Minerva K. Teichert (1888–1976), Solaaga a le Tupu o Limae ma Lona Nuu, 1949-1949, suauu i luga o le laupapa, 35 7/8 x 48 inisi. Falemataaga mo Faatufugaga a le Iunvesite a Polika Iaga, 1969.

11–17 Me

Mosaea 18–24

Ua Matou Osia se Feagaiga ma Ia

Sa aoao mai Peresitene Thomas S. Monson, “A o tatou faitau ma mafaufau loloto i tusitusiga paia, o le a tatou lagonaina ia musumusuga malu o le Agaga i o tatou agaga” (“E le Tuua Lava Na o i Tatou,” Ensign po o le Liahona, Nov. 2013, 122).

Tusifaamaumau Ou Lagona Uunai

O le tala ia Alema ma lona nuu i le Mosaea 18; 23–24 o loo faaalia ai le uiga o le “o mai i le lafu a le Atua” (Mosaea 18:8). Ina ua latou papatiso, sa latou osia se feagaiga ma le Atua e “auauna ia te ia ma tausi ana poloaiga” (Mosaea 18:10). E ui o tautinoga patino loloto faaletagata lava ia, ae e aofia ai foi ma le ala latou te taulimaina ai le tasi ma le isi. Ioe, o le malaga toe foi i le Tama Faalelagi e patino ma e fitoitonu i le tagata lava ia, ma e leai se tasi e mafai ona tausia a tatou feagaiga mo i tatou, ae e le faapea ai o tuua na o i tatou. Tatou te manaomia le tasi ma le isi. I le avea ai o ni tagata o le Ekalesia a Keriso, ua tatou osifeagaiga e auauna atu i le Atua e ala i le fesoasoani ma auauna atu le tasi i le isi i le ala, “tauave avega a le tasi” (Mosaea 18:8–10) Sa i ai moni lava avega a le nuu o Alema e tauamo, e faapei lava foi o i tatou uma. Ma o le ala e tasi e fesoasoani ai le Alii ia i tatou e “tauave [a tatou] avega ma le faigofie” (Mosaea 24:15) o le tuuina mai lea ia i tatou o se nuu o le Au Paia o e ua folafola atu e faanoanoa faatasi ma i tatou ma faamafanafanaina i tatou, e pei lava foi ina sa tatou folafola atu e faia mo i latou.

Manatu mo Suesuega Faaletagata Lava Ia o Tusitusiga Paia

Mosaea 18:1–17

O le papatisoga e aofia ai se feagaiga e auauna atu i le Atua ma tu atu o se molimau ia te Ia.

Mosaea 18:8–10 o loo i ai aoaoga a Alema e uiga i le feagaiga o le papatisoga po o le folafolaga tatou te faia i le Atua i le papatisoga. A o e faitauina nei fuaiupu, manatunatu i fesili nei:

• O le a se mea ua e aoao mai nei fuaiupu e uiga i folafolaga sa e faia i le papatisoga? O le a se mea ua folafola atu e le Atua ia te oe?

• E faapefea ona fesootai le feagaiga e auauna atu i le Atua (tagai fuaiupu 10) i a tatou taumafaiga e auauna atu i le tasi ma le isi? (tagai i fuaiupu 8–9).

• O le a sau mea o fai e tausi ai au folafolaga?

• E fesoasoani faapefea ia te oe le tausiga o au feagaiga o le papatisoga “ia faatumulia ai i le Agaga”? (Mosaea 18:14). E fesoasoani faapefea le Agaga ia te oe e tausi au feagaiga?

Ina ua ou osia feagaiga ma le Atua, ua ou maua Ana faamanuiaga.

O le tala lea o loo faaalia ai foi le faiga sa’o o le papatisoga. O le a se mea ua e aoao mai fuaiupu 14–17 e uiga i le ala e tatau ona faatino ai le papatisoga? O a nisi mea e te aoaoina mai e uiga i le papatisoga mai le Mataio 3:16; Roma 6:3–5; 3 Nifae 11:21–28; ma le Mataupu Faavae ma Feagaiga 20:72–74?

Tagai foi Mataupu Faavae ma Feagaiga 20:37, 77, 79.

Mosaea 18:17–30

E ao lava ona soofaatasi le nuu o le Atua

E pei ona iloa e Alema ma lona nuu, o le mulimuli ia Iesu Keriso o nisi taimi o lona uiga o le tuua o le ala ua masani ai o le olaga mo se mea e fou ma ese. Ae sa to mai e le tasi mai le isi o le nuu o Alema le malosiaga o se vaega lea “o le ekalesia a Keriso” (Mosaea 18:17). E musuia faapefea oe i aoaoga o i le Mosaea 18:17–30 ia avea o se tagata ua lelei atili o le Ekalesia? O le a se mea e mafai ona e faia e fesoasoani ai i tagata o lau uarota po o le paranesi “ia fili faatasi i le lotogatasi ma le alofa”? (Mosaea 18:21).

