Aoaoina Atu o Aoaoga Faavae Moni, saunia e Michael T. Malm

8--14 Iuni

Alema 8–12

O Le a Afio Mai Iesu Keriso e Togiola Lona Nuu

Ao e faitau i le mea na aoao atu e Alema ma Amoleka i tagata o Amonaea, o le a se lagona e sili ona talafeagai i tamaiti o loo e aoaoina?

Tusi faamaumau Ou Lagona Uunai

Valaaulia le Fefaasoaai

Valaaulia tamaiti e faamatala mai mea e fai e faifeautalai ma taʻu atu ia te oe e uiga i soo se tasi latou te iloa o loo auauna atu i se misiona. O le a le mea e aoao atu e faifeautalai i tagata? Fesoasoani i tamaiti ia latou iloa o Alema ma Amoleka o ni faifeautalai o e na faasoa atu le talalelei i tagata o Amonaea.

Aoao atu le Aoaoga Faavae: Tamaiti Laiti

Alema 8

E mafai ona ou fetufaai atu le talalelei

Na malaga Alema i le laueleele atoa e talai le talalelei, ma na talai Amoleka i lona lava aai i ana uo ma tuaoi. E mafai faapefea ona e uunaia tamaiti e mulimuli ia latou faataitaiga ma faasoa atu le talalelei i isi?

Gaoioiga e Mafai Ona Fai

• Faitau le afa muamua o le “Mataupu 22: O Le Misiona a Alema i Amonaea” (Tala o le Tusi a Mamona, 58--63; tagai foi i le vitio talafeagai i luga o le ChurchofJesusChrist.org). Valaaulia tamaiti e uu lima taitoalua ma faafoliga o Amoleka ma Alema, o e na aoaoina faatasi le talalelei, ao la usuina se pese e uiga i le galuega faafaifeautalai, e pei o “Ou Te Fia Avea Nei Ma Faifeautalai” (Tusipese a Tamaiti, 90).

• Fesoasoani i tamaiti e fai soo se upumoni o le talalelei, e pei “O le Tusi a Mamona o loo molimau ia Keriso” po o le “Ou te iloa e alofa Iesu ia te au.” Ona valaaulia lea o tamaiti taitoatasi e faataitai le faasoaina atu o lenei upumoni i se isi tagata o le vasega. I le avea ai o se vaega o lenei gaoioiga, e mafai ona e fesoasoani i tamaiti e faamaea le itulau o gaoioiga o lenei vaiaso.

• Fai i tamaiti e taʻu atu ia te oe se mea na latou fefaasoaai ma se tagata o le aiga po o se uo---e pei o se meataalo po o se lole. Fesoasoani ia i latou e lisi nisi o mea taua e mafai ona tatou faasoa atu i isi e uiga ia Iesu Keriso. Faamalamalama atu faapea talu ai e taua tele le talalelei, na alu atu ai Alema e faasoa atu ai i tagata i le tele o isi aai ina ia mafai ai ona latou aoao i le auala e maua ai le fiafia.

Alema 8:18--22

E mafai ona avea a’u ma se uo lelei.

O le auaunaga a Amoleka ia Alema o se faataitaiga lelei lea i tamaiti i auala e mafai ai ona latou alolofa ma auauna atu i isi.

Gaoioiga e Mafai Ona Fai

• Valaaulia se tamaitiiti e faafoliga o ia o Amoleka ma se isi tamaitiiti e faafoliga o ia o Alema ao e faamatalaina le tala i le Alema 8:18--22. Tuu atu i tamaiti e fesoasoani e faamatala le tala, ma valaaulia ni tamaiti eseese e avea ma Alema ma Amoleka. Na faapefea ona avea Amoleka ma se uo lelei ia Alema? Fai i tamaiti e talanoa pe faapefea ona avea se tasi ma se uo ia i latou. O a ni o latou lagona e uiga i lena aafiaga? Aisea e finagalo ai le Atua tatou te avea ma uo lelei i isi?

• Saili pe tusi se ata e fai ma sui o se faigauo (e pei o tagata e toalua o fusi po o se fatu), ma otioti i ni fasi pepa e pei o se paso. I le pito i tua o fasi paso taitasi, tusi se mea na faia e Alema ma Amoleka e avea ai ma ni uo lelei po o mea e mafai ona tatou faia e avea ai ma se uo lelei. Valaaulia tamaiti e feauauai i le filifilia o se fasi pepa ma faaopoopo i le paso ao e faitauina mea o loo tusia i tua. Fesoasoani ia i latou e mafaufau i tagata e mafai ona latou avea ma se uo. Molimau atu o Iesu Keriso o le uo aupito sili lea e mafai ona tatou maua.

E mafai ona avea i tatou ma ni uo lelei i isi.

Alema 11:43--44

A mavae le oti, o le a ou toetu.

Na aoao atu Amoleka i tagata o Amonaea e uiga i le Toetu. E mafai faapefea ona e fesoasoani i tamaiti o loo e aoaoina ia malamalama i le uiga o le toetu?

