E Le Faagaloina Outou, saunia e Jon McNaughton

1--7 Iuni

Alema 5–7

“Ua O’o Ea Lenei Liuga Tele i o Outou Loto?”

Alema 5–7 e mafai ona fesoasoani ia te oe e toe manatunatu ai i lou liuga faifai pea ia Iesu Keriso. A o e faitau, tusi faamaumau mea e aoao atu e le Agaga ia te oe.

Tusifaamaumau Ou Lagona Uunai

Sa lei iloa e Alema ia taotoga ua faasaoina ai le fesuiai o le fatu, lea ua suia ai se fatu ua afaina pe ua ma’i i se fatu maloloina. Ae sa ia iloa e uiga i se “suiga o le loto [fatu]” faavavega (Alema 5:26)—lea e aumai ai e le Faaola ia i tatou se faafouga o le ola faaleagaga, e pei “ua toefanauina” (tagai Alema 5:14, 49). Sa mafai ona vaai Alema o le suiga o le loto o le mea tonu lava lea sa manaomia e le toatele o sa Nifae. O nisi sa maumea a o nisi sa matitiva, o nisi sa faamaualuluga a o isi sa lotomaualalo, o nisi sa faasaua a o isi sa mafatia i sauaga (tagai Alema 4:6–15). Ae o i latou uma lava e manaomia le o mai ia Iesu Keriso ina ia faamaloloina—e faapei lava ona tatou manaomia uma. Pe o tatou saili e faatoilalo le faamaualuga pe onosaia mafatiaga, o le savali a Alema e tutusa lava: “O mai, ma aua le fefefe” (Alema 7:15 Tuu atu i le Faaola e suia se loto ua maaa, agasala, pe ua manu’a i se loto e maualalo, mama a’ia’i, ma fou.

Manatu mo Suesuega Faaletagata Lava Ia o Tusitusiga Paia

Alema 5:14–32

E tatau ona ou oo i ai—ma faaauau pea ona lagonaina—se suiga tele o le loto.

O le fesili faatupu manatu sa fesili ai Alema i le nuu o Saraemila, o loo maua i le Alema 5:14–33, e mafai ona fesoasoani ia te oe e sailiili i lou lava agaga ma ia malamalama i le uiga o le iloa o se “suiga tele o le loto” i lou olaga atoa. Sa faamalamalama mai e Peresitene M. Russell Ballard le taua o nei fesili: “E manaomia ona ou faaalu soo se taimi e fesili ai ia te au lava ia, ‘O faapefea mai au?’ E tai pei o la e fai sau oe lava ia faatalanoaga patino ma oe lava ia. I le avea ai ma se taiala mo au i le taimi o lenei iloiloga patino faaletagata lava ia, ou te fiafia ai e faitau ma mafaufau loloto i upu vailiili o loo maua i le mataupu lona lima o le Alema” (“Toefoi Atu ma Mauaina,” Ensign po o le Liahona, Me 2017, 64).

Mafaufau e faitau ia fesili a Alema e faapei o loo e faatalanoaina oe lava ma suesue lou loto. Atonu e te manao e tusi au tali i fesili. O le a se mea ua musuia oe e fai o se taunuuga o lau faatalanoaga?

Tagai foi Dale G. Renlund, “Taofimau i le Liliu Tele o le Loto,,” Ensign po o le Liahona, Nov. 2009, 97–99.

E tatau i soo taitasi o Keriso ona oo i se “suiga o le loto.”

Alema 5:33–62

E mafai ona maua la’u lava molimau i le Faaola ma Lana talalelei e ala i le Agaga Paia.

Sa tuuina mai e Alema se molimau mamana i le Faaola ma Lana talalelei, ma sa ia faamalamalama mai foi le ala na ia maua ai lena molimau. A o ia molimau mai, na te le’i ta’ua lona aafiaga na ia vaaia ai ma faalogo i se agelu (tagai Mosaea 27:10–17, ae na ia faamatalaina le tau na ia totogiina ia iloa ai le upumoni mo ia lava. O le a se mea ua e aoaoina mai le Alema 5:44–51 e uiga i le ala na iloa ai e Alema le upumoni? E mafai faapefea ona e mulimuli i lana faataitaiga i au taumafaiga ia maua ai pe faamalosia ai lau molimau? O le a se mea e te aoaoina e uiga i le Faaola mai aoaoga a Alema i le Alema 5:33–35, 48–50, ma le 57–60?

Alema 7

O le usitai ma le maelega o le a fesoasoani ia te au e tumau ai i luga “o le ala lea e tau atu i le malo o le Atua.”