Tagai foi Henry B. Eyring, “E Fusia o Tatou Loto ia Tasi,” Ensign po o le Liahona, Nov. 2008, 68–71.

Mosaea 19–20

O le a faataunuuina upu a perofeta.

Na faia e Apinati ni nai valoaga patino e uiga i mea o le a tutupu i le Tupu o Noa ma lona nuu pe afai latou te mumusu e salamo. Peitai, i nisi o tagata o nei valoaga sa foliga mai e le talitonuina (tagai Mosaea 12:1–8, 14–15), aemaise ai talu ai ona sa faamanuiaina sa Nifae i le puipuiga o i latou lava mai ia sa Lamana mo le toetoe atoa le 50 tausaga (tagai Mosaea 9:16–18; 11:19). Ae o le a faataunuuina uma lava upu a perofeta—i o tatou aso e pei foi o ona po o Apinati.

O a ni mea e te maua i le Mosaea 19–20 o le a taitai ai Kitiona e tautino atu ua faataunuuina ia valoaga a Apinati? (tagai i le Mosaea 20:21). Ua faamalosia faapefea e lenei tala lou faatuatua i lapataiga ma fautuaga a perofeta a le Atua ma lau tautinoga e mulimuli ia latou upu? O anafea na e vaai ai i upu a perofeta ua faataunuuina i o tatou aso?

Mosaea 21–24

E mafai e le Atua ona faamamaina a’u avega.

Na taufai pauu atu le nuu o Limae ma le nuu o Alema i le nofopologa, e ui ina mo mafuaaga eseese ma i tulaga eseese. O a ni mea e mafai ona e aoaoina mai i le faatusatusaina o tala o i le Mosaea 19–22 ma le nuu o Alema i le Mosaea 18; 23–24? E mafai ona e mataua le ala na tali atu ai nei vaega taitasi i lo latou nofopologa po o le ala na iu ina laveaiina ai nei vaega taitasi. A o e faia, vaavaai mo savali e faatatau i lou olaga. Mo se faataitaiga, o a ni mea ua e aoao mai i nei tala o le a fesoasoani ia te oe e tauave au avega?

Mosaea 23:21–24; 24:8–17

E mafai ona ou faatuatuaina le Alii.

E ui ina sa latou salamo ia latou agasala, ae sa noanoatia lava Alema ma lona nuu. O lo latou aafiaga ua faaalia ai o le faalagolago i le Alii ma ola ai ia tatou feagaiga e le taofia ai i taimi uma ia faigata, ae e fesoasoani ia i tatou e manumalo mai ai. A o e faitauina le Mosaea 23:21–24 ma le 24:8–17, tusi ia upu ma fasifuaitau e mafai ona fesoasoani ia te oe e aoao ai ia faalagolago i le Atua, tusa lava po o a o tatou tulaga o i ai.

Tagai foi Thomas S. Monson, “Ou Te Le Tuua Lava Oe, Ou Te Le Tuulafoai Lava ia te Oe,,” Ensign po o le Liahona, Nov. 2013, 85–87.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Mosaea 18:1–4

E i ai se faaupuga e faapea e mafai ona e faitauina fatu o se apu, ae e le mafai ona e faitauina apu e ola mai i le fatu e tasi. E na o le tasi lava le tagata sa taliaina le molimau a Apinati, ae o lena tagata e tasi—o Alema—sa tosinaina augatupulaga a sa Nifae. Atonu e mafai ona e faaaogaina se fua e i ai ni fatu e faapupula ai le mataupu faavae lenei. E faapefea ona faatatau lenei savali i lo tatou aiga? O a ni mea e mafai ona tatou faia e faasoa atu ai i isi a tatou molimau?

Mosaea 18:8–10

O a mea ua tatou aoao e uiga i a tatou feagaiga o le papatisoga mai i nei fuaiupu? (tagai foi i le MF&F 20: 73, 77–79). O le a se mea o tatou faia e sauniuni ai mo, pe tausia a tatou feagaiga o le papatisoga?

Mosaea 18:30

O a ni nofoaga e i ai se uiga faapitoa ia i tatou ona o aafiaga faaleagaga sa tatou maua ai iina?

Mosaea 21:11–16; 24:10–15

O a ni mea tatou te aoao mai i le faatusatusaina o le nofopologa o le nuu o Alema ma le nuu o Limae?

Mosaea 21:15; 24:11–15

O a mea o aoao mai e nei fuaiupu ia i tatou e uiga i ni auala e tali mai ai e le Alii tatalo?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Suesuega Faaletagata Lava Ia

Sue se taimi e lelei mo oe. E tele taimi e sili ona faigofie ona aoao pe a mafai ona e suesue i tusitusiga paia e aunoa ma le faalavelaveina. Sue se taimi e lelei mo oe, ma fai le measili e te mafaia e suesue ai pea i lena lava taimi i aso taitasi.

O Le Vai o Mamona, saunia e Jorge Cocco