E Le Faagaloina Outou, saunia e Jon McNaughton

1--7 Iuni

Alema 5–7

“Ua Oo Ea Lenei Liuga Tele i o Outou Loto?”

Ia mafaufau ma le agaga tatalo i aoaoga faavae o loo i le Alema 5--7 e te lagona e taua tele i tamaiti o loo e aoaoina.

Tusifaamaumau Ou Lagona Uunai

Valaaulia le Fefaasoaai

Valaaulia tamaiti e faasoa mai mea latou te manatua le aoaoina e uiga ia Alema le Itiiti i ni nai vaiaso ua mavae. Faamalamalama atu ina ua uma ona liua Alema, sa ia aoaoina tagata i mea taua e uiga i le talalelei. Tuu atu i tamaiti e faasoa mai mea latou te iloa e uiga i mea na ia aoaoina.

Aoao atu le Aoaoga Faavae: Tamaiti Laiti

Alema 5:44--48

E mafai ona ou mauaina laʻu lava molimau e ala i le Agaga Paia.

O tamaiti e te aoaoina e mafai ona atiina ae a latou lava molimau malolosi, e tusa lava pe laiti.

Gaoioiga e Mafai Ona Fai

• Faaaoga le ata o Alema le Itiiti (tagai Tusiata o le Talalelei, nu. 77) e toe iloilo le tala o le agelu o asiasi atu ia te ia (tagai Mosaea 27). Ona fai atu lea i tamaiti e faamatala mai po o le a le molimau, ma fesoasoani ia i latou e pei ona tatau ai. Ia faamalamalama atu sa galue Alema i le mauaina o se molimau ina ua uma ona asia o ia e le agelu. Faitau lemu Alema 5:46 mo ni nai taimi, ma valaaulia tamaiti e faalogologo mo le mea na faia e Alema ma pe na faapefea ona ia iloaina le upumoni. (Atonu e te manao e faamatala atu o le anapogi o lona uiga o le leai o se meaai ma se vai.)

• Faaali atu ata o ni mea e ola tuputupu malie ma e manaomia le tausiga faifai pea, e pei o se laau po o se tamai manu. Fai atu i tamaiti e faasoa mai pe faapefea ona tatou tausia nei mea ma fesoasoani ia latou tuputupu ae. Faamanatu ia i latou e tatau foi ona tatou tausia i taimi uma a tatou molimau.

• Faaaoga se paluni gaogao e fai ma sui o se molimau ma feula i totonu se ea i taimi uma e te faasoa atu ai se mea e fesoasoani i molimau e tuputupu ae. Nonoa le paluni ma pasi solo, ma fai atu i tamaiti e faasoa mai se mea se tasi e mafai ona latou faia e fesoasoani ai ia latou molimau ia tuputupu ae. Valaaulia tamaiti e tusi ni ata o i latou lava o faia ni vaega o le a faamalolosia ai a latou molimau.

Pe a tatou taliaina le talalelei, e pei lava o le amataina o se olaga fou.

Alema 7:10–13

Na tauave e le Faaola i Ona lava luga aʻu agasala, tiga, ma mafatiaga.

O upumoni i le Alema 7:10--13 e mafai ona fesoasoani i tamaiti ia iloa o Iesu Keriso e alofa ia i latou ma e mafai ona fesoasoani ia i latou.

Gaoioiga e Mafai Ona Fai

• Faaali atu i tamaiti se ata o Iesu. Faamalamalama atu Na te silafia pe faape’i le tiga, faanoanoa, po o le fefe. Faitau nisi o upu i le Alema 7:11--13 o loo faamatalaina ai mea na puapuagatia ai le Faaola, ma faamatala upu e ono le malamalama ai tamaiti. Faamanino atu e mafai e Iesu ona fesoasoani ma faamafanafana ia i tatou pe a tatou faanoanoa. Faasoa pe na faapefea ona fesoasoani ma faamafanafanaina oe e le Faaola.

• Fai atu i tamaiti e faasoa mai ni aafiaga ina ua latou mamaʻi pe tiga pe i ai se isi faafitauli na mafua ai ona latou faanoanoa. Ia tuuina atu lau molimau na puapuagatia foi le Faaola i na mea ma e silafia le ala e fesoasoani ai ia i tatou.

Alema 7:19–20

O le ala e toe foi atu ai i le Tama Faalelagi ma Iesu Keriso e sa’o.

E mafai faapefea ona e faʻaaogaina le faʻamatalaga a Alema i le ala e toe foi atu ai i le Tama Faalelagi e fesoasoani ai i tamaiti ia iloa ona fai filifiliga lelei?

Gaoioiga e Mafai Ona Fai

• Faitau Alema 7:19 i tamaiti, ma faamatala atu afai tatou te faia ni filifiliga lelei, ua tatou i ai i le ala e tau atu i le Tama Faalelagi. Tuu atu i tamaiti se faasologa o filifiliga po o taga (e pei o le agaleaga i tagata o le aiga poʻo le auauna atu ia i latou). Fai atu ia i latou e taʻu atu ia te oe pe afai e lelei le filifiliga ma toe foi atu i le Atua pe afai foi o se mea leaga e taitaieseina ai mai ia te Ia.