Sa lei tauivi le nuu o Kitiona ma nei faafitauli e pei ona sa i ai le nuu o Saraemila, o lea sa fesoasoani ai le Agaga ia Alema ia iloa o latou manaoga ma ese le aoaoina atu o i latou (tagai Alema 7:17, 26). E mafai ona e matauina ni nai eseesega i le va o savali a Alema i Saraemila (tagai Alema 5) ma i Kitiona. Mo se faataitaiga, sa vaai Alema i le nuu o Kitiona sa “i ai i le ala e tau atu i le malo o le Atua” (Alema 7:19). I lana lauga atoa ia i latou, na aoao atu ai i latou e Alema mea e tele e uiga i le ala e tumau ai i luga o lena ala (tagai Alema 7). O le a le fautuaga na ia tuuina atu ia te i latou? O le a se mea e mafai ona e faaaoga i lou olaga i le taimi nei?

Alema 7:7–16

Na tauave e le Faaola i Ona lava luga a’u agasala, tiga, ma puapuaga.

Pe i ai ea se taimi na e lagonaina ai e leai se tasi e malamalama i au tauiviga po o luitau? Afai e i ai o upumoni e mafai ona fesoasoani upumoni o loo aoao mai i le Alema 7:7–16 . Na molimau mai Elder David A. Bednar: “Ae ua silafia ma malamalama atoa i ai le Alo o le Atua, aua sa Ia lagonaina ma tauave a tatou avega taitoatasi. Ma ona o Lana taulaga le iu ma faavavau (tagai Alema 34:14), ua ia te Ia le tiga-alofa atoatoa ma e mafai ona ia faaloaloa mai Lona aao o le alofa mutimutivale ia i tatou” (“Tauave ma le Faigofie a Latou Avega,” Ensign po o le Liahona, Me 2014, 90).

A o e faitauina le Alema 7:7–16, mafaufau i mea ua fesoasoani nei fuaiupu ia i tatou ia malamalama ai e uiga i faamoemoega o le taulaga a le Faaola. E faapefea ona tatou maua Lona mana i o tatou olaga? Mafaufau e tusifaamaumau ou mafaufauga.

Tagai foi Isaia 53:3–5.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Alema 5:6–13

Aisea na manao ai Alema i lona nuu e manatua le alofa mutimutivale o le Alii i o latou augatama? O a tala mai le talafaasolopito o lou aiga o aoao ai oe e uiga i lona alofa mutimutivale? Atonu e mafai ona e asiasi i le familysearch.org/myfamily e tusifaamaumau ai nei tala.

Alema 5:14–33.

E mafai ona iloa e tagata o lou aiga pe o a lagona pe a saunia—pe le saunia foi—mo se malaga tolauapi, se suega i le aoga, po o se faatalanoaga mo se galuega. O a aafiaga lata mai e mafai ona latou faasoa mai e faapupula ai le taua o le saunia? E mafai ona e valaaulia tagata o le aiga e toe iloilo le Alema 5:14–33 ma sue fesili na fesili ai Alema ia saunia ai lona nuu e fetaiai ma le Atua. Atonu e mafai e tagata taitasi o le aiga ona filifili se fesili ma faasoa mai pe mafai faapefea ona fesoasoani ia i tatou e saunia ai e fetaiai ma le Atua. E mafai e lou aiga ona faaali ni fesili a Alema faasolosolo i lou fale mo tagata o le aiga e mafaufau loloto i ai.

Alema 6:4–6

O a ni mafuaaga tatou te faapotopoto ai o ni Au Paia? E mafai faapefea ona tatou faia lo tatou taimi i le lotu ia fesoasoani atili ia i tatou lava ma isi?

Alema 7:9–16

O a ni mea ua tatou aoao mai nei fuaiupu e fesoasoani ai ia i tatou e “aua le fefefe” (Alema 7:15) pe a tatou manaomia ona salamo ma suia? O a mea o aoao mai e nei fuaiupu ia i tatou e uiga i le liliu atu i le Faaola pe a tatou manaomia le fesoasoani? O a isi mea ua tatou faia e maua ai Lana fesoasoani? Na faapefea ona Ia fesoasoani ia i tatou?

Alema 7:23

O ai tatou te iloa o se faataitaiga lelei o se tasi pe sili atu foi o uiga auau mama o loo lisi mai i lenei fuaiupu? Aisea e taua ai le atiina ae o nei uiga auau mama?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Lo Tatou Aoao Atu

Fai fesili e valaaulia ai tagata o le aiga ia faatino. Mafaufau i fesili e musuia ai tagata o le aiga e mafaufau pe mafai faapefea ona latou ola atoatoa i le talalelei. “O fesili nei e masani lava e le o ni fesili mo talanoaga; e mo le manatunatu i ai faaletagata lava ia” (Aoao Atu i le Ala a le Faaola, 31).

O Lo Tatou Puluvaga, saunia e Jay Bryant Ward