E Lē Avatu faapei ona Avatu e le Lalolagi
O meafaigaluega tatou te moomia e fatu ai se aso sili ona susulu ma toto ai se tamaoaiga o le agalelei faamaoni i faapotopotoga e tele ina saunia ma maua mai i le talalelei a Iesu Keriso.
I le lumanai ai o lena uluai Eseta a o faai’uina e Iesu le sauniga fou o le faamanatuga lea na Ia faatautaia i le Toasefululua, sa Ia amataina Lana lauga faatofa ma le mamalu ma agai atu i Ketesemane, faalataina, ma le faasatauroga. Peitai, i le lagonaina o le popolega ma e masalo o se fefefe atoa o nisi o na alii atonu sa faaalia, sa Ia fetalai atu ai i lenei mea ia i latou (ma i tatou foi):
“Aua le atuatuvale o outou loto, ia outou faatuatua i le Atua, ia faatuatua mai foi ia te a’u. …
“‘Ou te le tuua outou o matuaoti: ou te sau ia te outou. …
“Ou te tuuina atu ia te outou le [filemu], o lo’u [filemu] ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”1
E oo mai taimi faigata i lenei lalolagi faaletino, e aofia ai i ē faatuatua, ae o le savali faamautinoa a Keriso e faapea e ui lava, O Ia, le tamai mamoe o le paseka, o le a alu atu e pei o “se mamoe i luma o [ē] sele lona fulufulu,”2 ae o le a toetu mai o Ia, e pei ona fai mai le fai salamo, e avea ma o “tatou malu … ma lo tatou malosi, [o lo tatou] fesoasoani silisili [i taimi nei o] puapuaga.”3
O le iloa ai o itula faigata o loo lupe mo Keriso a o Ia agai atu i le satauro ma mo Ona soo pe a o latou aveina atu Lana talalelei i le lalolagi i le taulotoaiga o taimi, tatou o faatasi ma a’u i le taimi nei i se savali e fesootai, mo tagata o le Ekalesia a le Faaola i aso e gata ai. O lenei savali o loo taoto lea i le anoano o fuaiupu i le Tusi a Mamona e faasino i ituaiga eseese o feteenaiga, mai amioga faasoesa lē muta a Lamana ma Lemuelu e tau atu i taua faai’u na aafia ai le faitau selau afe o fitafita. O se tasi o mafuaaga manino mo lenei faamamafa e faapea, e ui na tusia le Tusi a Mamona mo se aofia o aso e gata ai, ae o nei tusitala (o e na aafia tele i latou lava i taua) na lapata’ia faavalo’aga i tatou e faapea o taua ma feteena’iga o le a avea ma se uiga lauiloa o sootaga po o mafutaga i aso amuli.
Ioe, o lo’u manatu e uiga i finauga i aso e gata ai e le o se mea fou. I le 2,000 tausaga talu ai, sa lapatai mai ai le Faaola e faapea i aso e gata ai o le a i ai “taua, ma tala o taua,”4 mulimuli ane na Ia fetalai e faapea “o le a aveesea ai le filemu mai le lalolagi.”5 E moni lava o lenei Alii o le Filemu, na a’oa’o mai ma le mamafa e faapea o finauga e mai le tiapolo,6 e tatau ona fetagisi faatasi ma Lona Tama Paia mo i latou i le aiga o tagata o e ua “aunoa ma le alofa,” o loo fai mai ai tusitusiga paia, ma ua le mafai ona iloa pe faapefea ona nonofo faatasi i le alofa.7
Uso e ma tuafafine, ua tele naua feteenaiga ua tatou vaaia, fefinauai, ma le lē mafaufau o loo vagaia ai i tatou. O le mea e lelei ai, e le o i ai i lenei tupulaga se Taua Lona Tolu a le Lalolagi e tau ai, pe o tatou oo foi i se faaletonu faaletamaoaiga i le lalolagi e pei o le 1929 lea na oo atu ai i se Pa’ū Tele o le Tamaoaiga. Ae o loo tatou feagai ma se ituaiga o Taua Lona Tolu a le Lalolagi, e lē o se taua e olopala ai o tatou fili, ae o se faamalosiga faafitafita o fanau a le Atua ina ia agaalofa atili e uiga i le tasi ma le isi, ma ia fesoasoani e faamalolo manu’a tatou te maua i se lalolagi ua matuai fe’aina’i naua. O le Pa’ū Tele o le lalolagi ua tatou feagai nei e itiiti lava se faiā ma se toilalo va’aia o a tatou tupe teu, ae tele atu le faiā ia le galoma atu o le talitonuina o oe lava i totonu, ma le gau moni o le faatuatua, faamoemoe, ma le alofa moni i lo tatou siomaga atoa. Peitai o meafaigaluega tatou te moomia e fatu ai se aso sili ona susulu ma toto ai se tamaoaiga o le agalelei faamaoni i faapotopotoga e tele ina saunia ma maua mai i le talalelei a Iesu Keriso. E le mafai ona tatou gafatiaina—e le mafai foi e le lalolagi lenei ona gafatiaina—lo tatou toilalo e faaaoga nei manatu faavae o le talalelei ma faamalolosia feagaiga ia aoga atoatoa faaletagata lava ia ma le lautele.
