Talatalanoaga E Tatau Ai

Saunia e Joy D. Jones

Peresitene Aoao o le Peraimeri Ua Faatoa Faamalolo Talu Ai Nei

E le mafai ona tatou faatalitali mo le liuga ia na ona tupu i a tatou fanau. O le liua faafuasei e lē o se mataupu faavae o le talalelei a Iesu Keriso.

Pe ua e mafaufau ea pe aisea ua tatou faaigoa ai le Peraimeri o le “Peraimeri”? E ui ina faasino ia le igoa i aoaoga faaleagaga o loo mauaina e tamaiti i o latou uluai tausaga, ae ia te a’u lava ia o se faamanatu foi lea o se upumoni mamana. I lo tatou Tama Faalelagi, o tamaiti e le’i lona lua lava—o i latou o taimi uma e “muamua.”¹

Ua Ia faatuatuaina i tatou e faataua, faaaloalogia, ma puipuia i latou o fanau a le Atua. O lona uiga tatou te le faaleagaina lava i latou faaletino, i upu, pe faalelagona i soo se itu, tusa lava pe oso maualuga le popole ma le lē fiafia. Nai lo lena, tatou te faatauaina tamaiti, ma faia mea uma tatou te mafaia e tetee atu ai i le leaga o le sauaina. E muamua ia i tatou lo latou tausiga—e faapei foi ia te Ia.²

Sa saofafai se tina ma se tama talavou i le laulau i le umukuka e iloilo lo la aso. Sa la faalogoina i le alasavali se patatū o se mea. Sa fesili le tina, “O le a lena mea?”

Ona la faalogoina lea o se tagi lemu mai le potumoe o le la atalii e 4-tausaga. Sa la faanatinati atu i le alasavali. O la e taatia mai o ia iina, i luga o le fola i autafa o lona moega. Na sii i luga e le tina le tamaitiiti ma fesili atu ia te ia po o le a le mea na tupu.

Sa ia fai mai “Na ou pa’ū mai le moega.”

Sa fesili le tina, “Aisea na e pa’ū ai mai le moega?”

Na faamimigi o ia ma fai mai, “Ou te lē iloa. Masalo ou te le’i sōsō tele i totonu.

O le “sōsō tele i totonu” lea ou te fia talanoa atu ai i lenei taeao. O lo tatou avanoa ma le tiutetauave le fesoasoani i tamaiti e “sōsō tele i totonu” i le talalelei a Iesu Keriso. Ma e le mafai ona faapea ua vave tele ona amata.

O loo i ai se taimi faapitoa tulaga ese i olaga o tamaiti pe a puipuia i latou mai tosinaga a Satani. O se taimi o la e mamā o latou loto ma e lē agasala.³ O se taimi paia mo le matua ma le tamaitiiti. E tatau ona aoao ia tamaiti, e ala i le upu ma faataitaiga, a o lei “taunuu [ma pe a taunuu foi] i tausaga e tali atu ai i luma o le Atua.”⁴

Na aoao mai e Peresitene Henry B. Eyring: “Ua ia i tatou se avanoa silisili faatasi ma le au laiti. O le taimi sili lea e aoao atu ai o le amataga, a’o le’i gauai atu fanau i faaosoosoga a [le] fili o le olaga nei, ma a’o le’i taitai foi ona faafaigata ia i latou ona faalogo i upu moni ona o le faalavelave i ai o ō latou faafitauli faaletagata.”⁵ O na aoaoga o le a fesoasoani latou te iloa ai lo latou faasinomaga paia, lo latou faamoemoega, ma le mau faamanuiaga o loo faatalitali mai mo i latou pe a latou osia feagaiga paia ma mauaina sauniga i luga o le ala o feagaiga.

E le mafai ona tatou faatalitali mo le liuga ia na ona tupu i a tatou fanau. O le liua faafuasei e lē o se mataupu faavae o le talalelei a Iesu Keriso. O le avea ai e faapei o lo tatou Faaola o le a le tupu fua mai. O le i ai o le loto faamaoni i le alofa, aoao atu, ma le molimau atu e mafai ona fesoasoani i tamaiti e amata ai a o laiti, ia lagonaina le tosinaga a le Agaga Paia. O le Agaga Paia e tatau ai i molimau a ā tatou fanau ma le liua ia Iesu Keriso; tatou te mananao ia i latou ia “manatua pea o ia, ina ia latou maua lona Agaga e faatasi ma i latou.”⁶

Mafaufau i le taua o talatalanoaga faaleaiga e uiga i le talalelei a Iesu Keriso, talatalanoaga e tatau ai ia e mafai ona valaaulia ai le Agaga. Pe a i ai ni a tatou talatalanoaga faapena ma a tatou fanau, ua tatou fesoasoani ia i latou e fatufatu se faavae, “o le faavae mautinoa lea, o se faavae lea afai e atiae ai tagata e le mafai lava ona pa’ū i latou.”⁷ Pe a tatou faamalosia se tamaitiiti, ua tatou faamalosia le aiga.