• Faitau Alema 7:20 ma fesoasoani i tamaiti ia malamalama i upu i nei fuaiupu o loo faamatalaina ai le ala e toe foi atu ai i le Atua. Tusi i luga o le laupapa se auala sao mai ia i tatou i le Tama Faalelagi. Ona tusi lea o se ala piʻopiʻo lea e aofia ai auala gata ia e taʻitaʻia ese ai mai le Atua. Valaaulia tamaiti e suʻe uma auala i o latou tamatamailima. O le fea auala e sili atu? Fesoasoani ia i latou e mafaufau i filifiliga lelei o le a fesoasoani latou te tumau ai i luga o le ala sao.

Aoao atu le Aoaoga Faavae: Tamaiti Matutua

Alema 5:12–14, 27–28, 57; 7:14–24

E tatau ona ou toe fanauina ma mulimuli i le ala e tau atu i le Atua.

E mafai faapefea ona e fesoasoani i tamaiti ia malamalama i le uiga o le toe fanauina?

Gaoioiga e Mafai Ona Fai

• Faaali atu i tamaiti se ata o se pepe, ma valaaulia i latou e talanoa pe faape’i le pepe i le taimi muamua e fanau mai ai. Valaaulia se tamaitiiti e faitau le Alema 5:14. Ina ia fesoasoani i tamaiti e malamalama i le uiga o le “fanauina i la le Atua … faaleagaga” fai atu ia i latou e mafaufau pe na faape’i Alema le Itiiti ae lei liua o ia. Sa faape’i o ia mulimuli ane? (Tagai Mosaea 27:23–32 ma le Alema 36:12–24.) Faamalamalama atu afai tatou te faatuatua ia Iesu Keriso ma ola i Lana talalelei, e pei lava ua tatou amataina se olaga fou, e pei o se pepe.

• Faitau faatasi Alema 7:19, ma faamatala atu pe a uma ona toe fanauina i tatou, e tatau ona tatou mulimuli i “le ala e tau atu i le malo o le Atua.” Ia natia pepa i totonu o le potu ma mau nei e tusia ai i luga: Alema 5:12–13, 27–28, 57; 7:14–16, 23–24. Valaaulia tamaiti e sue ia pepa, sue mau, ma faasoa mai mea o loo aoao mai e mau taitasi e tatau ona tatou faia e toe foi atu ai i le afioaga o le Atua.

Alema 5:14, 44–48

E mafai ona ou mauaina laʻu lava molimau e ala i le Agaga Paia.

Na asia Alema e se agelu, ae o lana molimau na “faailoa mai ia te [ia] e ala i le Agaga Paia” (Alema 5:46).

Gaoioiga e Mafai Ona Fai

• Faitau faatasi ma tamaiti Alema 5:44--46. O le a le mea na faia e Alema ina ia maua ai lana lava molimau o le talalelei? Tuu atu i tamaiti taitasi se fasi pepa ma valaaulia i latou e fai se fuafuaga e fai se mea se tasi i lenei vaiaso e faamalolosia ai a latou molimau.

• Pasi faataamilo se faʻata ma tuu atu i tamaiti e tilotilo io latou ata ao e faitauina Alema 5:14. O le a le uiga o le i ai o foliga o le Faaola io tatou mata? Faasoa atu taimi na fai mai ai se tagata pe faia foi se mea e faamanatu atu ai ia te oe le Faaola, ma fai atu i tamaiti e faia foi faapena.

Alema 7:10–13

Na tauave e le Faaola i Ona lava luga aʻu agasala, tiga, ma mafatiaga.

A’o e suesueina Alema 7, mafaufau loloto pe mafai faapefea ona e fausia le faatuatua o tamaiti ia Iesu Keriso ina ia latou liliu atu ia te Ia io latou tofotofoga.

Gaoioiga e Mafai Ona Fai

• Valaaulia tamaiti e faitau Alema 7:11--13, vaavaai mo mea na puapuagatia ai Iesu Keriso. Atonu latou te naunau e faasoa atu ni aafiaga na latou lagona ai le tiga, maʻi, poʻo mafatiaga. E tusa ai ma nei fuaiupu, aisea na naunau ai le Faaola e puapuagatia i nei mea uma? (Faamatala atu o le “fesoasoani” (succor) o lona uiga “ia fesoasoani.”)

• Tau atu i tamaiti e uiga i se gasegase, manua, po o isi mafatiaga na ia te oe, ma fesili atu pe na latou lagonaina se mea faapena. Faitau faatasi Alema 7:11--13, ma faasino atu le mea na puapuagatia ai Iesu mo i tatou. Fesoasoani i tamaiti e mafaufau i taimi na oo ai i le Faaola i nei mea, e pei o le taimi na tofotofoina ai o ia (tagai i le Mataio 4:1--11) po o le taimi na mafatia ai o ia i Ketesemane. E faapefea ona fesoasoani ia i tatou le iloa e malamalama Iesu io tatou tauiviga? Faasoa atu lau molimau i le mana o Iesu e faamafanafana, fesoasoani, ma faamaloloina i tatou.

Fautuaina le Aoaoina i le Aiga

Valaaulia tamaiti e tautau se ata o Iesu i se nofoaga o le a latou vaai i ai e faamanatu soo ai ia i latou mea na latou aoaoina e uiga ia te Ia i le aso.

Faaleleia o Lo Tatou Aoao Atu

Alualu i Luma o se Faiaoga e Faapei o Keriso. I le avea ai o se faiaoga, e taua le mafaufau loloto i ni auala e mafai ona e faateleina ai lou tomai e fesoasoani i tamaiti e atiina ae lo latou faatuatua i le Tama Faalelagi ma Iesu Keriso. Mafaufau e faaaoga ia le iloiloga faaletagata lava ia mai le itulau 37 o le Aoao Atu i le Ala a le Faaola.