Toetu

Manumalo o Iesu Keriso i le oti

I se taimi i o tatou olaga, o le a tofu i tatou ma se taimi e taumanatunatu ai, “O le a le mea e tupu pe a tatou feoti?” “Pe o le a ou toe vaai ea i e pele ia te a’u ua maliliu?” “O fea e mafai ona ou maua ai le mafanafana pe a maliu se tasi ou te alofa i ai?”

E ui tatou te le maua uma tali, ae o le moni o le Toetu o Iesu Keriso e mafai ona aumaia ai le mafanafana ia i latou uma o e faanoanoa. O le mea moni e faapea, o i latou uma e maliliu o le a i ai se aso e toe ola ai, e aumaia ai le filemu i o tatou agaga ma folafolaga o loo i luma atu i aso e sili atu.

I le toetu mai le oti i le tino ola pea, sa avea Iesu Keriso ma “uluai fua” o le Toetu (tagai 1 Korinito 15:20–23) ma saunia se ala mo i tatou uma ia i ai se aso e toetu ai e pei o Ia.

O le a le Toetu?

O le toetu o le toe faatasia lea o le tino agaga ma le tino faaletino pe a mavae le oti, e le toe tuueseeseina lava (tagai Alema 11:45). Pe a tatou toetutu, o le a faaatoatoaina o tatou tino ma ola pea, e le toe oo i faama’i ma le oti. Ona sa faatoilalo e Iesu Keriso le oti e ala i Lona Toetu, o le a toetutu tagata uma e pei o Ia.

Vaaiga aoao i autu: Toetu

O taiala fesootai mo le suesueina o le talalelei: Togiola a Iesu Keriso, Galuega Faaletino a Iesu Keriso, Fuafuaga o le Faaolataga

Vaega 1

Na Toetu Iesu Keriso

O Iesu Keriso lea na muamua ona toetu mai. O Lona manumalo i le oti o le faavae lea o lo tatou faatuatua. Na aoao mai le Perofeta o Iosefa Samita, “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea na maliu o Ia, na tanumia, ma toetu mai i le aso tolu, ma afio a’e i le lagi.”¹

Ua tuuina mai e le Alii ni molimau se tele e uiga i lenei aoaoga faavae taua. O Evagelia taitasi e fa o loo aofia ai tala a i latou na molimauina Iesu o se tagata toetu. O loo molimau mai foi le Tusi a Mamona e faitau afe tagata i Amerika na vaai i le Faaola toetu. I ona po nei, o molimau e pei o Iosefa Samita ma isi perofeta ma aposetolo ua molimau mai o Iesu Keriso ua toetu ma o loo soifua i aso nei.

Mea e mafaufau i ai

Manatu faapea o oe o se loia o loo fauina se mataupu e faamaonia ai ua toetu Iesu Keriso. O ai o le a e valaaulia o ni molimau? E faapefea e molimau na vaai moni i ai ona faamalosia lau mataupu? E mafai faapefea e le mau a molimau na vaai i le Alii toetu ona aafia ai lau lava molimau? Mo manatu, tagai Ioane 20:1–20; 3 Nifae 11:3–17; ma le Mataupu Faavae ma Feagaiga 76:19–24.
Faitau le Ioane 20:26–29. O a savali o loo tuuina mai e le Faaola i lenei fuaitau i tagata e le o ni molimau vaai tino o Lona Toetu? (Tagai foi i le Eteru 12:5–6.) E tusa lava pe tatou te lei vaai i le Alii toetu, e mafai lava ona tatou maua se molimau patino ua Toetu o Ia. O le a se faamaoniga o le Toetu ua e vaaia i lou olaga? Na faapefea ona uunaia oe e lenei aoaoga faavae?

Gaoioiga mo le aoao faatasi ma isi

Na tautino mai e Peresitene Gordon B. Hinckley (1910–2008): “Mai manumalo uma i le talafaasolopito o le tagata, e leai se tasi e sili atu, e leai se tasi e lautele i lona aafiaga, e leai se faavavau i ona taunuuga e pei o le manumalo o le Alii faasatauroina o le na afio mai i le Toetu i lena uluai taeao o le Eseta.”² Talanoaina pe aisea e taua ai le iloa o loo soifua Iesu Keriso i le asō. Sa tusia foi e Peresitene Hinckley upu o le viiga “O Loo Soifua Lo’u Faaola.”³ Faitau pe faalogologo faatasi i lenei viiga, ona faasoa atu lea o manatu ma lagona e musuia ai oe.
E toatele tusiata musuia na faaalia le taimi na vaai ai tagata taitoatasi i le Faaola toetu. Vaai i ata nei po o isi e te fiafia i ai. Faasoa atu po o a mea ua fesoasoani nei ata e te malamalama ai e uiga i le Toetu o Iesu Keriso. E faapefea ona latou faatosinaina ou lagona e uiga ia te Ia? O le a sou manatu i ni ou lagona pe ana faapea na e i ai iina?

