“4–10 Me. Mosaea 11–17: ‘O Se Malamalama … E Le Mafai Ona Faapogisaina,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“4–10 Me. Mosaea 11–17,” Sau, Mulimuli Mai ia te Au—Mo Tagata Taitoatasi ma Aiga: 2020
Apinati i Luma o le Tupu o Noa, saunia e Andrew Bosley
4–10 Me
Mosaea 11–7
“O Se Malamalama … E Le Mafai Ona Faapogisaina”
O upu a Apinati na afua ai se suiga tele i le pe na o le toatasi lava se sui auai o le au faufautua a le Tupu o Noa (tagai Mosaea 17:2–4). Faitau le Mosaea 11–17 faatasi ai ma se tatalo i lou loto o le a e maua ia uunaiga e uiga i se ala e mafai ona e sui ai.
Tusifaamaumau Ou Lagona Uunai
O afi tetele e mafai ona amata mai i se aloiafi se tasi. O Apinati sa na o ia le tagata na molimau tetee i se tupu mamana ma lana au faufautua. Sa teena ana upu mo le tele o le vaega, ma sa faasalaina o ia i le oti. Ae o lana molimau ia Iesu Keriso, o le “malamalama … e le mafai lava ona faapouliuligia” (Mosaea 16:9), sa ma’alo ai se mea i totonu o Alema le ositaulaga talavou. Ma o lena ma’alo o le liuga na tuputupu ae malie a o aumaia e Alema le toatele o isi e salamo ma faatuatua ia Iesu Keriso. O le afi mumu na fasiotia ai Apinati na iu ina mate, ae o le afi mumu o le faatuatua na fatuina e ana upu o le a i ai se tosinaga tumau i luga o sa Nifae—ma i luga o i latou o e faitau i ana upu i ona po nei. O le toatele o i tatou o le a le feagai lava ma mea na oo i ai Apinati ona o a tatou molimau, ae e tofu uma i tatou ma taimi ina ua mulimuli ia Iesu Keriso o se tofotofoga o lo tatou lototoa ma le faatuatua. Atonu o le suesueina o le molimau a Apinati o le a tapili ai foi le afi musaesae o molimau ma le lototoa i o tatou loto.
Manatu mo Suesuega Faaletagata Lava Ia o Tusitusiga Paia
E mafai ona ou tu atu mo le mea moni, tusa lava pe ou te tutu na o au.
Manatu faalemafaufau i le lotovaivai atonu na i ai Apinati i le alagaina o le salamo i se nuu sa lei foliga mai na i ai se isi e fia manao e suia o latou ala amioleaga. Na teena ma toe teena lana savali. Ae e lei fiu ai lava Apinati.
O anafea na e lagonaina ai e pei ua e tutu na o oe e puipui le upumoni? A o e faitauina le Mosaea 11–13 ma le 17, o le a se mea ua e aoao ai faapea e mafai ona fesoasoani ia te oe e saunia ai pe a manaomia e le Alii oe e te tu atu mo Lana talalelei? O a isi mataupu faavae ua e aoaoina mai le faataitaiga a Apinati?
E manaomia ona ou faaaogaina lo’u loto ia malamalama i le afioga a le Atua.
Sa masani ositaulaga a Noa i le afioga a le Atua—sa mafai ona latou sii maia fuaitau o mau ma faapea mai o loo latou aoao atu ia poloaiga. Ae o na poloaiga e “le o tusia i o [latou] loto,” ma sa latou “le faaaogaina [o latou] loto e malamalama ai” i ai (Mosaea 13:11; 12:27). O le taunuuga, sa tumau le le suia o o latou olaga.
A o e faitauina le Mosaea 12:19–30, mafaufau loloto po o le a le uiga o le faaaoga o lou loto e malamalama ai i le afioga a le Atua. Pe o musuia oe i lenei mea e faia soo se suiga i le ala o e aoaoina ai le talalelei?
O le a lagolagoina e le Alii Ana auauna i Lana galuega.
I se isi itu, o le aafiaga o Apinati ua aumai ai le tele o faataitaiga o le ala e lagolagoina ai e le Alii Ana auauna—e mafai ona e maua le mau faataitaiga faapena i le Mosaea 13:1–9. I se isi itu, sa faatagaina foi e le Alii ia Apinati ia sauaina, faafalepuipuiina, ma faamaturoina mo lana molimau. O a ni mea ua e maua i nei fuaiupu o loo faaalia mai ai sa faatuatuaina e Apinati le Alii? O faapefea e le faataitaiga a Apinati ona aafia ai le ala o e vaai atu ai i ou valaauga ma tiutetauave?
Na puapuagatia Iesu Keriso mo a’u.