O nei talanoaga taua e mafai ona taitai atu ai tamaiti e:

Malamalama i le aoaoga faavae o le salamo.
Faatuatua ia Keriso, le Alo o le Atua soifua.
Filifili le papatisoga ma le meaalofa o le Agaga Paia pe a valu tausaga le matutua.⁸
Ma tatalo ma “savavali ma le amiotonu i luma o le Alii.”⁹

Ua fetalai mai le Faaola, “O lea Ou te tuu atu ia te oe se poloaiga, ia aoao saoloto atu ia mea i lau fanau.”¹⁰ A o a mea na finagalo o Ia tatou te aoao saoloto atu?

O Le Pa’ū o Atamu
O Le Togiola a Iesu Keriso
O le taua o le toe fanauina¹¹

Na saunoa Elder D. Todd Christofferson, “E moni lava e fiafia tele le fili pe a le aoaoina e matua ma faamasani a latou fanau ia faatuatua ia Keriso ma ia toefanauina faaleagaga.”¹²

I se tulaga e ese ai, e finagalo le Faaola tatou te fesoasoani i fanau “e tuu [lo latou] faalagolago i le Agaga lena lea na te taitai ia fai mea lelei.”¹³ Ina ia faia lena mea, e mafai ona tatou fesoasoani i tamaiti ia iloa le taimi latou te lagonaina ai le Agaga ma ia iloatino pe o a taga e fai e aluese ai Satani. O lea ua latou aoao ai e salamo ma toe foi mai i le malamalama e ala i le Togiola a Iesu Keriso. E fesoasoani lea e faamalosiauina ai le gafatia e fetuunai ma toe malosi ai faaleagaga.

E mafai ona tatou fiafia a o fesoasoani ia tatou fanau e fausia le malosi faaleagaga e fetuunai ai i soo se vaitausaga. E le tau tuli ia faigata pe tele naua se taimi e alu ai. O talatalanoaga faigofie, ma le manatu alofa e mafai ona taitai atu ai tamaiti ia iloa e le gata i le po o a mea latou te talitonu i ai, ae o le mea e sili ona taua o le, pe aisea ua latou talitonu ai. O talatalanoaga ma le manatu alofa, e tupu faalenatura ma faifai pea, e mafai ona tau atu i se malamalama sili atu ma tali. ‘Aua tatou te faatagaina le faigofie o masini eletonika e taofia ai i tatou mai le aoao atu ma le faalogo atu i ā tatou fanau ma tilotilo atu i o latou mata.

Talatalanoaga a le tina-ma-lana tama teine

O avanoa faaopoopo mo talatalanoaga e tatau ai, e mafai ona tupu e ala i le faatino i taga. E mafai e tagata o le aiga ona faatinoina ni tulaga o le faaosoosoina po o le uunaia e fai se filifiliga leaga. O na ituaiga o faatinoga e mafai ona faamalolosia ai le fanau ia saunia i se tulaga faigata. Mo se faataitaiga, e mafai ona tatou faatinoina ona talanoa lea a o tatou fesili i tamaiti pe o le a se mea o le a latou fai.

Pe afai o le a faaosoosoina i latou e soli le Upu o le Poto.
Pe afai e faaali atu ia i latou ni ata mataga.
Pe afai ua faaosoosoina i latou e gaoi, pe kopi.
Pe afai latou te faalogo i se mea mai se uo po o se faiaoga i le aoga e tete’e i o latou talitonuga po o tulaga faatauaina.

A o latou faatinoina ona talanoa lea i ai, nai lo le maua e le o sauni i se faatulagaga o taaga a tama ma teine faataute’e, e mafai ona faaauupegaina le fanau i “le talita o le faatuatua lea o le a mafai ai ona [latou] tineia o ufanafana mu uma a lē ua amioleaga.”¹⁴

Sa vave ona aoaoina e se uo mamae patino lenei lesona taua a o 18 tausaga le matua. Sa lesitala o ia i le militeli a le Iunaite Setete i le taimi o le taua i le va o le Iunaite Setete ma Viatename. Na tofi o ia i le aoaoga faamasani faavae i le iunite o fitafita e savavali ma tau ina ia avea o ia ma fitafita e tau savali. Sa ia faamatalaina o le aoaoga faamasani sa matuai faigata lava. Sa ia faamatalaina o lona faiaoga e saua ma tufanua.

