O Mea o Loo Tatou A’oa’oina ma O Le A Lē Galo Lava
Afai e te tagai i lou olaga ma le agaga tatalo, ou te talitonu o le a e vaaia le tele o auala o loo taialaina ai oe e le Alii i lenei taimi o faigata.
O’u uso pele, ua leva ona ou tulimatai mai i lenei faatasiga faatekinolosi ma outou. O le taimi mulimuli sa tatou faia ai se sauniga faaleperisitua o le konafesi aoao o Aperila 2019. E tele mea ua tutupu i le 2 tausaga ua alu. O nisi o outou ua maliliu ni ē pele. O isi ua leai ni galuega, leai ni mea e tausi ai aiga, po o le soifua maloloina. O isi e le o maua lava se lagona o le filemu po o se faamoemoe mo le lumanai. E momomo lo’u loto ia te outou taitoatasi ua mafatia i nei mea po o isi mea ua faaletonu. Ou te tatalo pea ia faamafanafanaina outou e le Alii. A faaauau pea ona outou faamuamua le Atua i o outou olaga, ou te iloa o loo faamoemoe o Ia o le a lelei lou lumanai e pei ona Ia faamoemoe ai lava.
I le lotolotoi o mea ua leiloloa [ma mafatiaga] ua tatou oo i ai, o loo i ai foi nisi mea ua tatou mauaina. O nisi ua mauaina se faatuatua loloto atu i lo tatou Tama Faalelagi ma Lona Alo, o Iesu Keriso. E toatele ua mauaina se vaaiga fou o le olaga—e oo lava i se vaaiga e faavavau. Atonu ua outou mauaina ni sootaga malolosi atu ma ē pele ia te outou faapea ma le Alii. Ou te faamoemoe ua outou mauaina se tomai faateleina e faalogo ai ia te Ia ma maua ni faaaliga faaletagata lava ia. O tofotofoga faigata e tele lava ina maua ai ni avanoa e tuputupu a’e ai ia semanu e le oo mai i se isi lava auala.
Mafaufau i tua i tausaga e lua ua alu. Na faapefea ona e tuputupu a’e? O a ni mea na e aoaoina? Atonu e te ono moomoo muamua lava pe ana mafai ona e toefoi i tua i le 2019 ma tumau ai iina! Afai e te tagai i lou olaga ma le agaga tatalo, ou te talitonu o le a e vaaia le tele o auala o loo taialaina ai oe e le Alii i lenei taimi o faigata, o loo fesoasoani ia te oe ia e avea ma se alii tuuto atili, ma liua atili—o se alii moni o le Atua.
Ou te iloa o loo i ai i le Alii ni fuafuaga maoae ma ofoofogia mo i tatou—taitoatasi ma taitoatele. Faatasi ma le agaalofa ma le onosai, na Ia fetalai ai:
“O outou o ni fanau iti, ma tou te le’i malamalama lava i le tetele o faamanuiaga o i ai i le Tamā … ua saunia mo outou;
“Ma e lē mafai ona outou gafatia mea uma i le taimi nei; e ui i lea, ia fiafia, ona o le a Ou taitaia outou i le ala.”1
O’u uso e, ou te molimau atu na Ia, ma o loo, Ia taitaiina moni pea i tatou, a o tatou saili atu e faalogo ia te Ia. E finagalo o Ia ia tatou tuputupu a’e ma ia a’oa’o, e ala atu—masalo aemaise e ala atu i—faigata.
O faigata o se faiaoga sili. O a ni mea ua outou aoaoina i tausaga e lua ua tuanai e te manao lava ia manatua pea? O au tali o le a tulagaese ia te oe, ae se’i o’u fautua atu ni lesona se fa ou te faamoemoe ua tatou a’oa’oina uma ma o le a lē galo lava.
Lesona 1: O Le Aiga o le Nofoaga Autu o le Faatuatua ma Tapuaiga
O le tele o taimi pe a lapataia i tatou e le Alii e uiga i lamatiaga o aso e gata ai, na Ia fautua mai: “Ia outou tutu ai i nofoaga paia, ma aua le masiʼi ese.”2 O nei “nofoaga paia” e mautinoa lava e aofia ai malumalu o le Alii ma falelotu. Ae o lo tatou tomai e potopoto ai i nei nofoaga ua faatapulaaina i tikeri eseese, ua tatou a’oa’oina o le tasi o nofoaga sili ona paia i le lalolagi o le aiga—ioe, e oo lava i lou aiga.
