Apinati i Luma o le Tupu o Noa, saunia e Andrew Bosley

4--10 Me

Mosaea 11--17

“O Se Malamalama … E Lē Mafai Lava Ona Faapouliuligia”

Mafaufau loloto ma tatalo ina ia e iloa pe mafai faapefea ona e faaaogaina le tala ia Apinati ma ana aoaoga i totonu Mosaea 11--17 e fesoasoani ai i tamaiti o e aoaoina. Tusi faamaumau lagona uunai e te maua.

Tusi faamaumau Ou Lagona Uunai

Valaaulia le Fefaasoaai

Faataga tamaiti e faasoa mai mea ua latou iloa e uiga i le tala ia Apinati ma le Tupu o Noa. O le ata i le otootoga o lenei vaiaso i le Sau, Mulimuli Mai ia te Au—Mo Tagata Taitaoatasi ma Aiga e mafai ona fesoasoani.

Aoao Atu le Aoaoga Faavae: Tamaiti Laiti

Mosaea 11–13; 17

E mafai ona ou tu atu mo le upumoni, e tusa lava pe ou te tu na o au.

Na lototetele uma Apinati ma Alema i le puipuia o le upumoni. E faʻapefea ona e faʻaaogaina lenei tala e fausia ai le lototele o tamaiti mo taimi e tatau ai ona puipuia o latou talitonuga?

Gaoioiga e Mafai Ona Fai

• Aotele le tala ia Apinati, le Tupu o Noa, ma Alema o lo’o maua i totonu o le Mosaea 11--13 ma le 17. E mafai ona e faʻaaoga le “Mataupu 14: O Apinati ma le Tupu o Noa” (Tala o le Tusi a Mamona, 38--42 po o le vitio talafeagai i luga o le ChurchofJesusChrist.org). Valaaulia tamaiti e faatino le tala, tuu atu ia i latou le avanoa e faatino ai vaega eseese.

• Savali [faafitafita] i le tulaga e tasi ma tamaiti a’o latou usuina se pese e musuia ai le lototele, e pei o le “O Le a Ou Lototoa” (Tusipese a Tamaiti, 85). Faitau faatasi upu o le pese, ma fesoasoani i tamaiti e iloa mea e faia e se tagata lototoa pe lototele. Filifili ni nai fuaiupu mai le Mosaea 11--13 ma le 17 e faitau atu i tamaiti e faaali atu ai le ala na lototoa ai Apinati ma Alema (mo se faataitaiga, tagai Mosaea 13:1--4, 9).

Mosaea 12:33–36; 13:11–24

E tatau ona ou usitai i Poloaiga e Sefulu.

Na iloa e faitaulaga a le tupu o Noa ia poloaiga ae sa latou le mulimuli i ai. O upu a Apinati e mafai ona fesoasoani i tamaiti ia malamalama ai i le taua o le usiusitai i poloaiga.

Gaoioiga e Mafai Ona Fai

• Valaaulia tamaiti e faitau i le 10. Pe avatu ia i latou ni fasipepa e 10 ua uma ona faanumera ma tuu atu ia i latou e faatulaga ia pepa i le tulaga sao. Faamalamalama atu na tuuina mai e le Tama Faalelagi Poloaiga e Sefulu ina ia fesoasoani tatou te toe foi atu ai e mau faatasi ma Ia. Fesoasoani i tamaiti e tauloto faatasi ma oe nisi o Poloaiga e Sefulu mai Mosaea 12:33–36 ma le 13:11–24.