O lea la, i se lalolagi “ua felafoai i afa, ma ua le faamafanafanaina,” e pei ona fetalai mai ai Ieova o le a faapena ona fai, e faapefea ona tatou maua le mea na Ia ta’ua “o le feagaiga o le … filemu”? Tatou te maua i lo tatou liliu atu ia te Ia o lē na fetalai mai o le a Ia faia, i aso e gata ai, “faatasi ma le agalelei tumau-faavavau” ma o le a aumaia le filemu ia tatou fanau.8 O lea la, e ui i valo’aga taufaamata’u ma mau faapopoleina o loo ta’utino mai ai o le a aveesea le filemu mai le lalolagi lautele, ae sa a’oa’o mai e perofeta, e aofia ai ma lo tatou lava pele o Russell M. Nelson e lē faapea e ao ina aveese mai ia i tatou ta’ito’atasi!9 O lenei Eseta ia tatou taumafai e atia’e le filemu i se ala patino, e faaaoga ai le alofa tunoa ma le pulupāsama faamalolo o le Togiola a le Alii o Iesu Keriso ia i tatou lava ma i latou o loo siomia ai i tatou ma o tatou aiga. O le mea e lelei ai, o se mea foi e ofo ai, tatou te maua lenei suauu faamalolo “e aunoa ma se tupe po o se totogi.”10
O lea ituaiga o fesoasoani ma le faamoemoe e matua’i moomia ona o lenei faapotopotoga i le lalolagi atoa i le asō o loo i ai le toatele o loo tauivi ma le mau lu’itau—faaletino pe faalelagona, faaleagafesootai pe faaletupe, po o le tele o isi ituaiga o faalavelave. Ae o le tele o nei mea e lē lava lo tatou malosi e taulimaina ai e i tatou lava, ona o le fesoasoani ma le filemu tatou te manaomia e le o le ituaiga lea e “aumai e le lalolagi.”11 Leai, aua o faafitauli faigata tatou te manaomia le mea ua ta’ua e tusitusiga paia “o mana o le lagi,” ma ina ia faaaogaina nei mana e tatau ona tatou ola i mea ua ta’ua e lena lava mau o “mataupu faavae o le amiotonu.”12 O le malamalama i lena sootaga i le va o le mataupu faavae ma le mana o le lesona lea e tasi e foliga mai e le o mafai lava e le aiga o le tagata ona a’oa’oina, ua faapena lava ona fetalai mai ai le Atua o le lagi ma le lalolagi!13
Ma o a la na mataupu faavae? Ia, o loo lisi faafia mai i a tatou tusi paia, o loo a’oa’oina pea lava pea i konafesi faapenei, ma i la tatou tisipenisione, sa a’oa’o ai foi le Perofeta o Iosefa Samita e tali atu ai i lana lava lomiga o le alaga “Lo’u Atua e, lo’u Atua e, aisea ua e tuulafoai ai ia te a’u?”14 I le potu malulu ma le lē alofa o le Falepuipui o Liperate, sa a’oa’oina ai o ia e faapea o mataupu faavae o le amiotonu sa aofia ai uiga paia e pei o le onosai, loa ona tali-tiga, agamalu, ma le alofa faamaoni.15 A aveesea na mataupu faavae e mautinoa lava o le a tatou ola ma feteenaiga, finauga, ma tiga
I lena la tulaga, se’i ou talanoa atu ai ma le faamaoni e uiga i le aveesea i nisi o taimi o nei mataupu faavae o le amiotonu i o tatou taimi. I le avea ai ma se tulafono, o a’u o se tagata fiafia ma agalelei, ma e matuai tele naua mea e lelei ma matagofie i lo tatou lalolagi. E moni, ua tele naua o tatou faamanuiaga i oa faalelalolagi nai lo se isi lava tupulaga i le talafaasolopito, ae i le aganuu o le seneturi 21 i se tulaga lautele ma ua tele naua i le Ekalesia, o loo tatou vaaia ai pea olaga o loo feagai ma mafatiaga, tele na’ua uiga ua fetu’una’ia ma taunuu ai i feagaiga ua solia ma ua tele naua loto ua nutimomoia. Mafaufau i le gagana masoā ua ogatusa ma le solitulafono faalefeusuai, ua taufai aligaliga i tifaga ma televise, pe matau foi le letoe’e faalefeusuai ma isi ituaiga o faiga tufanua tatou te faitau tele ai i o tatou falefaigaluega i nei aso. I mataupu tau i le mama a’ia’i faalefeagaiga, ua tele naua ona faamamasagia mea e sa, ma ua tele naua foi ona ta’uvaleina mea e paia. I soo se tasi o loo faaosoosoina e savali pe tautala pe amio “e faapei ona avatu e le lalolagi,” pe afai o lea, aua nei faamoemoe faapea e tau au lena mea i se aafiaga toafilemu; ou te folafola atu ia te oe, i le taimi o le Alii e le tupu lena mea. “O le amioleaga e le o le fiafia lea,“16 e pei ona ta’ua e se perofeta anamua. A uma le siva, e tatau lava ona totogi le ilifagufagu, ma o le tele lava o taimi, o le totogi o loimata ma le salamo.17