Uso e, o loo e tau’aveina le perisitua a le Atua. “O aiā a le perisitua ua fesootai e lē mavavaeeseina ma mana o le lagi.”3 Ua outou mauaina ma o outou aiga sauniga o le perisitua. O “sauniga [o le perisitua ua] faaalia ai le mana o le faale-atua.”4 Ua avanoa le mana ia te oe ma lou aiga i totonu o lou fale pe a e tausia feagaiga ua e osia.5
I le na o le 185 tausaga ua mavae, i lenei lava aso, 3 o Aperila 1836, na toefuataiina ai e Elia ki o le perisitua lea e mafai ai ona faamauina faatasi o tatou aiga e faavavau. O le mafuaaga lena na lagonaina ai le matuai lelei o le faatautaia ai o le faamanatuga i totonu o lou aiga. O le a sou manatu i le ala na aafia ai tagata o lou aiga i le vaai atu ia te oe—lo latou tamā, tamā matua, toalua, atalii, po o le uso—o faatautaia lenei sauniga paia? O le a se mea e te faia e faatumauina ai lena lagona paia i totonu o lou aiga?
Atonu e te lagonaina o loo tele pea nisi mea e manaomia ona e faia e avea moni ai lou aiga ma se malutaga o le faatuatua? Afai o lea, faamolemole ia faia! Afai ua e faaipoipo, fefautuaai faatasi ma lau avā o lau paaga tutusa i lenei galuega taua. O loo i ai nisi sailiga e sili atu ona taua nai lo lenei. I le va o le taimi nei ma le taimi o le a toe afio mai ai le Alii, tatou te manaomia uma o tatou aiga ina ia avea ma ni nofoaga o le filemu ma le puipuiga.6
O uiga ma amioga e valaauliaina le Agaga o le a faateleina ai le paia o lou aiga. O le mea moni ma le mautinoa e faapena foi, o le a mouese le paia pe afai o loo i ai se mea i au amioga po o le siosiomaga e faatiga i le Agaga Paia, aua i lena mea “e aveese e le lagi i latou lava.”7
Pe ua e tomanatu ea pe aisea ua finagalo ai le Alii ia i tatou ia faia o tatou aiga ma nofoaga autu o le aoaoina o le talalelei ma le ola i le talalelei? E le na o le saunia ai o i tatou mo [se faama’ioti], ae fesoasoani ia i tatou ia sao mai se, faama’ioti. O tapu o loo i ai nei i faatasiga o le a i’u lava ina faamutaina. Peitai, o lou tuuto ia faia lou aiga ma ou malutaga autu o le faatuatua e lē tatau lava ona muta. A o faaitiitia ai le faatuatua ma le paia i lenei lalolagi pa’ū, o le a faateleina lou manao mo nofoaga paia. Ou te augani atu ia te outou ia faaauau pea ona faia o outou aiga o se nofoaga paia moni “ma ia lē masii ese”8 mai lena sini taua.
Lesona 2: Tatou te Manaomiaina le Tasi ma le Isi
E finagalo le Atua ia tatou galulue faatasi ma fesoasoani le tasi i le isi. O le mafuaaga lena ua Ia auina mai ai i tatou i le lalolagi i ni aiga ma faatulaga i tatou i totonu o uarota ma siteki. O le mafuaaga lena ua Ia talosagaina ai i tatou ia tautua ma auauna atu le tasi i le isi. O le mafuaaga lena ua Ia talosagaina ai i tatou ia ola i totonu o le lalolagi ae le o ni ō o le lalolagi.9 E mafai ona tatou ausia faatasi ni mea se tele na’ua nai lo mea tatou te mafaia na o i tatou.10 Semanu e lē aoga le fuafuaga o le fiafia a le Atua pe ana fai e tumau le fai’esea o Ana fanau mai le tasi ma le isi.
O le faama’ioti o i ai nei ua tulagaese ma ua aafia ai tagata uma i le lalolagi i le taimi taua lava e tasi. E ui ua mafatia tele atu nisi i lo isi, ae ua lu’itauina i tatou uma i ni auala. Ona o lenei mea, ua i ai i lo tatou tofotofoga e tasi le gafatia e fesoasoani ai e tuufaatasia fanau a le Atua i lo se isi lava taimi muamua. O lea, ou te fesili atu, pe ua e latalata atili ai ea i ou tuaoi ona o lenei tofotofoga e tasi—i ou uso ma tuafafine i le tou nuu ma le lalolagi atoa?
I lenei tulaga, e mafai e poloaiga sili e lua ona taialaina i tatou: muamua, ia alofa i le Atua ma, lona lua, ia alofa i ou tuaoi.11 Tatou te faaali atu lo tatou alolofa e ala i le auauna atu.
