Taiala mo le Suesueina o le Talalelei
Togiola a Iesu Keriso
O le taulaga a lo tatou Faaola ma lo tatou ala e tasi e toe foi atu ai i le Tama Faalelagi
Afai na lua valavala ma se tasi e te alofa i ai, ona e malamalama lea—i se tulaga laitiiti—pe aisea e finagalo ai le Atua le Tama ia tatou toe foi atu ma nonofo faatasi ma Ia e faavavau. E alofa le Atua ia i tatou, ma na Ia auina mai Lona Alo, o Iesu Keriso, e avea ma o tatou Faaola. Na afio mai Iesu i le lalolagi e toe avatu i tatou i le Atua.
Na faataunuuina e Iesu lenei mea e ala i Ona puapuaga ma le ositaulaga—o le mea ua ta’ua e tusitusiga paia o le Togiola a Iesu Keriso. E ala i Lana Togiola, na faatoilalo ai e Iesu ia taunuuga uma o le Pa’u o Atamu: tiga ma mafatiaga faapea foi le oti faaletino ma le faaleagaga. Sa Ia saunia le ala mo i tatou e le gata e toe foi atu ai i le afioaga o le Atua ae ia avea foi e faapei o le Atua. I lena tulaga, e mafai e Iesu ona faalatalata atili atu i tatou i lo tatou Tama o i le Lagi nai lo se isi lava taimi muamua.
Ina ia suesue i mea na tutupu e o faatasi ma le Togiola a Iesu Keriso, iloilo le autu “Galuega Faaletino a Iesu Keriso.”
O le a le Togiola a Iesu Keriso?
O le Togiola a le Faaola e aofia ai Ona mafatiaga i Ketesemane ma luga o le satauro, Lona maliu, ma Lona Toetu. E ala mai i lenei mafatiaga na tauave ai e Iesu Keriso i Ona lava luga o tatou tiga uma, faanoanoaga, agasala, ma le oti, ma mafai ai ona tatou toe foi atu i le afioaga o le Atua ma maua le ola e faavavau.
Vaaiga aoao i autu: Togiola a Iesu Keriso
O taiala fesootai mo le suesueina o le talalelei: Iesu Keriso, Pa’u o Atamu ma Eva, Olaga Faitino o Iesu Keriso, Faaolataga, Fuafuaga o le Faaolataga
Vaega 1
Tatou te Manaomia se Faaola—Iesu Keriso
Ina ia malamalama i le ala e laveai ai i tatou e Iesu Keriso e ala i Lana Togiola, e mafai ona fesoasoani le mafaufau ane pe aisea e manaomia ai ona faaolaina i tatou. O le a le mea e faaolaina mai ai i tatou e Iesu Keriso? Tuu se isi itu, o le a le mea e mafua ai le vavaeeseina o i tatou ma le Atua?
O le Atua e atoatoa, e mamana, ma ola pea. Tatou te le atoatoa, vaivai, ma e oo i ai le oti. O se vaega lena o lo tatou lava sese—o se taunuuga o a tatou agasala ma filifiliga le lelei. Ae o se taunuuga foi o le ola ai i se lalolagi pa’u. (Mo nisi faamatalaga i lena autu, tagai i le “Pa’u o Atamu ma Eva.” O le suesueina o le Pa’u o le a fesoasoani e te malamalama atoatoa ai i le faamoemoega ma le manaomia o le Togiola a Iesu Keriso.)
E ala i Lana Togiola, e mafai ai e Iesu Keriso ona faamamaina i tatou mai le agasala ma faatuina i tatou mai le oti. E mafai ona Ia tuuina mai ia i tatou le “malosi e sili atu nai lo [lo tatou] lava malosi.” O Iesu Keriso na filifilia e le Atua, a o lei foafoaina le lalolagi, e avea ma o tatou Faaola (tagai Mose 4:1–2; Aperaamo 3:26–27). O le mea moni, ua na o Ia lava e mafai ona avea ma o tatou Faaola.
Mea e mafaufau i ai
-
Afai e fesili atu se tasi ia te oe “Aisea ou te manaomia ai se Faaola?” o le a sau tala e fai atu? Faitau e uiga i le auala na tali ai Peresitene Dallin H. Oaks i se fesili talitutusa i lana savali “O Le A Se Mea Ua Faia e lo Tatou Faaola mo i Tatou?” Ona mafaufau lea e tusifaamaumau ou lagona e uiga i mea na faia e Iesu Keriso mo oe.