Pe atonu foi ua tatou vaai i isi ituaiga o le sauaina po o faiga inosia. Ua le tatau ea ona faaluaina lo tatou faaeteete i le avea ai o ni soo o le Alii o Iesu Keriso ia aua nei o tatou afaina fua i soo sea amioga E leai ma se tulaga e tatau ai ona ta’usalaina i tatou i pule’aga amioletonu po o soo se ituaiga o sauaga po o amioga lē mamā—faaletino, faalelagona, faaleekalesia, po o soo se isi lava ituaiga. Ou te manatua lo’u gaua’i tele i le faanaunautaiga o Peresitene Gordon B. Hinckley i nai tausaga ua mavae, ina ua ia saunoa atu i alii o le Ekalesia e faatatau ia i latou na ia faaigoa o ē “pulesauā i totonu o ō latou lava aiga”:18
O se mala mata’utia ma le matuā inosia o le sauaina ma le faia faatautala o avā,” sa ia saunoa ai. “O soo se alii i le Ekalesia lenei e faasaua i lana avā, na te faalumaina o ia, na te faatiga ia te ia, e pule ma le amiolētonu ia te ia ua lē agavaa e umia le perisitua. … E lē agavaa o [ia] e umia se pepa faataga o le malumalu.”19 E tutusa lava le matuā leaga, na ia saunoa ai, ma soo se ituaiga o le sauaina o tamaiti—po o soo se isi lava ituaiga o sauaga.20
I le tele o taimi, o alii, tamaitai faamaoni, e oo lava i tamaiti e mafai ona ta’usalaina i le tautatala atu ma le agaleaga, e oo lava i upu faatauma’oi, ia i latou e tele lava o ē ua faamauina ia i latou e ala i se sauniga paia i totonu o le malumalu o le Alii. E tofu tagata uma ma se aia tatau e alofagia ai, ia lagona le toafilemu, ma maua le saogalemu i le aiga. Faamolemole, se’i o tatou taumafai ia tausisia lena siosiomaga iina. O le folafolaga o le avea ma sē e faatupuina le filemu o le a e mauaina le Agaga Paia e fai ma au soa tumau ma o le a tafe atu faamanuiaga ia te oe “e aunoa ma ni ala faamalosia” e faavavau ma faavavau lava.21 E leai se tasi e manaomia se laulaufaiva maai po o ni upu leaga e “usu le pese o le alofa togiola.”22
Se’i o’u faai’u atu i le mea na ou amata ai. O a taeao o le Eseta, o se taimi mo mataupu faavae o le amiotonu o le talalelei a Iesu Keriso ma Lana Togiola ia “pasia ai e i tatou”—pasia ai feteenaiga ma finauga, o faanoanoaga ma le lotovaivai, ma mulimuli ai le oti. O se taimi e tuuto atoa atu ai le faamaoni i le upu ma galuega i le Tamai Mamoe a le Atua, o le “na tauave o tatou tiga, ma tauave o tatou faanoanoa,”23 i Lona naunautaiga e faamaea le galuega o le faaolataga mo i tatou.
E ui i le faalataina ma tiga, e ui i le agaleagaina ma uiga pa’ā’ā, a o tauaveina agasala ua faula’i a le aiga atoa o le tagata, na silasila ifo le Alo o le Atua Soifua i lalo i le ala umi o le olaga faaletino, silasila mai ia i tatou i le faaiuga o lenei vaiaso, ma fetalai mai: “Ou te tuuina atu ia te outou le [filemu], o lo’u [filemu] ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”24 Ia outou maua se Eseta manuia, fiafia, ma filemu. O avanoa e le’i mata’ua ua mae’a ona totogiina e le Alii o le Filemu, o Lē ou te alofa i ai ma lo’u loto atoa, o Lē ona lenei Ekalesia, ma o Lē ou te molimau atu ai, le Alii o Iesu Keriso, amene.