Amona ma le Tupu o Lamonae, saunia e Scott M. Snow

22--28 Iuni

Alema 17–22

“O Le a Ou Faia Outou o se Mea Faigaluega”

E pei foi ona maua e Lamonae ma isi i lenei tala ni aafiaga faaleagaga e suia ai olaga, e mafai foi e tamaiti o e aoaoina ona maua ni aafiaga faaleagaga i tusitusiga paia o le a aafia ai o latou olaga mo tausaga a sau. Ia teuina lenei mea i lou mafaufau ao e mafaufau loloto pe faapefea ona e aoaoina i latou.

Tusifaamaumau Ou Lagona Uunai

Valaaulia le Fefaasoaai

Faʻaali atu se ata e faʻaalia ai se mea na tupu i le Alema 17–22 (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Fai atu i tamaiti e taʻu atu ia te oe mea ua latou vaaia i le ata.

Aoao atu le Aoaoga Faavae: Tamaiti Laiti

Alema 17–19

E mafai ona ou faasoa atu le talalelei i isi.

E faapefea e le faataitaiga a atalii o Mosaea ona musuia lau vasega e faasoa atu a latou molimau i isi?

Gaoioiga e Mafai Ona Fai

• Fesoasoani i tamaiti e faatino le tala ia Amona i le Alema 17--19. E mafai ona e tagai i le “Mataupu 23: O Amona: O Se Auauna Sili” (Tala o le Tusi a Mamona, 64--68, po o le vitio talafeagai i luga o le ChurchofJesusChrist.org). Afai e te manatu o le a fiafia i ai tamaiti, aumai ni toniga faigofie ma ni vaega e fesoasoani. Tau atu i tamaiti mea ua e aoaoina mai le tala, ma valaaulia i latou e faia foi faapena.

• Faaali atu se meafaigaluega po o se isi mea faapena, ma talanoa i tamaiti pe o le a le mea e faaaoga ai. O a isi meafaigaluega e iloa e tamaiti? Valaaulia i latou e faafoliga o latou faaaogaina se meafaigaluega. Faamalamalama atu e pei lava ona tatou faaaogaina meafaigaluega e fai ai galuega, e mafai e le Tama Faalelagi ona faaaogaina i tatou e faia Lana galuega. Faitau le Alema 17:11, ma faamatala atu o Amona ma ona uso o meafaigaluega ia a le Tama Faalelagi na fesoasoani i tagata Sa Lamana e aoaoina le talalelei.

• Valaaulia tamaiti e tamomoe i le tulaga e tasi ma faafoliga o tuʻituʻi atu i faitotoa ao e faamatalaina le tala ia Apiso o alu mai lea fale i lea fale ma taʻu atu i tagata e uiga i le mana o le Atua (tagai Alema 19:16–34). Fesoasoani i tamaiti e mafaufau i ni auala e mafai ona avea ai i latou e pei o Apiso ma faasoa atu le talalelei i isi.

• Valaaulia ia tamaiti e tusi se ata o i latou lava o faasoa atu le talalelei i se tasi. Fesoasoani ia latou mafaufau i mea patino e mafai ona latou faasoa atu. Usu faatasi se pese e faatatau i le faasoaina atu o le talalelei, e pei o le “Ou Te Fia Avea Nei Ma Faifeautalai” (Tusipese a Tamaiti, 90). Tuu atu ia i latou se avanoa e faasoa atu ai o latou lagona e uiga i mea na aoao atu e Amona.

Alema 17:21–25; 20:9–27

E mafai ona ou fesoasoani i isi e o mai ia Keriso e ala i le faaalia o loʻu alofa mo i latou.

O le alofa ma le auaunaga a Amona na faamaluluina ai loto o le Tupu o Lamonae ma lona tama. O le a se mea e mafai ona aʻoaʻoina e tamaiti mai nei tala?

Gaoioiga e Mafai Ona Fai

• Aotele le Alema 17:21--25 mo tamaiti, faamamafa atu na manao Amona e auauna ia Lamonae. Valaaulia tamaiti e faasoa mai ni aafiaga ina ua latou auauna atu i se tasi. Faamanatu atu i tamaiti o le auaunaga maoae a Amona na fesoasoani ai i le Tupu o Lamonae e manao e aoao e uiga i le talalelei (tagai Alema 18:15--23). Valaaulia tamaiti e mafaufau i se tasi e mafai ona latou auauna atu i ai i le taimi nei, ma talanoa pe mafai faapefea ona latou auauna atu i lena tagata.

• Faamatala atu i tamaiti le tala mai le Alema 20:8--27. E mafai ona e faaaoga le “Mataupu 24: Ua Feiloa’i Amona ma le Tama o le Tupu o Lamonae” (Tala o le Tusi a Mamona, 69--70, po o le vitio talafeagai i luga o le ChurchofJesusChrist.org). Fai atu i tamaiti e mafaufau i taga eseese e mafai ona latou faia i taimi uma e te ta’ua ai Amona, Lamonae, po o le tama o Lamonae. Faamanino atu o le tasi mafuaaga na suia ai le loto o le tama o Lamonae ona sa alofa tele Amona ia Lamonae. Valaaulia tamaiti e tusi se ata o se mea e mafai ona latou faia e faaalia ai le alofa mo se tasi.

Aoao atu le Aoaoga Faavae: Tamaiti Matutua

Alema 17:1–4

E tuputupu ae laʻu molimau pe a ou faitau i tusitusiga paia, tatalo, ma anapogi.

Na malolosi ia atalii o Mosaea i le talalelei ma avea ma ni faifeautalai maoae ona sa latou suesue ma le maelega i tusitusiga paia, tatalo, ma anapopogi. O nei lava mea e mafai foi ona fesoasoani i tamaiti e te aoaoina.