-
Na aoao mai le perofeta o Liae e mafai ona tatou mau faatasi ma le Atua i le na o “galuega, ma le alofa mutimutivale, ma le alofa tunoa” o Iesu Keriso (2 Nifae 2:8). Pe na e mafaufau ea po o a na galuega? O le a le mea e uiga ia Iesu Keriso ua avea ai o Ia ma tagata e toatasi—na o ia lava—e mafai ona avea ma o tatou Faaola? Mafaufau loloto a o e faitauina nei fuaitau o mau: Eperu 4:15; 2 Nifae 2:6–9; Mataupu Faavae ma Feagaiga 20:21–25.
Gaoioiga mo le aoao faatasi ma isi
-
Atonu e mafai ona fesoasoani se lesona faatino ia te oe e faaali atu ai le tele o lo tatou manaomia o se Faaola. Mo se faataitaiga, e mafai ona e fatu se ala e tumu i mea faalavefau ma faafitauli ma faatusatusa i o tatou olaga. Pe atonu foi e mafai ona e faasoa atu ni aafiaga i se taimi na e le maua ai se fesoasoani po o le oo i se tulaga lamatia ma manaomia ai se tasi e laveai oe. (O le vitio “Where Justice, Love, and Mercy Meet” [5:36] o loo aumaia ai se faataitaiga lelei.) O lenei mea e mafai ona taitai atu ai i se talanoaga e uiga i le mafuaaga tatou te manaomia uma ai Iesu Keriso e laveai i tatou.
Aoao atili
-
Tad R. Callister, “O le Togiola a Iesu Keriso,” Liahona, Me 2019, 85-87
-
“For God So Loved the World” (vitio), Gospel Library
-
“Faamanuiaga mai ia Iesu,” Uo, Fep. 2020, 8
Vaega 2
Ua Faatoilalo e Iesu Keriso le Oti mo i Tatou
E le itiiti ifo ma le tasi se mea e tutusa ai tagata uma i le lalolagi: o le a iu lava ina tatou feoti uma. Mai i Lona tina faaletino, o Maria, na maua ai e Iesu le gafatia ona oti. Ae i le avea ai ma Alo o le Atua, sa ia te Ia foi le mana e pulea ai le oti. Na Ia toetu mai le oti, ma o le faia o lea na Ia motusia ai filifili o le oti lea na faatagataotauaina uma ai i tatou. Ona sa toetu o Ia, o le a toetutu ai foi i tatou uma ma ola pea (tagai 1 Korinito 15:20–22). O se tasi lena o auala tatou te avea atili ai e faapei o le Tama Faalelagi, o le e i ai se tino faamamaluina, e le oo i ai le oti.
Mea e mafaufau i ai
-
I le Tusi a Mamona, o aoaoga a Amoleka e uiga i le toetu na suia ai le olaga o Seseroma. Faitau le Alema 11:42–46 e aoao ai po o le a le mea na ta’u atu e Amoleka ia te ia, ma mafaufau loloto pe faapefea e le malamalama i nei upumoni ona aafia ai lou olaga.
-
O le Gospel Library o loo i ai se tuufaatasiga o vitio o le Eseta o loo aoao mai ai e uiga i le Toetu o Iesu Keriso ma le faamoemoe ma le olioli ua Ia ofoina mai ia i tatou. Mafaufau e matamata se tasi pe sili atu o nei vitio. O a ni ou lagona mo Iesu Keriso a o e matamata i nei vitio?
Gaoioiga mo le aoao faatasi ma isi
-
E toatele perofeta ua saunoa e uiga i le “tui” o le oti (tagai 1 Korinito 15:55–57; Mosaea 16:7–8; Alema 22:14; Mamona 7:5). Aisea e “[matui]tui” ai pe a maliu se tasi tatou te alolofa i ai? Talanoa pe faapefea e lou faatuatua ia Iesu Keriso ona faamaluluina le tui o le oti mo oe.
