Ou te Fia Vaai i le Malumalu
O totonu o malumalu lea e mafai ona tatou maua ai le faamautinoaga o sootaga alofa faaleaiga lea o le a faaauau pea pe a mavae le oti ma oo atu i le faavavau.
O’u uso e ma tuafafine pele, ou te faafetai i le faatasi ai ma outou i lenei sauniga muamua o le konafesi aoao. O failauga, musika, ma le tatalo ua aumaia le Agaga—faapea foi ma se lagona o le malamalama ma le faamoemoe.
O lena lagona ua toe aumaia ai i lo’u manatuaga le uluai aso sa ou savali ai i totonu o le Malumalu o Sate Leki. Sa avea a’u o se alii talavou. O o’u matua sa na o le pau ia o a’u soa i lena aso. I totonu, sa la tutu mo sina taimi ina ia faafeiloaia e se tagata faigaluega o le malumalu. Sa ou savali muamua atu i o la luma, na o a’u mo se sina minute.
Sa faafeiloai a’u e se tina tino itiiiti lauulu sinasina i se ofu paepae matagofie o le malumalu. Sa tilotilo mai o ia i luga ia te a’u ma ataata ona fai mai lemu lea, “Susu maia i le malumalu, Brother Eyring.” Sa ou manatu mo sina taimi o ia o se agelu ona sa ia iloa lo’u igoa. Ou te lei iloaina sa tuuina se kata laitiiti o i ai lo’u igoa i autafa o le taga o lo’u suti.
Sa ou laa ese mai ia te ia ma tu. Sa ou tilotilo i luga o le faalo paepae maualuga lea sa matua malamalama lava ma foliga mai na toetoe lava a matala atu i le lagi. Ma i lena lava taimi, na oo mai se manatu i lo’u mafaufau i ni upu manino nei: “Sa ou i ai muamua i lenei nofoaga malamalama.” Peitai na oo vave mai i lo’u mafaufau, e le o lo’u leo, ia upu nei: “Leai, e te lei i ai lava iinei muamua. O loo e manatuaina se taimi ae e te le’i fanau mai. Sa e i ai i se nofoaga paia e pei o lenei nofoaga.”
I fafo o a tatou malumalu, tatou te tuuina ai upu, “E Paia i le Alii.” Ou te iloa mo a’u lava ia e moni na upu. O le malumalu o se nofoaga paia lea e faigofie ona oo mai ai faaaliga ia i tatou pe a tatala atu i ai o tatou loto ma tatou agavaa i ai.
I se taimi mulimuli ane o lena aso muamua sa ou toe lagonaina lea Agaga e tasi. Na aofia i le sauniga o le malumalu ni upu lea na aumaia ai se lagona o le mu i totonu o le loto, faamaonia mai ai faapea o mea sa faaalia e moni. O le mea sa ou lagonaina na patino lava ia te a’u e faatatau i lo’u lumanai, ma na tino mai i le 40 tausaga mulimuli ane e ala i se valaauga mai le Alii e auauna atu.
Sa ou lagonaina lea lava lagona e tasi ina ua ou faaipoipo i le Malumalu i Logan Iuta. Na faataunuuina e Peresitene Spencer W. Kimball le faamauga. I ni nai upu sa ia saunoa ai, sa ia tuuina mai ai le fautuaga lenei: “Hal ma Kathy, ola ai aua pe a oo mai le valaau, e mafai ona e savali faigofie ese atu.”
A o ia fofogaina mai ni nai upu na, sa ou vaai manino lava i lo’u mafaufau, i le lanu atoa, se mauga tifato ma se auala o agai atu i le tumutumu. Sa i ai se pa paepae i le itu agavale o le auala ma sa mou ese atu i se laina o laau i le tumutumu o le mauga. Sa tau leiloa atu se fale paepae i va o laau.
E tasi le tausaga mulimuli ane, na ou iloaina ai lena mauga ao aveina e o’u tama faaletulafono le taavale i luga o lena auala. Sa ou iloa uma mea uma na ou vaaia ina ua tuuina mai e Peresitene Kimball lana fautuaga i le malumalu.
Ina ua matou taunuu i le tumutumu o le mauga, sa tu lo’u tama faaletulafono i autafa o le fale paepae. Sa ia ta’u mai ua la faatauina ma lona toalua le fanua ma e na te manao i lona afafine ma a’u e nonofo i le faletalimalo. O le a la nonofo i le fale tele, na o ni nai futu le mamao. I le aluga la o le 10 tausaga sa ma nonofo ai i lena fale faaleaiga matagofie, ma te fai atu ma lo’u toalua e toeitiiti lava o aso uma, “E tatau ona ta fiafia iinei aua e lē umi ona ta i ai iinei.”
