KOVITI-19 ma Malumalu
Ia tausia a outou feagaiga ma faamanuiaga o le malumalu ia laualuga i o outou mafaufau ma loto. Tumau faamaoni i feagaiga ua outou osia.
O’u uso e ma tuafafine pele, sa faia moni lava se tatou talisuaga tele. E ma’eu lo’u faafetai mo tatalo, savali, ma musika o le konafesi atoa. Faafetai atu ia te outou taitoatasi mo le auai ma i matou, po o fea lava o outou i ai.
I le amataga o le tausaga ua te’a, ona o le faama’ioti o le KOVITI-19 ma lo tatou naunauta’iga e avea ma ni tagatanuu lelei i le lalolagi, sa tatou faia ai le faaiuga faigata ia tapuni lē tumau malumalu uma. I masina na sosoo ai, sa matou lagona le musuiaina e toe tatala faasolosolo malumalu e ala i se faiga faaeteete tele. Ua toe tatalaina nei malumalu i vaega e fa, i le usita’ia a’ia’i lea o tulafono faalemalo i le lotoifale faapea ma aiaiga o le saogalemu.
Mo malumalu i le vaega 1, o ulugalii agavaa na muai mauaina o la’ua lava faaeega paia e mafai ona faamauina o le tane ma le avā.
Mo malumalu i le vaega 2, o sauniga uma mo ē o soifua ua faatinoina, e aofia ai le faaeega paia o le tagata, le faamauina o le tane ma le avā, ma le faamauina o fanau i matua. Na matou suia talu ai nei aiaiga o le vaega 2 ma ua faatagaina a tatou talavou, tagata fou o le Ekalesia, ma isi o loo i ai se pepa faataga e tapulaa le faaaogaina e auai ai i papatisoga sui mo o latou tuaa.
Mo malumalu i le vaega 3, o latou o loo i ai ni taimi faatulagaina e mafai ona auai e le gata i sauniga mo ē o soifua ae faapena foi i sauniga sui uma mo tuaa ua maliliu.
O le vaega 4 o le toefoi atu lea i le faagaoioiga masani atoa o le malumalu.
Matou te faafetai atu mo lo outou onosai ma auaunaga tuuto i lenei vaitau o fesuisuia’i ma lu’itauina. Ou te tatalo ia mumū atili lo outou naunau e tapuai ma auauna i totonu o malumalu i lo se isi lava taimi.
Atonu o loo outou tuufesili po o afea o le a mafai ai ona outou toe foi atu i le malumalu. Tali: O le a toe tatala le tou malumalu pe a faatagaina ai e tulafono faalemalo i le lotoifale. Pe a taulimaina le faalavelave o le KOVITI-19 i le tou eria i totonu o tapulaa saogalemu, o le a toe tatalaina tou malumalu. Ia faia mea uma tou te mafaia e aumai ai i lalo ia fuainumera o le KOVITI i la outou eria ina ia mafai ai ona faateleina avanoa mo malumalu.
Ae o le taimi nei, ia tausia a outou feagaiga ma faamanuiaga o le malumalu ia laualuga i o outou mafaufau ma loto. Tumau faamaoni i feagaiga ua outou osia.
O loo tatou atia’e nei mo le lumanai! E fasefulu-tasi malumalu o loo fausiaina pe o faafouina i le taimi nei. I le tausaga ua te’a, e ui i le faama’ioti, ae sa suatiaina le eleele mo malumalu fou e 21!
Matou te mananao ia aumai le maota o le Alii ia matua latalatala atu i o tatou tagata, ina ia latou maua le avanoa paia e auai ai i le malumalu i le tele e mafai ona faatagaina ai e o latou tulaga.
A o o’u faasilasilaina atu a matou fuafuaga e fausia nisi malumalu e 20, ou te mafaufau loloto ma faamamaluina ia paionia—o e ua tuanai ma i le taimi nei—o e na fesoasoani o latou olaga faapaiaina i le faia o lenei talafaasolopito i le asō. O le a fausia se malumalu fou i nofoaga taitasi nei: Oslo, Nouei; Brussels, Peleseuma; Viena, Austria; Kumasi, Kana; Beira, Mozambique; Cape Town, Aferika i Saute; Sigapoa, Ripapelika o Sigapoa; Belo Horizonte, Pasila; Cali, Kolomupia; Querétaro, Mekisiko; Torreón, Mekisiko; Helena, Montana; Casper, Wyoming; Grand Junction, Colorado; Farmington, Niu Mekisiko; Burley, Idaho; Eugene, Oregon; Elko, Nevada; Yorba Linda, Kalefonia; ma Smithfield, Iuta.
O malumalu o ni vaega taua o le Toefuataiga o le talalelei a Iesu Keriso i lona atoaga. O sauniga o le malumalu e faatumuina ai o tatou olaga i le mana ma le malosi—e lē maua i se isi lava ala. Tatou te faafetai i le Atua mo na faamanuiaga.
A o tatou tapunia ai lenei konafesi, matou te toe faailoa atu lo matou alolofa mo outou. Matou te tatalo ia liligi mai e le Atua Ana faamanuiaga ma le leoleoga i luga o outou taitoatasi. O loo tatou auai faatasi i Lana galuega paia. Faatasi ma le lototele, ia tatou fetaomi atu uma i le galuega mamalu a le Alii! Ou te tatalo ai i nei mea, i le suafa paia o Iesu Keriso, amene.