Sa talitonu le Tupu o Noa ma ana ositaulaga faapea o le faaolataga e oo mai i le tulafono a Mose. Sa manao Apinati ia i latou ia iloa o le faaolataga e tau ala mai i le Mesia o Iesu Keriso. I le Mosaea 14–15, matau upu a fasifuaitau o loo faamatala ai le Faaola ma mea sa Ia puapuagatia ai mo oe. O a fuaiupu o loo fesoasoani e faalolotoina ai lou alofa ma le lotofaafetai ia te Ia?
E faapefea ona avea Iesu Keriso ma Tama ma le Alo?
O nei fuaitau o nisi taimi, e fenumiai ona e mafai ona foliga faapea o loo aoao mai Apinati faapea o le Tama Faalelagi ma Iesu Keriso o le Tagata lava e tasi, ae ua tatou iloa o i la’ua o ni Tagata mavaevae. O le a le uiga o le tala a Apinati? Sa ia aoao mai faapea o le Atua ma le Alo—o Ieova—o le a avea ma Togiola (tagai Mosaea 15:1), e afifio i le tino, ua i ai se itu tagata soifua ma se itu Atua (fuaiupu 2–3). Na Ia gauai atoatoa atu Ia lava i le finagalo o le Atua le Tama (fuaiupu 5–9). Ona o lea, o Iesu Keriso o le Alo o le Atua ma o le sui atoatoa faalelalolagi o le Atua le Tama (tagai Ioane 14:6–10).
Sa faaauau Apinati i le faamalamalama mai faapea o Iesu Keriso o le Tama foi i le uiga faapea pe a tatou taliaina Lana togiola, ua avea i tatou “ma ana fanau” (Mosaea 15:11–12). I se isi faaupuga, tatou te toefanauina faaleagaga e ala ia te Ia (tagai Mosaea 5:7).
Tagai foi Ioane 5:25–27; 8:28–29; 17:20–23; “The Father and the Son,” Ensign, Apr. 2002, 12–18.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
Mosaea 11–13; 17
O Apinati ma Alema o ni faataitaiga musuia o le tumau o le lotonuu i le upumoni, tusa lava pe matuai inosia ai ona o le faia o lena mea. Atonu e feagai tagata o lou aiga ma ni uunaiga faaagafesootai e fetuunai ai o latou tulaga faatonuina. O le a se mea e mafai ona latou aoao mai ia Apinati ma Alema e uiga i le tutu atu mo le mea moni? O le galuega limalima o loo avatu faatasi ma lenei otootoga e mafai ona fesoasoani i lou aiga e vaai faalemafaufau ai i le tala. A uma ona suesueina nei mataupu, mafaufau e faatino taga o tulaga moni o le olaga ina ia mafai ai e tagata o lou aiga ona faataitai ona tali atu i uunaiga e fetuunai o latou tulaga faatonuina. Pe e mafai foi ona outou fefaasoaai aafiaga o le tasi ma le isi i le tutu atu mo le mea moni.
Mosaea 12:33–37; 13:11–24
O le a le uiga o le “tusia i [o tatou] loto” ia poloaiga a le Atua? (Mosaea 13:11). Atonu e mafai ona e tusia ni nai manatu (pe tusi foi ata o ou manatu) i se pepa tele ua ‘oti faapei o se fatu. Aisea e taua ai poloaiga ia i tatou? E mafai faapefea ona tatou tusia i o tatou loto?
O le suesueina o tusitusiga paia e mafai ona fesoasoani ia i tatou e tusia ia poloaiga i o tatou loto.
Mosaea 14
I le mataupu lenei, o le a e maua ai ni upu ma fasifuaitau o loo faamatalaina ai Iesu Keriso. Atonu e mafai e lou aiga ona lisi mai a o e sueina mai. O a ni lagona o tagata o le aiga e uiga i le Faaola a o tatou suesueina nei upu ma fasifuaitau?
Mosaea 15:26–27; 16:1–13
O nei fuaiupu o loo faamatala ai mea o le a tutupu i fanau a le Atua pe ana fai e “le afio mai [Iesu] i le lalolagi” (Mosaea 16:6) pe latou te lei mulimuli foi ia te Ia. O a mea lelei na tutupu ona sa Ia afio mai ma togiolaina i tatou? Tagai foi i le vitio “Why We Need a Savior” (ChurchofJesusChrist.org).
Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.
Faaleleia o Lo Tatou Aoao Atu
Faaaoga tala ma faataitaiga e aoao atu ai mataupu faavae o le talalelei. E tele ona aoao mai e le Faaola ia mataupu faavae i le faaaogaina o tala ma faataoto. Mafaufau i faataitaiga ma tala mai lou lava olaga e mafai ona faaolaola se mataupu faavae mo lou aiga (tagai Aoao Atu i Ala o le Faaola, 22).
Sa Susulu Ona Foliga ma le Malamalama Maoae, saunia e Jeremy Winborg