Sa oo mai se valaau mai le komesina o aoga a le Ekalesia, o Neal A. Maxwell. O le lapataiga lea na tuuina mai e Peresitene Kimball ina ia “savali faigofie ese” ua tino mai. O se valaau e tuua se tulaga na foliga filemu patino ina ia auauna atu i se tofiga i se nofoaga ou te le iloa se mea e uiga i ai. Sa sauni lo matou aiga e tuua lena taimi ma nofoaga faamanuiaina ona o se perofeta, i totonu o se malumalu paia, o se nofoaga o faaaliga, sa vaai i se mea e tupu i le lumanai lea na matou saunia i ai.
Ou te iloa o malumalu o le Alii o ni nofoaga paia. O lo’u faamoemoega i le asō i le talanoa atu i malumalu o le faateleina lea o tou manaoga faapea ma a’u ina ia agavaa ma saunia mo le tele o avanoa mo aafiaga faalemalumalu lea o le a oo mai mo i tatou.
Mo a’u, o le musumusuga silisili ina ia agavaa mo aafiaga faalemalumalu o le mea lea na fetalai ai le Alii e uiga i Ona maota paia e faapea:
“Ma o le tulaga e oo i ai e loʼu nuu ona fausia se fale mo aʼu i le suafa o le Alii, ma latou lē tuua se mea eleelea e sau i ai i totonu, ina ia lē faaeleeleaina, o le a toʼa ai i ona luga loʼu mamalu;
“Ioe, ma o le a i ai lo’u afioaga iina, ona o le a Ou alu atu i ai i totonu, ma o i latou uma e loto mama e o mai i ai i totonu, o le a vaai i le Atua.
“Ae afai e faaeleeleaina Ou te lē alu atu i ai i totonu, ma o le a lē i ai foi loʼu mamalu iina; aua Ou te lē alu atu i totonu o ni malumalu ua lē paia.”1
Sa faamanino mai mo i tatou e Peresitene Russell M. Nelson faapea e mafai ona tatou “vaai” i le Faaola i le malumalu i se tulaga faapea e le o toe tagata ese o Ia ia i tatou. Na saunoa mai Peresitene Nelson: “Tatou te malamalama ia te Ia. Ua tatou malamalama i Lana galuega ma Lona mamalu. Ma ua amata ona tatou lagona le aafiaga le iu o Lona soifuaga lemafaatusalia.”2
Afai tatou te o i le malumalu ma le le atoatoa o le mama, o le a le mafai ona tatou vaai, e ala i le mana o le Agaga Paia, le aoaoga faaleagaga e uiga i le Faaola lea e mafai ona tatou mauaina i le malumalu.
Pe a tatou agavaa ia maua sea aoaoga, e mafai ona tupu ae e ala atu i o tatou aafiaga falemalumalu le faamoemoe, olioli, ma le manatu o le a lelei mea uma i o tatou olaga atoa. O le faamoemoe, olioli, ma le manatu o le a lelei mea uma ua na o le taliaina o sauniga e faia i malumalu paia e maua ai. O totonu o malumalu lea e mafai ona tatou maua ai le faamautinoaga o sootaga alofa faaleaiga lea o le a faaauau pea pe a mavae le oti ma oo atu ai i le faavavau.
I tausaga ua tea, ao o’u auauna atu o se epikopo, na teena e se alii talavou sa’u valaaulia ina ia agavaa e nonofo faatasi ai ma le Atua i ni aiga e faavavau. Sa ia tau mai ia te a’u e uiga i taimi lelei sa na maua ma ana uo. Sa ou tuu o ia e talanoa. Ona ia tau mai lea ia te a’u o se taimi i se tasi o ana patī, i le lotolotoi o le pisapisao, ina ua faafuasei lava ona ia iloa lona lagona o le tuuatoatasi. Sa ou fesili atu ia te ia po o le a le mea na tupu. Sa fai mai o ia sa ia manatua se taimi a o tama itiiti, o saofai i luga o vae o lona tina, ma ona lima o fusiina o ia. Mo sina taimi, sa melo tagi o ia, a o ia faamatalaina lena tala. Sa ou fai atu ia te ia le mea sa ou iloa e moni: “Pau le auala e mafai ai ona e maua le lagona o lena opo faaleaiga faavavau o le faaagavaaina lea o oe lava ma fesoasoani i isi ia maua sauniga o faamauga o le malumalu.”
Tatou te le iloa auiliiliga o sootaga faaleaiga i le lalolagi o agaga po o le a le mea o le a oo mai pe a mavae lo tatou toetutu. Peitai ua tatou iloa na oo mai le perofeta o Elia e pei ona folafola mai ina ia liliu loto o tamā i fanau ma fanau i tamā.3 Ma ua tatou iloa o lo tatou fiafia e faavavau e faamoemoe lea i lo tatou faia o le mea sili e ofo atu ai lea lava fiafia tumau e tasi i le toatele o o tatou aiga e mafai ai.
Ua ou lagona lea lava manaoga e tasi ina ia manuia i le valaauliaina o tagata o aiga o loo soifua ina ia mananao ia agavaa e maua ma faamamaluina sauniga o faamauga o le malumalu. O le vaega lena o le faapotopotoina o Isaraelu ua folafolaina i aso amulī i itu uma e lua o le veli.