Afai e te iloaina soo se tasi ua tuuatoatasi, aapa atu i ai—e tusa lava pe o e lagonaina foi le tuuatoatasi! E lē manaomia ona ia oe se mafuaaga po o se savali po o se pisinisi e faatino. Tau lava o le faatalofa atu ma faaali atu le alofa. E mafai ona fesoasoani atu tekinolosi ia te oe. Faama’ioti pe leai, e manaomia e atalii ma afafine taitasi faapelepele o le Atua ona iloa e le o tuua na o ia!
Lesona 3: O Lau Korama o le Perisitua E Sili Atu Nai Lo o se Fonotaga
I le taimi o le faama’ioti, sa faalēaogaina ai sauniga a korama i Aso Sa mo se taimi. O nisi korama ua mafai nei ona feiloai faatekinolosi. Ae ui i lea, o le galuega ua tuuina mai e le Alii i korama a le perisitua sa le’i faamoemoe e na o se fonotaga e tupu ai. O fonotaga ua na o se vaega itiiti o mea ua faatatau i ai se korama ma mea e mafai ona latou faia.
O’u uso e o le Perisitua Arona ma korama a toeaina, faalautele lau vaaiga mamao o le mafuaaga ua i ai a tatou korama. E faapefea ona finagalo le Alii i auala e te faaaoga ai lau korama e faataunuu ai Lana galuega—i le taimi nei? Saili i faaaliga mai le Alii. Faalotomaualalo oe lava ia! Fesili atu! Faalogo! Afai ua valaauina oe e taitai, ia fefautuaai o se au peresitene ma faatasi ai ma uso o le korama. Po o le a lava lou tofi po o le valaauga o le perisitua, ia faamuamua le Atua i lau ta’utinoga o se uso o lau korama ma i lau auaunaga. Ia lagona faatasi ma le olioli le amiotonu o le a e aumaia a o e “auai ma le naunautai i se famoemoega lelei.”12 O loo i ai korama i se tofiga tulagaese e faatelevave le faapotopotoina o Isaraelu i itu uma e lua o le veli.
Lesona 4: Tatou te Lagona Lelei Atili Iesu Keriso Pe a Tatou Filemu
O loo tatou ola i se taimi ua loa ona valo’ia mai, le taimi “o le a vāvāō mea uma; ma e moni lava, o le a pepē fatu o tagata; ona o le a oo mai le mataʼu i luga o tagata uma.”13 Sa moni lena mea a o le’i oo mai le faama’ioti, ma o le a sili ona moni pe a uma. O le vāvāō i le lalolagi o le a faaauau pea ona faateleina. I se faatusatusaga, o le siufofoga o le Alii e le “o se leo o se vāvāō tele, ae … o se siufofoga filemu o le fimalie atoatoa, [e pei] o se musumusu, ma [ua] ati e oo atu i totonu lava o le agaga.”14 Ina ia lagonaina lenei siufofoga filemu, e tatau foi ona e filemu!15
Mo se taimi, ua faalēaogaina ai e le faama’ioti gaoioiga sa masani lava ona faatumulia ai o tatou olaga. O le a lē pine ae mafai foi ona tatou filifili e toe faatumu foi lena taimi i le pisapisaō ma le vāvāō o le lalolagi. Pe mafai foi ona tatou faaaogaina lo tatou taimi e faalogo ai i le siufofoga o le Alii o loo musumusu maia Lana taitaiga, faamafanafanaga, ma le filemu. O taimi filemu o taimi paia ia—taimi o le a faafaigofie ai faaaliga faaletagata lava ia ma faatumauina ai le filemu.
Ia e faautauta oe lava ia ia faia se taimi na o oe ma [se taimi e] faatasi ai ma ē pele ia te oe. Tatala atu lou loto i le Atua i le tatalo. Faaalu se taimi e faatofu ai oe lava i tusitusiga paia ma tapuai atu i totonu o le malumalu.
O’u uso e pele, e anoanoai ni mea ua finagalo le Alii ia tatou a’oa’oina mai i o tatou aafiaga i lenei faama’ioti. Ua ou lisi atua na o le fa. Ou te valaaulia outou ia fai ni a outou lava lisi, mafaufau ma le toto’a i ai, ma faasoa atu ia i latou e te alofa i ai.
E manuia le lumanai mo tagata tausi-feagaiga a le Atua.”16 O le a faateleina pea ona valaau mai le Alii i Ana auauna o loo umia ma le agavaa le perisitua ina ia faamanuia, faamafanafana, ma faamalosia ia tagata ma ia fesoasoani e saunia le lalolagi ma ona tagata mo Lona Afio Mai Faalua. E faamanuiaina i tatou taitoatasi pe a ausia tulaga faatonuina o faauuga paia ua tatou mauaina. E mafai ona tatou faia lenei mea! Ou te molimau atu ai, faatasi ma le faailoaga o lo’u alofa mo outou taitoatasi, o’u uso pele, i le suafa paia o Iesu Keriso, amene.