• Faaali atu se ata o Mose ma Poloaiga e Sefulu (e pei o le Tusiata o le Talalelei, nu 14), ma faamatala puupuu pe na faapefea ona maua e Mose poloaiga mai le Atua (tagai Esoto 19--20). Ona faaali lea o se ata o Apinati (tagai otootoga o lenei vaiaso i le Sau, Mulimuli Mai ia te A’u---Mo Tagata Taitoatasi ma Aiga), ma taʻu i tamaiti na faamanatu atu e Apinati i le Tupu o Noa ma ana faitaulaga e uiga i Poloaiga e Sefulu. Filifili ni nai poloaiga mai le Mosaea 12:33--36 ma le 13:11--24 ia e te lagona e faapitoa le taua mo tamaiti o loo e aoaoina, ma talanoa faatasi ma i latou faamanuiaga e maua mai i le usiusitai i na poloaiga.

• Usu faatasi se pese e faatatau i poloaiga, e pei o le “Tausi Poloaiga” (Tusipese a Tamaiti, 68). Aisea tatou te tausia ai poloaiga?

Mosaea 14:5; 15:7–9

E molimau ma le lototele perofeta ia Iesu Keriso.

Na aoao e Apinati le Tupu o Noa ma isi e uiga ia Iesu Keriso, e tusa lava pe o se tulaga matautia. E mafai faapefea e le tala a Apinati ona faamalosia molimau a tamaiti i perofeta?

Gaoioiga e Mafai Ona Fai

• Faasoa ma tamaiti nisi o mea na aoao e Apinati e faatatau ia Iesu Keriso i le Mosaea 14:5 ma le 15:7--9. Fesoasoani i tamaiti ina ia malamalama na manao Apinati i le Tupu o Noa ma ona tagata e mulimuli ia Iesu ina ia latou fiafia. I o tatou vaitaimi, ua aoao mai i tatou e perofeta soifua e faatatau i le Faaola. Faitau se vaega mai le konafesi aoao, pe faasoa atu se vitio o se tasi o perofeta soifua o loo faasoa mai lana molimau ia Iesu Keriso (mo se faataitaiga, tagai i vitio o le “Special Witnesses of Christ” i luga o le ChurchofJesusChrist.org).

• Faaali pe tusi ata o ni filifili, se falepuipui, ma se afi. Aoao atu i tamaiti o Apinati na malie e noanoatia, tuu i le falepuipui, ma susunuina foi i le afi ina ia faasoa atu lana molimau ia Iesu Keriso. E ui lava atonu o le a tatou le feagai ma nei faafitauli, e mafai faapefea ona tatou lototetele e pei o Apinati i le faasoaina atu oa tatou molimau ia tatou upu ma a tatou filifiliga?

Aoao atu le Aoaoga Faavae: Tamaiti Matutua

Mosaea 11–13; 17

E mafai ona ou tu atu mo le mea saʻo, e tusa lava pe ou te tu na’o a’u,

E mafai fa’apefea ona e saunia tamaiti o e aoaoina e tutu atu ma le totoa mo le mea sa’o, tusa lava pe tatau ona latou faia na’o i latou?

Gaoioiga e Mafai Ona Fai

• Valaaulia tamaiti e tusi ni ata o vaega eseese o le tala ia Apinati, Tupu o Noa, ma Alema o loo maua i totonu o le Mosaea 11--13 ma le 17. Fesoasoani ia i latou e faaaoga a latou ata e toe faamatala ai le tala, pe faʻaaoga “Mataupu 14: O Apinati ma le Tupu o Noa” (Tala o le Tusi Mamona, 38--42 po o le vitio talafeagai i luga o le ChurchofJesusChrist.org). Na faapefea ona tutu atu taitoatasi Apinati ma Alema mo le mea tonu? Aisea na le tu atu ai le Tupu o Noa mo le mea tonu? (Tagai i le Mosaea 17:11–12). Fesoasoani i tamaiti e mafaufau i taimi na latou tutu atu ai mo le mea tonu.

• Fesoasoani i tamaiti e mafaufau i ni tulaga e mafai ona latou tutu atu ai mo le mea tonu, ma valaaulia i latou e faatino nisi o nei tulaga. Mo se faʻataʻitaʻiga, o le a se mea e mafai ona latou faia pe a taumafai se tasi e faamatamata i latou i se tifaga le talafeagai po o le le mananao foi o a latou uo e faaaofia se tasi i se taaloga latou te taaalo ai?