Aoao atili
-
D. Todd Christofferson, “O Le Toetu o Iesu Keriso,” Liahona, Me 2014, 111–14
-
Reyna I. Aburto, “E Leai se Manumalo o le Tuugamau,” Liahona, Me 2021, 85-86
Vaega 3
Na Faatoilalo e Iesu Keriso le Agasala mo i Tatou
O le toatele o i tatou o loo taumafai e avea ma tagata lelei. Ae e ui i le faigata tatou te taumafai ai, tatou te faia uma lava mea tatou te iloa e le tatau ona tatou faia. Tatou te agasala uma lava, ma o lena mea e taofia ai i tatou mai le mafai ona mau i le paia ma le mama a’ia’i i le afioaga o le Atua—e le o se mea amiotonu (tagai Alema 42:12–15). Ae e finagalo le Atua ia tatou ola e faavavau i Lona afioaga, o lea na Ia saunia ai ma le alofa mutimutivale se ala mo i tatou e faatoilalo ai aafiaga o le agasala: na Ia auina mai Iesu Keriso e tauave na agasala i Ona lava luga. O le mea lea, o i latou uma o e salamo faamaoni e mafai ona faamagaloina ma toe foi atu e mau faatasi ma lo tatou Tama Faalelagi.
Mea e mafaufau i ai
-
E mafai faapefea e le fuafuaga a le Atua ona totogi e Iesu le sala mo a tatou agasala? Mafaufau e suesue le Alema 42:9–27 ma mafaufau i lena fesili. O a ni mafaufauga ma ni uunaiga faaleagaga e oo mai ia te oe?
Gaoioiga mo le aoao faatasi ma isi
-
E tele viiga o loo molimau mai i le mana o Iesu Keriso e laveai ai i tatou mai a tatou agasala. O viiga o le faamanatuga e faapitoa lava le lelei i lenei mea (tagai, mo se faataitaiga, “Ia Migao ma le Agamalu Nei” po o le “Ou Te Tu ma Ofo”). Atonu e te mafaufau e usu pe faalogologo faatasi i ni nai pese e te fiafia i ai. Pe o i ai ni fasifuaitau i nei viiga e fausia ai lou faatuatua i le Faaola ma Lana Togiola?
Aoao atili
-
Dallin H. Oaks, “Faamamāina e le Salamo,” Liahona, Me 2019, 91–94
Vaega 4
E Malamalama Iesu Keriso ma e Mafai ona Fesoasoani ia i Tatou
O ou aafiaga—e aofia ai ou aafiaga sili ona faigata—o ou lava na. O isi atonu na oo i ni mea talitutusa faapea, ae e na o le toatasi le tagata e iloaina atoatoa ou lagona. O Iesu Keriso na “mafatia i tiga ma puapuaga ma faaosoosoga o ituaiga eseese uma.” Na Ia ave i Ona luga “tiga ma maʼi o ona tagata” (Alema 7:11). Aisea o le a Ia faia ai lena mea? Ina ia “mafai ona ia silafia e tusa ma la le tino le ala e fesoasoani ai i ona tagata, e tusa ma o latou vaivaiga” (Alema 7:12). Sa Ia faia ina ia e maua ai se tasi e liliu atu i ai, se tasi e malamalama, se tasi e i ai le tomai ma le malosi e fesoasoani ai, e tusa lava po o le a le mea o loo e mafatia ai (tagai Eperu 4:14–16).
Mea e mafaufau i ai
-
O le a le eseesega o i ai ia te oe i le iloa ai ua “tauave e le Faaola o [ou] tiga, ma tauave [ou] faanoanoa”? (Isaia 53:4). O nei fuaitau o mau e mafai ona fesoasoani ia te oe e mafaufau loloto ai i le fesili lenei: Isaia 41:10; Ioane 14:18, 27; Mataupu Faavae ma Feagaiga 122:5–9.
Gaoioiga mo le aoao faatasi ma isi
-
Pe ua e mafaufau ea po o le a le uiga o le mafatia o le Faaola “i tiga o tagata ola uma, o tane, fafine, ma tamaiti”? (2 Nifae 2:21). Atonu e mafai ona outou palepalealuga ma isi ia nisi o tiga o le a aofia ai—e pei o tiga faaletino ma faalelagona na e lagonaina, na lagonaina e e pele ia te oe, ma atonu na e faalogo i ai mai isi. O le a le atoatoa lau lisi, ae e faapefea e lau lisi le atoatoa ona aafia ai le ala e te faitauina ai le Alema 7:11–13? E faapefea e le iloaina o mea na puapuagatia ai Iesu Keriso e aafia ai ou lagona e uiga ia te Ia?
Aoao atili
-
Dallin H. Oaks, “Faamalosia e Ala i le Togiola a Iesu Keriso,” Liahona, Nov. 2015, 61–64
-
Neil L. Andersen, “Manu’a,” Liahona, Nov. 2018, 83–86; tagai foi i le vitio “The Wounded Shall Be Healed” (Gospel Library)
-
“O Fea Lo‘u Filemu?,” Viiga, nu. 68.