O Le A le Mea ua Faia e Lo Tatou Faaola mo i Tatou?
Ua faia e Iesu Keriso mea uma e tatau ai mo la tatou malaga i le olaga faaletino ma agai atu i le taunuuga ua faataatia mai i le fuafuaga a lo tatou Tama Faalelagi.
I se sauniga o le afiafi o le Aso Toonai i se konafesi faalesiteki i le tele o tausaga ua mavae, sa ou feiloai ai i se tamaitai sa fai mai na talosagaina o ia e ana uo e toe foi mai i le ekalesia i le mavae ai o le tele o tausaga sa le toaga ai, ae sa le mafai ona ia mafaufau i se mafuaaga e tatau ai ona ia toe foi mai. Ina ia faamalosiau atu ia te ia, sa ou fai atu ai, “A e mafaufau i mea uma sa faia e le Faaola mo oe, e tele ni mafuaaga ia te oe e te toe foi mai ai e tapuai ma auauna atu ia te Ia.” Sa faate’ia a’u ina ua ia tali mai, “O le a Lana mea sa fai mo au?”
O le a le mea ua faia e Iesu Keriso mo i tatou taitoatasi? Ua Ia faia mea uma e tatau ai mo la tatou malaga i le olaga faaletino ma agai atu i le taunuuga ua faataatia mai i le fuafuaga a lo tatou Tama Faalelagi. O le a ou talanoa atu i vaega autu e fa o lena fuafuaga. O Lona Alo e Toatasi na Fanaua, o Iesu Keriso, o le totonugalemu o nei vaega taitasi. O le faaosofiaga o nei mea uma “o le alofa lea o le Atua, ua faamaligi ifo lautele o ia lava i loto o le fanauga a tagata; o lea, o le mea lea ua silisili atu ona manaomia i mea uma.”(1 Nifae 11:22).
I.
A o lumanai tonu ai le Aso Sa o le Eseta, ua talafeagai lelei le talanoa muamua e uiga i le Toetu o Iesu Keriso. O le Toetū mai le oti o le poutū patino mautinoa lea o lo tatou faatuatuaga. Ua faaopoopo i ai le uiga i la tatou mataupu faavae, faaosofiaga o o tatou amioga, ma le faamoemoe mo lo tatou lumanai.
Ona ua tatou talitonu i faamatalaga a le Tusi Paia ma le Tusi a Mamona e uiga i le Toetū moni o Iesu Keriso, ua tatou talitonu ai foi i le anoanoai o aoaoga faatusi paia e faapea o le a oo mai foi se toetū faapea i tagata uma o ē ola ai i luga o lenei fogaeleele.1 E pei ona a’oa’o mai Iesu, “Ou te ola au, o le mea lea e ola ai outou” (Ioane 14:19). Ma sa a’oa’o mai Ana Aposetolo e faapea “e toe tutū mai ai ē ua oti ma le ola pea” ma o “lenei tino iu vale i le tino ola pea” (1 Korinito 15:52, 54).
Ae o le Toetū ua aumaia ia i tatou se mea e sili atu nai lo lenei faamautinoaga o le tino ola pea. Ua suia ai le ala tatou te vaai ai i le olaga faaletino.
Ua aumaia e le Toetu ia i tatou le vaaiga ma le malosi e onosaia ai lu’itau o le olaga faaletino o loo feagai ma i tatou taitoatasi ma i latou tatou te alolofa i ai. E aumaia ia i tatou se ala fou e vaai ai i faaletonu faaletino, faalemafaufau, pe faalelagona tatou te mauaina i le taimi e fanau mai ai pe aafia ai foi i le gasologa o le olaga faaletino. E aumaia ia i tatou le malosi e onosaia ai faanoanoaga, toilalo, ma ni lē fiafia. Ona ua tofu i tatou ma se toetū mautinoa, ua tatou iloa ai o nei faaletonu faaletino ma mea faafeagai ua na o se taimi lē tumau.
Ua aumaia foi e le Toetū ia i tatou se uunaiga mamana e tausi poloaiga a le Atua i le taimi o o tatou olaga faaletino. Pe a tatou toetutu mai le oti ma agai atu i lo tatou Faamasinoga Mulimuli na valo’iaina, tatou te fia agavaa mo faamanuiaga silisili ua folafola mai i tagata toetutu.2
Ma le isi, o le folafolaga e mafai ona aofia i le Toetutu se avanoa e faatasi ai ma tagata o o tatou aiga—tane, avā, fanau, matua, ma ē tupuga mai ia te oe—o se faamalosiauga mamana lea mo i tatou e faataunuu ai o tatou tiutetauave faaleaiga i le olaga nei. E fesoasoani foi ia i tatou e ola faatasi ai i le alofa i lenei olaga, ma faamafanafana ai i tatou i le oti o ē pele ia i tatou. Ua tatou iloa o le valavala ai faaletino ua na o se mea lē tumau, ma e tatou te tulimata’i atu i faatasiga ma fegalegalea’iga fiafia i le lumanai. O le Toetū tatou te maua ai le faamoemoe ma le malosi e onosai ai a o tatou faatalitali. Ua saunia ai foi i tatou i le lototele ma le mamalu e fetaiai ai ma lo tatou lava oti—e oo lava i se oti e ono ta’ua o le vave oti.