I se tasi aso faapitoa sa fai uma toniga ma auupega o le taua a lana vaegaau, ma sopo i le aasa o le la. Sa faafuasei ona ‘alaga le faiaoga autu i faatonuga e faapalalasi i lalo ma ia le toe gaioi. Sa mataitu e le faiaoga sina migoi itiiti lava. Soo sina gaoioi lava o le a i ai ni taunuuga matuia mulimuli ane. Sa mafatia le vaegaau mo le silia ma le lua itula i le vevela faatasi ma le ita ma le faalilii ua matuā faateleina i lo latou taitai.

E tele ni masina mulimuli ane, sa iloa ane e le matou uo ua taitai e ia lana vaegaau i vaomatua o Viatename. O le mea moni lenei, ua le na o se aoaoga faamasani. Sa amata ona papa uafana mai luga o laau na i ai. Sa vave ona faapa’ū’ū i le eleele le vaegaau atoa.

O le a le mea na sailia e le fili? Se gaioi. Soo sina gasē o le a papa ai fana. Na faamatala mai e la’u uo e faapea, a o ia taoto ma afulelea e aunoa ma sina gasē i le fola o le vaomatua, ma faatalitali mo le po mo le tele o itula uumi, sa ia toe tomanatu i ana aoaoga faamasani faavae. Sa ia manatua lona matuā lē fiafia i lona faiaoga autu. O le taimi nei, na ia lagonaina le ogaoga o le lotofaafetai—mo mea sa ia aoaoina ai o ia ma le ala sa saunia ai o ia mo lenei tulaga taua. Sa faaauupegaina ma le poto e le faiaoga autu le matou uo ma lana vaegaau i le tomai e iloa ai le mea e fai pe a matamataita le taua. O le mea moni, sa ia faasaoina le ola o la matou uo.

E mafai faapefea ona tatou faia foi lenei mea mo a tatou fanau i la le agaga? A o lei taitai ona latou ulufale atu i le malae o le taua, e mafai faapefea ona tatou taumafai malosi ma le atoatoa e aoao atu, faamalolosia ma saunia i latou?¹⁵ E mafai faapefea ona tatou valaaulia i latou ia “sōsō tele i totonu?” Pe le sili ea ia i tatou lo latou “afu” i le siosiomaga saogalemu e aoao ai o le aiga nai lo le lavatoto i luga o le malae o le taua o le olaga?

Pe a ou toe tepa i tua, sa i ai taimi sa ma lagonaina ai ma lo’u toalua ia faiaoga autu i lo ma naunautai faamaoni e fesoasoani i le ma fanau ia ola i le talalelei a Iesu Keriso. E foliga mai o faaleo mai e le perofeta o Iakopo nei lava lagona ina ua ia fai mai: “Ua ou naunau mo le manuia o o outou agaga. Ioe, ua tele lava loʼu popole mo outou; ma ua outou iloa ua ou faapea lava i taimi uma.”¹⁶

A o aoao e tamaiti ma agaigai i luma, o le a luitauina o latou talitonuga. Ae a lelei ona faaauupegaina, e mafai ona latou tuputupu ae i le faatuatua, lototoa, ma le mautinoa, e oo lava i le lotolotoi o tetee malolosi.

Na aoao mai i tatou e Alema ia “saunia mafaufau o [le] fanau.”¹⁷ O loo tatou tapenaina le tupulaga faia’e ia avea ma leoleo o le faatuatua i le lumanai, ia malamalama “ua [latou] saoloto e fai mo i [latou] lava—e filifili le ala o le oti tumau-faavavau, po o le ala o le ola e faavavau.”¹⁸ E tatau mo tamaiti le malamalama i lenei upumoni sili: o le faavavau o le mea sese lea e sese i ai.

Ia avea a tatou talatalanoaga e tatau ai ae faigofie ma a tatou fanau ma mea e fesoasoani ai ia i latou ia “olioli i afioga o le ola faavavau” i le lalolagi lenei, ma le “ola faavavau i le lalolagi a sau, o le mamalu ola pea lava.”¹⁹

A o tatou faafailele ma tapena tatou fanau, tatou te faataga i latou e faaaoga lo latou faitalia, tatou te alolofa ia i latou ma o tatou loto atoa, tatou te aoao i latou i poloaiga a le Atua ma Lana meaalofa o le salamo, ma tatou te lē taitai lava, fiu ia latou. Ae, pe le o le ala ea lea a le Alii mo i tatou taitoatasi?

Ina tatou fetaomi atu ia i luma ma le tumau ia Keriso, ma le iloa e mafai ona tatou maua “se susulu atoatoa o le faamoemoe”²⁰ e ala i lo tatou Faaola alofa.

Ou te molimau atu o Ia o le tali lea. I le suafa paia o Iesu Keriso, amene.