Ata o Alema ma Amoleka ua laveaiina mai le falepuipui, saunia e Andrew Bosley

15--21 Iuni

Alema 13–16

“Ulu atu i le Malologa o le Alii”

E te i ai ma tamaiti i lau vasega mo na o sina taimi puupuu i vaiaso taitasi. O le a e faamanuiaina o latou olaga pe afai e mafai ona e musuia i latou e faaauau ona aoao mai le Tusi a Mamona i fafo atu o le vasega---aemaise lava ma o latou aiga.

Tusifaamaumau Ou Lagona Uunai

Valaaulia le Fefaasoaai

Tuʻu atu i tamaiti avanoa e faʻasoa ai mea ua latou iloa e uiga i tala i le Alema 13--16. Ina ia fesoasoani ia i latou, ia faaali atu ata e pei o ata i le Sau, Mulimuli Mai ia te A’u---Mo Tagata Taitoatasi ma Aiga po o le “Mataupu 22: O Le Misiona a Alema i Amonaea” (Tala o le Tusi a Mamona, 58–63).

Aoao atu le Aoaoga Faavae: Tamaiti Laiti

Alema 13:1–2, 6, 16

E fesoasoani le perisitua ia ou sau ia Keriso.

Mafaufau loloto ma le agaga tatalo i mea e manaomia e tamaiti o lau vasega ona malamalama ai mai le mea na aoao mai e Alema e uiga i le perisitua i nei fuaiupu.

Gaoioiga e Mafai Ona Fai

• Fai i tamaiti e toe fai faatasi ma oe se faamatalaga faigofie o le perisitua, e pei “o le perisitua o le mana o le Atua.”

• Sue tusitusiga paia i le Alema 13:2, ma taʻu atu i tamaiti e valaauina e le Atua tagata e umia le perisitua “e mafai ai e tagata ona … tepa taulai ai i luma i lona Alo.” Ina ia faaalia pe faapefea e tagata o loo umia le perisitua ona faia lenei mea, ia faaali atu ata o auala e auauna atu ai le au perisitua (tagai Tusiata o le Talalelei, nu. 38–41, 103–9), ona faasoa atu lea o tala e faatatau i auala na auauna atu ai Iesu (tagai Mataio 26:26–28; Mareko 5:22–24, 35–43).

• Sue i le Alema 13:6, ma faamatala atu oi latou e umia le perisitua “e aoao atu poloaiga [a le Atua] i le fanauga a tagata.” Fesoasoani i tamaiti e mafaufau e uiga i tagata e umia le perisitua latou te iloa. Pe faapefea ona latou aoao atu ia poloaiga? Valaaulia tamaiti e tusi se ata o se tasi e umia le perisitua latou te iloa o loo aoao atu se tasi i poloaiga a le Atua.

O sauniga o le perisitua e fesoasoani tatou te vaai atu ai ia Iesu Keriso mo le togiolaina.

Alema 14:18--29

E faamalosia au e le Tama Faalelagi e tusa ai ma loʻu faatuatua.

O le tala ia Alema ma Amoleka na laveaiina mai le falepuipui e mafai ona musuia tamaiti e liliu atu i le Alii pe a latou manaomia le fesoasoani.

Gaoioiga e Mafai Ona Fai

• Faaali atu le ata o Alema ma Amoleka i luga o le itulau o gaoioiga i lenei vaiaso ao e faamatala atu le tala i le Alema 14:18–29. E mafai foi ona e tagai i le “Mataupu 22: O Le Misiona a Alema i Amonaea” (Tala o le Tusi a Mamona, 58–63, po o le vitio talafeagai i luga o le ChurchofJesusChrist.org). Tuu atu i tamaiti e auauai i le faaaogaina o ata faafaatusa e faamatala ai le tala. Faamamafa atu na tuuina atu ia Alema ma Amoleka le malosi e sosola ai mai le falepuipui “e tusa ma lo (la) faatuatua ia Keriso” (Alema 14:26).

• Fesoasoani i tamaiti e mafaufau pe na faapefea lagona o Alema ma Amoleka ao i ai i le falepuipui, ma valaaulia i latou e faatino nei lagona (tagai fuaiupu 22). Faamatala atu na ole Alema i le Alii mo le fesoasoani (tagai fuaiupu 26). Molimau atu o le a faamalosia i tatou e le Atua pe a tatou tatalo ma le faatuatua.

• Faaaoga le itulau o gaoioiga o lenei vaiaso e aoao ai tamaiti e uiga i auala e faamalosia ai e le Atua i latou o e faatuatua. A o valivali e tamaiti le itulau o gaoioiga, faamatala e uiga i se taimi na tuuina atu ai e le Atua ia te oe le malosi.

Alema 16:1--8

E faamanuiaina a’u pe a ou mulimuli i le perofeta.

O Sorama, o le kapeteni sili o le autau a Sa Nifae, na iloa o Alema o se perofeta ma saili lana taitaiga. Ona o lenei mea, na faamanuiaina ai Sorama.

Gaoioiga e Mafai Ona Fai

• Faasoa i au oe lava upu le tala i le Alema 16:1--8. Faamamafa atu talu ai ona o Sorama ma le autau a sa Nifae na mulimuli i le perofeta o Alema, na mafai ai e Sa Nifae ona laveai a latou uo oe sa taofia e sa Lamana. Faasoa atu se aafiaga na faamanuiaina ai oe ona sa e mulimuli i le perofeta.

• Faaali atu se ata o le Peresitene o le Ekalesia, ma faasoa atu ni mea na ia aoaoina i tatou e fai. Fesoasoani i tamaiti e mafaufau i ni auala e mafai ona latou mulimuli ai ia Iesu e ala i le faia o mea o loo aoaoina ai i tatou e Lana perofeta.

