Toetu

O le toetu o le toetuufaatasia lea o le agaga ma le tino i se tulaga tino ola pea, e le toe oo i ai ni faama’i po o le oti. Ona o le Pau o Atamu ma Eva, ua tatou oo ai i le oti faaletino, o le tuueseeseina lea o le agaga mai le tino. E ala ia Iesu Keriso ma Lana Togiola, o le a toetutu ai tagata uma ma laveaiina mai le oti faaletino.

Vaaiga Aoao

Ona o le Pau o Atamu ma Eva, ua tatou oo ai i le oti faaletino, o le tuueseeseina lea o le agaga mai le tino. “E ala i le Togiola a Iesu Keriso, o le a toetutu ai tagata uma ma laveaiina mai le oti faaletino (tagai i le 1 Korinito 15:22). O le toetu o le toetuufaatasia lea o le agaga ma le tino i se tulaga tino ola pea, e le toe oo i ai ni faama’i po o le oti.

O le Faaola o le uluai tagata lea i lenei lalolagi na toetu mai. O loo i le Feagaiga Fou ni tala ua molimau mai na toetu o Ia mai le tuugamau (tagai i le Mataio 28:1–8; Mareko 16:1–14; Luka 24:1–48; Ioane 20:1–29; 1 Korinito 15:1–8; 2 Peteru 1:16–17).

Ina ua faaali atu le Alii toetu i Ona Aposetolo, sa fesoasoani o Ia ia latou malamalama sa ia te Ia se tino o aano ma ivi. Sa fetalai atu o Ia, “Ia outou vaavaai mai i o’u lima ma o’u vae, aua o a’u lava lenei: ia outou tagotago mai ia te au, ma ia vaavaai mai; aua o le agaga e leai sona aano ma ni ivi, pei o a’u nei ua outou vaavaai i ai” (Luka 24:39 Sa faaali atu foi o Ia ia sa Nifae ina ua mavae Lona Toetu (tagai i le 3 Nifae 11:10–17).

I le taimi o le toetutu, o le a “faamasinoina [tatou] e tusa ma a [tatou] galuega. … Ma o le a aumai i tatou e laulaututu i luma o le Atua, ma le iloa e pei ona tatou iloa nei, ma maua se manatua pupula o lo tatou sala atoatoa” (Alema 11:41, 43). O le mamalu e faavavau o le a tatou maua o le a faalagolago lea i lo tatou faamaoni. E ui o le a toetutu tagata uma, ae nao i latou o e e o mai ia Keriso ma tofo i le atoatoa o Lana talalelei o le a mautofi i le faaeaga i le malo selesitila.

O se malamalama ma le molimau i le toetu e mafai ona tatou maua ai le faamoemoe ma le vaaiga a o tatou feagai ma luitau, tofotofoga, ma olioliga o le olaga. E mafai ona tatou maua le mafanafana i le faamautinoaga o loo soifua le Faaola ma e ala mai i Lana Togiola, “ua motusia e ia noataga o le oti, o le a leai ai se manumalo o le tuugamau, ma o le a tofatumoanaina le tui o le oti i faamoemoega o le mamalu” (Alema 22:14).

Tusifaamaumau Ou Lagona Uunai