Gaoioiga e Mafai Ona Fai

• Faaaoga lou lima e fai ma sui o se agaga, ma faʻaaoga se totigilima e fai ma sui o se tino. Aveese lou lima mai le totigilima e faʻaali atu ai i tamaiti o le a tuueseeseina o tatou agaga ma tino i le oti. Ona toe tuu lea o lou lima i le totigilima e faaali atu ai o o tatou agaga ma tino o le a toe tuufaatasia i le Toetu. Tuu atu i tamaiti e auauai e tui le totigilima ma aveese ao e faitauina atu le Alema 11:43 ia i latou. Faaali atu le ata o Maria ma Iesu Keriso Toetu (Tusiata o le Talalelei, nu. 59), ma molimau atu o Iesu Keriso na mafai ai e tagata uma ona toetutu.

• Valaaulia tamaiti e tusi ni ata o a latou uo po o tagata o le aiga, e aofia ai tagata lautele o le aiga. A o faasoa mai e tamaiti a latou ata, faasino i uo taitasi po o tagata o le aiga na latou tusia ma faamatala atu o le a ia toetu. Molimau atu na faia e Iesu ina ia mafai ai mo i tatou ona tatou faatasi ma o tatou aiga e faavavau.

Aoao atu le Aoaoga Faavae: Tamaiti Matutua

Alema 8–10

E mafai ona ou fetufaai atu le talalelei

Na faasoa atu e Alema ma Amoleka le talalelei, e tusa lava pe le’i faigofie. E faapefea e lo laua lototele ma le faatuatua ona musuia tamaiti o loo e aoaoina?

Gaoioiga e Mafai Ona Fai

• I au oe lava upu, aotele mai mea na tutupu i le Alema 8--10. Filifili ni mataupu faavae mai nei mea na tutupu e mafai ona fesoasoani i tamaiti e faasoa atu le talalelei, e pei o le faapalepale (tagai Alema 8: 8-13), molimau atu ia Keriso (tagai Alema 9:26–27), ma le i ai o se soa (tagai Alema 10:7--11). Valaaulia tamaiti e faitau ia fuaiupu filifilia ma tau mai mea ua latou aoaoina e uiga i le faasoaina atu o le talalelei. Aisea e taua ai le tau atu i isi e uiga i le talalelei?

• Valaaulia tamaiti e faasoa mai ni aafiaga ao latou faasoaina atu le talalelei i se tasi, pe faasoa atu foi sou oe lava aafiaga. Valaaulia tamaiti e faalogo mo auala e mafai ai ona latou saunia e faasoa atu le talalelei ao latou usuina se pese e uiga i le galuega faafaifeautalai, e pei o le “Matou Te Aumaia Le Upu Moni I Le Lalolagi” (Tusipese a Tamaiti, 92--93). Aisea e finagalo ai le Tama Faalelagi ia tatou faasoa atu le talalelei? Fesoasoani i tamaiti e fuafua auala e faasoa atu ai le talalelei ia latou uo, e pei o le tuuina atu ia i latou o se kopi o le Tusi a Mamona po o le valaauliaina o i latou i se gaoioiga a le Ekalesia. Tuu atu ia i latou se taimi e faatino ai mea latou te ono fai atu pe fai i nei tulaga.

Alema 11–12

O le fuafuaga a le Atua o se fuafuaga o le togiola.

E faapefea ona e faaaogaina le Alema 11--12 e “[faaali] ai [i tamaiti] le fuafuaga o le togiolaina”? (Alema 12:30).

Gaoioiga e Mafai Ona Fai

• Tusi i luga o le laupapa nisi o mataupu faavae e faatatau i le ata o le faaolataga o loo maua i le Alema 11--12, e pei o le Pau o Atamu ma Eva, le Togiola a Iesu Keriso, salamo, maliu, toetu, ma le faamasinoga. Faitau ni nai fuaiupu mai le Alema 11 po o le 12 o loo aoao atu e uiga i mataupu faavae, ma tuu atu i tamaiti le taimi e tusi ai se ata e suitulaga i mataupu faavae taitasi. O le a le matafaioi a le Faaola i lenei fuafuaga? Ona valaaulia lea o tamaiti e faaaoga a latou ata e faatino ai le aoaoina o se uo e uiga i le fuafuaga a le Atua.

Alema 12:10

Afai ou te le faamaaaina loʻu loto, e mafai ona ou mauaina le tele o afioga a le Atua.

Pe a oo i le aoaoina o upumoni faaleagaga, o le tulaga o o tatou loto e tutusa lava lona taua ma tomai o o tatou mafaufau.

Gaoioiga e Mafai Ona Fai

• Faitau faatasi le Alema 12:10, ma talanoaina le uiga o le “faamaaa” o tatou loto. Aisea e atili ai ona faigata le aʻoaʻoina mai le Atua ona o se loto maaa?

• Ina ia faamanino lenei mataupu faavae, faʻaali atu i tamaiti se momi ma se maa ma fesili ia i latou po o le fea e sili i le mimitiina o le vai. E mafai faapefea ona tatou faaali atu i le Alii tatou te mananao i o tatou loto ia faʻamalulu e pei o le momi?

Fautuaina le Aoaoina i le Aiga

Valaaulia tamaiti e vaavaai mo avanoa e faasoa atu ai le talalelei pe fesoasoani foi i se isi tagata i lenei vaiaso.

Faaleleia o Lo Tatou Aoao Atu

Tuu atu lau molimau i lau vasega. E mafai ona faigofie se molimau e pei o le “Ou te iloa e alofa le Tama Faalelagi ia te outou taitoatasi” po o le “Ua ou lagona lava le fiafia o lo’u loto ina ua ou aoao e uiga ia Iesu Keriso.” (Tagai foi i le Aoao Atu i le Ala o le Faaola, 11.)