• Faaali atu ata o perofeta (tagai Tusiata o le Talalelei, nu. 6–9, 14, 18, 26–27) a’o outou usuina ma tamaiti se pese e faatatau i perofeta, e pei o le “Mulimuli i le Perofeta” (Tusipese a Tamaiti, 58--59). Faamamafa ia fuaitau i le pese o loo aoao mai ai le mafuaaga e tatau ai ona tatou mulimuli i le perofeta.

Aoao atu le Aoaoga Faavae: Tamaiti Matutua

Alema 13:1–19

E fesoasoani le perisitua ia ou sau ia Keriso.

A’o e faitau i le Alema 13:1--19, o le a se mea na e mauaina e faaloloto ai lou faaaloalo mo le perisitua? O le a se mea ua musuia ai oe e faasoa ma tamaiti o loo e aoaoina? E mafai ona fesoasoani manatu nei.

Gaoioiga e Mafai Ona Fai

• Faitau ma tamaiti le Alema 13:10 ma le 13, saili mo uiga e tatau i se tasi e umia le perisitua ona i ai. Fai atu ia i latou e mafaufau i tagata latou te iloa o ni faʻataʻitaʻiga lelei o nei uiga.

• Fesoasoani i tamaiti e faia se lisi o sauniga tatou te mauaina e ala i le perisitua (tagai “Sauniga” i le Faamaoni i le Faatuatua, 109--10). Fai atu i se tasi e faitau Alema 13:16. E faapefea e nei sauniga ona fesoasoani ia i tatou e “tepa taulai atu ia [Iesu Keriso] mo le faamagaloina oa [tatou] agasala”?

• Fesili atu i tamaiti pe latou te iloa pe na faapefea ona maua le igoa o le Perisitua Mekisateko. Fesoasoani ia i latou e sue le tali i le Alema 13:14–19 ma le Mataupu Faavae ma Feagaiga 107:1–4. O le a se mea ua tatou aoaoina mai ia Mekisateko e uiga i le auala e tatau ai ona faaaoga le perisitua?

Alema 14:18--29

E faamalosia au e le Tama Faalelagi e tusa ai ma loʻu faatuatua.

Na i ai Alema ma Amoleka i le falepuipui mo le tele o aso ao lei faasaolotoina i laua e le Alii. O lenei tala e mafai ona fesoasoani i tamaiti ia iloa o o latou tofotofoga atonu e le maua ni tali vave pe faigofie, ae o le a faamalosia i latou e le Alii “e tusa ma lo [latou] faatuatua” (Alema 14:26).

Gaoioiga e Mafai Ona Fai

• Tusi fesili i luga o le laupapa e fesoasoani i tamaiti e sailiili auiliiliga mai le Alema 14:18--29, e pei O le a le mea na faia e faamasino ia Alema ma Amoleka i le falepuipui? po o le Pe na faapefea ona la faaalia lo la faatuatua ia Iesu Keriso? Tuu atu i tamaiti taitoatasi se fuaiupu pe lua e faitau, ma vaavaai mo tali i fesili.

• Valaaulia tamaiti e tusi ni ata o mea na tutupu mai Alema 14:18--29, ona tuu atu lea ia i latou e faaaoga a latou ata e faamatala ai le tala. E mafai faapefea ona tatou pei o Alema ma Amoleka?

• Faasoa atu se aafiaga na e faaalia ai lou faatuatua i le Alii ma na Ia tuuina atu ia te oe le malosi e faatoilaloina ai pe onosaia ai se tofotofoga. Ia uunaia tamaiti e faasoa mai ni aafiaga talitutusa na latou maua.

Alema 15:3–12

E mafai e le talalelei ona suia loto.

Na tetee malosi Seseroma ia Alema ma Amoleka i le taimi muamua, ae oa la molimau na paʻi atu i lona loto ma musuia o ia e salamo. Ao e suesue i nei fuaiupu, mafaufau pe faapefea e le aafiaga a Seseroma ona musuia tamaiti o loo e aoaoina.

Gaoioiga e Mafai Ona Fai

• Iloilo faatasi ma tamaiti mea na latou aoaoina i le vaiaso talu ai e uiga ia Seseroma. Faitau faatasi le Alema 15:3--12 ia iloa pe na faapefea ona suia o ia.

• Valaaulia tamaiti e vaai faalemafaufau na latou feiloai ma Seseroma ae lei salamo o ia. O le a se latou tala e fai e fesoasoani ai ia te ia e talitonu i le talalelei? E mafai ona latou faatusatusa mea o le a latou fai atu ai ma le mea na aoao atu e Alema ma Amoleka ia Seseroma (tagai Alema 11:40–46; 15:6–11). Aisea e mafai ai e le iloaina o nei upumoni ona fesoasoani i se tasi e manao e sui?

Fautuaina le Aoaoina i le Aiga

Valaaulia tamaiti e mafaufau i se mea e mafai ona latou faia i lenei vaiaso e faaalia ai lo latou faatuatua i le Alii. Fautuaina i latou e faasoa a latou fuafuaga ma aafiaga ma o latou aiga.

Faaleleia o Lo Tatou Aoao Atu

Aoao ia iloa faaaliga. “O faaaliga e masani ona oo mai i “fuaitau i luga o lea fuaitau’ (2 Nifae 28:30, ae le oo mai uma i le taimi e tasi. … Ao e mafaufau loloto pe faapefea e mataupu faavae o loo e aoaoina ona faamanuia ai tagata o lau vasega, o manatu ma musumusuga o le a oo mai i le gasologa o lou olaga i aso uma—ao e alu atu i le galuega, faia feau i le fale, pe fegalegaleai ma aiga ma uo” (Aoao Atu i le Ala a le Faaola, 12).