Ua faaali atu Keriso ia Toma ina ua mavae le toetu

O Kaleopa ma se soo o loo saofafai e aai ae la iloaina le Faaola

Aoao atili

Mataio 27:52–53; Mataio 28; Luka 24:13–43; 1 Korinito 15:1–8; 2 Nifae 9:3–7, 13–15; Helamana 14:14–17; 3 Nifae 23:6–14
D. Todd Christofferson, “O Le Toetu o Iesu Keriso,” Liahona, Me 2014, 111–14.
“O Le Togiola ma le Toetu o Iesu Keriso,” Aoaoga a Peresitene o le Ekalesia: Howard W. Hunter (2015), 99–110.
Robert J. Matthews, “Toetu,” Liahona, Ape. 1996, ChurchofJesusChrist.org
“Ua Toetu Iesu” (vitio), Potutusi o le Talalelei
“Mataupu 54: Ua Toetu Iesu,” Tala o le Feagaiga Fou, 139–44

Vaega 2

O Le a Tatou Toetutu Uma

Ona sa toetu Iesu Keriso, o le a tatou toetutu uma foi. E lei leva ona mavae le Toetu o Iesu Keriso, ae toatele foi tagata faamaoni na toetutu mai (tagai Mataio 27:52–53). E ui o le a le toetutu tagata uma i le taimi lava e tasi, ae o le a iu lava ina maua e tagata uma se tino atoatoa, e faavavau e ala i le meaalofa mamalu o le toetutu o tagata uma.

O o tatou tino toetutu o le a talitutusa ma tino ua tatou maua i le taimi nei, ua na o le tino ola pea, atoatoa—e saoloto mai ma’i ma tiga. O le a tatou “maua se atoatoaga o le olioli” (Mataupu Faavae ma Feagaiga 93:33–34; tagai foi Alema 11:43). O o tatou tino toetutu o le a mafai ai ona tatou toe foi atu i le afioaga o le Atua ma faamasinoina ai. O i latou ua salamo ia latou agasala o le a olioli i le ola e faavavau ma ola e faavavau i le afioaga o le Atua.

Mea e mafaufau i ai

O Korianetona le atalii o Alema le Itiiti sa “popole e uiga i le toetutu mai o e ua oti” (Alema 40:1). O lea na aoao atu ai e Alema ia Korianetona—ma le aufaitau o le Tusi a Mamona—i le tele o upumoni taua e faatatau i le Toetu. Faitau mea sa ia aoaoina atu i le Alema 40–41. A o e faitau, ia matau upumoni e uiga i le Toetu e taua ia te oe. Mata na faapefea ona fesoasoani nei upumoni ia Korianetona e lagona ai le filemu? E mafai faapefea ona latou faatosinaina faaiuga o loo e faia i le taimi nei?
Sa aoaoina e le Aposetolo o Paulo e faapea o nisi o le Au Paia i Korinito sa lei talitonu i le Toetutu. Faitau le 1 Korinito 15, ma taulai faapitoa atu i aoaoga a Paulo e uiga i le Toetu. O nisi nei o fesili e te mafaufau i ai ao e suesue:
- Fuaiupu 12–15: Aisea o le a le aoga ai le talai atu ma le faatuatua pe afai e leai se toetu?
- Fuaiupu 16–19: Aisea o le a tatou i ai “i [a tatou] agasala” pe ana faapea e leai se toetutu? Aisea o le a tatou “sili ai ona malaia”?
- Fuaiupu 55–58: E faapefea e lou malamalama i le Toetu ona fesoasoani e te “tumau” ai ma le “le faagaeetia”?

Gaoioiga mo le aoao faatasi ma isi

Ua aoao mai e le talalelei toefuataiina a Iesu Keriso e faapea o le meaalofa o le toetu ua tuuina atu e aunoa ma le faatuaoia i tagata uma, ae o le toatele o fanau a le Atua e le o iloaina lenei faamanuiaga. Talanoaina pe faapefea ona faia e le Toetu se eseesega i lou olaga. Atonu foi e taua le talanoaina o aafiaga patino o Sister Reyna I. Aburto i lana saunoaga “ELeai se Manumalo o le Tuugamau”⁴ ma Elder S. Mark Palmer i le “O Lo Tatou Faanoanoa o le a Liua i le Olioli.”⁵ Na faapefea ona faamanuiaina Sister Aburto ma Elder Palmer i se malamalama o le Toetu? E faapefea ona faamanuiaina i tatou e lenei malamalama?

Aoao atili

1 Peteru 1:3–5; Mosaea 15:19–25; 16:7–9; Alema 11:40–45
Dallin H. Oaks, “Toetu,” Liahona, Iulai 2000, 16–19.
“Maliu ma le Toetu: Mai le Tafa o Ata i le Taeao Fiafia,” Aoaoga a Peresitene o le Ekalesia: Thomas S. Monson (2020), 113–22.
“Mauaina o le Faamoemoe e ala i le Toetu o Keriso” (vitio), Gospel Library

O Isi Punaoa e uiga i le Toetu