasoa atu i isi. Sasaa le ipu vai i totonu o se ipu laitiiti mo tamaiti taitoatasi, ma tau i tamaiti pe a tatou faasoa atu a tatou molimau, tatou te fesoasoani foi i isi ia maua ni molimau malolosi.

• Afai e mananao i ai tamaiti, tuu atu latou te faataitai i le faasoaina atu o a latou molimau. Fautua atu ni auala e mafai ona latou faaali atu ai latou te iloa e moni le talalelei, e aofia ai ma a latou taga.

aikona o le aoao atu

Aoao atu le Aoaoga Faavae: Tamaiti Matutua

Alema 1:2--9

E mafai ona ou aoao e iloa aʻoaʻoga sese.

I nisi taimi i o tatou olaga, tatou te feagai ai ma tagata e pei o Neʻoa---latou te taumafai e faasese i tatou i savali manaia ae e sese ma leaga. O le faasoaina o le tala o loo i le Alema 1:2--9 e mafai ona fesoasoani i tamaiti e saunia ai mo na ituaiga o feiloaiga i o latou olaga.

Gaoioiga e Mafai Ona Fai

• Fesoasoani i tamaiti e faitau le Alema 1: 2--4 e toe iloilo ai nisi o mea na aoaoina e Neʻoa, o se faiaoga pepelo. Fesoasoani ia i latou e fatu se suega moni-pe-sese e faaaoga ai faamatalaga mai nei fuaiupu. Aisea e tuufaatasia ai e Satani i nisi o taimi upumoni ma meapepelo? Fesoasoani i tamaiti e mafaufau i nisi o faataitaiga.

• A uma ona iloiloina faatasi le Alema 1:2--9, ona fai atu lea i tamaiti taitoatasi e faitau se tasi o mau nei: Mataio 7:21–23; 2 Nifae 26:29–31; Mosaea 18:24–26; ma Helamana 12:23–26. E faapefea ona teena e nei mau ia aoaoga a Neʻoa? E faapefea ona tatou faaaogaina tusitusiga paia e faamalosia ai a tatou lava molimau o le talalelei?

Alema 1:26–30; 4:6–13

I le avea ai ma se tagata o le Ekalesia, e tatau ona ou alofa ma auauna atu i isi.

O nisi taimi o tagata o le Ekalesia i aso o Alema sa agalelei ma foai atu, ma o isi taimi na latou agaleaga ma faamaualuluga. Fesoasoani i tamaiti o e aoaoina e aoao mai o latou aafiaga.

Gaoioiga e Mafai Ona Fai

• Fesoasoani i tamaiti e faitau Alema 4:6--13, ma faamatala upu e pei o le “amusia,” “sauaina,” ma le “inoino” (faaaoga se utugagana pe a manaomia). O le a so tatou lagona pe afai e faapena le faiga o tatou e tagata? Valaaulia tamaiti e saili upu o loo i le Alema 1:26--30 e faamatala ai pe faapefea ona finagalo le Tama Faalelagi ia tatou fegalegaleaiga o le tasi ma le isi.

• Fai atu i tamaiti e faitau le Alema 1:27, 30 ma fai se lisi o ituaiga tagata na fesoasoani i ai tagata o le Ekalesia. Valaaulia tamaiti e mafaufau i tagata i o latou pitonuʻu po o aʻoga atonu e ono “[manaomia]” (Alema 1:30) lo latou alolofa ma le fesoasoani. Ina ia faamalosia lenei aoaoga faavae, usu faatasi se pese e faatatau i le lotoalofa, e pei o le “Ou te Savali ma Oe” (Tusipese a Tamaiti, 78--79).

Alema 4:8--20

O laʻu molimau e mafai ona faamalosia ai isi.

Na tuu ese e Alema lona tulaga o le faamasino sili ina ia mafai ai ona ia faaaluina le tele o taimi e faasoa atu ai lana molimau ma fesoasoani i tagata ia salamo. O lana faataitaiga e mafai ona musuia tamaiti e faasoa atu a latou molimau i le tele o taimi.

Gaoioiga e Mafai Ona Fai

• Faitau Alema 4:8--12, 15 ma tamaiti, ma fai atu ia i latou e faailoa mai faafitauli na tutupu i le Ekalesia, e pei ona faamatalaina i nei fuaiupu. Valaaulia tamaiti e fautua mai nisi o mea sa mafai ona fai e Alema e foia ai nei faafitauli. Fesoasoani ia i latou e saili, i le Alema 4:16--20, mea na filifili Alema e fai. Aisea e matua mamana ai molimau?

• Ina ia fesoasoani i tamaiti e malamalama po o le a le molimau ma vaega e aofia ai, faaali le vitio “Apostle Testimony Montage” (ChurchofJesusChrist.org); usu faatasi se pese e faatatau i le autu, e pei o le “Molimau” (Viiga, nu. 74); pe faaaoga le itulau o gaoioiga o lenei vaiaso. Fai atu i tamaiti e faasoa mai mea na latou aoaoina e uiga i molimau mai nei risosi.

aikona o le aoaoina

Fautuaina le Aoaoina i le Aiga

Fesoasoani i tamaiti e mafaufau i se tasi e mafai ona latou faasoa atu i ai a latou molimau i le vaiaso a sau. Fautuaina i latou e tusi se fuafuaga e fesoasoani ia i latou e ausia a latou sini.

Faaleleia o Lo Tatou Aoao Atu

Fai ni fesili e valaaulia ai molimau. “O le faia o fesili e faamalosia ai tagata aoao e molimau atu i mataupu faavae na aoaoina e mafai ona avea o se auala mamana e valaaulia ai le Agaga” (Aoao Atu i le Ala a le Faaola, 32). Ina ia valaaulia tamaiti e tuuina mai a latou molimau, fai ni fesili e uunaia ai i latou e mafaufau i ai ma faasoa mai o latou lagona e uiga i le Faaola po o Lana talalelei. E mafai foi ona e fesili e uiga i aafiaga na latou maua i le tatalo, auaunaga, sauniga e pei o le papatisoga, po o le lagonaina o le uunaiga a le Agaga Paia.

itulau o gaoioiga: E mafai ona ou faasoa atu la’u molimau o le talalelei a Iesu Keriso