O nei aafiaga uma o le Toetu o ni vaega o le tali muamua i le fesili “O le a se mea ua faia e Iesu Keriso mo a’u?”
II.
Mo le toatele o i tatou, o le avanoa ina ia faamagaloina ai a tatou agasala o le uiga tele lena o le Togiola a Iesu Keriso. I tapuaiga, tatou te pepese ai ma le migao:
O Lona toto sa faamasa’a;
Ma sa ofo mai Lona soifua,
Se taulaga e fai mo agasala,
E lavea’i ai tagata.3
Na onosaia e lo tatou Faaola ma le Togiola le mafatiaga lē mafaamatalaina, ina ia avea ai o Ia lava ma taulaga mo agasala a tagata uma o le a salamo. O lea taulaga togiola na ofoina atu ai le lelei silisili, le tamai mamoe e aunoa ma se ila, mo le fuataga silisili o mea leaga, o agasala a le lalolagi atoa. Na tatala ai le faitotoa mo i tatou taitoatasi ina ia faamamaina ai mai a tatou lava agasala patino, ina ia mafai ai ona toe faaulufale atu i tatou i le afioaga o le Atua, lo tatou Tama e Faavavau. O lenei faitotoa matala o loo avanoa i fanau uma a le Atua. I tapuaiga, tatou te pepese ai:
Ou te ofo i lona afio mai i luga,
E laveai a’u sē ua faalogogatā,
Ma ua Ia alofa i se ua pei o au nei.4
O le aafiaga ofoofogia ma le lēmafaamatalaina o le Togiola a Iesu Keriso e fua i le alofa o le Atua mo i tatou taitoatasi. Ua faamautu ai Lana tautinoga e faapea “ua tele lava le taua o agaga”—o tagata uma—“i le silafaga a le Atua” (Mataupu Faavae ma Feagaiga 18:10). I le Tusi Paia, sa faamatalaina ai e Iesu Keriso lenei mea e tusa ai ma le alofa o le Tama Faalelagi: “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau” (Ioane 3:16). I faaaliga i ona po nei na tautino mai ai lo tatou Togiola o Iesu Keriso e faapea na Ia alofa tele i le lalolagi na ia tuu atu ai lona lava ola, ina ia mafai e le toatele o e talitonu ona avea ma atalii o le Atua” (Mataupu Faavae ma Feagaiga 34:3).
Pe o se mea ea e ofo ai, le faai’uina o le Tusi a Mamona: O Se Tasi o Molimau ia Iesu Keriso,” i le aoaoga e faapea ina ia “faaatoatoaina” ma “faapaiaina … ia Keriso” e tatau ona tatou alolofa i le Atua ma o [tatou] manatu atoa, mafaufau ma le malosi atoa”? (Moronae 10:32–33). O Lana fuafuaga na faaosofia e le alofa e tatau ona mauaina i le alofa.
III.
O le a se isi mea ua faia e lo tatou Faaola, o Iesu Keriso mo i tatou? E ala i a’oa’oga a Ana perofeta ma e ala i Lana auaunaga patino, sa a’oa’o mai ai e Iesu ia i tatou le ata o le faaolataga. O lenei fuafuaga ua aofia ai le Foafoaga, le faamoemoega o le olaga, le tatau ai o mea faafeagai, ma le meaalofa o le faitalia. Sa Ia a’oa’o foi i tatou i poloaiga ma feagaiga ia e tatau ona tatou usitaia atoa ai ma sauniga e tatau ona tatou oo i ai e toe faafoi atu ai i tatou i o tatou Matua faalelagi.
I le Tusi Paia tatou te faitau ai i Ana a’oa’oga, “O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola” (Ioane 8:12). Ma i faaaliga i ona po nei ua tatou faitau i ai, “Faauta, o A’u o Iesu Keriso, … o se malamalama e le mafai ona natia i le pouliuli” (Mataupu Faavae ma Feagaiga 14:9). Afai tatou te mulimuli i Ana a’oa’oga, Na te faamalamalamaina lo tatou ala i lenei olaga ma faamautinoa mai lo tatou taunuuga i le olaga e sosoo ai.