O se tasi o o tatou avanoa silisili o le taimi lea o laiti ai tagata o tatou aiga. Latou te fananau mai ma le Malamalama o Keriso o se meaalofa. E mafai ai ona latou iloa le mea e lelei ma le mea leaga. Mo lena mafuaaga, e oo lava i le vaaia o se malumalu po o se ata o se malumalu e mafai ona faafailele ai i totonu o i latou se manao ina ia agavaa ma faamanuiaina i se aso e alu ai i totonu.
E mafai ona oo mai le aso pe a latou mauaina, o se talavou, se pepa faataga o le malumalu e faia ai papatisoga sui i le malumalu. I lena aafiaga, e mafai ai ona tuputupu ae o latou lagona faapea e faasino atu pea sauniga o le malumalu i le Faaola ma Lana Togiola. A o latou lagona o loo latou ofoina atu i se tagata i le lalolagi o agaga le avanoa e faamamaina ai mai agasala, o le a tupu a’e o latou lagona o le fesoasoani lea i le Faaola i Lana galuega paia o le faamanuiaina o se alo a lo tatou Tama Faalelagi.
Ua ou vaai i le malosi o lena aafiaga o suia ai le olaga o se talavou. I tausaga ua mavae sa ma o ai ma se afafine i le malumalu i le leva o le aoauli. O ia le tagata mulimuli na galue o se tagata fai ma sui i le potu papatiso. Sa talosagaina lo’u afafine pe mafai ona ia nofo umi e faamaea sauniga mo tagata uma ua uma ona saunia o latou igoa. Sa fai mai o ia ioe.
Sa ou mataituina lo’u afafine laitiiti o laa atu i totonu o le faatanoa o le vai papatiso. Na amata le papatisoga. Sa tafe mai i foliga o si o’u afafine laitiiti le vai i taimi uma lava na faaea mai ai o ia i luga o le vai. Sa toe fesiligia pea lava pea o ia, “E mafai ona e toe faia nisi?” O taimi uma lava sa ia fai atu ioe.
I le avea ai ma se tama popole, sa amata ona ou faamoemoe atonu o le a tuusaunoaina o ia mai le faia o nisi igoa. Ae ou te manatua pea lona tumau ai ina ua fesiligia o ia pe mafai ona faaauau ai pea ma sa ia fai atu i se tamai leo naunautai, “Ioe.” Sa nofo o ia seia maua e le tagata mulimuli i le lisi i lena aso faamanuiaga o le papatisoga i le suafa o Iesu Keriso.
Ina ua ma savavali ese ma ia mai le malumalu i lena po, sa ou mafaufau i le mea na ou vaai i ai. O se teineitiiti na musuia ma suia i luma o o’u mata e ala i le auauna atu i le Alii i Lona maota. Ou te manatua pea le lagonaina o le malamalama ma le filemu ao ma savavali faatasi mai le malumalu.
Ua mavae le tele o tausaga. O loo ia fai atu pea ioe i le fesili mai a le Alii pe o le a na ia faia nisi mea e tele mo Ia pe afai ua matua faigata lava. O le mea lena e mafai ona fai e le auaunaga i le malumalu e suia ma siitia ai i tatou. O le mafuaaga lena ua ou faamoemoe ai mo oe ma mo tagata uma o lou aiga pele ina ia mafai ona e tuputupu a’e i le manaoga ma le naunautaiga ia agavaa e ulu atu i le maota o le Alii i soo se taimi e faatagaina ai e ou tulaga.
Na Te fia faafeiloaia oe iina. Ou te tatalo o le a e taumafai e fausia le manao i loto o fanau a le Tama Faalelagi e o iina, lea e mafai ona latou lagona ai le latalata ia te Ia, ma o le a e valaaulia ai foi ou tuaa e agavaa e faatasi ma Ia ma oe e faavavau.
E mafai ona avea upu nei ma a tatou upu:
Ou te fia vaai i le malumalu.
Ou te ulu i ai i se aso
E lagona ai le Agaga,
Ma ou tatalo ai.
O le maota o le Atua.
E i ai o le alofa.
O le a ou saunia nei;
O lo‘u tiute lea.4
Ou te molimau faamaoni atu o i tatou o fanau a se Tama Faalelagi alofa. Na Ia filifilia Lona Alo Pele, o Iesu Keriso, e avea ma o tatou Faaola ma Togiola. Pau le auala e toe foi ai e nonofo faatasi ma i Laua ma o tatou aiga e ala lea i sauniga o le malumalu paia. Ou te molimau atu o Peresitene Russell M. Nelson o loo umia ma faagaoioia ki uma o le perisitua ua mafai ai ona maua le ola e faavavau mo fanau uma a le Atua. O lea ou te molimau atu ai i le suafa paia o Iesu Keriso, amene.