Gaoioiga e Mafai Ona Fai

• Aumai i le vasega ni mea e fai ma sui o tusitusiga paia, tatalo, ma le anapogi, e pei o se seti o tusitusiga paia, o se ata o se tasi o tatalo, ma se ata o meaai, ma faamatala mea o loo faatusa i ai mea taitasi. Faitau le Alema 17:1--4, ma fesili atu i tamaiti pe na faapefea ona fesoasoani nei mea i atalii o Mosaea. E faapefea e le faitauina o tusitusiga paia, tatalo, ma le anapogi ona fesoasoani tatou te faalatalata atili atu ai i le Tama Faalelagi?

• Faaaoga le faasino autu o le Tusipese a Tamaiti e fesoasoani i tamaiti e saili pese e uiga i le suesueina o tusitusiga paia ma le tatalo. Usu faatasi nisi o nei pese, ma fesoasoani i tamaiti ia iloa mea o loo aoao mai e pese pe faapefea ona faamanuiaina i tatou e nei mea

Alema 17–18; 22:1–3

E mafai ona ou fesoasoani i isi e o mai ia Keriso e ala i le faaalia o loʻu alofa mo i latou.

O le manao o Amona e avea ma auauna a Lamonae na iu ina taitai atu ai i le avanoa e aoao ai Lamonae ina ua matala lona loto ma saunia e talia le talalelei.

Gaoioiga e Mafai Ona Fai

• Fesoasoani i tamaiti e faitau fuaiupu mai le Alema 17:21--39 o loo faamatala mai ai le tala i le auaunaga a Amona i le Tupu o Lamonae. Valaaulia i latou e tusi ata o tagata po o mea na tutupu i le tala ona faamatala lea o le tala ia latou lava upu. Fesoasoani i tamaiti e vaai pe na faapefea ona aafia le tupu i le auaunaga a Amona (tagai Alema 18:9--23). O le a se mea e mafai ona tatou aʻoaʻoina mai i lenei tala e uiga i auala e fesoasoani atu ai i isi ia aoao atili e uiga i le talalelei?

  

  MinervaK. Teichert (1888–1976), Sefeina e Amona le Lafu a le Tupu, 1935-1945, suauu i luga o le laupapa, 35 x 48 inisi. Falemataaga mo Faatufugaga a le Iunvesite a Polika Iaga

• Faitau le Alema 22:1--3, ma fai atu i tamaiti e faalogo pe faapefea ona avea le faataitaiga lelei a Amona ma mea na aafia ai le tama o le Tupu o Lamonae. Valaaulia i latou e mafaufau i se tasi latou te iloa e tatau ona malamalama i le talalelei. Fautua atu i tamaiti o lo latou alolofa ma faataitaiga lelei e mafai ona fesoasoani i lenei tagata ia iloa le maoae o le talalelei. Fesoasoani i tamaiti e mafaufau i auala e mafai ai ona avea i latou ma faataitaiga lelei ma faaali atu le alofa i tagata na latou mafaufau i ai.

• Valaaulia faifeautalai faamisiona po o se faifeautalai faatoa foi mai e faasoa atu le tala ia Amona i le Alema 17--18. Fai atu ia i latou e faasoa mai mea na latou aoaoina e uiga i le galuega faafaifeautalai mai ia Amona ma le taua o le auaunaga ia latou taumafaiga. Ia talanoaina ma tamaiti auala e mafai ai ona latou mulimuli i faataitaiga a Amona.

• Fai faatasi o se vasega, se lisi i luga o le laupapa o mea e mafai e tamaiti ona fai e auauna atu ai i tagata o o latou aiga. E faapefea ona faamanuiaina le aiga atoa i le faia o nei auaunaga?

Alema 18:24–43; 19:16–34

E mafai ona ou faasoa atu le talalelei i isi.

E mafai faapefea ona e faaaogaina tala i nei fuaiupu e musuia ai tamaiti e avea ma faifeautalai e pei o Amona ma Apiso?

Gaoioiga e Mafai Ona Fai

• Faaali atu ata e fai ma sui o nisi o upumoni na faasoa atu e Amona i le Tupu o Lamonae o loo maua i le Alema 18:24--40 (tagai i le itulau o gaoioiga o lenei vaiaso). Valaaulia tamaiti e faafoliga o ni faifeautalai ma faasoa atu mea latou te iloa e uiga i nei upumoni i le tasi ma le isi.

• Faitau le tala ia Apiso i tamaiti (tagai Alema 19:16–20, 28–29). Valaaulia tamaiti e auauaʻi e faafoliga e pei o Apiso i le tuʻituʻi i le faitotoa o le potuaoga ma molimau atu i le mea na tupu i le Alema 19:1--17. E faapefea ona avea i tatou e pei o Apiso ma molimau atu i upumoni tatou te iloa?

Fautuaina le Aoaoina i le Aiga

Valaaulia tamaiti e faia ma le agaga tatalo se sini ma o latou aiga e faasoa atu le talalelei i se tasi.

Faaleleia o Lo Tatou Aoao Atu

Tulitatao ia valaaulia e faatino. A e valaaulia ia tamaiti e faatino se mea ua latou aoaoina, ia tulitatao lena valaaulia i le taimi o le isi vasega e sosoo ai. E faaalia e lena mea i tamaiti e te popole i le ala o faamanuiaina ai e le talalelei o latou olaga. A o fefaasoaaʻi o latou aafiaga, o le a faamalolosia i latou ma fesoasoani le tasi i le isi ia ola i le talalelei (tagai Aoao Atu i le Ala a le Faaola, 35).