• Faaali le vitio “Dare to Stand Alone” (ChurchofJesusChrist.org). Na faapefea ona pei Peresitene Thomas S. Monson o Apinati?

Mosaea 12:33–36; 13:11–24

E tatau ona ou usitai i Poloaiga e Sefulu.

Na aoaoina e Apinati le Tupu o Noa ma ana faitaulaga amioleaga e uiga i Poloaiga e Sefulu. Pe o malamalama tamaiti o loo e aoaoina pe aisea e tatau ai ona tatou alolofa ma usiusitai i poloaiga a le Atua?

Gaoioiga e Mafai Ona Fai

• Tofi tamaiti taitoatasi e faitau se tasi o poloaiga i totonu o le Mosaea 12:35 ma le 13:11--24. Fesoasoani i tamaiti e mafaufau i ni auala fatufatu e fesoasoani ai le tasi i le isi ia manatua poloaiga taitasi (e pei o se fuaitau o le solo, o se taga, po o se faapuupuuga (faaaoga ai mataitusi amata o upu taitasi)). O le pese “The Commandments” (Children’s Songbook, 112) e mafai ona fesoasoani. Tuu atu i tamaiti ni siepi o fatu na oti mai ni fasipepa, ma valaaulia i latou e tusi se tasi po o le sili atu foi o Poloaiga e Sefulu i luga o a latou fatu (tagai Mosiah 13:11)---atonu o se tasi o poloaiga latou te lagona e tatau ona latou taumafai atili e usitaia.

• Usu faatasi se pese e faatatau i poloaiga, e pei o le “Tausi Poloaiga” (Tusipese a Tamaiti 68). O a faamanuiaga e maua mai le tausia o poloaiga?

O tusitusiga paia e aoaoina i tatou i poloaiga a le Atua.

Mosaea 14:6; 16:4–9

Pe a ou agasala, ua ou leiloa; ona o Iesu Keriso, e mafai ona maua aʻu.

Ina ia aoao atu e uiga ia Iesu Keriso, na sii mai ai e Apinati le perofeta o Isaia, lea na faatusaina i tatou i mamoe na leiloloa. E faapefea ona e faaaogaina lenei faatusatusaga e aoao ai tamaiti e uiga i le Faaola?

Gaoioiga e Mafai Ona Fai

• Valaaulia tamaiti e faasoa mai ni aafiaga na latou leiloloa ai se mea pe na leiloloa ai foi i latou lava. O a ni o latou lagona? O a a latou mea na fai? Faitau faatasi Mosaea 14:6 ma le 16:4–9. E faapefea ona tatou “se ese” i nisi o taimi mai le Atua? E faapefea ona fesoasoani Iesu Keriso e toe aumai i tatou?

• Valaaulia tamaiti e mafaufau i se lafu mamoe. O a nisi mafuaaga e ono leiloa ai se tasi o mamoe? Lisi a latou tali i luga o le laupapa. E faapefea ona pei i tatou o mamoe e feoa’i solo? E faapefea lagona o le Tama Faalelagi pe a “maua” i tatou e ala i le salamo ma le Togiola a le Faaola? (Tagai MF&F18:10–13). Faasoa atu lau molimau e uiga i le Faaola ma le salamo

Fautuaina le Aoaoina i le Aiga

Valaaulia tamaiti e fai atu i tagata o o latou aiga e faasoa mai ni aafiaga na latou tutu atu ai mo le upumoni, pe uunaia tamaiti e faasoa mai a latou lava aafiaga.

Faaleleia o Lo Tatou Aoao Atu

O le faifai soo o le ki i le aoaoina. E manuia tamaiti mai le faalogo i se mataupu faavae o le talalelei po o le faia o se gaoioiga e sili atu i le na o le tasi. Taumafai e faifai soo gaoioiga i ni auala eseese.