Ona e alofa o Ia ia i tatou, ua Ia lu’iina ai i tatou e taulai atu ia te Ia nai lo mea o le lalolagi faaletino. I Lana lauga maoae e uiga i le areto o le ola, sa a’oa’o mai ai Iesu e le tatau ona tatou i ai faatasi ma i latou o loo sili ona tosina atu i mea o le lalolagi—o mea o loo lagolagoina ai le ola i le lalolagi ae e le o fafagaina ai le ola e faavavau.5 E pei ona valaauliaina pea lava pea i tatou e Iesu, “Mulimuli mai ia te au.”6
IV.
Ma le mea mulimuli, o loo a’oa’o mai le Tusi a Mamona e faapea, i le avea ai ma se vaega o Lana Togiola, sa “mafatia [ai Iesu Keriso] i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata” (Alema 7:11).
Aisea na mafatia ai lo tatou Faaola i nei lu’itau faaletino “o ituaiga eseese uma”? Na faamatala mai e Alema, “Ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, le ala e fesoasoani ai [o lona uiga ia tuu atu le toomaga po o fesoasoaniga] i ona tagata e tusa ma o latou vaivaiga” (Alema 7:12).
Ua lagona ma silafia e lo tatou Faaola o tatou faaosoosoga, o tatou tauiviga, o tatou lototiga, ma o tatou puapuaga, aua na Ia loto e oo i ai i na mea uma e fai ma vaega o Lana Togiola. Ua faamautu mai e isi tusitusiga paia lenei mea. Ua tautino mai le Feagaiga Fou, “Auā na tigaina o ia ina o tofotofoina, o le mea lea ua mafai ai o ia ona fesoasoani i e ua faaosoosoina” (Eperu 2:18). Na a’oa’o mai Isaia, “Aua e te fefe: aua Ou te ia te oe: … Ou te faamalosia oe; e moni, Ou te fesoasoani ia te oe” (Isaia 41:10). O tagata uma e mafatia i soo se ituaiga o vaivaiga faaletino e tatau ona manatua na oo foi lo tatou Faaola i lena ituaiga o tiga, ma e ala i Lana Togiola, ua Ia ofo mai ai ia i tatou taitoatasi le malosi e onosaia ai.
Na aoteleina e le Perofeta o Iosefa Samita nei mea uma i le tatou mataupu faavae o le faatuatua lona tolu: “Matou te talitonu e ala i le Togiola a Keriso, e mafai ai ona faaolaina tagata uma, e ala i le usiusitai i tulafono ma sauniga o le Talalelei.”
“O le a se mea ua faia e Iesu Keriso mo a’u?” sa fesili ai lena tuafafine. I lalo o le fuafuaga a lo tatou Tama Faalelagi, sa Ia “foafoaina le lagi ma le lalolagi” (Mataupu Faavae ma Feagaiga 14:9) ina ia mafai e i tatou taitoatasi ona maua le aafiaga faaletino e tatau ai e saili ai lo tatou taunuuga faalelagi. I le avea ai ma se vaega o le fuafuaga a le Tama, sa faatoilalo ai e le Toetu o Iesu Keriso le oti e faamautinoa mai ai ia i tatou taitoatasi le tino ola pea. O le taulaga togiola a Iesu Keriso ua aumaia ia i tatou le avanoa e salamo ai mai i a tatou agasala ma toefoi atu ai ma le mamā i lo tatou aiga faalelagi. O Ana poloaiga ma feagaiga ua faaali mai ai ia i tatou le ala, ma o Lana perisitua ua aumaia ai le pule e faatino ai sauniga ia e taua e taunuu ai i le taunuuga. Ma na finagalo lava lo tatou Faaola ia oo i tiga uma faaletino ma vaivaiga ina ia Ona silafia ai le auala e faamalosia ai i tatou i o tatou mafatiaga.
Sa faia e Iesu Keriso nei mea uma ona e alofa o Ia i fanau uma a le Atua. O le alofa o le faaosofiaga lea mo ia mea uma, ma sa faapena lava talu mai le amataga. Na ta’u mai e le Atua ia i tatou i faaaliga o ona po nei na “ia foafoaina le … tane ma le fafine, e tusa ma lona lava faatusa … ma sa tuu atu ia te i laua poloaiga e tatau ona laua alolofa ma auauna atu ia te ia” (Mataupu Faavae ma Feagaiga 20:18–19).
Ou te molimau atu i nei mea uma ma tatalo ina ia tatou manatua uma le mea na faia e lo tatou Faaola mo i tatou taitoatasi ma ia tatou alolofa uma ma auauna atu ia te Ia, i le suafa o Iesu Keriso, amene.